Yɔhánɛsɛ 13

Yə́susu a ndɔ makɔlɔ́ má báyɛ́á bɔkɔ́nɛna sɔa

1Ɔ uyə́səkiə wɔ́ ɛŋganda yɛ Básɛ́ka, Yə́susu a manyaka ɔwá ɛlɔ́áyɛ́ ayɛ́, ikúílí yɛ́ nɔ́ ndáfámá ɔ ɔhɛ́kɛakɛa ɔ yɛ́ɛyɛ misí ɔ ɔwákaka á Isə́ ɛmɛ́ŋɛ́, bikúílí bikimə, a ka bááyɛ́ hikəkiə ɔbá bá ná báá ɔ misí, a ná bəə́bu hikə́kíə́ ɔkafámáká ɔ nisúki. 2Yə́susu a ka báá ɔ ɔnɛ́á bɛkɔlakɔ́lá na báyɛ́á bɔkɔ́nɛna, əlimə ɔwá sátana a nɔ́ ɛfɛka yɛ́ ɔwayɛ́ ɔ ɔsɛma háá ɔ mɔlɛ́má wɔ́ Yútasɛ á mɔná wa Símono Isikalióto. 3Yə́susu a manyaka ɔwá Isə́ a ka bikimə híə́niə ɔ ɔwayɛ́ makátá, a manyaka wɛɛ́ya bɛ́múɛ́tɛ́ ɔwá a ka húlínə na Huɛlɛ́, a lɛa ɔ ɔwákaka á Huɛlɛ́ busíə́, 4a ná hɔalɛ́na ɔ ɛtáka, a ná bɔlɛŋa bíhúlíə́, a ná hitumbə ɛ́ta, a ná bítíŋə́ ɔ nɛlálá. 5Əlimə yɛ nɔ́yɛ́, a ná mənífə́ kútə́ ɔ ɛfána, a ná botólíə́ ɔ makɔlɔ́ má báyɛ́á bɔkɔ́nɛna ɔ ɔsɔa, a maáta húnəkə na hitumbə ɔhɛ́á hɛ́ ná báá ɔ ɔwayɛ́ nɛlálá.

6Ɛnaka a ndáfámá á Símono busíə́, Símono a sɛ́á: «Á Isə́lúkú, aŋɔ́á ɛkasɛ ɔ mɛaŋɔ́á makɔlɔ́ sɔ́áka əə́?» 7Yə́susu a sɛ́á: «Ɔ lɛ ndɔ manya yatɛ́ ɔyɛ́á mɛ ndɔ kɛa isíŋáka, mba, ɔ ŋɔ nɔ́yɛ́ manya əlimə yɛ ikúílí.» 8Bíə́lə a sɛ́á: «Bóo! Ata ɔ hííní hinó, táta aŋɔ́á ɔ ŋɔ mɛaŋɔ́á makɔlɔ́ sɔaka.» Yə́susu a sɛ́á: «Ábá mɛ sá aŋɔ́á makɔlɔ́ sɔa, ɔ sa ndá nioko ɛtá na mɛaŋɔ́á!» 9Símono a sɛ́á: «Ábá nɔ́yɛ́, á Isə́lúkú, ɔ lɛ mɛaŋɔ́á sɔ́á á makɔlɔ́ bíbúə́, mba, sɔ́áká mɛaŋɔ́á makátá na mɔlɔ́á tɔ́na.» 10Yə́susu a sɛ́á: «Wɛ́ɛ́yɛ́ ɔwá a ná bɛ́sɔ́áka, bá sá hɔ́ánana ɔ ɔwayɛ́ ɔsɔa, mba, a lɛa naŋátɔ́ wɛɛ́ya mukimə, uwə́nú, nɔ lɛa naŋátɔ, mba, tátá bənú bəkimə.» 11Ɔ taká, a ka bá a ndɔ wɛ́ɛ́yɛ́ manya muɛsɛ ɔwá ɛkasɛ a wɛɛ́ya sɛma, ɔ́ ɛlɔ́áyɛ́ nɔ́yɛ́ a ndɔ laa a sɛ́á: «Nɔ lɛ bá bənú bəkimə naŋátɔ.»

