Jn 12

Ɛ́ yiósé Jesus ɛ Betani

(Mat 26.6-13; Mak 14.3-9)

1Nɛy se lu nɛ bɛɛse əbchii ntuufe, ɛ́ yɛ yiɛ Kechii Ɛyboyse, Jesus ndu ɛ Betani bene fɛ Lazalus wɛ əb nè losen se ɛykuo nè chiin. 2Ɛ́ nè lô fɛl əbfua-əbyíɛ́ne se Jesus fo, Malta se gwiye so ge ɛ́ yɛ yiɛ. Lazalus nè lu wel əblee wɛ ghene ghe Jesus nè diom se yɛ yiɛ. 3Mɛɛle me liɛ febel felee nɛ keyióséne keləm kejuŋe lu ɛ ten, è me yiose ɛvəə Jesus so è fikse nɛ̀ nəŋse ketuu nə wene. Ndaa ɛyjim me chinten è se ki keləm nɛ ke jofe ge.

4Wan-ɛyfɛl nə Jesus əblee, Judas Iskaliot, wɛ əb nè lóòn se feene wen me suuy ge: 5Lu bek ghɛ wɛ ɛ́ kè lòó ɛ́ jia feene keyiósén kin se denalii ɛyviɛ ɛytal è gia əbkaa ten se ghɛ́ ketane. 6Judas nè báà se suuy dì ge bek ka əb kiin shii se ghele ketane. Ka əb nè lu wele kebam nə ghon-ɛyfɛl nə Jesuse, əb nè lóó əb soŋ kefaa ɛ ten. Əb nè lu əbchoŋ.

7Jesus me suuy ge: Ghɛn vəse wen nyiaŋ. Əb kè yiose mɛ se siyse əbghun ə wom ka kechii nɛ̂y kwɛn é ɛ́ gvəəme. 8Ghɛne nɛ̂y yɛ yese lu ghɛne ghele ketane, dî nɛ mɛ bɛɛy wiy se yɛ lu ghɛsen se əbtəm.

Ɛ́ báà ntaŋ se yuye Lazalus

9Feliɛ ghele Juuse nɛ̂y keele ge Jesus lu ɛ Betani, è gwiy nɛ wiy kɛn bek wen, ghene nè gwiye sɛy se yɛne Lazalus wɛ əb nè losen se ɛykuo. 10Ghele mbiy se ghɛ́ ntaŋlee me se chio ntaŋse ge ɛ́ yúy sɛy Lazalus. 11Lu bek Lazalus wɛ ghele Juus se ɛydio nè nyiŋen ghele mbiy nə ghen gwiye se Jesus, foo ɛytem se wen.

Jesus lii ɛ Jolesalem ka əbfon

(Mat 21.1-11; Mak 11.1-11; Luk 19.28-40)

12Əbtəke yio, feliɛ wel fɛ fe nè gwiyen se yiɛ Kechii Ɛyboyse yio ge Jesus liɛmen jii Jolesalem, 13ghene me liɛ əbyaŋ, è se nduu se baksene wen ləke ge: Ɛykokse lu se Feyine. Feyine bose vi dì wɛ əb gwiyen ɛ ɛyghel nə Bay! Feyine bose əbfone Islael.

14Jesus kiile wan kembɛɛybiy, è kok ɛ ten ka ŋwaale-Feyine nè suuyen ge:

15“Ghàà ghɛn yɛ fan mba ghele Zione.

Yɛn-a, əbfon ə wɛn gwiye

nɛ əb diom ɛ ketuu wan kembɛɛybiy.”

16Nè lu əbliy fo nɛ ghon-ɛyfɛl nə Jesus keele wiy ge əbnəə wɛ kum Jesus vin sɛ lu gee ghɛ-a? Nɛy se lu əbliy wɛ Feyine nè losenmen wen se wen ə əbghaake, ghene me kuume ge lu kenəə kɛ ɛ́ nè nyakenmen ɛ ŋwaale-Feyin kum wen ka ke kooymen dì.

