Matìo 22
22
Kwə̀ən kə ushwāʼ kùu ndùw zə kə nì zə eghùe
(Lûk 14:15-24)
1Yɛso ŋ kòom kwə̀ən kə̀a kpèʼe ndùw àghəa â ghì yi gho enyəa, 2“A lo alenìi bâan ndûw fɔ̀e ù kəwālā ghèe də̀ŋ kə̀ li ko kə fə̀ so e zɔ̂ʼ àghì enyəa wɛ̀ ù wə̄n nî tsùghu wī. 3Ù n tum tsughu kɔ̀ɔ u wə̄n enyəa ghe ndûw tɔɔ̄ŋ kaāŋ wô ghì ghə̀là ù mò naʼā enyəa ghe bughò a fughu. Ghî a te ghə n ləghaa yo alebùghò a fughu. 4Ù n tum sə kpeʼe tsughu kɔ̀ɔ n li mò, dzɛ̀ â ghee enyəa, ‘Nduw dzǎa ndùw nlò â ghì ghəla mugho mò naʼà enyəa: nəgha e kəzə zə m kpe, mùghò n tsɔ̀m u təmbɔ̀ŋ waŋa u wi, yìa Ŋ̀ wi tə̀ kaā to. Mùghò ŋ ghəa gho a dzə̀m biaan naŋa mɛ̀ʼɛ̀, enyəa ghe bughò an zə kə nì zə eghùe kə wɛ waŋa wən!’ 5Ghe ŋ kè buʼù nî ghəa a te gho tò eghəa, ghe n nùghù ghe â luʼū to, chìa n nùghù sòʼ ndùw an sum u wə̄n, ù lòʼ wən n sòʼ sə̀ ndùw wən â bekewə̄n ko. 6Ghî à li ghən ŋ kuūwn kwu tsughu kɔ̀ɔ ŋ wə̄n mì, tsʉ̀ ghee, wiin màʼà tsughu ghee. 7Də̀ŋ chi kə ŋ ŋge pfʉso ùnʉ̀ghà aŋ ghəa a te gho, tsə̀ghàsò tsùghù kəlâŋ â sùghugòʼ tə wə̄n to, tə n ndùw tə̌əm wī tsughu ghî ghəla ghe mò wi kɔ̀ɔ ŋ wə̄n mì, kpàa màʼà kɔʼ naʼ e ghee. 8Ù fi dzɛ̂ tsùghù nû â kɔ̀ɔ ŋ wən mò enyəa, ‘Nəgha e zə kə nì zə eghùe kə m kpe, ghî ghə̀là mùghò mò naʼā, ghe ka mo kpe to a e naʼà ghee. 9Sə ndùw nlò êzəŋ am fwànlò e tədzǐi, ghɛ̀ waʼn naʼa nduw ghî ghən a dzə̀m ghɛ̀ koʼ, enyəa ghe bughò an zə kə nì zə eghùe.’ 10Kɔ̀ɔ mi mə̀ n sə ndùw sùghò am fwànlo e tədzǐi, kuum kaāŋ wò ghì ghəla ghe fə kôʼ tsughu a dzə̀m, à biigh gho àsùghò à dzûŋ ghò; sàŋkpàa chia ghe fə̀ ghəə̄ŋ ghəa a nì zə eghùe gho a te n lue tsughu enyə aŋ ghùu ghì ghò. 11A m bùghò, də̀ŋ kə te kə sô sə wo alebùghò kôʼ ghì yìa ù mò naʼā, ù m bùghò sə̀ kòʼ wò ghùw ù lì a fughu u mɔ̀ʼ mò ù kà ndzʉ tə zə kə nì zə eghùe tə̀ dzəlà. 12Ù m bvʉ̄ â ghùw ù te enyəa, ‘Ŋ ghûw fə̀n, ghù mò nyə̀ ênzə̂n fɛ à mò ghù kà dzə̀la ndzʉ tə nì zə eghù tò a?’ Tûwbʉ̀ghà vʉ ŋ kè kə̂a èghəa. 13#Mat 8:12; 25:30; Lûk 13:28Də̀ŋ chi kə n daŋso fughu tsughu kəlâŋ â kɔ̀ɔ ŋ wən mò, dzɛ̀ â ghee enyəa, ‘Kwu kɔ̀lɔ tsughu nlò kwe e ghùw vʉ zo, àsùghò fwee e wə̄n zo, ghɛ̀ shʉaa maʼa sə nduw wə̄n a beē, a fî alo kələ̄m, a fia ghî à sô diī, ghee e pfʉa sɔŋ gho.’ ” 14Yɛso n tsughu tsən tsughu enyəa, “Ghe naʼà wò də̀m è àghì, ghe yia kuūwn shîaa sə wô ko sə fə aghì ghe tɔ̂ʼ gaʼ fə̀ŋ e ghee aŋ ghəa a te.”