12Ɛnaka a bəə́bu makɔlɔ́ sɔ́áka, a ná bɔ́áyɛ́á bɔlɛŋa bíhíə́níə́, a ná híáná ɔ ɛtáka, a ná bəə́bu lɛ́na a sɛ́á: «Nɔ ná manya yatɛ́ ɔyɛ́á mɛ nɔ́ bənú kɛaka əə́? 13Nɔ ndɔ mɛaŋɔ́á ɛ́lɛnɛna Mulə́liə, na Isə́lúkú, nɔ ndɔ laa muɛsɛ bɔkɔasɛ́á, ɔ́ nɔ́yɛ́ mɛ lɛ́á. 14Ábá ɔwámɛ á Isə́lúkú na Mulə́liə, mɛ ná bənú makɔlɔ́ sɔ́áka, bənú tɔ́na nɔ ná hɔ́ánána ɔ makɔlɔ́ ɔsɔana bənú ná bənú, 15ɔ taká, ɔ́ hɛŋgɛtɛ́nɛ́á hííyí mɛ́ nɔ́ bənú ínə́niə ɔkɛaka ɔwá, bənú tɔ́na nɔ́ kɛ́áká ɛ́sɛ́á mɛ ná kɛ́áka ɛlɔ́áyɛ́ ənú. 16Ɛ́ɛ! Ɔ taká, mɛ ndɔ bənú nɔ́yɛ́ lɛna, mɔnyɛna a lɛ bá mɔŋɛ́ŋa yáyɛ́ná yayɛ́á isə́lúkú, ata mɔsɔ́másɔma a lɛ bá mɔŋɛ́ŋa yáyɛ́na wɛ́ɛ́yɛ́ ɔwá a ná wɛɛ́ya lɔma. 17Isíŋáka nɔ ndɔ nɔ́yɛ́ manya, nɔ ŋɔ báá ɔ nɛhɔnɔ ábá nɔ ná nɔ́yɛ́ bɛ́kɛ́ákɛ́na. 18Mɛ lɛ ndɔ hɛ́na ɛlɔ́áyɛ́ bənú bəkimə, mɛ ndɔ bááyɛ́ manya ɔbá mɛ ná tɛfa. Mba, yɛ́ɛ́yɛ́ ɛtambá yɛ́ Mətilə yɛ́ ná hɔ́ánána ɔ bíúndúsiniə yɛ́ sɛ́á: “Wɛ́ɛ́yɛ́ ɔwá tɔ ná níə́kə́níə́, a ná mɛaŋɔ́á híánɛ́na əlimə.” 19Mɛ ndɔ bənú nɔ́yɛ́ lɛna isíŋáka ubusíə́ ɔbɔ́á bɔ́ɛ́yɛ́ bɔkɔa bɔ́ ndáfámá ɔkɛaka ɔwá, ikúílí bɔ́ ŋɔ ndafámá nɔ́ lumínə ɔwá, ɔwámɛ, mɛaŋɔ́á mɛ lɛ́á wɛ́ɛ́yɛ́ ɔwá mɛ lɛ́á. 20Ɛ́ɛ! Ɔ taká, mɛ ndɔ bənú lɛna, ata ɛ́yánɛ́ ɔwá a ŋɔ wɛ́ɛ́yɛ́ káha ɔwá mɛ ná lɔ́má, ɔ ɔwámɛ a ndɔ káha, ata ɛ́yánɛ́ ɔwá a ŋɔ mɛaŋɔ́á káha, a ndɔ wɛ́ɛ́yɛ́ káha ɔwá a ná mɛaŋɔ́á lɔma.»

Yə́susu a ndɔ mənyəsiə ɔwá ɛkasɛ Yútasɛ a wɛɛ́ya fiɔtɔ

(Mat 26.20-25; Mə́l 14.17-21; Lúk 22.21-23)

21Əlimə yɛ bɛ́táyɛ́ bɛtambá, hɛtányɛ́ hɛ́ ná Yə́susu kátɛ́á, a ná fə́mə́lə́níə́ ɔ mianyɔ́ a sɛ́á: «Ɛ́ɛ! Ɔ taká, mɛ ndɔ bənú nɔ́yɛ́ lɛna, ɔmɔtɛ́ ɔ uwənú ətíə́ a ŋɔ mɛaŋɔ́á sɛma.» 22Əlimə yɛ nɔ́yɛ́, bɔkɔ́nɛna bá ná siəlínə́nə, bá lɛ mɔndɔ manyá ɔwá a ndɔ hɛ́na. 23Wɔmɔtɛ́ ətíə́ yɛ bɔkɔ́nɛna, wɛ́ɛ́yɛ́ ɔwá Yə́susu a ná bá a ndɔ hikiə mɔŋɛ́ŋa, a ka báá tuənə́tɔ́ ɔ ɔwayɛ́ ɛmɛ́ŋɛ́. 24Símono a ná wɛɛ́ya hɛsála ɔkɛaka ɔwá, a Yə́susu batá á mɔndɔ ɔwá a ndɔ hɛ́na. 25Wɛ́ɛ́yɛ́ mɔkɔ́nɛna a ná lɛŋɛma, a ná wɛɛ́ya bə́sə́líníə́ a sɛ́á: «Á Isə́lúkú, ɛ́yánɛ́ mɔ́táyɛ́ əə́?» 26Yə́susu a sɛ́á: «Ɛkasɛ mɛ hiɔ́mbɛ yubə́ ɔ bɔnɛ́ná, wɛ́ɛ́yɛ́ ɔwá mɛ ndɔ índiəkinə, wɛɛ́ya.» Nɔ́yɛ́, a ná hiɔ́mbɛ yubə́, a ná índíə́ á Yútasɛ á mɔná wa Símono Isikalióto. 27Ikúílí Yútasɛ a ná hiɔ́mbɛ ɛtá, Sátana a ná wɛɛ́ya fínə́ ɔ mɔlɛ́má. Yə́susu a sɛ́á: «Yatɛ́ ɔyɛ́á ɔ ndɔ siə ɔkɛa, kɛ́áká yɛɛ́ta tɔfá.» 28Mba, ata ɔmɔtɛ́ ɔ uwəbú ətíə́ ɔbá bá ná báá ɔ ɛtáka, a sa manya ɛlɔ́áyɛ́ yatɛ́ a ndɔ nɔ́yɛ́ hɛ́na. 29Ɛ́sɛ́á Yútasɛ a ná bá na ɔmbalá wɔ́ mɔnɛ́á, bəəŋí bá fɛkaka ɔwá, Yə́susu a ná wɛɛ́ya lɛ́na ɔwá, a ká bɛɛ́la ɔ́ndɔ́kɔ́ ɔbɛ́á bɛ́ ndɔ bəə́bu bísiə ɛlɔ́áyɛ́ ɛŋganda, ataná, á ká nɛhánɛna índíə́ ɔ tɔtɔyɔ́nɔ́. 30Yútasɛ, á hiɔ́mbɛ káhá, ɔ umisíumə́ a ná fama, ibínə́binə yɛ́ ka báá kɔ́átɔ.

