Dzɔ̌n 14
14
Yɛso lǒ dzì alendùw a vʉ̀a Tsele
1Yɛso n dzɛ̀ â tsə̀təndə̄ghā tə wə̄n to enyəa, “E kwo ko fə̂ŋ tɛʼɛ tə lô so e tsəəŋ nù, boo fùghù tsughu ko nlò â Zə̀ kò, ghɛ̀ boo fughu wo sùghò â mùghò. 2Dzughu a təndughu a lo ndə̀m am mùghùu kə bəghà, abugho à mò yo êzə̀, to Ŋ̀ ka mò dzɛ̀ â ghɛ̀ enyəa M̀ fɛ ndùuw alendùw fəghaān naŋā tsughu təluʼū â ghɛ̀. 3Abugho Ǹ ndûw fəghaān naŋā tsughu luʼū to â ghɛ̀, Ǹ lo kôom bughò èbàm M̀ bughò nî ghɛ̀ tò sɛ̀ è lo a dzə̀m, enyəa luʼu kəla Ǹ lo a te ghɛ̀, è lo sugho fughu èzə̀. 4Ghɛ̀ kwo nû luʼū kəla Ǹ nduūw a te, ghɛ̀ yia kwo sugho dzì è te.” 5Tɔ̀mâs m bvʉ̀ ndùw â Yɛso enyəa, “Mughùbè, ghàʼ kwo yo luʼū kəla ghù ndǔuw a te. Ghà laʼà sò fughu bughò mo a dzì tsəghà ghɛ̀?” 6Yɛso n dzɛ̀ ndùw â wə̄n enyəa, “Ǹ lo dzì, yìa Ǹ lô səŋò zò àsùghò mùghù zò. Ghùw yo alebùghò tɛ̂ alô Bə̀ghà mò ù kà tsə̀ghà a zəŋò mùghò. 7Abugho ghɛ̀ mô kwo mugho, to ghɛ̀ mô kwo sughò Bəghà. Êzə̄ŋ ghɛ̀ ŋ wə̄n kôʼ, ndòʼ kwò sugho wə̄n.”
8Felèp n ndzɛ̀ â wə̄n enyəa, “Mughùbè děe wò ghaʼ â Tsele wʉ̂a to fə̂ŋ taʼa tə zʉ̂ʉn tsughuu.”
9Yɛso m bɛ̀lɛ̀ ndùw wə̄n enyəa, “À fi lo enyəa, an dəghà kə kəgha kəla Ǹ lô fɛ sɛ̀ a Felèp, ghɛ̀ kaām kwo to yo mugho a Felèp? Ghùw wəla ù lo mò ù m mùghò kôʼ, ù ŋ kôʼ sùgho Bəghà. À sò lò kə kwò ghɛ̀ sô naām məghaan wə̄n a? 10Ghɛ̀ kāam boo to enyəa ghàʼ à bə̀ghà lò kəfəgha kə̀ mɔ̀ʼ à? Shwaʼ wəla Ŋ̀ kə̂aa wô â ghɛ̀, à yò dzə̂ aŋ ŋgəŋ zaŋa, à lo daʼa kə bəghà kəla kə lô a zəŋò mùghò. 11Boo tsughu nlò aŋghəa Ǹ dzɛ̂ enyəa ghàʼ à bə̀ghà lò kə fəgha kə̀ mɔ̀ʼ ŋkāa ghɛ̀ boo tsughu mugho am fwàʼ kə̀là ghɛ̀ koʼ wo M̀ fwâʼ tsughu. 12M̀ fɛ kùum dzàa wò nù â ghɛ̀, ghùw wəla ù boo fughu â mùghò, ù lo fwàʼà sùghò nǔ fwàʼ kə̀là M̀ fwaʼā ghè kò, ù bùʼù fwaʼà tsəgha sə bòʼ enyəa M̀ fɛ ndùuw â vʉ̀a bə̀ghà. 13Abugho ghɛ̀ bvʉ ko ghəa è ghɛ zo an zən zaŋā, Ǹ sô ghə̌əŋ nù, tò bəghà è lo kele ŋkɔʼso bòʼ mùghò. 14Abugho ghùw wɛʼɛ kûm bvʉ ko ghəa è ghɛ zo an zən zaŋā, Ǹ sô ghə̌əŋ nù.”
Yɛso to naŋa enyəa ghe lo tuu wò nû Zūʼ tə̀ zɔlɔ to
15Yɛso n dzɛ̀ â tsə̀təndə̄ghā tə wə̄n to enyəa, “Abugho ghɛ̀ ləghaa mugho, ghɛ̀ ki alenaaŋ lâŋ kaŋa ko. 16Ǹ lo gɔ̀ɔŋ ndùw â bə̀ghà ù lo tuū wò ghɛ̀ â ghùw wəla ù lo yôsò ghɛ, wəla ù lo doʼn təla ghɛ̀ à ghee. 17À lǒ wə̄n Zuʼ təla tə dêe fughu səŋò zò kùu ndùw Kə̀zə̀. Ghî a mbī yo dzə̂ alekpeē nî wə̄n bòʼ ghe yo alekòʼ wə̄n ŋkāa ghe kwo yo wə̄n. Yia a bughò ghɛ, ghɛ̀ kwo nû wə̄n bòʼ ù lǒ ghɛ̀ à ghee, vʉ̀a ù kè lô a zəŋò ghɛ̀.
