Mâk 6
6
Ghe tue màʼà Yɛso an Nazalɛ̀t
(Mat 13:53-58; Lûk 4:16-30)
1Yɛso n zə̀ghà tsùghù bâ kə enaʼ chìa ù mò lo a te, nùghùu wò an nāʼ zəla ù noō a te, tsə̀təndə̄ghā tə m bùghò dzə̌əŋ ko ghèe ghee. 2A m bùghò Tsuʼntsə̄ u Tə̀dzûu, ù n nyə kàʼ ndùw ghì à zoʼn gho an Ndùghène è Tə̀dzûu. Tuw kə m kpuuw ndə̀m è àghì ghəla ghe mò zuw ghəa yìa ù mò kəā, ghe n dzâa tsùghu enyəa, “Tûw wə̄n fə̀ ghəa ghən ni wo ghɛ? À wə̄n â ŋgòʼ è utɔ zən bòʼò fùghù ndughoo a? Kòʼo to kɔ tə aghəa təla ù ghənlō à! 3Wən mgbàŋ yò kɔmfəndàŋ wə̀n à, wɛ̀ ù Mèle wən a? Yia a so wə̄n lǒ wàazə̀ Dzɛ̂ms, ghèe ghê Dzosɛ̀s, à Dzudàs, àsùghò Sǎemòn a, wàazə̀ Dzɛ̂ms, waazə̂ à zən a gbaŋ yò ko fɛ sɛ̀ à?” Nə̀ghà mə̀ m mbè ndùw ghee a zəŋò wə̄n.
4 #
Dzn 4:44
Yɛso n daŋso dzɛ̀ â ghee enyəa, “Ghî à tsəŋo ghùwshʉ̀ghà ù Kə̀zə̀ luʼū tən tə̀ dzə̀m, à gɔ̀ʼɔ̀ ko an naʼ e wə̄n, kèndughu kə wə̄n, àsùghò ndùm è ghee.” 5Ù n yo aledè fənlo è li zo a fughu, à fə̀ gɔ̀ʼɔ̀ kô ghəa ù fə̀ gaʼ ndûw ghu a wə̄n gho a zəŋò sə fə aghì à dzaŋa à li gho, baaŋ kɔʼ ghee. 6Dzughu zə zum wən aŋghəa ghe taʼkè boō fughu â wə̄n.
Yɛso n daŋso nùghù è tsughu, ŋgəaa ndùw nàʼà n te məla m mò lô kaāŋ fughu, zoʼn ndùw àghì.
Yɛso tum tsə̀təndə̄ghā tən èghəm à ghè tò tə bə̀ghà
(Mat 10:5-15; Lûk 9:16)
7Yɛso n tɔŋɔ zùuŋ wò tsə̀təndə̄ghā tə wə̄n tən èghəm à ghè tò kə bə̀ghà a vʉ̀a wə̄n, zìi tsùghu ghee a lùʼù tuu səa wo, a bə̀ghà à bə̀ghà, fughuu tsughuu ghee â dwaʼa wəla u ghaʼā wo zʉ̀ ù biigh wo. 8Ù n dzɛ̀ â ghee enyəa, e kwo ghe lô nîi fəgha ko am bwìnlò e ghee, ghe nîi kɔʼɔ̄ ko mbàŋ; enyəa ghe ka nî fəgha kə̀ zəa ko, ghe ka ni mbə̀ghà, ghe ka dzə̂n kua wo alo mmbə̀ghà; 9ghe dzəlà kɔʼɔ̄ ko tə̀gùw, ghe ka sɔ̀ʼn wo u bʉ̀ghà dzəlà. 10Ù n dzɛ̀ â ghee enyəa, “Mò ghɛ̀ nyə ko an ndughū alô ndùghò, ghɛ̀ m bɔɔm mùghùu ko fughu tò ghɛ̀ ke bugho zəghāa luʼū kə te ko. 11#Kfw 13:51#Lûk 10:4-11 Abugho ghe doʼŋkè kpeēnî ghɛ̀ an lùʼu kə̀ li ko, tue enyəa ghe zuuw yo shwaʼ wɛʼɛ wo, mò ghɛ̀ zəghàan naʼ e te zo, ghɛ̀ m bùʼ màʼà tsùghù gbə̂n chia aŋ ghùw ghɛʼɛ̄ tǒ tsə̌a enyəa ghɛ̀ n dzə̀m â ghee nyuʼu, bòʼ enyəa ghe ŋ ghəəŋ bonlo.”
