Matìo 16
16
Ghî à ləghaa alekòʼ tsə̌a
(Mâk 8:11-13; Lûk 12:54-56)
1 #
Mat 12:38; Lûk 11:16 Ghî a Falàsîi à li gho ghèe ghê Sadùwsîi tə̀ n nduw bùghò alebùghò baʼn kwu Yɛso, ghe m bvʉ â wə̄n enyəa, “Děe wò ghaʼ â tsə̌a enyəa à fùghù Kəzə̀ ghû â daʼa ko aleghəəŋ ghəa ghəla ghù ghəəŋ fɛ.” 2Yɛso n so bɛlɛ̀ ghee, dzɛ̀ â ghee enyəa, “Abugho tsuʼ u zɔlɔ an nə̀gha è guŋsò zò, ghɛ̀ mo enyəa, ‘Tsʉ̂ u lo zee nù tsʉtsʉ.’ 3À m bùghò à lǒ â gbə̀làgbə̀là tò, ghɛ̀ mo enyəa, ‘Fɛ̀ɛn kə eghuuw kə sô tsùghuu nù nɛ, aŋghəa wala kə sô baŋa ləŋo ndûw nû.’ Ghɛ̀ kwo nû aletɔɔŋ kelê fəgha kəla tsə̌a tə kəwala tə deē, kuuwn yò aleteso dzɛ̂ ghəa ghəla a səa an tì kən. 4#Mat 12:39; Lûk 11:29 Bòobò tə ghì tə nɛ tən tò ghɛ, ghe tsəŋō yo Zə̀ kò; mmɛ̀ mbɔŋɔ bvʉa wò mùghò â tsə̌a. Ghɛ̀ lo tsoo kòʼò yò tsə̌a è lì, tsə̀ghàasə̌a ko yo tsə̌a è ghùwshʉ̀ghà Dzonàh zən.”
Aŋghəa ù kə̀a tsughu êzə̀, ù n zə̀ghàa tàʼà tsughu ghee fughu, nùghù e wən zo.
Mbvùŋ è tə̀ ghî a Falàsîi
(Mâk 8:14-21)
5Ghəa tsə̀təndə̄ghā tə̀ dâŋ sə nduw aŋ ŋgùŋ zə ènyʉ̀ è li ezə̂, à n lo mò ghe mâa nì zə̀ alenì kə̀bɛ. 6#Lûk 12:1 Yɛso n dzɛ̀ â ghee enyəa, “Ni nlò ghôom zò am mbvùŋ è ghì Falàsîi ghèe ghê ghî Sadùwsîi ghò.”
7Ghe ŋ kaʼ tsughu alekə̀a aŋ ghùe e ghee enyəa, “Ù ghəa ghən fɛ kə̀a nu ù a kâ bùghò â bɛ ko.”
8Yɛso ŋ kele tsughu fəgha kəla ghe mô kəā, ù m bvʉ â ghee enyəa, “À lò kə kwò ghɛ̀ pfʉa dzughu gho aŋ ghùe zɛʼɛ enyəa ghɛ̀ ki yo bɛ ko a? Ghɛ̀ kâ tɔ̀ʼ bǒo fughu â mùghò a! 9#Mat 14:17-21 Ghɛ̀ kaām zuwkɛlɛ to ghəa gho a? Ghɛ̀ ghaam nìzə̀ dzə̀ nù aŋghəa mùgho mò nî kɔʼ sə a ugbɛ gho a tɛ̀ a, mùghò m boʼn dzùghùu fughu tsughu â kam tə aghì tò tə tɛ̀ a? Ghɛ̀ mò kuum lueso kɔʼ ushwàʼnlo u shò ghe mo zə naŋā sə tsughu a? 10#Mat 15:34-38 Ŋkāa ghɛ̀ nîzə̀ sùghò nù ghoo tə gbɛ tən sə̀ghàmbəgha mùghò mò fughu â kam tə aghì tən tə chìakò, àsùghò ndə̀m è u shwàʼnlo u kəbɛ wəla u mò səā tsughuu a? 11À sə̀ lǒ kwò ghɛ̀ maʼà tâʼkè zuwkɛ̀lɛ̄ enyəa M̀ mô fɛ kə̂a yò ghəa e kəbɛ zo a ghɛ̀ a? Nǐ nlò ghôom zò am mbvùŋ è ghì a Falàsîi, àsùghò è ghì a Sadùwsîi.”
12Ghe fi daŋso zuwkɛlɛ nù enyəa ù mò fɛ kə̂a yò enyəa ghe nîi kɔʼ eghômlò am mbvùŋ è kə̀bɛ, enyəa à mò kǔuwn lò enyəa ghe ghomlò an tsʉ̀ e ghì a Falàsîi ghèe ghê ghì a Sadùwsîi ghò.
Pità dzɛ̀ ghùw wəla Yɛso lǒ ghè wò
(Mâk 8:27-30; Lûk 9:18-21)
13A m bùghò Yɛso bùghò am mbùʼ à Sìsalìa Felèpîi, ù m bvʉ â tsə̀təndə̄ghā tə wə̄n to enyəa, “Ghî à dzɛ̂ enyəa Wɛ̀ ù Ghùw lò ndugho a?”
14 #
Mat 14:1, 2; Mâk 6:14, 15; Lûk 9:7, 8 Ghe mo enyəa, “Ghî à li a dzɛ̂ enyəa à lǒ Dzɔn Fùghùu mùghù ŋ Kə̀zə̀, à li yia so enyəa à lǒ Elaedzà, à li yia a dzɛ̂ enyəa à lǒ Dzɛ̀lɛ̀mîa ŋkāa ghùwshʉ̀ghà ù lì.”
