Mâk 13

Yɛso kə̀a aŋghəa ghe lo saʼà maʼn ə Ndùghèkə̀zə̀ è nē a te an Yɛ̀lusalɛ̀m

(Mat 24:12; Lûk 21:5-6)

11 A m bùghò Yɛso daŋso nughù sə wo an Ndùghèkə̀zə̀ è nē an Yɛ̀lusalɛ̀m, tsə̀ndə̄ghā è wə̄n e mɔ̀ʼ n dzɛ̀ â wə̄n enyəa, “Tso kòʼo to kɔ tə atīa təla ghe bəgha luʼū to fɛ a te a Wàdè, kòʼo sùghò kɔ tə təndughu tə te to lo a!”

2Yɛso n daŋso nì tsùghù â wə̄n enyəa, “Ghù vʉ̀a ghù kòʼò faŋkwu u təndughu wəla a? Fəgha kə̀ li kə kê kòom nyàʼ yo fɛ a zəŋò wàazə̀ enyəa à lò etia, mo e kâ tsùghù a ghūu.”

Yɛso dzɛ̀ naŋa wò enyəa tsû ù lo â sə ko

(Mat 24:3-14; Lûk 21:7-19)

3Yɛso ŋ kɔ̀ʼ dòʼò tsùghù aŋ kwàʼ u tə̀ Olèf, lɛɛn dàŋà ndùw Ndùghekəzə̀ è nē an Yɛlusālɛ̀m. Pità ghèe ghê Dzɛ̂ms, à Dzɔ̌n, àsùghò Andùlù n tsèen bvʉ tsughu â wə̄n fughu enyəa, 4“Ghəa ghən kê bala kə nîi zə̀n? Dzǎa wò â ghàʼ, à kè lǒ tsə̌a è ghɛ̀ zò aledèe wô enyəa ghəa ghən fɛ so e bughò sə a?”

5Yɛso n daŋso nì tsùghù â ghee enyəa, “E ghoōm tsughu nlò ghùw lò sêe məŋsō ghɛ. 6Ndə̀m kè ndùw bùghòo fɛ enyəa ghe lo mugho, ghe e dzaā wo enyəa, ‘Ǹ lo wə̄n!’ Ghe sêe məŋsō tsughu ndə̀m è àghì. 7Abugho ghɛ̀ zuw tsughu tsaā tə kuū kaŋlō àsùghò làbəlà tə tətsàa to, e kwo ko fə̂ŋ tɛʼɛ tə lô so e tsə̄əŋ nù, ghəa ghən ki alenì kə̀bala, e fi kuuwn kāam daŋso yò dzə̂ enyəa mbī fi so e mîa. 8Naʼà tə̀ ke e zughū aŋ ghùe e ghee, fɔ̂e zə̀ è ke təma tsaā to ghùe e ghee, ghueekətsə̄ kə e ke boʼn bvʉā kaaŋ dəŋò tə̀ də̀ŋò, dzə̀ŋ è ke lo dəŋo tə̀ də̀ŋò. Ghəa ghən kê ò ko to wɛ lô kaʼā nu tsughuu zəla nʉ̀ghà u wɛ̄.

9 # Mat 10:17-20; Lûk 12:11, 12 Yia a bughò ghɛ, tiso kɔʼ nlò tuw ko edzūŋ; ghe lo kwuū fughuu ndûw ghɛ aŋ kaŋsì, ghe tsɔʼ sa ghɛʼɛ an ndughutə̀ne to; ghɛ̀ lo sə tee an sə kə udwə̀ŋ à ghê gɔvə̀nò bòʼ mùghò, zən kè lǒ dzì alenàʼà tsə̀ndə̄ghā è Kə̀zə̀ â ghee. 10Ghe bûʼ kì dzə alenàʼà tùm è dzùŋ zən â nàʼà tò tə dzə̀m. 11Abugho ghe kwu tsughu ghɛ, nì ndùw ghɛ̀ enyəa ghɛ̀ nduw tee an tia e sāʼ, e kwo ghɛ̀ lô so e bâŋsò tə̀fə̀ŋ mo nəgha e kaam kpe enyəa ghɛ̀ sô fughu yia kə̂aa ndùw êndughō. Bɔɔm kə̌aa ko fəgha kəla kə sə wo an dzughu ghɛʼɛ̄ an nə̀gha e te zo, tɔŋlo enyəa à kè kə̀aa yò ghɛ, à kè kə̀aa Zuʼ tə̀ Zɔlɔ to. 12Ghùw ke e feēn fughuu nduw wàazə̀ enyəa ù ndùw kpuw. Tsele ke feēn fughuu nduw wɛ, wɛ ghə e ke kɔʼɔ an tuw u ghê tsele, ghəəŋ sùghò enyəa ghe e wiin sugho ghee. 13#Mat 10:22 Ghî ghə̀n à dzə̀m lo bɛ̂ ghɛ̀ bòʼ mùghò. Ghî ghəla ghe lo kuūwn dzəlà mɛ̂ʼn daŋso ndûw ko fə̂ŋ tò alendùw kûu ndûw, ghe lo zə kətuw.

