Dzɔ̌n 6

Yɛso fùghù u fʉghazəa â kam tə aghì tò tə tɛ̀

(Mat 14:13-21; Mâk 6:30-44; Lûk 9:10-17)

1Ghəa ghən n tsə̀ghà è tsughu, Yɛso n dàŋ sə̀ kɔʼ Nyʉ̂ e Galèlîi (zəla ghe tɔɔ̄ŋ sugho enyəa à lǒ Nyʉ̂ e Tàebɛlìas), dàŋ sə̀ ndùw a ŋgùŋ è lì èzə̂. 2Nɔ̂e kə aghì kə̀ n tə̂əŋ bwìi kǎaŋ ko a bǎa wə̄n, ghe màʼà kôʼ tsughu tsə̌a təla ù fə̀ fòʼn tsughu a zəŋò ghì à dzaŋā gho, ghe n tughuu dòʼn wò. 3Yɛso ŋ kɔ̀ʼ ndùw aŋ ukwàʼ, kɔ̀ʼ dòʼò tsùghu fughu ghèe ghê tsə̀təndə̄ghā tə wə̄n to. 4À fə̀ lo mo zə kə̀ Zəŋso naaŋ kə n sū, tɔ̀ɔŋ zə kə Tə̀dzûu. 5A m bùghò ù nùghùsò kɔʼ tuw kə wə̄n ko, ù ŋ kòʼ ndùw saʼ kə aghì kə səŋō kəə̄ŋ wo a vʉ̀a wə̄n. Yɛso m bvʉ â Felèp enyəa, “A bɛ kə fɛ e zue ghɛ to ghî ghən zə à?” 6Yɛso fə̀ ghəa ghən tso kəa tsughu ko alemɔ̀ɔ kôʼ Felèp, nu ghue u wə̄n ù fə̀ kwo nû ghəa zəla ù ki aleghəŋlo.

7Felêp m bɛ̀lɛ̀ tsughu wə̄n enyəa, “Bɔ̀m n ukʉa n dɛnalì#6:7 dɛnalì e mɔ̀ʼ fə̀ lo kua wəla ghe fə̀ lo aletsə̄ ghù a te alo fətsuʼ, bɔm tə dɛnalì tə bə̀ghà tə fə̀ lò kua u fwàʼ kə təndzɔŋɔ efāa, (Mat 20:2). m bə̀ghà bùʼ yò alezue ufʉghàzəa â ghî ghən a dzəm alekele kaāŋ ndûw ko mbəs mbəs.”

8Andèle, tsə̀ndə̄ghā è Yɛso e mɔ̀ʼ, tɔɔŋ wàazə̀ Sǎemòn Pità n dzɛ̀ â Yɛso enyəa, 9“Wɛfêtùghù fə̀ li fə lo fɛ fə ki sə a ubwɛ̄ gho a tɛ̀, àsùghò tsəghaa to təbə̀ghà ko, u kâ tso bùʼ kɔ̀ʼ kpē â ndə̀m è àghì ghən.”

10Yɛso n dzɛ̀ tsùghù enyəa, “Ghəəŋ tsughu nlò ghî à tsughuu doʼò tsughu.” À n lo mo zwiī ū tso muʼn lò sugho fughu an lùʼù kə te ko; ghe fi tsughu dòʼò tsùghù nû, yînû ghə̀ n lo tǒ təkam tə tɛ̀#6:10 ghe fə̀ niī tsəgha yo yîzən gho an tāŋ — ghe fə̀ taŋa tsəgha yo yîzən gho am bùghoo kə Tə̀dzûu.: 11Yɛso n daŋso nì kɔ̀ʼ sə a ugbɛ yì, a m bughò ù fughu tsughu zɔ̀ɔŋ kò â Zə̀ kò, ù n dzùghùu fughu tsughu â ghì yia ghe mò doʼ, ù nì kɔ̀ʼ sùghò tsəgha tə te to dzùghù fùghù ndùw sùghò â ghee, ghe mô è zə, zə̀ è kuw. 12A m bùghò ghe zə kūw tsughu, ù n dzɛ̀ â tsə̀təndə̄ghā tə wə̄n to enyəa, “Kuum kaaŋ wò nlò sugho təla tə səā tsughu, a ka fəgha kə̀ li kə nyâ màʼà.” 13Ghe ŋ kuum kaaŋ wò èsugho, shwaʼn wə n lue kɔʼ eghəm à ghè wò u bʉ̀ghà an sugho tə ugbɛ təla ghî yi zə naŋā sə tsughu.