17Feliɛ wel fɛ fe nè luun ghene ghe Jesus ɛ əbliy wɛ əb nè losen Lazalus se ɛykuo me se suuy əbnəə se ghele wɛ ghene nè yɛnen əbliy fo. 18Nè lu bek əbchəyte wɛ əb nè dinen nɛ̂ vin wɛ ghel se ɛydio nè yion, è fəy è gwiy se yɛne wen. 19Ghele kenone Falisee me se suuy se ngeŋse ghene ge: Yɛn-a, kenəə kine chiamen kediake kɛ́sen. Ghel ɛjime se nduu kɛn ɛ wen ɛybam.

Ghele Gleeke se kɛŋe Jesus

20Nè lu dî nɛ ghele Gleese lu ɛ məme ghel ghɛ ɛ́ nè gwiyen se kokse Feyin ɛ əbliy ɛyyiɛ Kechii Ɛyboyse. 21Ghene me ndu se Filib wɛ̂ Betsaida ɛ Galilee è se lone ge: Babɛy, ghɛse kɛŋe se yɛne Jesus.

22Filib me ndu è suuy se Andole ghene wen me ndu è suuy se Jesus.

23Jesus fise ge: Əbliye kwɛnmen wɛ Wanwele kiile əbghaake ə wen. 24Mɛ suuy əbluuy se ghɛn ge: Loo lu nɛ ɛ́ báà vii ɛyshiɛ ɛysaŋ se ntiɛ ɛy foy, fene ɛy bɛɛy kɛn ɛymok. Dî nɛ loo lu əbliy wɛ ɛy foyen, è fəy è bus, ɛshiɛ tene yɛ dio. 25Naa ndɛ wɛ əb koŋen ɛychii ə wen nɛ̂y lim ɛyghene dî nɛ wel vi wɛ əb bane ɛychii wen ɛ mbi fɛne lɛ́mè se náà se kiile ɛychii yɛ ɛy jia yî mɛy. 26Naa ndɛ wɛ əb fɛ́len se mɛ lu se yɛ jumte mɛ, nɛ ghááy wɛ mɛ luun lu nɛ wel ɛyfɛl nə mɛ lu se yɛ lu fo. Naa ndɛ wɛ əb fɛ́len se mɛ lu nɛ Baye nɛ̂y ngvəmle wen.

Jesus suŋnen kum ɛykuo wen

27Kɛ́ leenene lu nɛ ɛytem ə yome foo ngɛk san, nɛ lòó mɛ suuy gee ghɛ? Ge Bay, boyse mɛ se kenəə kɛ ke luun se kooy əbliy fɛn-a? Ɛngaŋ, mɛ nè gwiy ɛ ketuu ntiɛ fɛn bek əbliy nɛ̂ vin. 28Bay, dine se ghele jii yɛ əbghaake viɛ luun ɛ ten.

Əb suuy dì ɛ leghɛ, giɛ me səəke gwiy ɛ ɛyyio ge: Mɛ dinmen əbghaake ə wom nɛ mɛ nɛ̂y gese din.

29Ghel ghɛ ɛ́ nè luun fo yio è me se suuy ge, ɛyghuu lu nɛ ɛy dəm, nɛ ɛlee suuy ge, suŋnen nchiy-ndaa-Feyin se wen.

30Jesus me suuy ge: Giɛ yɛ ɛy səəken gwiy yin lu bek ghɛn nɛ báà se lu bek mɛ. 31Lu ɛ leenen wɛ Feyine sak mbi yin, nɛ gese lu ɛ leenen wɛ Feyine jum wel wɛ əb saken mbi yin. 32Kome lu ge ɛ́ nɛ̂y loo lu əbliy wɛ ɛ́ losenmen mɛ se ntiɛ è kokse, é mɛ liɛ wel əbjim se mɛ əbghun. 33Əb nè suuy kine se din ɛynkii ɛykuo yɛ əb nè luun se kuo ɛyghene.

34Ghele fise ge: Ɛysak ə yɛ́se dine ge Vi wɛ Feyine nè Yiosene yî yɛ chii ndu kɛn nduun. Ke ghan lɛɛy nɛ wɛ̀ geese yɛ suuy ge ɛ́ lu se lose Wanwel. Wanwel nɛ̂ vin lu ndɛ?

