Mâk 16

Yɛso kɔʼsə alo evʉ̄

(Mat 28:18; Lûk 24:1-12; Dzn 20:1-10)

1Ghəa tsuʼ fə kəzə̄ fə tsəghà kɔʼ, Mèle Màgdàlɛ̂n, Mèle, zə̂ Dzɛ̂ms, ghèe ghêe Sàlomɛ̀ n zueen kɔʼ vʉ n lə̌əm mò enyəa ghe ndûw tsoʼso gwən e Yɛso a te. 2A m bùghò Tsuʼntsə̄ wə ŋ̀kalà tɔ̂ɔŋ tsuʼ fə sûesʉ fo alo ewə̄n, ghe ŋ kì nùghù tsùghù â sə̀ghà kə tsə̂ kò, nùghù ndùw fughu alo eshìa. 3Ghe m bvʉa ndùw aŋ ghùe e ghee enyəa, “À sò tia e zə fughu a fù u eshìa bə̀ŋso nùghùun ndùghò â sɛ̌ a?” 4A m bùghò ghe ndûw tɛ̂ tsughu fughu, ghe mo e nughùun lɛ̌ɛn kɔʼɔ nù, à n lo mo ghe n tia e te e bəŋso nùghù — e mò waʼsō duūw nû. 5Â ghee alenyəa ndûw fughu alo eshìa, ghe m fìi kɔʼ tsôm kə wɛ ù nùu kə̀ li ko kə doʼ fughu â kwe ù təma wo, mo ù ŋ ghue u la an dàla è fə̀ma. Dzughu zə n zūm ghee. 6Ù n dzɛ̀ â ghee enyəa, “E kwo dzughu e lô zuū ghɛ, ghɛ̀ kəŋo Yɛso ghùw ù Nazalɛ̀t wəla ghe mò təghāa. Ù kòom yò fɛ: ghe ŋ wə̄n zôm nùghù kɔ̀ʼ alo evʉ̄, kòʼo ko luʼū kəla ghe mò nyəŋsò naŋā wə̄n a tè à. 7#Mat 26:32; Mâk 14:28 Ndǔw nlò ebàm, ghɛ̀ nduw naʼa nduw â tsə̀təndə̄ghā tə wə̄n to àsùghò â Pità enyəa, ‘Yɛso vʉ̀a â sə ko, ù ndǔuw aŋ Galèlîi, à lǒ fughu ghɛ̀ sô koʼō wə̄n, aŋghəa ù mò dzɛ â ghɛ̀.’ ”

8Ghe n nùghù sə̀ è wo, tì nùghù fughu wò alo eshìa; nu ghue e mò ŋgee tsəəŋ ghee, tuw kə m kpuuw sùghò ghee, ghe yo alekə̀a èghəa aŋ ghùe e ghee ghe màʼa fə̀ ŋgeē tsəŋō.

Yɛso gbə̀n sə kɔʼ a sə̀a Mèle Màʼdàlɛ̂n

(Mat 28:9-10; Dzn 20:11-18)

9Êzə̄ŋ, ghəa Yɛso gbən kɔʼsə̄ alo evʉ̄ an tsuʼ fə sûesʉ fo alo ewə̄n, ghùw sûesʉ wəla ù fə gbə̂n sə kɔʼ a vʉ̀a wə̄n fə̀ lo Mèle Màʼdàlɛ̂n, tɔɔŋ wìzən wəla Yɛso fə̀ dzûm sə zʉ̀ ù biigh wo sə̀ghàmbəgha a zəŋò ughùe. 10Ghî ghə̀là ghèe ghê Yɛso mò lô tsəgha a dzə̀m n lo alo esē, dìi sùghò, nughò vʉ n ndùw dzɛ̀ ndùw ghəa yì â ghee. 11A m bùghò ghe kuūwn zuw tsughu enyəa Yɛso lò â tuw ko, enyəa nughò vʉ ŋ wə̄n kôʼ, ghe m boom yo ghəa a te gho.