12Ghe fi sə ndùw nù, nàʼn ndùw enyəa ghî ghə̀n à dzə̀m màʼà èbo. 13#Dzm 5:14 Ghe n dzùm sə̀ ndə̀m è ùzʉ̀, ghe n zɔʼn#6:13 vʉ məla ghe dzâa fɛ lò Mvʉ n tə̀ Olèf, ghe zɔʼɔ tsughu a zəŋò ghùw enyəa Zə̀ kə̀ fughu ghùw ù te â bughun zo. sùghò ndəm è aghì à dzaŋā gho alo mvʉ̄, baaŋ tsughu ghee.
Ghe gbô tuw kə Dzɔ̌n wəla ù fughu mùghù ŋ Kə̀zə̀ mò
(Mat 14:1-12; Lûk 9:7-9)
14 #
Mat 16:14; Mâk 8:28; Lûk 9:19 Hɛlɔ̀d, tɔɔŋ Kə̀də̀ŋ, n zuw ghəa ghəla Yɛso mò ghəŋlo, nu zwɔ̂ŋ u Yɛso ù maā ŋge ndza luʼū to. Ghî à li a fə̀ dzaā enyəa, “Ghe n Dzɔ̌n, ghùw wəla ù fughuu mùghù ŋ kə̀zə̀ mò zôm nùghù kɔ̀ʼ alo evʉ̄; zən lò e ghee dwaʼa u te u fwaʼà a zəŋò wə̄n enyə.”
15À li ghə ŋ kuuwn dzàa enyəa, “À lǒ Elaedzà.” À li ghə n dzâa enyəa, “À lǒ ghùwshʉ̀ghà ù lì, ù lǒ tò ghiishʉ̀ghà à wii ghən.” 16A m bùghò Hɛlɔ̀d kuūwn zuw tsughu, ù mo enyəa, “Dzɔ̌n wəla mùgho mò gbô tuw ko, ghe ŋ wə̄n zôm nùghù kɔʼ alo evʉ̄.” 17#Lûk 3:19, 20 Ù mo êzə dzɛ̀ tsughu bòʼ enyəa, ghuūghùe u wə̄n u fə̀ tum sə aghî, ghe n ndùw kwù dzə̀n ndùw Dzɔ̌n an ndùghùtsaʼ enyəa à lò ghəa e Hɛ̀lòdìa, wì ù Felêp, wàatsele, ù mò nî tsughu aŋ wi. 18Ù mò ghəa ghən a zəŋò Dzɔ̀n ghəəŋ tsughu, Dzɔ̌n màʼà mgbɛɛ dzaā tsəghà ko â wə̄n enyəa, “Lâŋ kə̀ kâ bǒo dzə̀ enyəa ghù koom ni wì ù wàatsùghò aŋ wī.”
19Hɛ̀lodìa n nì nyə̀a nàŋa ndùw Dzɔn aŋ ghəa e te zo, kəŋo tsə̀ghà alewī wə̄n kuuwn ghàa kèe tsə̀ghà, 20Hɛlɔ̀d màʼa fə̀ tsəŋō tsəgha Dzɔ̌n, ù sò kwo enyəa à lǒ ghûw ù tsəghatsəgha, zɔlɔ sùghò. Ù m baʼà mbàŋ an tuw kə wə̄n. Hɛlɔ̀d mò zuūw tsughuu shwaʼ u Dzɔ̌n wo, ghue wə m kpuw tsughu wə̄n enyə; ù n naam ləghaa ko alezə̂ən shwaʼ u wə̄n u te wo.