14 # Dan 9:27; 11:31; 12:11 Abugho ghɛ̀ kòʼ sàasɛ̀ kə ghəa kə nîi bəla ko an lùʼù wəla kə mô ki yô alesə̄ a te, (à ghùw wəla ù tɔɔ̄ŋ ghəa ghən gho: Də̀mà tən tsughu aletɔɔ̄ zuūwkɛlɛ̂ ghəa a te), ghî ghəla ghe lo an Dzùdîa kì aletiīn kɔʼ alo təkàʼà, 15#Lûk 17:31e kwo ko wəlà ù lǒ aŋ gɔ̀ŋ kə ndughu lô so e səa tsughuu wò nù, ŋkāa ù bùghò nyə an ndughu alenyəa nî fə̀ghà kə̀ li ko. 16E kwo vʉ̀a â ŋgwən lô nughùun kwəlā wô enyəa e so e bughò nî ndzʉ tə wə̄n. 17Tsû ù kê lǒ â yìzən ghəla ghe lo nə̀ghà mə̀ à wɛ mò, àsùghò ghəla ghe kê nyɔŋsō wɛ gho an tsùʼu n te mò. 18Gɔ̌ɔŋ tsughu ko nlò enyəa e kwo ghəa a te a lô so e səa am mbuw mə̀ èghuuw. 19#Dan 12:1; Edê 7:14Tɔŋlo enyəa fəm kə kê lò an tsuʼu n te mò, mo kə kaam doʼò kòʼ ghuêchia Zə̀ kə fə̀ bɔm tsughu mbī alebùghò tâa wô nɛ̄, ŋkāa ghəa è li e kê kòom lò koʼ nû tò zən. 20Abugho Mughu ù te mò doʼŋkè gbôo kə̂aa tsughu tsùʼù mən, to ghùw nsɔ̌ɔŋnchùw kà tuw kə zə. Bòʼ ghì a wə̄n ghəla ù shìa kɔʼ, vʉ̀a ù gbò kə̂a tsughu tsùʼu n te mò.

21Mò à dzɛ̀ ko ndùghò â ghɛ̂ an nə̀gha e te zo enyəa, ‘Kòʼô! Mɛ̀sayà wən fɛ̄!’ Ŋkāa ‘Lɛɛn ndùw, u vʉ fî!’ E kwo ghù lò se boom nù. 22Tɔŋlo enyəa ghê Mɛ̀sayà ghə agha, àsùghò ghǐishʉ̀ghà ghə agha a lo vùuŋ nùghùn sə̌a kɔʼɔ nù, ghe e deē wo tsə̌a to à sə̀ghà mò alesèe məŋso ghì ghə̀là Zə̀ kə̀ mò shîaa kɔʼ. 23Kuuwn nǐi kɔʼ ko nlò ghôom zò, nu mùghǒ ŋ ghɛ̀ â ghəa ghən à dzə̀m dzɛ̂ zìi nàŋa wò.”