14A m bùghò ghî a te a kôʼ sʉghà vʉ̀a Yɛso dè tsughu, ghe ŋ kâʼ ndùw alekə̀a enyəa, “Kùmkùm, wən lǒ ghùwshʉ̀ghà ù Kə̀zə̀ wəla ù mò ki alebùghò fɛ mbī.”

15Yɛso ŋ kòʼ tɔ kɔʼ enyəa ghe ləghaa aleŋgaām kwuū tsuʼ wə̄n alo kədə̀ŋ, ù ŋ wèlè nùghù è tsùghù, kɔ̀ʼ dòʼò ndùw aŋ ukwàʼ wə̄n â nəŋ ko.

Yɛso bwìi wò an tuw kə mmùghu

16A m bùghò an nə̀gha è guŋsō zo, tsə̀təndə̄ghā tə wə̄n tə n nughù tsùghù ndùw alo enyʉ̀, 17tsughu nyə kɔʼ alo kəkwə̀n, kàʼ ndùw aledàŋ dzùghù zə̀, ghe nduūw aŋ Kàpɛnùm. À n lo mò tsuʼ wə n dzə̄, Yɛso n naam lǒ mò ù kaam bughò. 18Dzùghù e te ŋ kaʼ tsughu aletùuŋ kaŋlo, kʉɛ̌ɛ kə̀ biigh kə̀ li kə màʼa fə̀ tsəghāa. 19A m bùghò ghe bâŋ nyə kəŋo ndûw to kwə̀n kò an tsə̀tèʼè fə dzughù alekəŋo sə tǒ tə̀mâe tə təgha ŋ kāa tə chìa kò#6:19 Tò tə tàm fəbɔm à ghè to ŋghəm èfāa à ghè tò tə tɛ̀., ghe ŋ kòʼ wò Yɛso mò ù bwìi wò an tuw kə mmùghu, fə̂ŋ tə̀ n sə ghee. 20Ù ŋ kuuwn dzɛ̀ wò â ghee enyəa, “À lò mugho; kà nlò tsəŋ.” 21Ghe ləghaa alebòʼò alo kəkwə̀n, ghe n tsò kòʼ ko mò kwə̀n kə ŋ ghaan dàŋ sə̀ ndùw aŋ ŋgùŋ è dzùghù è lì èzə̂ an naʼ zəla ghe mô nduūw fughu.

Ghî à dzə̂ən Yɛso

22Tsuʼ ù li vʉ̀, saʼ kə aghì kəla kə mô doʼòdoʼò nduw a ŋgùŋ ŋ è lì ezə̂ kòʼ tsùghù enyəa à mò fughu lo ko kəkwə̀n kə mɔ̀ʼ, àsùghò enyəa Yɛso ka mo nughù ghèe ghee tsə̀təndə̄ghā tə wə̄n to aŋ kwə̀n kə te ko, enyəa tsə̀təndə̄ghā tə wə̄n tə mô nùghù ko ghee à nəŋ ko. 23À n lo êzə̀ mò kwə̀n ù li u mâa bùghò kùʼù těe dòʼò tsughu fughu an lùʼù kəla ghe mò zə bɛ ko a te aŋghəa Mughu ù te mò fughu tsughu zɔ̀ɔŋ kò â Zə̀ kò, mo kwə̀n u te u nughù wǒ an Tàebɛlìas. 24Ghəa saʼ kə aghì chi kôʼ tsughu enyəa Yɛso yò sughò, ghe m bɔ̀ŋ nyə̀ kɔ̀ʼ sùghò aŋ kwə̀n u te wo, nùghù ndùw aŋ Kàpɛnùm, ghe kəŋo ndûw Yɛso.

Yɛso lò bɛ kəla kə fughuu mughù zò

25A m bùghò ghe dâŋ sə ndûw kôʼ ndûw Yɛso aŋ ŋgùŋ è lò è zə̂, ghe m bvʉ â wə̄n enyəa, “Labì, ghù fɛ bughò zə̀n?”

26Yɛso m bɛ̀lɛ̀ tsùghu ghee enyəa, “Kùmkùm, aŋghəa Ǹ dzâa səā wo â ghɛ̀, ghɛ̀ mugho kəŋo kaaŋ dzə̀ yò bòʼ sə̀ghàa mə̀là ghɛ̀ mò koʼ, à lǒ bòʼ gbɛ wəla ghɛ̀ mò zə kūw tsughu. 27Kà nlò e kəŋo fʉghàzəa wəla u lo alebō, e laam kəŋo nlò fʉghàzəa ù doʼn təla wəla Wɛ ù Ghùw ki alefughu â ghɛ̀. Tɔŋlo enyəa à lò â Wə̄n Tsele ù te, tɔɔŋ Kə̀zə̀ fə̀ fughu naŋā daʼa kə te ko.”

