Matìo 18
18
À ghàʼ tsəgha ndughoo am Fɔ̀e u kəwālā à?
(Mâk 9:33-37; Lûk 9:46-48)
1 #
Lûk 22:24
An nə̀gha e te zo, tsə̀təndə̄ghā tə̀ m bùghò bvʉ̀ â Yɛso enyəa, “A ghàʼ tsəgha ndugho alo kəwālā à?”
2Ù n daŋso tɔŋɔ tsughu wɛfêtùghu fə̀ li fo, naŋa nyə tsughu am bvʉa e ghee, 3#Mâk 10:15; Lûk 18:17 dzɛ̀ tsughu enyəa, “Kùmkùm, ghəa Ǹ dzâa wô fɛ â ghɛ̀, à buw mò ghɛ̀ kuuwn kɔʼ nû, ghɛ̀ doʼo tsughu tò wɛghêtùghu ghən, ghɛ̀ kê nyə yo am fɔ̀e u kəwālā. 4Ghùw wəla ù ghaʼ tsəgha waazə̂ ghò am fɔ̀e u kəwālā lo ghùw wəla ù zuumsō tsughu ghue u wə̄n wo tò wɛfêtùghu fən. 5Ghùw wəla ù nì naŋā sugho ŋgòʼò wɛfêtùghu fə te fo, ù fi nî nàŋa mùghò.”
Ghəa ghəla a tsoōm kɔʼɔ̄ ghùw enyəa ù ghəŋlo èbo
(Mâk 9:42-48; Lûk 17:12)
6Yɛso n dzɛ̀ tsùghù sùghò enyəa, “Abugho ghùw ghəə̄ŋ tsughu wɛ̂ɛtùghu u mɔ̀ʼ aŋ wɛghêtùghu ghəla ghe boō fughu â mùghò enyəa ù ghəŋlo èbo, ghùw ù te fi kpe to a nî kɔʼ ŋgɔ̀ʼɔ̀ kə etia kə̀ gwuūŋ ko, a kɔlɔ̀ tsughu am mwè u wə̄n, a ndûw maʼà nyəa tsughu wə̄n alo kətsə̀m.
7Ŋgoʼ fɛ am mbī bòʼ ghəa ghəla a ghəŋlo enyəa ghî ghə̀ è ghəəŋ bo zo! Nu ghəa a te a ki nû alesəa, zəa e kuūwn lô enyəa ŋgoʼ â ghùw wəla ù ghəŋlo enyəa ghùw ghəŋlo èbo! 8#Mat 5:30 Abugho ghu kə̀a ŋkāa kəghuw kə̀a kə̀ tsoōm ghû enyəa ghù è ghəəŋ ghəa à biigh gho, ghù ŋ kə̀a è maʼa. Nu â ghù aleki ghu ko ŋkāa kəghuw ghù kuuwn nduw pfʉa aŋ wə̀n ù doʼn təla wo, dzɔ̀ lò enyəa ghù kele mughù è doʼn təla u zò mò ghù lǒ kə̀màkə̀kwe ŋkāa kə̀màkə̀fwee. 9#Mat 5:29Abugho sə zə̀ghà è ghəə̄ŋ sughò enyəa ghù è ghəəŋ ghəa à biigh gho, ghù m bɛso bɛ̀ʼɛ̀ màʼà sə wò sə e te zo; nu â ghù aleki sə gho a dzə̀m ghù kuuwn nduw pfʉ aŋ wə̀n wəla u doʼò tən, dzɔ̀ lò enyəa ghù kele mughù zəla e doʼò tən à sə zo e mɔ̀ʼ.”
Kwə̀ən kə ushwāʼ an ndzì zəla e fə̀ lâʼ miāa
(Lûk 15:3-7)
10 #
Lûk 19:10
“Ghəəŋ tsughu enyəa ghɛ̀ ka e koʼō keē nyàaŋ mə̄n; nu ghəa Ǹ dzâa wô fɛ â ghɛ̀, tsə̀təndə̄ghā tə Kəzə̀ tə ghee tə lo tsəgha ko ghèe ghê Bə̀ghà alo kəwālā. 11[Tɔŋlo enyəa Wɛ̀ ù Ghùw mò fɛ bùghò alebəghaasə ghî ghəla ghe lâʼ lo.]#18:11 Mwàʼsò ù wii ù lì u ki yo ghəla zən zo.