Umbə́ndə́ muɔ́sɔ

31Ɛnaka Yútasɛ a fámá, Yə́susu a sɛ́á: «Isíŋáka ɛkasɛ bá Mɔná mɔndɔ úmə́kíə́, Huɛlɛ́ ɛkasɛ á úmə́kə́ ɔ tɔ́mbákɛna na wɛɛ́ya. 32[Mba, ábá tuúmə tɔ́ Huɛlɛ́ tɔ́ ná bífə́mə́lə́níə́ ɔ ɔwayɛ́,] Huɛlɛ́ wɛɛ́ya bɛ́múɛ́tɛ́, a ŋɔ Mɔná úmə́kiə, a ŋɔ wɛɛ́ya tuúmə híə́niniə ɔ ikúílí tɛ́tɛ́á. 33Á bámɛ́á baná, mɛ lɛa na bənú ɛlɔ́áyɛ́ tɛ́tɛ́á yɛ ikúílí. Nɔ ŋɔ tíkə́ mɛaŋɔ́á siəkə, mba, isíŋáka mɛ ndɔ bənú lɛna yatɛ́ ɔyɛ́á mɛ ná lákɛ́na ɔ Bɛyútɛnɛ, nɔ sa ósó ɔndasá ɔ ɛbɔ́ka ɔyɛ́á mɛ nɔ́ ákána.»

34«Mɛ ndɔ bənú umbə́ndə́ muɔ́sɔ tíkínə. Nɔ́ hikə́kə́níə́ bənú na bənú ɛ́sɛ́á mɛ ná bənú híkə́kíə́, nɔ́ hikə́kə́níə́ bɔ́mɔtɛ́ na bə́ə́ní. 35Ábá nɔ ndɔ hikəniə bənú na bənú, nɔ́yɛ́, bəkimə bá ŋɔ manya ɔwá nɔ lɛa bámɛ́á bɔkɔ́nɛna.»

Yə́susu a nɔ́ fə́mə́ləniə ɔwá ɛkasɛ Bíə́lə a wɛɛ́ya bɛsaŋɔna

(Mat 26.31-35; Mə́l 14.27-31; Lúk 22.31-34)

36Símono a ná Yə́susu batá a sɛ́á: «Á Isə́lúkú, hə́níə́ ɔ nɔ́ ákáná əə́?» A ná wɛɛ́ya bíhíə́níníə́ a sɛ́á: «Ɔ ɛbɔ́ka ɔyɛ́á mɛ nɔ́ ákána, ɔ sa ósó ɔwámɛ ɔwɔŋgɔ, mba, ɔ ŋɔ mɛaŋɔ́á ɔ́ŋgɔkɔ əlimə yɛ ikúílí.» 37Bíə́lə a sɛ́á: «Á Isə́lúkú ɛlɔ́áyɛ́ yatɛ́ mɛ sɔ́ ŋɔ óso ɔwáwɔ ɔwɔŋgɔ isíŋáka əə́? Mɛ ndɔ luminə ɔ uwə́ə́ ɛlɔ́áyɛ́ áwɔ.» 38Mba, Yə́susu a sɛ́á: «Ɔ ndɔ luminə ɔ uwínə ɛlɔ́áyɛ́ ámɛ! Taká, taká, mɛ ndɔ aŋɔ́á lɛna, ubusíə́ ɔbɔ́á miɔkɔ́ yɛ lɔ́ŋɔ́, ɔ ndɔ sáŋɔnaka bikúílí bɛ́lálɔ́ ɔwá ɔ lɛ ndɔ mɛaŋɔ́á manya.»

Currently Selected:

Yɔhánɛsɛ 13: tvu

Highlight

Copy