Yɛso gbə̀n sə kɔʼ a sə̀a tsə̀təndə̄ghā tə wə̄n to tə bə̀ghà

(Lûk 24:13-35)

12Gha kə kâ sə̀ an tsuʼ fə te fo ko, Yɛso m gbə̀n sə kɔʼ an sə kə tsə̀təndə̄ghā tə wə̄n tə̀ li to tə bə̀ghà aŋ ghùe u ghûw ù nùghù, mo ghe kwəla ndùw ènaʼ alo aghùw. 13Ghe n ndùw èbàm, ndùw dzɛ̀ ndùw â tsə̀təndə̄ghā tə̀ li tì, ghe ŋ kè boo.

Yɛso gbə̀n sə kɔʼ a sə̀a tsə̀təndə̄ghā tən èghəm à ghè zò u mɔ̀ʼ

(Mat 28:16-20; Lûk 24:36-49; Dzn 20:19-23; Kfw 1:6-8)

14Yɛso m bùghò gbə̀n sə kɔʼ a sə̀a tsə̀təndə̄ghā tə wə̄n tì èghəm à ghè zò e mɔ̀ʼ, mo ghe yia zəā. Ù n shwən ghee aŋghəa ghe doʼŋkè boō fughu â ghee, àsùghò an tùghù tùghù ù təfə̀ŋ u ghee wəla ghe ki ghè wò, bòʼ ghe ka mō boo fughu dzə̀ â ghì ghəla ghe mò koʼ wə̄n ghəa ù nùghù kɔʼ. 15#Kfw 1:8Ù n daŋso dzɛ̀ tsùghù â ghee enyəa, “Nyə ndǔw nlò am mbī e dzə̀m, ghɛ̀ naʼa nduw tùm è dzûŋ zən â ghì ghò a dzə̀m. 16Ghùw wəla u boō fughu tsughu a te, ghe yia fughu tsughu wə̄n â mùghù ŋ Kə̀zə̀ mò, ù lo zə kətuw; wəla ù dòʼŋkè kuūwn boo fughu, ghe lo dzûuw maʼà tsughu wə̄n. 17À kè tsə̌a tən dèe kô ghî ghəla ghe boō fughu tsughu: ghe ke e dzuū sə̄a zʉ̀ ù biigh wo an zən zaŋā; ghe ke kəā ghəa gho an sàʼà tə̀ fughu to. 18Ghe e ke kuum wo zughu to aŋ ghu, tə e ghəəŋ yo ghee â ghəa è li zo, mo ghe zə ko nō, zə̀ ŋ kè nomso ghee. Ghe e ke gaʼā nduw ghu gho a zəŋò ghì à dzaāŋ gho, ghe e dzaŋā tughuu wo.”

Yɛso kɔ̀ʼ alo kəwālā

(Lûk 24:50-53; Kfw 1:9-11)

19 # Kfw 1:9-11 A m bùghò Mughùbè Yɛso kə̀a tsughu ghəa ghən gho enyə â ghee, à fi daŋso lò ghəa a wə̄n à kɔʼɔ gho alo kiwālā, ù ŋ kɔ̀ʼ dòʼò tsùghù aŋ kwe ù Kəzə̀ u təma wo. 20Tsə̀təndə̄ghā tə wə̄n tə n daŋso sə̀ sɛ̀ɛ è tsughu, nàʼn kǎaŋ ndùw tsə̀ndə̄ghā è Kə̀zə̀ an lùʼù tən tə̀ dzə̀m. Ghue u Mughu ù te wə n lo a bàâ ghee, tughuso ndùw shwaʼ u ghee an tsə̌a təla tə fə̀ səā kɔʼɔ̄ a te. Àkpe.

Currently Selected:

Mâk 16: agq

Highlight

Copy

Want to have your highlights saved across all your devices? Sign up or sign in

2020

Learn More About To kə Kəzə̀ kə̀ Fughu ko