Bughò e Wɛ ù Ghùw

(Mat 24:29-31; Lûk 21:25-28)

24 # Èzy 13:10; Dzw 2:10, 31; 3:15; Edê 6:12; Èzy 13:10; Ɛ̀zi 32:7 “A kê so e kuūwn bùghòo an tsùʼu n te mò, mo fala zə m mìa. Ləm kə kê nughù bvʉ̂a tsughu â tsə̀ tò, ndzɔŋ ke nyəmā tsughuu sughò. 25#Èzy 34:4; Edê 6:13; Dzw 2:10Sə̀ghàbəlà ŋ kê tsɔʼn tsughuu wô alo kəwālā, dwaʼa u kəwālā u kê noʼò kaāŋ ndûw. 26#Dan 7:13; Edê 1:7Ghe lo daŋso kôʼò ko mò Wɛ̀ ù Ghùw sò bùghòo am mbàʼ, à kɔ kə kədaʼa ko, alo nsə̄ghānyə̄ghā. 27Ù lo daŋso tuū səā ndûw tsə̀təndə̄ghā tə kəwālā, ù zùuŋ kaāŋ wô ghì a wə̄n am buw ghən à chìakò aŋ kàlà tə mbī, ndùw tɛ̀ ndùw aŋ kàlà tə kəwālā.”

Etsʉ̂ kùu ndùw kàʼ fə fîʼ

(Mat 24:32-35; Lûk 21:29-33)

28“Zoʼŋ kɔʼ nlò tɔ wo aŋ kàʼ fə fîʼ. Abugho kwèe tə wə̄n tə bughuun dzɔ̂ tsughu, kaʼ tsughu alezùw, à fi lo enyəa wuuw zə n su aletsughūu kwə̄n. 29À lò sugho eghəla abugho ghɛ̀ kôʼ ghəa ghən nîi bəla ko, kele tsughu nlò enyəa nəgha e wə̄n e bughōo zə n sū. 30Ghəa Ŋ̀ kûu dzâa fɛ â ghɛ̀, mweē e nɛ zən lo tsə̀ghà mìa yò mo ghəa ghən kâ bəla kə nî. 31Wala kə lo tsə̀ghàa mìan nù à ghueekətsə̄ ko: shwaʼ waŋa u kê kǔuwn tsə̀ghà mìa yò.

Ghùw ù lì kwò naŋa yo nəgha zəla Wɛ ù Ghùw lo bughōo a te

(Mat 24:36-44)

32 # Mat 24:36 Alekuūwn nîi tsughu, ghùw mɔʼɔ̄ kwo naŋa yo tsuʼ wəla Wɛ ù Ghùw kè bughōo a te ŋkāa nəgha e te zo, tsə̀təndə̄ghā tə Kəzə̀ alo kəwālā tə bûʼ kwò sugho yo. Wɛ bûʼ kwò sugho yo, à gɔ̀ʼɔ̀ ko Tsele ù te. 33Nǐ nlò ghôom zò; naŋso tsughu nlò ghuw kə ebwìi kò, tɔŋlo enyəa ghɛ̀ kwò naŋa dzə yo tsuʼ fə te fo ŋkāa nəgha e te zo. 34#Lûk 12:36-38 À lǒ tò ghùw lò səā bwînlo, à m bùghò ù zə̀ghàan tsughuu ndughu, ù naŋa tsughu ŋkɔ̂ɔ enyəa mə̀ è chiīn tsughuu, chìa am fwàʼ kə wə̄n, chìa a lô kə wə̄n ko; naŋa tsughu u mɔ̀ʼ a fǔundughu enyəa ù è tseē luʼū to. 35Tɔ̀ʼɔ têe nlò, nu ghɛ̀ kwo naŋa yo nəgha zəla mughùbè ù te lo kwəlā nyəā a te. Ù lò alevùuŋ bughò an nə̀gha è gûŋsò zò, ŋkāa â fə̀ŋ è ùtsùʼ, ŋkāa â zùwzùw kə utsūʼ ko, ŋkāa â bwə̀làbwə̀là tò. 36E kwo ko ù lò vûuŋ ndûw bughōo mò ghɛ̀ yia bwiī. 37Ghəa ghəla Ǹ dzɛ̂ tsughu â ghɛ̀, M̀ fɛ dzɛ̀ â ghì ghò a dzə̀m: tiso kɔʼ nlò tuw ko.”

Currently Selected:

Mâk 13: agq

Highlight

Copy

Want to have your highlights saved across all your devices? Sign up or sign in

2020

Learn More About To kə Kəzə̀ kə̀ Fughu ko