18Ǹ yo alezə̀ghàa ghɛ̀ tò waatsʉ̄, Ǹ lo bùghò nù ebàm a vʉ̀a ghɛ̀. 19A tsûuŋ ko enyə, mbī lo kòom kòʼò yò mugho, ghɛ̀ lo e koʼō mugho. Bòʼ enyəa M̀ mugho nû, ghɛ̀ lo e mughu sugho. 20Tsuʼ u te u kê bùghòo nù, wəla ghɛ̀ ke kele tsughu enyəa ghàʼ à bə̀ghà lò kəfəgha kə mɔ̀ʼ tò aŋghəa sɛ̀ lô sugho fəgha ko kə mɔ̀.
21Ghùw wəla ù zuūw lwâŋ waŋa wo, bɔɔm bwìi ndùw a te, vʉ̀ lô ghùw vʉ̀a ù biso ləghaa mugho. Ghùw wəla ù ləghaa mugho, Bəghà lo ləghaa sùghò wə̄n, mùghò è ləghaa sugho wə̄n, dèe fùghu sùghò ghue waŋā â ghùw ù te.” 22Dzudà (wəla à kuūwn yô dzə Eskalìot) m bvʉ â Yɛso enyəa, “Mughùbè, à kǔuwn lǒ bòʼ kwò ghù lo kaā dêe ko ghue wʉ̀a wò â ghàʼ tsə̀təndə̄ghā təgha a, mo mbī kuuwn yò a te?” 23Yɛso m bɛ̀lɛ̀ ndùw wə̄n enyəa, “Abugho ghùw ləghaa mugho, ù kì alebwiī aŋghəa Ǹ ləghaa a te, bəghà lo e ləghaa sugho wə̄n, ghàʼ kê bughò mughù ghàʼ à ghee. 24Ghùw wəla ù ləghaa yô mugho yò sughò alekɔʼso mùghò. Ghəa ghəla ghɛ̀ zuūw an ndzughu zaŋā yo dzə̂ à ghaŋa gho, à lò shwaʼ u Bəghà wəla ù tum sə wô mugho.
25Mùghò n dzɛ̀ naŋa wò ghəa ghən gho â ghɛ̀, êzə̄ŋ wəla Ǹ naām lô fɛ sɛ̀. 26Ghùw wəla ù lo dêe ghɛ â dzì, wəla ù lo yôsò ghɛ tɔɔŋ Zuʼ tə̀ Zɔlɔ təla Bəghà lo tuū wo â ghɛ̀ an zən zaŋā lo zoʼn ghɛ̀ â ghəa gho a dzə̀m, zə̀əŋ wò sùghò ghɛ̀ aŋ ghəa ghən à dzə̀m mùgho mò dzɛ̂ naŋā â ghɛ̀. 27M̀ fughu ghɛ â bughun zo, bughun zaŋā zəla M̀ fughu â ghɛ̀, Ŋ̀ kâ fùghù dzə̀ to aŋghəa mbī fughuu. E kwo ko ghùw wɛʼɛ lô so e bâŋsò fə̀ŋ aŋghəa è li zo ŋkāa ù lò so e tsəŋo ghə̀a è li zo. 28Ghɛ̀ maā zuw ghəa ghə̀là mugho mô dzɛ̂ naŋā â ghɛ̀ enyəa, ‘Ghəa Ǹ zəghàan tsughu ghɛ fɛ, Ǹ lo kôom bùghò nù ebàm â ghɛ̀.’ Abugho ghɛ̀ ləghaa mugho, ghɛ̀ laam ki aleduʼnlo enyəa Ǹ ndûuw a vʉ̀a Bə̀ghà, bò Bəghà tsə̀ghàsə̀ mugho. 29M̀ fɛ dzɛ̀ zìi wò dzə̀ nù â ghɛ̀ mo e kaām sə, enyəa mo e lo kôom nì ko kə̀bəla, ghɛ̀ n lo alebōo. 30Ŋ̀ kôom ki yo ndə̀m è aghəa à kəaa gho sɛ̀, bòʼ enyəa ghùw wəla ù saʼā mbī zən bughò nù. Ù kì ki yo daʼa kə li ko a zəŋò mùghò. 31Ǹ telè fwàʼà ko an dzə̂ è Bə̀ghà, to mbī lo kele enyəa Ǹ ləghaa nù Bəghà. Nùghù kɔ nlò to sɛ̀ nughù fɛ an lùʼu kən.”
Currently Selected:
Dzɔ̌n 14: agq
Highlight
Share
Copy
Want to have your highlights saved across all your devices? Sign up or sign in
