Luk 22

Judas bééme se dine Jesus ge ɛ́ koo

(Mat 26.1-5; Mak 14.1-2; Jn 11.45-53)

1Əbliy ɛyyiɛ keban kɛ tóó ghàà feshik è kaŋ, wɛ ɛ́ ko nè toŋten sɛy ge wɛ ɛyboyse, me se baksene. 2Ghele mbiy se ghɛ́ ntaŋlee nɛ̀ ghɛ ɛ́ nè dinten tesake me se kɛŋe ge sɛ lòó ɛ́ jɛl lɛɛy se geese yuye Jesus-a? Bek ka ghene nè fanen ngose wel yɛ ɛy nè lóó ɛy yɛ lu ɛ Jesus ɛybee.

Judas beeme se feene Jesus

3Satan me lii se ɛytem nə Judas wɛ ɛ́ nè toŋten ge Iskaliot, wɛ nè luun wel əblee ɛ məme ghon-ɛyfɛl nə Jesus ghɛ njio-sebaa ɛyvəm. 4Əb me ndu è yɛn ghele mbiy se ghɛ́ ntaŋlee, ghene əbtuu se ghel ghɛ ɛ́ chiyen ndaa-ɛykokse Feyin, ghene ghene se siyse jii yɛ əb nɛ̂y din Jesus ɛ́ koo. 5Ghene yio kii nɛ̂ kine, è se saŋlee, è me lɛm ge ɛ́ nɛ̂y fo əbkaa se wen. 6Judas me beeme, è se kɛŋe jii yɛ lòó əb din Jesus ɛ́ koo nɛ ghele ke wiy.

Jesus tum ge ɛ́ ndu è siyse əbfua-əbyíɛ́ne wɛ̂ Kechii Ɛyboyse

(Mat 26.17-25; Mak 14.12-21; Jn 13.21-30)

7Kechii kɛ ɛ́ sɛɛn wán keyak ɛ ten ɛ əbliy ɛyyiɛ keban kɛ too ghàà feshik, è kaŋ ki nɛy kwɛn. 8Jesus me tum Bita ghene Joon, è suuy se ghene ge: Ghɛn ndu è siyse əbfua-əbyíɛ́ne ɛyyiɛ Kechii Ɛyboyse, é ghɛsen nɛ̂y yiɛ. 9Ghene me bif se wen ge: Kelik kɛ wɛ̀ koŋen ge ghɛs fɛl əbfua-əbyíɛ́ne nɛ̂ vin ɛ ten lu ghááy? 10Əb suuy se ghene ge: Yɛn-a! Ghɛne loo lii ɛ ntɛk, é ghɛne ghe wel konen nɛ əb bɛɛy nton ə moo. Ghɛn ndu ɛ wen ɛybam è lii ɛ ndaa yɛ əb lii ɛ ten, 11è suuy se ba ə ndaa fo ge: Ndinte bife ge ɛybee ndaa nə ghel ɛyghane yɛ ghene ghe ghon-ɛyfɛl nə yii nɛ̂y yiɛ Kechii Ɛyboyse ɛ ten se yaay-a? 12É əb me din kelik se ghɛn nɛ ke ghake ge ɛybee ndaa yɛ ɛyyio nɛ ɛ́ loote siyse, é ghɛn me fɛl əbfua-əbyíɛ́ne ten fo. 13Ghene me lòò è ndu ɛ ntɛk fo, è yɛn əbnəə əbjim nɛ əb lu kɛn ka Jesus kè suuyen, è fɛl əbfua-əbyíɛ́ne ɛyyiɛ Kechii Ɛyboyse fo.

Jesus kɛɛte se fo Nchinten

(Mat 26.26-30; Mak 14.22-26; 1Kl 11.23-25)