28Ghe n daŋso bvʉ â wə̄n enyəa, “Ghàʼ lo aleghəŋlo ênzə̂n alefwaʼā fwàʼ kə Kəzə̀ kǒ a?”

29Yɛso m bɛ̀lɛ̀ tsùghu ghee enyəa, “Ghəa zəla Zə̀ kə̀ ləghaa enyəa ghɛ̀ ghəŋlo lo enyəa, ghɛ̀ boo fughu nduw â ghùw wəla Ù tum wo.”

30Ghe fi dzɛ̂ nù â wə̄n enyəa, “À lò shʉ̀ghà ù ghɛ wo ghù lò aledèe tsughu, tò ghàʼ kôʼ a, ghàʼ boō fughu wô â ghǔ a? Ghù fwàʼà tsùghû fwàʼ kə ghɛ ko? 31#Ksm 16:4, 15; Sms 78:24 Ghê bəghàbəgha fə̀ zəa tsəgha fʉghàzəa wəla ghè fə̀ tɔŋlo enyəa à lò manà#6:31 manà fə̀ lo fʉghàzəa wəla Zə kə fə̀ fughu tsughu wo â ghì a wə̄n à wi gho enyəa ghe zə. am bə̄ghā e kəshīashīa, aŋghəa ghe tɔm naŋā enyəa, ‘Ù m fùghù tsùghù wò ghee â fʉ̀ghazəa wo alo kəwālā enyəa ghe zə.’ ”

32Yɛso n daŋso dzɛ̀ â ghee enyəa, “Kùmkùm, Ǹ so n dzâa wô â ghɛ̀ enyəa, a ka fə fughu dzə̀ Musî ghee â bɛ kəla kə sə tsughuu wô alo kəwālā, à lǎam lò Bəghà ù fughuu ghee â bɛ kəla kə kûum tsughu wô alo kəwālā. 33Tɔŋlo enyəa bɛ kə Kəzə̀ kə̀ lo kəla kə tsughuu wô alo kəwalā, chia kə fughu mughù zò â ghì a mbī gho.”

34Ghe n dzɛ̀ â wə̄n enyəa, “Mùghùbè, e fughuu zee ghaʼ a bɛ kən ko.”

35Yɛso n dzɛ̀ â ghee enyəa, “Ǹ lo bɛ kəla kə fughu mughùu zò â ghì ghò. Ghùw wəla ù dòʼòdoʼò wo ghàʼ à wə̄n kê dì yǒ dzə̀ŋ, wəla ù boo fughu tsughu â mùghò, fə̀ŋ è mmùghu lô wə̄n zuʼso kòʼ yò. 36M̀ mafə̄ â ghɛ̀ dzɛ̀ enyəa ghɛ̀ m mùghò kôʼ, ghɛ̀ yia taʼkè kuūwn naām boo. 37Ghî ghə̀n a dzə̀m Tsele ù te fughu â mùghò, lo bùghòo a vʉ̀a mùghò, ghùw wəla ù tso məghàa doʼò wô dzə ghàʼ à wə̄n, Ŋ̀ kê wə̄n dzûm nùghù yò; 38Nu Ŋ̀ kâ nùghù tsùghù wò dzə̀ alo kəwālā alebùghò fwâʼ ghəa a nʉ̀ghà ghaŋa, M̀ bughò alebùghò fwâʼ fwaʼ kə ghùw wəla ù tum wô mugho. 39À lǒ to kə ghùw wəla ù tum wô mugho, enyəa e kwo ko ghùw u mɔ̀ʼ lò mîaan səā aŋ ghì ghə̀là ù lo mò Ù m fughu â mùghò, Ŋ̀ lo kôom zôo nughù wô ghee ebàm an tsuʼ fəla fə doʼò gûŋsò tsughu#6:39 Tsuʼ fəla fə doʼò gûŋsò tsughu:Tsuʼ fəla Zə̀ kə̀ kê saʼā ghî ghò a te.: 40Tɔŋlo enyəa, kən lǒ to kə Bəghà, enyəa, ghùw wəla ù kôʼ tsughu Wɛ ù wə̄n ù nùu, vʉ̀a ù boō fughu nduw â wə̄n lo kele mùghù è doʼn təla zo, Ŋ̀ kê nîi nùghùsò kɔ̀ʼ wə̄n an tsuʼ fəla fə doʼò gûŋsò tsughu.”

