Matìo 28

Yɛso kpuūw kɔʼsə̄ alo evʉ̄

(Mâk 16:1-10; Lûk 24:1-12; Dzn 20:1-10)

11 Ghəa Tsuʼntsə̄ u Dzùdîa ù tsəghà tsughu, mò à sò zǔuw wò tsuʼ u sûesʉ wo alo ewə̄n, Mèle Màgdàlɛ̂n n nùghù tsùghu ghèe Mèle ù lì wən alendùw kôʼ shìa e Yɛso e te zo. 2Aŋghəa ghe nduw, ghueekətsə̄ kə n vùuŋ nùghù nòʼ tsùghù ènyə, tsə̀ndə̄ghā è Mughu ù te n sə̀ tsughu wô alo kəwālā, bəŋso màʼà ndùw tia zə̀, kɔʼ nyaʼa kɔʼ a te. 3Kôʼ e wə̄n zə n nyəghaan ko to ghuuw e lô mwâa tsughuu, ndzʉ tə wə̄n tə n lo fùuŋ, tə fəmā. 4Fə̂ŋ tə̀ n sə tsughu chì tia ghe mò chîin shîa to, ghe tsəŋo wə̄n, ghe n tsəŋlo enyə, dòʼò ndùw tò ghî à kpuuwn gho. 5Tum è te m fwə̀n dzɛ̀ â yìzən yi gho enyəa, “Kǎ nlò tsəŋ; tɔŋlo enyəa Ŋ̀ kwo nû enyəa ghɛ̀ ləghaa alekòʼ Yɛso wəla ghe mò təghāa. 6Ù yò dzə̂ fɛ; nu ù ŋ kɔʼsə alo evʉ̄ aŋghəa ù mò dzɛ̂ naŋa. Bùgho kòʼ nlò bala zəla ù mò nyəŋ a tè à. 7Ghɛ̀ daŋso mba nduw dzɛ nduw â tsə̀təndə̄ghā tə wə̄n to enyəa ù ŋ kɔʼsə alo evʉ̄, koʼô, vʉ̀ ù ndǔuw â sə ko a zəŋò ghɛ̀, ù ndǔuw aŋ Galèlîi; ghɛ̀ sô wə̄n koʼò a fughu. Ghɛ̀ e moʼn tsughuu ghəa ghəla Ǹ dzɛ â ghɛ̀.” 8Ghe fi daŋso kwuun zə̀ghàa tsùghù nû a fughu alo eshìa, nòʼò ndùw ko â ghue zo alo eduʼnlo, ghe nyəŋō ndûw alendùw dzɛ̂ â tsə̀təndə̄ghā tə wə̄n to. 9Ghe mo e koʼò, Yɛso m kpeen wǒ ghèe ghee dzɛ̀ tsùghù enyəa, “Bughuun zə e lo ghɛ̀ à ghee!” Ghe n daŋso kuʼso kəŋo ndùw wə̄n, kwu tsughu ghuw a wə̄n, fughu wə̄n â kɔʼso mò. 10Yɛso n daŋso dzɛ̀ â ghee enyəa, “Kǎ nlò tsəŋ; nduw dzǎa ndùw nlò â waazə̂ ghaŋa gho enyəa ghe ndûuw aŋ Galèlîi, ghe sô mùghò koʼò a fughu.”

Chì tə̀ teso dzɛ̀ fəgha kəla kə sə

11Aŋghəa yîzən yi a nughùun nduw ebàm, a mo e koʼò, chì tə̀ li to an chì təla tə mò chîin shîa e Yɛso zò n nùghù kwə̀n ndùw enaʼ, ndùw dzɛ̀ â tuw u təfɔ̀e wò fəgha kəla kə sə kə dzə̀m. 12Tuw u təfɔ̀e wə̀ n dòʼò è tsughu, zə tsughu fə̀mbɛ̀ ghèe ghêe tsoʼ to, zueen tsughu tə sùghugòʼ aŋ kua ù səŋò wò, 13dzɛ̀ â ghee enyəa, “Ghɛ̀ è kəa kaaŋ nduw enyəa, ‘Tsə̀təndə̄ghā tə wə̄n tə mô bugho tsɔŋ nughu gwən e wə̄n â tsuʼ wo mo mgbii tə ŋ ghàʼ nî.’ 14Abugho ghəa zən bûʼ bughò nyə ko an tùuŋ kə gɔvə̀nò, ghàʼ lo təmā tsughu tsaʼ kə̀ saa ko am fə̂ŋ è wə̄n, a ghəə̄ŋ tsughu ù kele tsughu enyəa ghɛ̀ ki yo tsû ù li wo, ghɛ̀ e ki yo tsəŋ zo aŋ ghəa è li zo.” 15Ghe fi nî kɔ̀ʼ nû kua u te wo, ghəəŋ ndùw sùghò aŋghəa ghe teso dzɛ̂ tsughu â ghee. Dzûu tə̀ fɛ zùghòo tsə̀ghà kô ghəa yia chì tə fə̀ bughò dzɛ wo, bùghò sə̀ kɔʼ nɛ.

Yɛso gbə̀n sə kɔʼ an sə kə tsə̀təndə̄ghā

16 # Mat 26:32; Mâk 14:28 Tsə̀təndə̄ghā tən èghəm à ghè zò e mɔ̀ʼ n nùghù ndùw êzə̄ŋ aŋ Galèlîi, aŋ kwàʼ wəla Yɛso mò teso tsughu â ghee. 17A m bùghò ghe kôʼ kɔʼ wə̄n, ghe fughu wə̄n â kɔʼso mò; tuw kə kuuwn naam kpūuw ko ghee à li gho. 18Yɛso n daŋso bùghò dzɛ̀ tsùghù â ghee enyəa, “Dwaʼa wən u dzə̀m alo kəwālā àsùghò aŋ ghueekətsə̄, ghe m fughu â mùghò. 19#Kfw 1:8Ndǔuw ko nlò êzə̄ŋ, ghɛ̀ è ghəəŋ nduw enyəa ghî ghə̀ è doʼn wo tsə̀təndə̄ghā taŋa to an nàʼà tə̀n tə̀ dzə̀m. Abugho ghe boō fughu tsughu, ghɛ̀ è fughuu nduw ghee â mùghù ŋ Kə̀zə̀ mò an zən e Tsele ù te, àsùghò an zən e Wɛ̀ ù te, àsùghò an zən Zuʼ tə̀ Zɔlɔ to. 20Ghɛ̀ e zoʼn ndùw ghee enyəa ghee naaŋ lwâŋ wəla M̀ fughu wo â ghɛ̀ u dzə̀m; kòʼo sùghò nlò, Ǹ lo sɛ̀ alo tənə̀gha tə dzə̀m to mbī kê bughò mîa.”

Currently Selected:

Matìo 28: agq

Highlight

Copy