Bûʼ kə mwàʼsò kə̀ chuuw ko
(Mâk 12:13-17; Lûk 20:20-26)
15Ghî a Falàsîi à li ghə n ndùw dòʼò ge naŋa tsughu aŋghəa ghe lo alebèe kwu Yɛso a te aŋ shwaʼ u wə̄n. 16Ghe n tùm ndùw tsə̀təndə̄ghā tə ghee ghèe ghê ghì a Hɛlɔ̀d à li gho a vʉ̀a Yɛso; ghî a tum yi ghə n ndùw dzɛ̀ â wə̄n enyəa, “Wàdè, ghàʼ kûm kwò nû enyəa, ghù lǒ ghùw wə̀ èsəŋò, ghù vʉ̀a ghù kùu zoʼn sugho ghî ghò â səŋò zò aŋ ghəa a Kəzə̀. Ghù bùʼù nǎaŋ yo tuūŋ ko aŋ ghəa ghəla ghî à moʼò an tsʉ̀ zəla ghùw fughuu â ghì ghò, ghù vʉ̀a ghù naāŋ sughò yô sə zo am fəgha kəla ghùw lǒ ghè kò. 17Ghù mòʼò èndugho aŋ ghəa ghən à, dzâa wò â ghàʼ. E dzɔ̂ɔ nù alechūuw mwàʼsò kò â Də̀ŋ kə Lumà ko ŋkāa e dzɔ̂ɔ yǒ a?” 18Yɛso ŋ kuuwn lò mò ù mâa kèle zìi moʼnlò e ghee è biigh zəa ghe mô ki ghè zò, ù n dzɛ̀ â ghee enyəa, “Ghɛ̀ mugho chwəlà kòʼò aŋ kwǒ, ghɛ̀ ghî a kə̀bàŋàdzə̀m ghən? 19Děe wò nlò mugho â kua wəla ghɛ̀ nîi chuūw mwàʼsò kò a te tò Ŋ̀ kôʼ.” Ghe n nì wò sùghò kua u fəŋgɔ̀ʼ vʉ̀. 20Yɛso m bvʉ̄ â ghee enyəa, “Kən lò zəŋsō kə ndugho ko àsùghò zən e ndugho zo ghe tɔm naŋa a te à?” 21Ghe n dzɛ̀ â wən enyəa, “À lò sʉ u Kaesà.” Ù n daŋso dzɛ̀ â ghee enyəa, “Fəgha kəla kə lô kə Kaesà kò, ghɛ̀ è fughuu nduw Kaesà, də̀ŋ kə Lumà, mò alò fəgha kəla kə lô kə Kəzə̀ kò, ghɛ̀ è fughuu nduw sugho â Zə̀ kò.” 22A m bùghò ghe zuw tsughu ghəa ghən, ghe n zə̀ghàa tsughu luʼū kə te ko, nùghù s fùghù mo ghue zə ŋ ghee kpuw lɔŋe.
Bûʼ kə̀ zoōm nughūun wo ko alo evʉ̄
(Mâk 12:18-27; Lûk 20:27-40)
23 #
Kfw 23:8
An tsuʼ fə̀ mɔʼɔ̄ fə̀ te fo, ghî a Sadùwsîi à li gho, tɔ̂ɔŋ ghì ghəla ghe moʼò enyəa ghùw yò kpuūw kɔʼɔ̄ sə alo evʉ̄, ghe m bùghò kòʼ wò Yɛso, 24#Lwa 25:5bvʉ â wə̄n enyəa, “Wàdè, Muwsî fə̀ dzɛ enyəa, abugho ghùw kpuw naŋa taʼà tsughu wi ù wə̄n mò ghe ka mo kaam dzə dzə̂ wɛ a te, wàazə̀ ghùw ù kpǔuw n nyə̀ŋsò ndùw wìkpuw ù tè, dzə fughu tsughu awɛ a te â wàazə̀. 25Êzə̄ŋ, ghî à li a fə̀ lo fɛ̄ sə̀ghàmbəgha mo ghe lo waazə̂; ù sʉèsʉ n nì tsùghu wī, kpuw naŋatàʼà tsùghù â wàazə̀ mò ù kà wɛ̀ a te dzə̄. 26À m bɔɔm sə sùghò ghəa è mɔʼɔ̄ zo a zəŋò wàazə̀ vʉ̀a ù nyə̀ŋsò tsughu wìkpuw vʉ̀. Ù lì wən ŋ kòmlò è nyəŋso è zum zo; à m bɔɔm lò ko ghəa è mɔʼɔ̄ zo alekɔʼɔ̄ kûu ndûw aŋ waazə̂ a te gho a dzə̀m sə̀ghàmbəgha. 27Ghəa ghe bughò kpuūw mɛʼɛ̀ tsughu, wìzən vʉ m bùghò kpùw tsùghù è sugho. 