41Dzûu tə̌ fi kaʼ tsughu nu alenyuūŋ sāʼ wə̄n, bòʼ ù fə̀ dzɛ tsughu enyəa, “Ǹ lo bɛ kəla kə sə tsughu wô alo kəwālā.” 42Ghe ŋ kə̂aa enyəa, “Wən mgbàŋ yǒ Yɛso à, wɛ̀ ù Dzùghùsî wə̀n à, wəla a mgbaŋ kwo tsele ghèe zə̀ à? Ù lò ênzə̂n aledzaā wo êzəŋ enyəa ‘Ǹ sə tsùghù wò alo kəwālā a?’ ”

43Yɛso m bɛ̀lɛ̀ tsùghù ghee enyəa, “Kà nlò nyuuŋ kə̀a kaaŋ ghəa gho aŋ ghùe zɛʼɛ̄. 44Ghùw yò alebùghò a vʉ̀a mùghò à gɔ̀ʼɔ̀ ko mo a dzɛ̀ Tsele ù te wəla ù tum wô mugho. Ŋ̀ kê daŋso nîi nughùso kɔʼ wə̄n an tsuʼ wəla u doʼò gûŋsò tsughu. 45#Èzy 54:13 Ghe tɔm naŋa am Mwàʼsò u ghǐisʉghà a Kəzə̀ enyəa, ‘À lô ghee zoʼn Kə̀zə̀ alo aghəa.’ Ghùw wəla ù zuw shwaʼ u Tsele ù te wo, vʉ̀a zoʼ kele sughò ghəa gho aŋ ghùu Tsele ù te bughòo a vʉ̀a mùghò. 46Ghùw ù lì kaām Tsele ù te kôʼ kòʼ tsə̀ghà dzə̀, à gɔ̀ʼɔ̀ ko ghùw wəla ù nùghù wo a vʉ̀a Zə̀ kò, ù lo mò ù ŋ kǒʼ Tsele ù te. 47Kùmkùm, Ǹ dzâa wò â ghɛ̀ enyəa, ghùw wəla ù boō tsughu dzə̄, ù kì mughù è doʼn təla zo. 48Ǹ lo bɛ kəla kə fughu mughùu zo. 49Ghê tsùghò fə̀ zə fʉ̀ghàzəa wəla ghe tɔŋlo enyəa à lǒ Manà alo ebə̄ghā, ghe n naam bùghò kpǔuw ko nù. 50Kən lò bɛ kəla kə sə tsughu wô alo kəwālā enyəa abugho ghùw zə kɔʼ, ù ŋ kè kpuw. 51Ǹ lo bɛ kəla kə fughuu mughù zò kəla kə mò sə tsughu wô alo kəwālā. Ghùw wəla ù zə bɛ kən ko lo mùghùun tə̀la nù; bɛ kə te kəla Ŋ̀ lo fughuu alenaŋâ mùghùu e mbī lò ghue waŋā.”

52Dzûu tə̀ n daŋso kàʼ ndùw alendzùghùun kə̂aa kaŋlo àghəa an nə̀ghà m pfʉa mò enyəa, “Ghùw wə̄n lo ênzə̂n alefughūu ghue u wə̄n enyəa a pfʉ à?”

53Yɛso fi dzɛ̂ nù â ghee enyəa, “Zə e lo ko aŋghəa Ŋ̀ kûum dzàa wô â ghɛ̀ enyəa, à gɔ̀ʼɔ̀ ko mò ghɛ̀ pfʉ nyòm è ùghùe è Wɛ̀ ù Ghùw, mʉ̀ sùghò kàŋ tə wə̄n, ghɛ̀ kì yo mughù è doʼn təla zo a zəŋò ghɛ̀. 54Ghùw wəla ù pfʉ nyòm è ùghùe zaŋā, mʉ̀ sùghò kàŋ taŋa ki mughùu zəla e doʼò tən, Ǹ lo ghəŋlo ù kpuūw kɔʼɔ̄sə̄ alo evʉ̄ an tsuʼ fəla fə doʼò gûŋsò tsughu; 55tɔŋlo enyəa nyòm è ghùe zaŋa lo ndzə̀əm kə ufʉ̀ghàzəa, kâŋ taŋa tia tə ndzə̂əm lô fəgha kə̀ mʉa ko. 56Ghùw wəla ù pfʉ nyòm è ùghùe zaŋā, vʉ̀a ù mʉ sughô kâŋ taŋa to lo ghàʼ à wə̄n, yìa Ǹ lo a zəŋò wə̄n. 57Aŋghəa Tsele ù te wəla ù lò â tuw ko mò tum wô mugho, yìa M̀ mughu mò à lǒ Tsele ù te, à kè lo sugho enyəa, ghùw wəla ù pfʉ nyòm è ùghùe zaŋā lo mughùun sughò mò à lò mugho. 58Kən lò bɛ kəla kə mò sə tsughu wô alo kəwālā, à yò dzə̂ tò kəla ghê tsùghò fə̀ zə ghè kò, ghe mo è kpuwnlo. Ghùw wəla ù kuuwn zə bɛ kən ko, lo mùghùun tə̀la nù.”