12Ghɛ̀ moʼò èndùghò à? Abugho ghùw ki bɔm fə təndzì fò, e mɔ̀ʼ zə̀ è làʼ mîaa tsughu a te, ù ŋ kè naŋā taʼà tsughu ghə̀m n tə̀ndzì mən tɛ̀ndzūghū à ghè tǒ tɛ̀ndzūghū aŋ ŋgaŋlò e ukwàʼ à enyəa e ndûw kəŋo wô dzə̂ zəla è làʼ miaa a? 13Mò ù kəŋ kòʼ tsùghù nû, ù n lɔʼso duʼn mìasò ndùw enyə a te tsə̀ghàtàʼàsè aŋghəa ù duʼnlo aŋ ghə̀m mə̀n tɛ̀ndzūghū à ghè tò tɛ̀ndzughu tə dòʼŋkè mîaa. 14À lò sugho eghəla, Bəghà alo kəwālā kâ lə̀ghà dzə̀ enyəa wɛ u mɔ̀ʼ mìaa səa wô aŋ wɛmètùghu mən.”
Aleyòsò wàazùghù wəla ù ghəə̄ŋ ghəa à biigh gho
15 #
Lûk 17:3
“Abugho wàazùghù ghəə̄ŋ tughu ghû â bo zo, dòʼò tsughu ghɛ̀ à wə̄n a bə̀ghà, ghù dzɛ̀ nduw â wə̄n. Mò ù ŋ ghù zuw, ghù fi kôom kèle kɔʼ nu wàazə̀. 16#Lwa 19:15Abugho ù dòʼŋkè kuūwn zuw ghû, ghù n ndùw kə̀ŋ wo ghùw u mɔ̀ʼ ŋkāa a bə̀ghà enyəa mò à lò eghəa, ghî ghə̀ n ti a te a bə̀ghà ŋkāa a təgha. 17Mò ù tùe sùghò nù enyəa e zuuw yo ghee, ndǔw dzǎa ndùw an dzeŋe kə ghì a Kəzə̀; mò ù tue daŋso sùghò enyəa e zuuw yo â dzeŋe kə ghì a Kəzə̀ ghò, nǐi ndǔw wə̄n tǒ ghùw wəla ù kwo yo Zə̀ kò, ŋkāa tǒ dzə̀akə̀mwàʼsò. 18#Mat 16:19; Dzn 20:23 Kùmkùm, aŋghəa Ǹ dzâa wô fɛ â ghɛ̀, ghəa zəla ghɛ̀ tsughu boō tsughu enyəa e lo êzə̀ a fɛ am mbī, ghe lo boom sùghò ezə̀ alo kəwala, mò à lò zəla ghɛ̀ kuūwn tue maʼà tsughu fɛ am mbī, ghe lo tuu màʼn sùghò êzə̀ alo kəwālā.
19Ǹ so Ŋ̀ kôom dzâa kpeʼe wô â ghɛ̀ enyəa abugho ghɛ̀ a bə̀ghà tsughu boō tsughu alo eghəa, ghɛ̀ gɔŋlò enyəa to ghəa e mô sə êzə̀, Bəghà alo kəwālā lo fwàʼà fùghuu nù ghəa e te zo â ghɛ̀. 20Nu bugho aghî a bə̀ghà ŋkāa a təgha zûuŋ doʼò tsughu bòʼ mùghò, mùghò n lo a fughu ghàʼ à ghee.”