14Əbliye nɛy kwɛn, Jesus ghene ghe ghɛ ntum nə wene me diom kelik kemok se yɛ yiɛ. 15Əb suuy se ghene ge: Mɛ kè lô se loote ki shii ge ghɛsen yiɛ Kechii Ɛyboyse kin nɛ mɛ geese yɛne ngɛk. 16Mɛ suuye se ghɛn ge: Mɛ jia bo yî yiɛ əbfua-əbyíɛ́ne nɛ̂ vin se chin ka kenəə kɛ kum əbghene nɛy kwɛn ɛ əbliy wɛ Feyine saken. 17Əb me liɛ əbbom əmnduk, è bɛ̀ɛ̀lè Feyin è suuy ge: Ghɛn ko è giate è kal è konen. 18Ghɛn yɛ ke ge mɛ jia bo yî nəə əmnduk min se chin ka ɛysak ə Feyine yî gwiy. 19Əb liɛ keban, è bɛ̀ɛ̀lè Feyin è bɛkte è fo se ghene, è suuy ge: Kine lu əbghun ə wom wɛ mɛ fó bek ghɛn. Ghɛne yese, ghɛn yɛ nɛɛye ɛ jii ghan se yɛ kuume mɛ. 20Ghene mɛyse ɛyyiɛ, əb liɛ əbbom əmnduk, è jɛl kɛn so ɛ jii nɛ̂ ghan è suuye ge: Əmnduk min lu kelek kefɛɛ ke kum əmnduŋ mə mom mɛ əm lɛŋen bek ghen. 21Dî mba, nɛ wel wɛ əb nɛ̂y din mɛ ɛ́ koo lu fɛn, yiɛ ghɛse wen kɛl ɛymok. 22Wanwele nɛ̂y kuo ka Feyine nè kakenmen, dî nɛ lòn lu se wel wɛ əb nɛ̂y din wen ɛ́ koo.

23Ghene me kɛɛte è se kante se ghene ngeŋse ge sɛ lu ndɛ ɛ ghene məm wɛ əb nɛ̂y mom kenəə nɛ̂ kin-a?

Lu ndɛ wel wɛ əb chian ghel ɛjim

24Ghene me gese kɛ̀ɛ̀tè se yɛ bek ge sɛ lu ndɛ ɛ ghene məm wɛ əb chian ghel ɛjim-a? 25Jesus me suuy se ghene ge: Tefon əbtume ki əbtaawe se yɛ sake ghele ghen, nɛ̀ ghel ghɛ ɛ́ saken ghel kwante ghele ten ge ɛ́ yɛ toŋte ghene ge ngiamtense. 26Dî nɛ ke báà se lu se yɛ lu dî se ghɛn. Wel wɛ əb chian ghel ɛjim ɛ ghɛne məm lu se yɛ lu ka wán əbtɛlɛ, nɛ̀ wel ɛ mbiy lu se yɛ fɛl Ka wándɛ. 27Wel wɛ luun ketuu lu ndɛ? Wel wɛ əb diom, ɛ́ gwiy nɛ̀ əbfua-əbyíɛ́ne se wen moo wel wɛ əb gwiyen so-a? Lɛ báà se lu wel wɛ əb diom, ɛ́ gwiy nɛ̀ əbfua-əbyíɛ́ne se wen-a? Dî nɛ mɛ fɛle ɛ ghɛne məm Ka wándɛ. 28Ghɛn lu ghel ghɛ ɛ́ kulen ɛytem, è gok ghɛsen ɛ mɛ ɛymomse. 29Mɛ me se foo əbtaawe ɛysak se ghɛn kɛn ka Ba ə wom nè foon se mɛ. 30Mɛ yî loo sak əbfon ə wom, é ghɛsen yɛ yíɛ́ gese nəə kelik kemok, é ghɛn kok kabase, è yɛ sake tekfəə ghele Islael tɛ njio-sebaa ɛyvəm.

Jesus suuy ge Bita nɛ̂y maa Yi

(Mat 26.31-35; Mak 14.27-31; Jn 13.36-38)

31Jesus nɛy lòò è mbaate Bita ge: Simon, Simon, Satan lonmen jii se fɛfte ghɛn ka wel fɛfte ɛsaŋ. 32Dî nɛ mɛ lu nɛ mɛ jem se wɛ̀ Simon ge Feyine nɛɛy é wɛ̀ teem ketaan ghɛne wen. Ɛ́ nɛ̂y loo lu ɛ əbliy wɛ wɛ̀ kasen è fiile se mɛ é wɛ̀ giamten ghone-no viɛ. 33Bita fise ge: Báàba mɛ lu kebaaten se lii ɛ nchak ghɛsoo, se gese se kuo ghɛsoo. 34Jesus suuy se wen ge: Bita, mɛ suuy se wɛ̀ ge kɛn nɛ̀ ntəke lan lumngvəə nɛ̂y yɛ ghan ge əb toŋ nɛ wɛ̀ maamen mɛ kaŋ ɛtal.