59Ù fə̀ ghəa ghən kəā mò ù tsʉ̀a àghì an Ndùgènē è Tə̀dzûu aŋ Kàpɛnùm.

Ndə̀m è tsə̀təndə̄ghā tə Yɛso tə̀ ti zə̀ghàa Yɛso

60A m bùghò tsə̀təndə̄ghā tə wə̄n tə zuw ghəa yì, ndə̀m è ghee n dzɛ̀ enyəa, “Tsʉ̂ zən tughuu nù; à lò ndugho aleboo alefwàʼ ghəa a te gho à?”

61Yɛso ŋ kòʼ tɔ tsùghu enyəa tsə̀təndə̄ghā tə wə̄n tə shwəən kaŋlo aŋ ghəa ghən, ù m bvʉ â ghee enyəa, “Shwaʼ wən u fəmso nù ghɛ a? 62To e mô sô yia kuuwn lò ênzə̂n â ghɛ̀ a, abugho ghɛ̀ mô koʼò wô Wɛ̀ ù Ghùw ù nùghùun kɔʼɔ̄ ndûw fia ù mò bûʼ lo sʉèsʉ a? 63À lò Zuʼ tə Kəzə̀ tə fughuu ghùw â mùghù zò, gwən e ughùe ki yo ghəa è li zo aleghəŋlo. Shwaʼ wəla Ǹ tsɔ̂ɔn tsughu fɛ â ghɛ̀ lò Zuʼ tə Kəzə̀ təla tə fughuu ghɛ â mùghù zò. 64Ghî à li a ŋgəəŋ lò nû am bvʉa zɛʼɛ̄ mo ghe kaām boom yo shwaʼ waŋa wo.” (Yɛso fə̀ kwo ziī nû ghî ghəla ghe lo mo ghe boom yo shwaʼ u wə̄n wo, àsùghò ghùw wəla ù lo fêen fughuu wə̄n.) 65Ù n daŋso dzɛ̀ tsùghù enyəa, “Zən lò e ghee M̀ mô dzɛ̂ wô â ghɛ̀ enyəa, ghùw yò alebùghò doʼò ghàʼ à wə̄n à gɔ̀ʼɔ̀ ko mò à wə̄n nî tum wò Tsele ù te a vʉ̀a mùghò.”

66A m bùgho ù kə̀a tsughu ghəa ghən gho, ndə̀m è tsə̀təndə̄ghā tə wə̄n tə̀ li tə n nùghùu kòom wò ebàm, kòom ŋgə̌aa kaaŋ yo ghèe ghee. 67Yɛso fi bvʉ nû â tum tən èghəm à ghè tò tə bə̀ghà enyəa, “Ghɛ̌ sô yia ləghaa sùghò nù alekòmlò ebàm à?”

68 # Mat 16:16; Mâk 8:29; Lûk 9:20 Sàemòn, tɔɔŋ Pità m bɛ̀lɛ̀ tsùghu wə̄n enyəa, “Mughubè, ghàʼ lo alekòom ndûw a vʉ̀a ndùghò à? Shwaʼ wʉ̀a ù ki mughù zəla e doʼò tən. 69Ghǎʼ yia lo mò ghàʼ m boo fughu â ghù, kwo sugho enyəa ghù lǒ ù Wɛ ù Kə̀zə̀ ù tsùʼu.”

70Yɛso m bɛ̀lɛ̀ tsùghu ghee enyəa, “Ŋ̀ ka mo ghɛ mgbaŋ tsɔʼ kɔʼ eghə̄m à ghè ghò a bə̀ghà à, yìa à sò kuūwn lǒ ko enyəa ghùw wɛʼɛ u mɔ̀ʼ nǎam ŋgəəŋ ki ko zə̀a fə̀ biigh fo.” 71Ù mò fɛ kəa ghəa a Dzudàs, wɛ̀ Sàemòn Eskàlìot, tɔŋlo enyəa, ghəa Dzudàs mo lô ko tsə̀ndə̄ghā an tsə̀təndə̄ghā tən èghəm à ghè tò tə bə̀ghà, ù mò ki alefèe fughu Yɛso.

Currently Selected:

Dzɔ̌n 6: agq

Highlight

Copy