28Êzə̄ŋ, abugho ghî à kê zôom wô alo evʉ̄, wìzən ù te kê lǒ wì ù ndùghò aŋ ghì ghən sə̀ghàmbəgha à, ghee a dzə̀m màʼa fə̀ nî kaāŋ wo wə̀n à?” 29Yɛso m fwə̀n dzɛ̀ ndùw â ghee enyəa, “Ghɛ̀ n nyə̀ŋ làʼ, tɔŋlo enyəa ghɛ̀ kwo yo shwaʼ u Kə̀zə̀ wò, ghɛ̀ kwo sugho yo daʼa kə wə̄n ko. 30Nu tsuʼ fə kɔʼɔsəa fo alo evʉ̄, ghùw nìi yǒ wī, ghùw nìi fùghuu sùghò yǒ wìzən â ghùw; ghî ghə̀n à dzə̀m lò ko tǒ tətūm alo kəwālā. 31Aŋ ghəa à zoōm wo gho alo evʉ, ghɛ̀ kaām tɔɔŋ kòʼ fəgha kela Zə̀ kə fə̀ dzɛ̂ â ghɛ̀ à? Kə fə̀ dzɛ enyəa, 32#Ksm 3:6‘Ǹ lo Zə̀ kə Abə̀làhâm, Zə̀ kə Aezìk, lò sugho Zə̀ kə Yàkɔ̂b.’ Ù yò dzə Zə̀ kə ghì a kpuuwn gho, Ù lǒ Zə̀ kə ghì a sə̀ à tughu gho.” 33Aŋghəa saʼ kə aghì chi kə zuw tsughu ghəa ghən gho, dzughu zə n zum ghee aŋ ŋgòʼ è dzì zəla ù zoʼn ghî ghò a te. 34Aŋghəa ghî a Falàsîi à zuw tsughu enyəa Yɛso n dzughu a ghì Sadùwsîi à nyəm naŋa, ghe n nyə̀ŋ zùŋlò è wo. 35Dèekə̀làŋ ù lì u mɔ̀ʼ ŋ kəŋo alebàʼn kwu Yɛso, ù m bvʉ â wə̄n enyəa, 36“Wàdè, à bìso lo dəŋò kə̀ ghɛ ko alo kəlàŋ a, kə tughu tsəghà lwâŋ wən wo ù dzə̀m a?” 37#Lwa 6:5Yɛso m bɛ̀lɛ̀ ndùw enyəa, “Ghù ki aleləgha Mughu ù te, Zə̀ kə̀a â fə̂ŋ zə̀ghà e dzə̀m, àsùghò ghùe wʉ̀a wò u dzə̀m, àsùghò am mòʼn zə̀ghà e dzə̀m. 38Kən lò lâŋ kə sûesʉ kəla kə tughu tsəghà lâŋ wò u dzə̀m. 39#Lɛv 19:18Kə̀ li chia kə məghà nduw mo kə tughuu sùghò tò kə sûesʉ kən. Kə te kə dzɛ̂ enyəa, ‘E ləgha Wàazùghù tò aŋghəa ghù ləghàa ghue wùa wò a te.’ 40#Lûk 10:25-28Wən lo lwâŋ wə̀n ù bʉ̀ghà u kwu kɔlɔ̄ kɔʼ lwâŋ u Musî wò dzə̀m, à tsʉ̀ e ghǐishʉ̀ghà a Kəzə̀ zò.”
Bûʼ kə ghùw wəla Bəghambī lo ghè wò
(Mâk 12:35-37; Lûk 20:41-44)
41A m bùghò ghî a Falàsîi à li zûuŋ doʼò tsughu, Yɛso m bvʉ̀ ndùw ghee â ghəa zo 42enyəa, “Ghɛ̀ moʼò èndùghò kùu ndùw Bəghambī lo a? Ù sə̀ an tiigh kə ndugho ko a?” Ghe m bɛ̀lɛ̀ ndùw wə̄n enyəa, “Ù sə̀ an tiigh kə Dɛvìd.” 43Yɛso m bvʉ â ghee enyəa, “À sò lǒ kwò Zuʼ tə Kəzə̀ tə fə̀ ghəə̄ŋ tsughu enyəa Dɛvìd è tɔɔŋ wə̄n enyəa ù lò Mughu ù te a?
44 #
Sms 110:1
Dɛvìd fə̀ dzɛ enyəa, ‘Mughu ù te fə̀ dzɛ â Mughùbè waŋā enyəa:
Dòʼo tsughu fɛ aŋ kwe waŋa ù təma wo tò Ŋ̀ kê telè naŋā wô dzə̂ ghì a kətūw ghə̂a a tsəla efwee zəghà.’
45Abugho Dɛvìd fə̀ tɔɔŋ wə̄n enyəa à lò Mughu ù te, ù lò ênzə̂n alelo wɛ̀ ù Dɛvìd a?” 46Ghùw mɔʼɔ̄ n yo alebɛ̀lɛ̀ wə̄n. Nì nùghù tsùghù an tsuʼ fə te fo, ghùw ŋ kè kôom foʼò kôʼ alebvʉ̄ wə̄n â ghəa zo.
Currently Selected:
Matìo 22: agq
Highlight
Share
Copy
Want to have your highlights saved across all your devices? Sign up or sign in
