Jn 2

Jesus kɛɛte se din əbchəyte əbchio əbyúméné

1Nɛy se lu ɛybam əbchii əbbua ɛ́ se yiɛ əbjen ɛ ntɛke Kana ɛ Galilee, nɛ no ə Jesus lu fo. 2Ɛ́ nè lô jaŋ sɛy Jesus ghene ghon-ɛyfɛl nə wene se əbjen fo. 3Nɛy se lu ka əmndukme nè laayenmen, no ə Jesus suuy se wen ge: Ghene bo ki wiy əmnduk.

4Jesus fise ge: No ə wom, wɛ̀ suuye ge mɛ jɛl lɛɛy? Əbliy ə wome bɛɛy ghàà kwɛn.

5No ə Jesus me suuy se ghel ghɛ ɛ́ nè fɛ́len ɛ ndaa fo ge: Ghɛn nɛɛy naa ghɛ kɛ əb suuy ge ghɛn nɛɛy.

6Ntonse moo nè tiy fo ntuufe, nɛ lu sɛ ghel ɛylake Juuse sɛɛ vii moo ɛ ten se yɛ suute əblik so ɛ ndee ɛylak. Ɛymok nè lòó ɛy fo moo ka əmtɛm əmbaa kene əmmtal. 7Jesus suuy se ghel ghɛ ɛ́ nè fɛ́len fo ge: Ghɛn lunse nton shin nɛ̀ moome. Ghene me vii moo se ten se lunke. 8Əb me suuy se ghene ge: Ghɛn sɛf əmlee è ndu è fo se wel ɛychia é əb mom. Ghene sɛfte è ndu so əb mom. 9Əb mom nɛ moo mi shi əmnduk. Əb jia se ke ghaa əmnduk nɛ̂ mi lòòn (nè ke kɛn ghel ghɛ ɛ́ nè tuun moome ten). Wel ɛychia vi me jaŋ lum jen, 10è suuy se wen ge: Wele sɛɛ loo əb chia mbiy è fo əmnduk əbjuŋ, ghele nəə è kul, nɛ əb geese fo mɛ nchɛke nchɛk. Wɛ̀ sɛy lɛm əmnduk əbjuŋ è fo nɛ lu ɛ leenen-a?

11Kii nɛ̂ kine nè lu kenkɛɛte əbchəyte əbchio əbyúméné wɛ Jesus nè nɛɛyen. Əb nè nɛɛy ɛ Kana ɛ Galilee è din əbtaawe wen. Ghon-ɛyfɛl nə wene fó ɛytem se wen.

12Se ɛybame ten Jesus ghene no ə wen, nɛ̀ ghone-no wene, nɛ̀ ghon-ɛyfɛl nə wene me chio ɛ ntɛk yɛ Kabanaum è chii gho se əbchii se ɛylaay.

Jesus jum ghɛ́ əbwɛye se ndaa-ɛykokse

(Mat 21.12-13; Mak 11.15-17; Luk 19.45-46)

13Nɛy se lu nɛ ɛyyiɛ Kechii Ɛyboyse nə ghele Juuse se baksene, Jesus me kok se Jolesalem. 14Əb kok è lii ɛ ndaa-ɛykokse è yɛn nɛ ghele feene nase, nɛ̀ bvəyse njiɛ gese nɛ̀ əbnlale, gese nɛ̀ ghel ghɛ nɛ̀ kubsen əbkaa ka ɛ́ diom ɛ ghene əbtatan, 15əb me liɛ kfəə è báà ngwan ɛ ten è weefe ghel ghi è jum nase nɛ̀ bvəyse ghene, è fəyse se ndaa-ɛykokse è takse əbkaa ə ghɛ́ ɛykubsen əbkaa, è bvəŋse əbtatan ə ghen. 16Əb nɛɛy di è suuy se ghel ghɛ ɛ́ nè feenen əbnlal ge: Ghɛn liɛ è fəy so se fɛn! Ghàà ghɛn bense ndaa ə ba ə wom ge kelik əbwɛy! 17Ghon-ɛyfɛl nə wene kuume ge ɛ́ nè nyak ɛ ŋwaale-Feyin ge: “Feyine, shii wɛ mɛ kiin se ndaa nə wɛ̀ nɛɛye nɛ ɛytem ə yome lume se ŋaŋ.”

18Ghɛ́ mbiy nə ghele Juuse bif se Jesus ge: Əbchəyte wɛ wɛ̀ din se ghɛs lu ghɛ se din ge wɛ̀ ki əbtaawe se yɛ nɛɛy əbnəə nɛ̂ vin?

19Jesus fise ge: Ghɛn sakte ndaa-ɛykokse yin, é mɛ kase baklé se əbchii əbtal.

20Ghɛ́ mbiy nə ghele Juus ghii me suuy se wen ge: Ɛ́ nè liɛ nguk njiose-ntuufe əmmkɛɛk se bàklè ndaa-ɛykokse yin, é wɛ̀ yɛ lu se kase se bàklè se əbchii əbtal-a?

21Dî nɛ ndaa-ɛykokse yɛ Jesus nè suuyen nè lu əbghun ə wen. 22Naa se lu ka Jesus nè loolen se ɛykuo, ghon-ɛyfɛl nə wene me kuume kenəə nɛ̂ kin kɛ əb nè suuyen. Ghene me fo ɛytem se kenəə kɛ ŋwaale-Feyine suuyen gese nɛ̀ se giɛ sɛ Jesus nè suŋnen.

Jesus ke ɛyteme wel əbjim

23Jesus nɛy se lu ɛ Jolesalem ɛ əbliye ɛyyiɛ Kechii Ɛyboyse, ghele yɛn əbchəyte əbchio əbyúméné wɛ əb nè nɛɛyen, ghel se ɛydio me fo ɛytem se wen. 24Dî Jesus jia samse ghene bek ge əb nè ke ghene naa ɛjim. 25Əb nè báà se shii ge wel fekte kum wel əblee se yi bek ge əb nè ke teteme ghel ɛjim.

Currently Selected:

Jn 2: oku

Highlight

Copy