35Jesus fise ge: Wel wɛ əb fóon ɛyban bo bɛɛy se yɛ lu ghɛne ghene se feleeŋese əbliy. Ghɛn yɛ jɛle ndu ɛ mbiy nɛ ɛybane bo bɛɛy buu dî é kebɛye fin ghɛn, wel wɛ əb jɛ́len ɛ nfiine báà se ke ghaa əb nduun. 36Ka ɛybane bo bɛɛyen se ghɛn, ghɛn fó ɛytem se ten ka ghɛne yɛ lu ghel ə ɛyban.

Ghele Juus tɛn se beeme əbnəə wɛ Jesuse suuyen

Jesus suuy əbnəə vin dì, è me lòò è ndu è lel. 37Chèmè lu ka əb nè nɛɛyen əbchəyte əbchio əbyúméné ɛ ghene ɛyshiɛ, ghene nè báà fo ɛytem se wen. 38Ke nè gan dî se nɛɛy ge kenəə kɛ wele ntum nə Feyine wɛ Ezaya nè suuyen kwɛn, əb nè suuy ge:

“Báàba, fô ndɛ ɛytem se sakghɛ wɛ ghɛse fekten?

Báàba nè din əbtaawe wen se ndɛ?”

39Kenəə kɛ ke nè nɛɛyen ghene jia fo ɛytem nè lu ka Ezaya nè suuyen ge:

40“Feyine chitemen ɛshiɛ ə ghen

è nɛɛy ghene se ki ɛytof ɛytəme.

Buu dî é ghene loo yɛn nɛ̀ ɛshiɛ ə ghene,

yio nɛ̀ əbtuule ə ghene

keele əbnəə nɛ̀ tetem ə ghene,

è fiile se mɛ

ka mɛ chuk ghene. Di ghɛy ka Báàba suuyen.”

41Ezaya nè suuy kine bek ka əb nè lô yɛn əbghaake Jesus è se suŋnen kum wen.

42Nè lu dì nɛ ghɛ́ mbiye nə ghele Juus se ɛydio kô fo ɛytem se Jesus dî è se fane ghele kenone Falisee se yɛ suŋnen kum ɛybeeme ghen ɛ dɛɛne fɛ ɛ́ jum ghene se ngay ɛyjem. 43Ghene nè koŋe ge ghele yɛ bente ghene chia ka yɛ bente Feyin ghene.

Kenəə kɛ Jesuse fektene sake ghel

44Jesus me suuy ɛ giɛ ɛytaa ge: Naa ndɛ wɛ əb foon ɛytem se mɛ báà fo kɛn se mɛ, əb fo nɛ lu se wel wɛ əb nè tumen mɛ. 45Naa ndɛ wɛ əb yɛnen mɛ, yɛne sɛy wel wɛ əb nè tumen mɛ. 46Mɛ nè gwiy ɛ mbi fɛn ka ɛyban, se nɛɛy ge naa ndɛ fo ɛytem se mɛ é əb jia gok ɛ nfiine. 47Wel yio kenəə kɛ mɛ fekten, è jia yɛ yionen, é mɛ jia sak wen. Mɛ nè báà gwiy se sake mbi, mɛ nè gwiy se boyse ghel. 48Naa ndɛ wɛ əb tunsen mɛ, è jia beeme kenəə kɛ mɛ fekten yɛ ke ge kii dii lu kɛ ke yî sak wen. Əbnəə wɛ mɛ suuyen yî yɛ lu se sake wel nɛ̂ vi ɛ kechii kenləysen. 49Ke lu dî bek ge mɛ báà se suŋnene ɛ mɛ əbtaawe. Bay wɛ əb nè tumen mɛ nè dine kenəə kɛ mɛ yɛ suuy gese dine jii yɛ mɛ yɛ suuy ɛ ten. 50Mɛ ke ge kenəə kɛ əb làmen ge mɛ nɛɛy, foo ɛychii yɛ ɛy jia yî mɛy. Kenəə kɛ mɛ suuyen me se lu nɛ suuy Bay ge mɛ suuy.

Currently Selected:

Jn 12: oku

Highlight

Copy