Mâk 4

Kwə̀ən kə ushwāʼ kə ghûwsūm

(Mat 13:19; Lûk 8:48)

1 # Lûk 5:1-3 Yɛso ŋ kòom ndùw kaʼ kpeʼe ndùw ghì à zoʼn gho a ŋgùŋ è ènyʉ̀ e Galèlîi. Nɔ̂e kə aghì kəla kə fə̀ zûuŋ ŋgəa kɔʼ wə̄n fə̀ ŋgee duūw nû; ù m bīsō nyə̀ dòʼò kɔ̀ʼ alo kəkwə̀n an dzughù è te, nɔ̂e kə aghì chi kə ŋ kuuwn tēe tsughu a ŋgùŋ è dzùghù. 2Ù n zoʼn tsughu ghee enyə â ndə̀mà tə aghəa to aŋ kwə̀ən tə ushwāʼ, dzɛ̀ â ghee ghəa ù zoʼn ghee enyəa, 3“Zəən tsughu nlò! Ghùw ù lì fə soʼ nduw alendùw tam ufʉgha an usum. 4A m bùghò ù təmā ndûw fʉgha wo, ù loʼ wə m bvʉ̀ ndùw an dziī, nwə̀n mə̀ m bùghò chǔuwn pfʉ̀ è kɔʼ. 5Ù loʼ wə n bvʉ̀ ndùw alo ugɔ̀ʼɔ̀, mo zu tə biso yǒ fughu. Sə a te ghə n tsùuŋ ko enyə, fùw è kɔʼ, zu tə màʼâ fə məə̄n yo an lùʼù kə te ko. 6A m bùghò zuuw e sə kɔʼ wo, zə n zùʼ è tsughu, ghəa u ki yô ghaŋ to, wə ŋ gwə̀n bò è kɔʼ. 7Sə à li ghə m bvʉ̀ nyə tsughu an lùʼu kəla nyɔ̌ɔŋmgbê ù nomlō a te, nyɔ̌ɔŋmgbê wə̀ n noo kwù ŋgwùu è tsughu, tsuʼn wì è tsughu, ghə ŋ kè bɔŋ. 8Sə à li ghə m bvʉ̀ ndùw am fòon kə kəlùʼu, noo bɔ̀ŋ dzɔ̀ è tsughu, ebuʼ è mɔ̀ʼ m fughuu kɔʼɔ̂ ghə̀m mə̀ àsə n təgha, buʼ à li ghə m fughuu kɔʼɔ ŋ̀ghəm tǔu, buʼ à li ghə m bɔŋɔ kɔʼɔ ndùw ŋ̀ghəm è ghəm.” 9Yɛso n tsughu tsən tsughu enyəa, “Ghùw wəla ù ki tuw ko, ù zuw!”

See kə kwə̀ənlò u ushwāʼ wə̄n

(Mat 13:10-17; Lûk 8:9-10)

10A m bùghò Yɛso sə̀ lo wən â nəŋ ko, ghî à li gho, aŋ ghì ghəla ghe fə̀ zəə̄n shwaʼ u wə̄n wo, n ndùw bùghò ghèe ghêe tsə̀təndə̄ghā tə wə̄n tən èghəm à ghè tò tə bə̀ghà, dzɛ̀ â wən enyəa ù teso dzâa wô kwə̀ən kə ushwāʼ kən. 11Yɛso n dzɛ̀ â ghee enyəa, “Ghe n sə ghɛʼɛ a tsʉ aŋ ghəa e fɔ̀e u Kəzə̀ ghəla a nân doʼō. Yia kuūwn bughò â ghî à li ghən a beē, ghəa ghə̀n à dzə̀m lò aŋ kwə̀ən kə ushwāʼ;

12 # Èzy 6:9, 10 to ghe e mgbaŋa koʼō nduw,

kòʼòkɛ̀lɛ yo,

ghe e zuuw nduw,

kuuwn zuuwkɛ̄lɛ̄ yo;

ghe lô tiī kuwnlō, ghe bvʉ̂a wô â tsəlà Zə̀ kò

Zə̀ kə̀ ghuūw maʼà kɔʼ bôo tə ghee.”