Jesus tef ghon-ɛyfɛl nə wen

35Əb me gese suuy se ghene ge: Nè lu əbliy wɛ mɛ nè tumen ghɛn ghàà əbkaa, ghàà kebam, ghàà guose ɛvəə, ghɛn nè lô tan kefaa? Ghene fise ge: Aay, wel nè báà tan. 36Əb suuy se ghene ge: Kɛ́ leenene lu nɛ wel ki əbkaa əb liɛ, wele yɛ ki kebam əb liɛ, wele jia yɛ ki fiak, əb feene ndəyse kenton nə wen è yun fiak. 37Mɛ suuy se ghɛn ge: Kenəə kɛ ɛ́ nè nyakenmen ɛ ŋwaale-Feyin kum mɛ lu se kwɛn. “Ɛ́ nè nyak ge: Ɛ́ nè chinten wen ghene ghele mbee.” 38Ghene me suuy ge: Yɛn-a Báàba, fiakse shi fɛn sebaa. Jesus fise ge: Ke kwɛn di.

Jesus jem ketaan ɛ Kfən Olif

(Mat 26.36-46; Mak 14.32-42)

39Jesus me lòò è kok ɛ kfən Olif ghaa əb nè lóó əb yɛ kok; ghon-ɛyfɛl nə wen kok ghene ghene. 40Ghene kok è chin fo ɛ leghɛ əb suuy se ghene ge: Ghɛn yɛ jem fɛ ɛymomse nɛɛy é wel fɛy.

41Əb suuy di, è me vəse ghene è chia è ndute se ɛylaay, è təm ɛləy, è se jeme ge: 42Ba ə wom, fii əbbome ngɛk vin se mɛ, ɛ lefɛ wɛ̀ koŋen. Dî nɛ lòó wɛ̀ nɛɛy kɛn ka wɛ̀ kɛŋen, ghàà nɛɛy nɛ lu ka mɛ kɛŋen. 43Nchiy-ndaa-Feyin me səəke ɛyyio, è nɛɛy əb se ki əbtaawe. 44Əb nè yio ɛylum se ŋaŋ, è me se jeme naa ketaan nɛ kezəksen ə wene chemke se ntiɛ ka əbmal əmnduŋ.

45Əb mɛyse ɛyjem, è kase ndu ghaa ghon-ɛyfɛl nə wene kè luun, è yɛn nɛ ghene buune buunen bek nkwaate sɛ ŋaŋe. 46Əb me bif se ghene ge: Lu bek ghɛ wɛ ghɛne buunen? Ghɛn loole, è yɛ jem fɛ ɛymomse nɛɛy é wel fɛy.

Judas din Jesus ge ɛ́ koo

(Mat 26.47-56; Mak 14.43-50; Jn 18.3-11)

47Ka Jesus suŋnen dî ɛ leghɛ kenone ghele fəy è gwiy fo, nɛ wel əblee ɛ məme ghɛ́ ntume ghɛ njio-sebaa ɛyvəm wɛ ɛ́ nè toŋten ge Judas dine jii. Əb kokte gwiy ɛ Jesus ɛybee è baamé wen. 48Jesus me suuy ge: Judas, wɛ̀ baamé Wanwel ka wɛ̀ chakte chakten se din ge ɛ́ ko-a? 49Ghon-ɛyfɛl nə Jesus keele kenəə kɛ ke loo è gan, è me bif ge: Báàba, ghɛs gwɛte nɛ̀ fiakse-a? 50Wel əblee ɛ ghene məm me gwɛl kekos se ketuu se ghɛ́ ntaŋlee è kɛf ketuule kɛ əbkoy əbtaa. 51Jesus kɛy ge: Ke kwɛn di! È me kum ketuule wel vi, ke seese əbghun se fo. 52Jesus me suuy se ghele mbiy se ghɛ́ ntaŋlee, nɛ̀ ghel ɛfɛ́lene ghɛ ndaa-ɛykokse Feyine gese nɛ̀ chɛɛ sɛ se kè gwiyen se koo wen ge: Ghɛn gwiy nɛ̀ fiakse gese nɛ̀ əbbule ge ɛ́ koo mɛ nɛ mɛ lu əbchoŋ-a? 53Ghɛsen nè lóó ɛ́ yɛ lu ɛ ndaa-ɛykokse Feyine əbchii əbjim nɛ ghɛn koo wiy mɛ. Dî nɛ əbliy ə wɛne kwɛnmen, nɛ lu ɛ kediak nɛ mbi nfiine.