21Ghuw kə m bùghò tsə kɔʼ Hɛ̀lodìa enyəa Hɛlɔ̀d fə̀ duʼnlo enyəa ghuw ghə edzə̄ a wə̄n a tsəghà kpè nû, ù ŋ kəan fughuu ghî a wə̄n; ghî a tɔ̀ʼ è wə̄n, ghî a tuw u ufwàʼ, à tsoʼ tə Galèlîi tò. 22A m bùghò wɛ fə Hɛ̀lodìas fə̀ zən fə bughò nyə kaʼ tsughu bən zo, fə ŋ ghəən tsughu Hɛlɔ̀d n tsoʼn ndùw ènyə ghèe ghêe ghì ghəla ghe mò lo a fughu, də̀ŋ kə te kə n dzɛ̀ â zən fə te fo enyəa, “A bugho ghù ləghaa ko kwò kò, dzǎa wò, Ǹ sô fughu.” 23Ù n dzə̀m kɛ̀ sə wò enyəa, “A bugho ghù bvʉ ko kwò kò, M̀ fughuu nù, abugho à bùʼ lô ko bâ kə enaʼ kaŋā.” 24Zən fi n nùghù sə̀ èndùw, sə bvʉ tsughu â zə̀ enyəa, “Ǹ ndûw bvʉā ndûw kwò à?” Zə̂ mo enyəa, “Ndùw bvʉ ndùw tuw kə Dzɔ̌n wəla ù fughuu ghî ghò â mùghù ŋ Kə̀zə̀ mò.” 25Dzə̂ tə̀n tə̀ bə̀ghà mo fə sô kòom tì a vʉ̀a də̀ŋ kò, â wə̀n à, “Ǹ ləghaa enyəa ghù fughu wo mugho â tuw kə Dzɔ̌n Fùghùu mùghù ŋ Kə̀zə̀ kò aŋ kwônɛ̀lɛ aŋ ghəa a ti fɛ.” 26Ghəa a te ghə n zà ndùw də̀ŋ chi ko enyə am fə̂ŋ; ghəa ù màʼa fə̀ lo mò ù ŋ kɛ̀ bònlo, àsùghò ghəa ghî a mò lô sugho an ndughu, u ŋ kôom yò aletuū maʼà ghəa ghəla zən fi bvʉā. 27Də̀ŋ chi kə n daŋso tum tsughu gbè e mɔ̀ʼ enyəa è ndùw gbôo wô â tuw kə Dzɔ̌n ko, ghùw vʉ n ndùw gbò tsùghù tuw kə Dzɔ̌n an ndùghùtsāʼ, 28bòʼò wò â ghè kò aŋ kwônɛ̀lɛ, bùghò fùghù wò â zən fi fo. Zən fi n daŋso bòʼò fùghù ndùw â zə̀. 29A m bùghò tsə̀təndə̄ghā tə Dzɔ̀n tə̀ zuw tsughu ghəa a te gho, ghe m bùghò bòʼò nùghù ndùw â gwən e wə̄n zo, ndùw tsə̀la è nduw.
Yɛso fùghù kam tə aghì tə tɛ̀ â fʉ̀ghàzəa wo
(Mat 14:13-21; Lûk 9:10-17; Dzn 6:1-14)
30Tum tə Yɛso tə̀ ŋ kwə̀n nyə wò e bàm a vʉ̀a wə̄n. Ghe n nì kɔ̀ʼ fəgha kəla ghe fwaʼ à ghəa ghəla ghe zoʼnlō, dzɛ̀ tsùghù â wə̄n kpe. 31Yɛso n dzɛ̀ â ghee enyəa, “Bùghò nlò sɛ̀ ndûw doʼò tsughu an saŋe kə kəlùʼu tò ghɛ̀ nya zʉʉ̄n tsughu ghue zo.” Ù mo êzə dzɛ tsughu bòʼ ghî a mò mgbɛɛ nyəŋo ko a vʉ̀a ghee, ghe m bûʼ kì yo nəgha zo alezə̄. 32Ghe n nùghù tsùghù alo kəkwə̀n alendùw doʼò an saŋe kə kəlùʼu ghee à nəŋ ko.