Yɛso tèso dzɛ̀ kwə̀ən kə ushwāʼ kə Ghûwsum

(Mat 13:18-23; Lûk 8:11-15)

13Yɛso ŋ kòom bvʉ â ghee enyəa, “Ghɛ̀ zuuwkɛ̄lɛ̄ yo kwə̀ən kə ushwaʼ kən a? Ghɛ̀ sô kwə̀ən u ushwāʼ ù li wən ù dzə̀m êzəŋ zuūwkɛ̄lɛ̄ ênzə̂n? 14Ghùwsum wən fɛ̄ tâa shwāʼ u te wo. 15Ghî à li ghən lo tǒ sə ghəla a bvʉ̂ tsughu an dziī; abugho ghe daŋso zuw tsughu shwaʼ u te wo, satàn m bùghò tsù nùghù kɔ̀ʼ shwaʼ u te wo am fə̀ŋ tə ghee. 16Ghî li ghən nyoʼn lò sugho tǒ sə ghəla a bvʉ̂ tsughu alo ugɔ̀ʼɔ̀, abugho ghe zuw kɔʼ shwaʼ u te wo, ghe n chʉɛ boo tsughu alo eduʼnlo; 17wə ŋ kè sô kuūwn nyəā məla ghee alo təfə̀ŋ, wə n tsùuŋ dòʼò tsughu ko aŋ kəmà fə enə̀gha; abugho tsû ù sə kɔʼ, ghe fala tsughu am fwàʼ kə Kəzə̀; ghe n tì zə̀ghà è tsughu. 18Ghî à li a lo tò ghəla a mò tsɔʼn nduw an nyɔ̌ɔŋmgbê. Ghe lo ghî ghəla ghe zuw tsughu shwaʼ u te wo, 19yìa à kuūwn lô enyəa ghe nəŋlo aŋ ghəa a mbī gho, ləghâa kum e mbī, àsùghò ndə̀mà tə aghəa tə mbī to; ghəa a te yia a boōn maʼà tsughu ghəa a Kəzə̀ ghəla a lo ghee alo təfə̀ŋ enyəa a ka noo bɔ̄ŋ. 20Sə ghəla a mò kuūwn bvʉ̂ tsughu an zù tə̀ ləə̄m to lo tò ghî ghəla ghe zuw tsughu shwaʼ u Kəzə̀ wò, tɔ̀ʼ bǒo tsughu am fə̂ŋ è dzùŋ, mʉ̀ ndùw ùtwam, à li gho ŋghəm n təgha n təgha, à li gho ŋghəm tǔu, à li gho fəbɔm.”

Kwə̀ən kə ushwaʼ kùu ndùw lâm

(Lûk 8:16-18)

21 # Mat 5:15; Lûk 11:33 Yɛso n dzɛ̀ kpèʼe ndùw â ghee enyəa, “Ghùw lò nû aledàa tsughu lâm, ù nìi naŋā nyəā ndûw a tsəla kəkə̌a ŋkāa a tsəla uchʉ̀a, mò ù kà tìso kɔʼ am fəgha kəla kə dâ sə kɔʼ tò ti kə lâm à? 22#Mat 10:26; Lûk 12:2 Ghəa è li e yo ghe nân naŋā mo e kê bùghò sə̌a yo ndɛ; ghəa è li e yo sughò ghe tsɔŋ ghəŋlo, e kê səā yo an tsə̂. 23Abugho ghùw ki tûuŋ ko alezūw, ù zuw!” 24#Mat 7:2; Lûk 6:38 Ù n dzɛ̀ kpèʼe ndùw a ghee enyəa, “Naŋa nlò tuw ko aŋ ghəa ghəla ghɛ̀ zuūw; fòʼ zəla ghù fòʼo fughu səā nduw, à lò sugho fòʼ zəla ghù lo kele, ndə̀m è lì ke nāam buʼ lo kpeʼe. 25#Mat 13:12; 25:29; Lûk 19:26 Nu ghùw wəla ù ki, ghe kê fùghuu kpeʼe wə̄n; wəla ù ki yo, nyàaŋ fə̀là ù bùʼ ki, ghe kê nìi nùghùun nù.”

Kwə̀ən kə ushwāʼ kùu ndùw esām e nomlō

26Yɛso n nùghù ndùuŋ ndùw â ghəa à kəā gho enyəa, “Fɔ̂e u Kəzə̀ ù lo tò ghùw lò təmā naāŋ nduw ŋgòʼ a ghuu, 27ù ŋ ghəəŋ zee ndùw ghəa a wə̄n â tsə̀ tò, fəŋò bwii ndùw wə̄n â mgbii to, ŋgòʼ zə m fwə̄n è kɔʼ, noo è kɔʼ mò ghùw u te kwo yo tuw ko a te. 28Zə n tsò fwə̀n sùghò aŋ ghùe fughu a ghueetsə̄, bùʼ mgbə̄n sə̀ kɔ̀ʼ è dzə, fughu kɔʼ ebuʼ, daŋso nyə tsughu am būʼ e te zo. 29#Dzw 3:13Abugho sə a te a biso tsughu, nəgha e fi kpē nû â fʉ̀ghàzəa wo alekwə̄n, ù n daŋso sugho alo fənyə̄.”