Bita maa Jesus

(Mat 26.57-58,69-75; Mak 14.53-54,66-72; Jn 18.12-18,25-27)

54Ghene me koo Jesus è loo ndu nɛ̀ wen se bɛy nə ketuu se ghɛ́ ntaŋlee, Bita se nyiake gwiye kɛ wene naa əbtəm. 55Se lu ka ɛ́ nè kwaayenmen əbvəs ɛ ɛyfume ntetembɛy fo, Bita me gwiy è diom ghene ghele è se yósê. 56Wándɛ əbvii əblee wɛ əb nè fɛ́len ɛ bɛy fo yɛn ka Bita diom ɛ əbghun əbvəs, è loote kiy, è suuy ge: Wel vin nè lu sɛy ghene wen. 57Bita maa, è suuy ge: Əbvii, mɛ báà se ke wen. 58Se moote kɛn lɛ wel əblee gese yɛn Bita è suuy se wen ge: Wɛ̀ lu sɛy wele ngoo nə Jesus. Bita fise ge: Əbluumen, mɛ wiy wel əblee. 59Se lu ka keleŋ əbliy nè chian, wel əblee gese suuy ketaan ge: Ke loote lu se əbluuy ge wel vin lu wele ngoo nə Jesus bek ge əb lu wele wɛ̂ Galilee.

60Dî Bita fise ge: Əbluumen, mɛ báà se ke kenəə kɛ wɛ toylen kin. Lumngvəə me toŋ kɛn se əbliy nɛ əb bo suŋnene. 61Báàba benle è soo ɛyshiɛ ɛ Bita əbghun, əb me kuume kenəə kɛ əb kè suuyen ge: Kɛn nɛ ntəke lan, lumngvəə nɛ̂y yɛ ghan ge əb toŋ nɛ wɛ̀ maamen mɛ kaŋ ɛtal. 62Əb kuume di, è fəy ndu jii bɛy è kɛ̀sèn nɛ̀ ɛydiye. 63Ghel ghɛ ɛ́ nè chiyen Jesus ghi me se buu Jesus gese tɛle.

64Ghene kul ɛyshiɛ ə wen, è tɛl wen, è suuy ge: Chio ge sɛ tɛl ndɛ wɛ̀-a? 65Ghene nè lô gese suuy əbnəə əbyafene se wen naa se ɛydio.

Jesus teem ɛ ɛytiye Nsak

(Mat 26.59-66; Mak 14.55-64; Jn 18.19-24)

66Əbtəke bvəs è yio, chɛɛ sɛ ɛylak foo, nɛ̀ ghele mbiy se ghɛ́ ntaŋlee gese nɛ̀ ghel ghɛ ɛ́ nè dinten tesak konen, è liɛ Jesus è ndu so se ghene ɛytiye nsak è suuy ge: 67Loo lu nɛ lu wɛ̀ wel wɛ Vi wɛ Feyine nè Yiosen, wɛ̀ suuy se ghɛs. Əb fise ge: Mɛ suuy se ghɛn é ghɛn jia beeme kenəə kɛ me suuyen. 68Nɛ̀ mɛ bif ɛybif se ghɛn é ghɛn jia fise. 69Dî nɛ se kɛ̀ɛ̀tè ɛ leenen lu nɛ Wanwele nɛ̂y diom ɛ əbkoy əbtaa nə Feyine, Wɛ Ba-Əbtaawe-Əbjim. 70Ghene ghel ɛjim bif ge: Ke dine ge wɛ̀ lu wán Feyin-a? Əb fise ge: Ke lu ka ghɛn suuyen. 71Ghene me suuy ge: Ghɛsen bo shii wiy wel ɛyshiɛ. Ghɛsen yiomen kenəə kɛ ke fəyen ɛ wen əbchio.

Currently Selected:

Luk 22: oku

Highlight

Copy