33Ndə̀mà tə aghì tə̀ ŋ kòʼ tsùghù ghəa ghe nughùun nduw a te, kòʼkɛ̀lɛ ndùw ghee, ghî a te ghə n sə̀ tsə̀ghà tsughu ko alo aghùw, nyə̀ŋ ndùw dòʼò zìi ndùw fia ghe mò nduūw. 34#Taŋ 27:17; 1Ud 22:17; 2Tw 18:16; Ɛ̀zi 34:5; Mat 9:36 A m bùghò Yɛso ndùw a ŋgùŋ è dzùghùntsòʼ, ù ŋ kòʼ nɔ̀ɛ kə aghì; kwuso tsughu ese a zəŋo ghee, bòʼ ghe mò lo tǒ ndzì təla tə ki yo ghùw wəla ù bàʼa ghee; ù ŋ kàʼ ndùw ghee alezōʼnlō an ndə̀mà ndə̀mà tə aghəa. 35A m bùghò tsuʼ u nyə̀ghàan wo, tsə̀təndə̄ghā tə wə̄n tə m bùghò dzɛ̀ â wən enyəa; “À fɛ lò an saŋe kə kəlùʼu, nəgha zə ŋgè tsə̀ghà sùghò; 36dzǎa tsughu enyəa ghe sɛ̂ɛ ghe lô nəə̄ŋ kwəlā zuū zəa fəgha ko enaʼ ŋkāa aŋ ŋgwə̀là tən fɛ.”
37Ù m fwə̀n dzɛ̀ â ghee enyəa, “Fughu tsughu nlǒ ghee â fəgha kə̀ zəa ko.” Ghe n dzɛ̀ â wə̄n enyəa, “A bɔ̀m n tə̀ dɛnalì#6:37 dɛnalì fə̀ fòʼ zəla ghe fə̀ taŋā kua wo a te. mò m bə̀ghà boʼò nìi wò gh tò sɛ̀ è zuū fughu ufʉ̀ghàzəa wo a te à ghì ghə̀n à, enyəa ghe zə a?”
38Ù m bvʉ â ghee enyəa, “Ghɛ̀ ki ugbɛ ù shòʼ a? Ndǔw lɛɛn tsùghùu.” A m bùghò ghe ndûw kôʼ tsughu, ghe mo enyəa, “U twɛ̀, à sə a tətsə̄ghāa gho a bə̀ghà.”
39Ù n dzɛ̀ â ghee enyəa, “Ghɛ̀ ghəəŋ tsughu enyəa ghî ghən tsughuu doʼò tsughu alo ntùʼù an uzwǐi wən” 40Ghe fi tsughu dòʼò tsùghù sùghò nù alo ntuʼù, mo fetuʼù fə mɔ̀ʼ fə̀ ghəəŋ kɔʼɔ àghì fəbɔm, fə̀ li fo aghî ŋghəm n tɛ̀. 41Ù n nì kɔ̀ʼ gbɛ vʉ̀ ù twɛ̀ à tsəghaa tì to tə bə̀ghà, lɛɛn kɔ̀ʼ ndùw kəwala, fughu ndùw kə̀zɔ̀ŋlò â Zə̀ kò. Boʼn fughu tsughu â tsə̀təndə̄ghā tə wə̄n to enyəa ghe dzughùu fughuu ndûw â ghì yì gho; ù ŋ dzùghùun fughu kaaŋ wò tsəghaa tì to â ghì yì à dzə̀m. 42Ghee a dzə̀m n ndòʼ zə̀ kùw è tsughu; 43kuum lueso kɔʼ boʼò mə̀ mbàa àsùghò sugho tətsə̄ghāa to alo ushwàʼnlo eghə̄m à ghè wò u bʉ̀ghà. 44Ghî yia ghe mò zə gbɛ vʉ mò lo kam tə a yìnû tə tɛ̀.