Kwə̀ən kə ushwāʼ kùu ndùw sam e Mostàd

(Mat 13:31-32, 34; Lûk 13:18-19)

30Ù n daŋso nùghù bvʉ tsughu enyəa, “A lo alenìi fòʼsò ndûw fɔ̀e ù Kəzə̀ ghèe kwò kò à, ŋkāa a lo alekə̀a tsughu kwə̀ən kə ushwāʼ kə̀ ghɛ ko aleteso a tè à? 31U lo tǒ nyàaŋ fə esam fə̀ li fo ghe taā tsughuu, ghe tɔŋlo enyəa à lò sam e mostàd, fə to tsəghà sam to tə dzə̀m aŋ ghueetsə̄; 32abugho a tam tsughu, zə ŋ kuuwn nōo dùw tsə̀ghà tsùghu kàʼ mə̀n n dzə̀m, fughu sə̀ wò kùee tə̀ ne to, nwə̀n mə̀ m bughò bə̀ghaa tə̀ndughu a te.”

33Yɛso n tsò kə̀a tsùghu ghee â kwə̀ənlò u ushwāʼ wo enyə ndə̀m aŋ ghəa ghe fə̀ tso ki alezuūwkɛlɛ; 34ù kaa ŋgəmso kə̀a ghəa zo â ghee mò ù kà kwə̀ən kə ushwāʼ ko a te bughò dzə̀n, kuuwn nyɛʼɛ ndùw tèso dzàa tsùghûu ghəa a te gho a dzə̀m â tsə̀təndə̄ghā tə wə̄n to.

Yɛso bughu naŋa zə̄ŋ

(Mat 8:23-27; Lûk 8:22-25)

35An tsuʼ fə te fo ko an nə̀gha è guŋsō zo, Yɛso n dzɛ̀ â tsə̀təndə̄ghā tə wə̄n to enyəa, “Bùghò nlò sɛ̀ daŋà səā ndûw a ŋgùŋ èzə̂.” 36Ghe n zə̀ghàa tsùghù saʼ kə aghì chì, nyə kɔʼ aŋ kwə̀n chia Yɛso mò lo a te, dzə̄ŋē nùghù è nduw. Kwə̀n ù li wə n tso lò sugho fughu. 37Bòobò kə zə̄ŋ kə̀ li kə n nùghù nùghù sə kɔʼ fughu an dzughù, tùŋutùŋu kə n tûuŋ kǎaŋ tsə̀ghà kwə̀n chi enyə, mùghù mə̀ ŋ kàʼ ndùw alenyə a te. 38Yɛso n lo am bàm kə kəkwə̀n, bwii fughu, mò n tuw kə gaʼ alo kətàlà; ghe n ndùw zòm kɔ̌ʼ wə̄n, dzɛ̀ â wən enyəa, “Wàdè, à lò enyəa ghù dɔ̀m tǎa yo e zəghà zò abugho a kpuw ŋkāa a?” 39Ù n nùghù è kɔʼ, daŋso kē tsughu kʉ̀ɛɛ kə te ko enyəa, “Bughu dòʼô! Dòʼò mɔŋ!” Zəŋ zə m bùghù dòʼò è kɔʼ, luʼū tə ŋ kòom nùghù zuw dòʼò tsùghù mɔŋ. 40Ù n daŋso bvʉ â ghee enyəa, “Ghɛ̀ tsəŋô kwò à? Ghɛ̀ naam ki ko yo fə̂ŋ tò a zəŋò Zə̀ kò à?” 41Ghue zə m kpuw lɔŋe tsughu ghee enyə, chìa m bvʉ â chìa enyəa, “Wən lò ndughoo, kʉ̌ɛɛ kə sô zuūw â wə̀n à, à dzùghù a?”

Currently Selected:

Mâk 4: agq

Highlight

Copy

Want to have your highlights saved across all your devices? Sign up or sign in

2020

Learn More About To kə Kəzə̀ kə̀ Fughu ko

Popular Bible Verses from
Mâk 4

Videos for Mâk 4

Mark 4:1-34

Lumo Project

Mark 4:35-41

Lumo Project

Mâk 4

Popular Bible Verses from
Mâk 4

Videos for Mâk 4

Mark 4:1-34

Mark 4:35-41

Bible:

Aghem

Version: To kə Kəzə̀ kə̀ Fughu ko - agq

Mâk 4

Mâk 4

Popular Bible Verses from Mâk 4

Videos for Mâk 4

Mark 4:1-34

Mark 4:35-41

Bible:

Aghem

Version: To kə Kəzə̀ kə̀ Fughu ko - agq

Mâk 4

Popular Bible Verses from
Mâk 4