Kwə̀ən kə ushwāʼ aŋ kɔ̀ɔ fəla fə nîizə̂a yo bo e ghûw zò
21 #
Lûk 17:3, 4 Pità n daŋso sə kɔ̀ʼ è wo dzɛ̀ â Yɛso enyəa, “Mughùbè, Ǹ lo alenìizə̂ bòo tə waanùghò alekɔʼɔ̄ sə tənəghā tə sòʼ abugho ù tsòo ghəə̄ŋ kwêen ko mugho â bo zo a? Ǹ lo nû alenìi zə̂ bo e wə̄n kɔʼɔ səa ndùw tə̀nəghā sə̀ghàmbəgha a?” 22#Dzs 4:24Yɛso n dzɛ̀ â wə̄n enyəa, “Ǹ dzâa wò dzə̀ yò enyəa à lò tənəghā sə̀ghàmbəgha. À lǒ ghə̀əm n tə̀nə̀gha sə̀ghàmbəgha alo tənə̀gha sə̀ghàmbəgha. 23Fɔ̂e u kəwālā u lo tò kədə̀ŋ kə fə̀ ləghaa alebianlo ghèe kɔ̀ɔ ŋ wə̄n mò. 24Ù n naam kaʼ tsughu ko ebianlo, ghe n daŋso bùghò â ghùw mò ù ki wə̄n â ndàŋ kò an ndə̀mà tə ukʉ̄a. 25A m bùghò kɔ̂ɔ fi fə sô ki yô fəgha ko aletsəā tsəghàa ndûuw ndàŋ chìa ù mò ki â ghùw vʉ̀, də̀ŋ chi kə n tsə̀ghàsò tsùghù kəlâŋ enyəa ghe nîi fêe sə wə̄n tò kəkɔ̂, ghe fêe daŋso â wi ù wə̄n àsùghò wɛ a wə̄n gho àsùghò fʉgha u wə̄n wo u dzə̀m, ghe tsə kua u te wo. 26Kɔ̂ɔ fi fə n nyaʼa ndùw a tsəlà wə̄n, buʼ kəghu â wə̄n enyəa, ‘Mughùbè, fughu tsughu mugho â nyàaŋ fə enə̀gha fo, Ǹ lo tsəa nù kua wʉ̀a wò u dzə̀m.’ 27Də̀ŋ chi kə ŋ kwuso tsughu ese a zəŋò wə̄n, nìzə̀ ndùw ndàŋ kə te ko, zə̀ghàa màʼà ndùw wə̄n.
28Kɔ̂ɔ fə̀ mɔʼɔ̄ fi n nùghù è tsughu enyəa fə fɛ nùghùnlò ebàm alô wə̄n, fə kpeen ndùw ghèe ghùw fən ù wə̄n mò à lò sugho fəkɔ̂ɔ. Tûw vʉ n lo mò ù ki wə̄n â ndàŋ kò a tə̀tɔlɔ tə sòʼ enyə ko; ù ŋ kwu kam kɔʼ wə̄n am mwè, dzɛ̀ â wə̄n enyəa, ‘Tsə tsə̀gha wò ndàŋ kə̀a kò.’ 29Ghùw fə̀n ù wə̄n vʉ n nyə̀ŋè ndùw a ghueetsə̄, buʼ kə ghu â wə̄n enyəa, ‘Fughu tsughu mugho â nyàaŋ fə kə ghāa fo, Ǹ lo tsəa nù ghû.’ 30Ù mo e tue, nì dzə̀n ndùw ghùw fən ù wə̄n vʉ an ndùghùtsāʼ enyəa ù kè tèlè tsə̌a ndàŋ chì. 31A m bùghò kɔ̀ɔ n lǐ mìa ghèe ghee dzeŋe fwaʼā a dzə̀m kôʼ ghəa yì gho, ghue zə ŋ ŋge kpuw ghee, ghe n lɛ̂ɛn ghəa a te gho a dzə̀m, ndùw dzɛ̀ fughu tsughu â mughùbè ù ghee. 32Mughùbè ù wə̄n fi tɔŋɔ tsughu nu wə̄n, dzɛ̀ â wə̄n enyəa, ‘Ghù tɔ̀ʼ lǒ ghùw ù kəfwàʼ ù bǐigh enyə! Yìa Ǹ so ghù mò mgbaŋ buʼ kəghu fɛ̄ â mùghò enyəa Ǹ nîizə̂a ndûw ndàŋ kə̀là ghù mò ki â mùghò a, 33ghù mò bɔŋ yo sughò alekwuso ese a zəŋò ghùw wəla ghɛ̀ à wə̄n fwaʼà dzəŋlō a dzə̀m, tò aŋghəa M̀ mô kwusō sugho se zo a zəŋò ghù a?’ 34Mughùbè ù wə̄n vʉ m pfʉso kɔʼ unʉghà, nì tùm ndùw wə̄n an ndùghùtsāʼ enyəa ghe e buu wə̄n a fughu tò ù kè telè tsə ndàŋ kə wə̄n.”
35Yɛso n daŋso dzɛ̀ tsùghù enyəa, “Bə̀ghà alo kəwālā kê bɔ̌ɔm ghəəŋ sùghò èzə̀, â ghùw wəla ù dòʼŋkè nîizə̂ bo e wàazə̀ am fə̂ŋ è wə̄n.”
Currently Selected:
Matìo 18: agq
Highlight
Share
Copy
Want to have your highlights saved across all your devices? Sign up or sign in