Yɛso bwìi an tuw kə mmùghu
(Mat 14:22-33; Dzn 6:15-21)
45Yɛso n daŋso lùum dzə̀n kɔ̌ʼ tsə̀təndə̄ghā tə wə̄n alo kəkwə̀n enyəa ghe nughù ndûw am Bɛ̀dsǎedà â sə ko, e kuūwn ghəə̄ŋ tsughu ghî à sɛ̂ɛ tsughu. 46Ghəa ù təmā nduw ghee, ù n nùghù kɔ̀ʼ ndùw aŋ kwàʼ alekɔʼɔ̄ gɔ̂ŋlò. 47A m bùghò tsuʼ u nyəghàan wo, kwə̀n kə te kə n lo an dzughù tèetè, ù ŋ kuuwn lǒ wən à nəŋ ko a beē. 48A m bùghò u kòʼ ghəa ghəla ghe dəmā ghèe ghêe kpaʼa ko, kʉ̌ɛɛ kə màʼà tə̂əm tsəghàa foō mâʼn wo ghee ebàm, ù m bwìi kə̀ŋo wò an sə kə ghee, â lə̌mlə̌m to enyə, mò ù bwìi wò an tuw kə mmùghu. Ù ŋ kəəŋ wò tò ù se bughò zəə̄ŋ kɔʼ u ghue ghèe ghee. 49A m bùghò ghe kuūwn kôʼ ndûw ghəa ù bwìi wo an tuw kə mmùghu, ghe n dzɛ̀ ko à lò avʉatsə̄a, màʼà sə̀ kə̀bɔ̀ŋ, 50nu ghe mò koʼ nduw wə̄n fə̌ŋ m bàa ghee. Ù n daŋso kə̀a ndùw ghee ghəa gho, dzɛ̀ â ghee enyəa, “Kele tsughu nlǒ fə̂ŋ, kǎ nlò tsəŋ; à lò mugho.” 51Ù n daŋso nyə dzəəŋ kɔʼ alo kəkwə̀n ghèe ghee, kʉ̌ɛɛ chi kə n tsùghù bvʉ̀ è tsughu. Tuw kə ŋ kè wàʼsò kpùw ndùw ghee enyə, 52tɔŋlo enyəa ghe ka mō zuwkɛlɛ̄ sùghò ghəa a ugbɛ a yî, ghe màʼa fə̀ tughū â fə̀ŋ tò alezuūwlɛlɛ̂ ghəa a te gho.
Yɛso bǎaŋ ghìidzaŋā ghò an Dzɛ̀nɛ̀salɛ̀t
(Mat 14:34-36)
53A m bùghò ghe dâŋ sə wo, ghe m bùghò an naʼ e Dzɛ̀nɛ̀salɛ̀t, tə̀ŋò nàŋa ndùw kə̀kwə̀n. 54Ghəa ghe sə tsughu alo kəkwə̀n ghî ghə̀ n daŋso kòʼkɛ̀lɛ wò wə̄n, 55nyəŋ ŋgəa tsughu mbùʼ è te e dzə̀m, kàʼ tsughu alebòʼn wô ghì à dzaāŋ gho a vʉ̀a wə̄n aŋ ŋghàm ŋ ghee bugho ghe tso zuw tsughu dzə̂ enyəa ù lò alo kəlùʼu. 56Mò ù ndùw ko ghɛ an nyàaŋ mə̀ n nàʼàʼ ŋkāa an naʼà tə̀ ne to, ŋkāa alo təŋgwə̀là, ghî ghə̀ m bòʼn nàŋa wò ghì à dzaāŋ gho am fwànlò u tə̀dzǐi. Ghe m buʼu kə̀ghu â wə̄n enyəa to ghe mô mɔ̀ɔ tsùghuu kô dzughu e təndzʉ̄ e wə̄n. Ghee a dzə̀m ghəla ghe mò mɔ̂m tsughu, ghe mo è tughu.
Currently Selected:
Mâk 6: agq
Highlight
Share
Copy
Want to have your highlights saved across all your devices? Sign up or sign in
