Jn 17

Jesus jem se ghel ə wene

1Jesus nɛy suuy əbnəə vin è mɛyse ɛ leghɛ è kiy ɛyyio, è suuy ge: Bay, əbliye kwɛnmen. Nɛɛy é wan ə viɛ kiile ɛykokse ka əb nɛɛy é wɛ̀ kiile ɛykokse. 2Wɛ̀ nè fomen əbtaawe se wen ge əb yɛ lu ɛ ketuu nə wel əbjim, ka əb yɛ foo ɛychii yɛ ɛy jia yî mɛy se ghel ghɛ wɛ̀ nè foon se wen. 3Ɛychii yɛ ɛy jia yî mɛy lu ge, wel keele wɛ̀ wɛ luun kɛn Feyine fɛ́ əbluuye, è gese keele mɛ wɛ Jesus Christ wɛ wɛ̀ nè tumen. 4Mɛ nɛɛymen wɛ̀ kiile ɛykokse ɛ ketuu ntiɛ ka mɛ mɛysen ɛyfɛl yɛ wɛ̀ nè foon se mɛ. 5Bay, nɛɛy é mɛ kiile ɛykokse ɛ leenen, ɛykokse yɛ ghɛsoo nè kiin se geese náà se bome mbi.

6Mɛ dinmen wɛ̀ se ghel ghɛ wɛ̀ nè fəysen ɛ məme mbi è fo se mɛ. Ghene nè lu ghel ə ghiɛ, wɛ̀ fo ghene se mɛ, se lu nɛ ghene nɛɛymen kenəə kɛ wɛ̀ suuyen. 7Leenen lu nɛ ghene keelemen ge əbnəə əbjim wɛ wɛ̀ nè foon se mɛ lu nɛ əb nè lòò se wɛ̀. 8Mɛ nè lô fo sakghɛ wɛ wɛ̀ nè foon ge mɛ fó, ghene fiisen, è se ke se əbluuy ge mɛ nè lòò se wɛ̀ gese ki ɛybeeme ge nè tum wɛ̀ mɛ.

9Mɛ báà se jeme nɛ lu se ghele ghɛ́ mbi fɛne, mɛ jeme se ghel ghɛ wɛ̀ nè foon se mɛ bek ge ghene lu ghel ə ghiɛ. 10Ghel ɛjim ghɛ mɛ kiin lu ghiɛ nɛ ɛjime ghɛ wɛ̀ kiin lu ghome, nɛ lu bek ghene wɛ əbghaake ə wome yɛnsen. 11Kɛ́ leenene lu nɛ mɛ se fiile se wɛ̀ nɛ mɛ bo bɛɛy wiy se yɛ lu ɛ mbi fɛn dî nɛ ghene bɛɛy ɛ ten. Bay əblanen, ko ghal ghene nɛ̀ əbtaawe ɛyghel nə wɛ̀, yɛ wɛ̀ nè foon san ka ghene yɛ lu se kefaa kemok ghɛɛ-ghɛɛ ka ghɛsoo luun se kefaa kemok. 12Nè lu əbliy wɛ mɛ nè luun ghɛse ghene, nɛ mɛ ghale gese chiye ghene nɛ̀ əbtaawe ɛyghel nə wɛ̀ yɛ wɛ̀ nè foon se mɛ. Wel nè báà lɛy ɛ ghene məm buu kɛn wel wɛ ke nè luun ge əb lu se jase jii se lunse kenəə kɛ ŋwaale-Feyin suuyen. 13Kɛ́ leenene lu nɛ mɛ se gwiye se wɛ̀, nɛ mɛ suuye əbnəə vin bo bɛɛy ɛ mbi fɛn ka ghene loote kiile kechɛkle ə kom ɛ ghene məm. 14Mɛ nè lô fo sakghɛ wɛ wɛ̀ nè foon ge mɛ fó se ghene, ghele mbi se bane ghene bek ka ghene báà se chii ka ghɛ́ mbii. Lu sɛy ka mɛ nè báà se chii ka ghɛ́ mbii. 15Mɛ báà se suuy ge wɛ̀ chakse ghene chaksen se mbi fɛn, dî lone ge wɛ̀ tɛɛke ghene se wel vi wɛ ɛ́ toŋten ge wel əbbee. 16Ghene báà se lu ghele mbi, kɛn ka mɛ báà se lu wele mbi. 17Siyse ghene nɛ̀ əbluuy ə viɛ, giɛ ə shiɛ lu əbluuy. 18Ka wɛ̀ nè tumen mɛ se mbi lu ghɛɛ-ghɛɛ ka mɛ tumen ghene. 19Mɛ me siyse ngeŋ ə yom ka mɛ nɛɛy é ghene yɛ lu ɛ siysen se əbluuy.

20Mɛ báà se jeme kɛn se ghene, mɛ jeme sɛy se ghii dii ghɛ ghene naa fekte kenəə ə Feyin se ghene é ghene fó ɛytem se mɛ. 21Mɛ jeme ge ghene ghel ɛjime yɛ lu se kefaa kemoke Bay, kɛn ka wɛ̀ luun ɛ məm nə mɛ nɛ mɛ lu ɛ məm nə wɛ̀. Nɛɛy é ghene yɛ lu sɛy ɛ məm nə ghɛsoo ka ghele mbii beeme ge nè tum kɛn naa wɛ̀ mɛ. 22Mɛ fomen se ghene əbghaake wɛ wɛ̀ nè foon se mɛ ka ghene yɛ lu se kefaa kemok ka ghɛsoo luun se kefaa kemok. 23Mɛ lu ɛ məm nə ghene nɛ wɛ̀ lu ɛ məm nə mɛ, ko nɛɛy é ghene ko yɛ loote lu se kefaa kemok ka ghele mbi keele ge nè tum wɛ̀ mɛ è se koŋe ghene kɛn ka wɛ̀ koŋen mɛ.

24Bay, mɛ kɛŋe ge ghel ghɛ wɛ̀ nè foon se mɛ yɛ lu ghaa mɛ luun ka ghene yɛn əbghaake wom wɛ wɛ̀ nè foon san bek ka wɛ̀ nè koŋen mɛ se geese naa se bome mbi. 25Bay wɛ əb nɛɛyen kɛn əbnəə wɛ titiye, ghele mbi báà se ke wɛ̀ dî nɛ mɛ ke wɛ̀ nɛ ghel ghine ke ge nè tum wɛ̀ mɛ. 26Mɛ nè lô nɛɛy ghene se ke wɛ̀ nɛ mɛ yɛ ndu kɛn ɛ mbiy nɛɛye nɛ ghene keele wɛ̀ ka ɛykoŋ yɛ wɛ̀ kiin se mɛ yɛ lu sɛy ɛ ghene məm, nɛ mɛ se mɛ ngeŋ lu ɛ məm nə ghene.

Currently Selected:

Jn 17: oku

Highlight

Copy