15Ù m bvʉ â ghee enyəa, “Ghɛ̀ yia sô kuuwn dzɛ̀ enyəa Ǹ lo ndughoo a?”
16 #
Dzn 6:68, 69 Sǎemòn, tɔɔŋ Pità m bɛ̀lɛ̀ tsùghù enyəa, “Ghù lǒ Kə̀lestò, wɛ ù Zə̀ kəla kə mughù tən.”
17Yɛso n daŋso bɛ̀lɛ̀ tsùghu wə̄n enyəa, “Dzɔ̀ lǒ â ghù a Sǎemòn wɛ ù Dzɔ̌n, nu à kà sə̀ŋò zən dê dzə̂ ghùw ù lì â ghù, à sə̀ŋò e te e dê Tsele waŋā wəla ù lò alo kəwālā. 18Ǹ so Ǹ dzâa wô â ghù enyəa ghù lò Pità, mo e moʼnlò enyəa, à lò kənɛ, kəla Ǹ lo bəghaa tiso kɔʼɔ dzeŋe kə ghì a Kəzə̀ kaŋa ko a te, mo vʉ e kê bùʼ tsò yò aletughu tsəghà dzeŋe kə te ko. 19#Mat 18:18; Dzn 20:23 Ǹ lo fughuu ghù â tsʉ kə̀ fɔ̀e u kəwālā ko. Ghəa zəla ghù tsughu boo tsughu fɛ am mbī, ghe lo bɔɔm boom sùghò èzə̀ alo kəwālā, zəla ghù tue maʼà tsughu fɛ am mbī, ghe lo tuu màʼn sùghò êzə̀ alo kəwālā.”
20Ù n daŋso tɔ̀ʼ kuɛ̀ɛn tsùghu Tsə̀təndə̄ghā tə wə̄n enyəa e kwo ko ghe lô dzâa â ghùw enyəa e lo Kə̀lestò.
Yɛso kə̀a ghəa a fala e wə̄n à vʉ e wə̄n zo
(Mâk 8:31—9:1; Lûk 9:22-27)
21Alezìi tsughu an nəgha e te zo, Yɛso ŋ kaʼ tsughu aledè â tsə̀təndə̄ghā tə wə̄n to enyəa, “Ŋ̀ ki alendùw an Yɛ̀lusalɛ̀m, Ǹ ndùw ŋgeē fala aŋ ghùu tsoʼ tə enaʼ to, fɔ̀e tə̀ tughu to, àsùghò ghê dèekə̀làŋ, ghe lo wiī sughò mùghò, Zə̀ kə̀ lo zôo nughù kɔʼ mugho abugho tsuʼ ŋ kpe tsughu n təgha.”
22Pità n nyɛʼɛ nùghù bə̀ŋso tee tsughu ghèe wə̄n, kàʼ ndùw wə̄n alezùghù enyəa, “Zə̀ kə̀ yo aleboo a Mughùbè! Ghəa zən yo aletsoō sə a zəŋò ghù.”
23Ù ŋ kuuwn fə̀n tsughu ughue, dzɛ̀ â Pità enyəa, “Nùghu a bàâ mùghò a Satàn! Ghu tə̀ghàsò mùghò; nu zə yo dzə̂ moʼnlò e Kəzə̀ ghù ki, zə lo moʼnlò aghì.”
24 #
Mat 10:38; Lûk 14:27 Yɛso n daŋso dzɛ̀ â Tsə̀təndə̄ghā tə wə̄n to enyəa, “Abugho ghùw so e bwîi â bàâ mùghò, ù n ni tsùghù enyəa e yo dzə̂ fəgha kə̀ li ko, ù m boo tsughu evʉ, ù n nùghù wô a bàâ mùghò. 25#Mat 10:39; Lûk 17:33; Dzn 12:25Nu ghùw wəla ù ləghaa alebəgha sə ghue u wə̄n, ù lo guŋù tuw kə wə̄n, wəla ù lo alegùŋù tuw kə wən ko aŋghəa zaŋā, ù lo zəa nù tuw ko. 26Nu ghùw lo alezəā kɔʼ kə kwò abugho ù kele mɛʼɛ̀ fʉgha wo u dzə̀m am mbī a, ù ŋ kuuwn gùŋù tuw kə wə̄n à? Ŋkāa ghùw lò alekuūwn fughu tsəghà ndûw kə̀ kwò alezuū sə tuw kə wə̄n a te à? 27#Mat 25:31; Sms 62:12; Lum 2:6 Wɛ ù Ghùw ki alebùghò ghèe ghê tsə̀təndə̄ghā tə Kəzə̀ tò təla tə lô tə wə̄n to an səghanyəgha n Tsele, ù è ke tsəa ko ghùw am fəgha kəla kə kpe am fwàʼ kə wə̄n. 28Kùmkùm, M̀ fɛ dzàa wò nù â ghɛ̀, ghî à lo nû fɛ mo vʉ e lô ghee â mbàŋ sɔ̂ŋ fùghù yo mo ghe kâ Wɛ ù Ghùw kôʼ ù bùghòo fɛ am mbī tò Kədə̀ŋ.”
Currently Selected:
Matìo 16: agq
Highlight
Share
Copy
Want to have your highlights saved across all your devices? Sign up or sign in
