Yɔhánɛsɛ 15

Yə́susu a lɛa hɛlɛ́álɛ́á hɛɛsɛ hɛ́ tɔtámátámá

1«Mɛaŋɔ́á mɛ lɛ́á tiísi yɛ hɛlɛ́álɛ́á hɛ́ tɔtámátámá, yamɛ́á Isə́ a lɛa mɔnyɔɔ. 2Mɛlɛ́áfɛ mikimə ɔyɛ́á yɛ́ lɛ́á tɔsɛ́nátɔ́ ɔ ɔwámɛ mbá yɛ́ lɛ ndɔ tɔtámátámá háá, a miítə fáláka. Mɛlɛ́áfɛ ɔyɛ́á yɛ́ ndɔ tɔtámátámá háá, a miítə anjakɛna ɔkɛaka ɔwá yɛ́ hákɛ́na ɔ ɔyáyɛ́na. 3Bilə́líə́ ɔbɛ́á mɛ ná bənú ínə́kíníə́ bɛ́ ná bənú nə́ŋə́síə́. 4Nɔ́ bámɛ́nɛ́na ɔ bɔlatɔ́ na mɛaŋɔ́á ɛ́sɛ́á mɛ lɛ́á ɔ bɔlatɔ́ na bənú. Mɔlɛ́áfɛ wɔ́ sá ósó ɔ tɔtámátámá ɔháá bɛ́múɛ́tɛ́ ɛ́bá wɔ́ lɛ bá ɔ bɔlatɔ́ na hɛlɛ́álɛ́á, hɔ́ánánátɔ́ nɔ sa ósó ɔ tɔtámátámá ɔháá ábá nɔ lɛ bá ɔ bɔlatɔ́ na mɛaŋɔ́á. 5Mɛaŋɔ́á mɛ lɛ́á hɛlɛ́álɛ́á, bənú, mɛlɛ́áfɛ. Wɛ́ɛ́yɛ́ ɔwá a lɛ́á ɔ bɔlatɔ́ na mɛaŋɔ́á ɛ́sɛ́á mɛ lɛ́á ɔ bɔlatɔ́ na wɛɛ́ya, a ŋɔ tɔtámátámá hákɛna tuəŋí bɔkɔasɛ́á, ɛŋaná mɛaŋɔ́á nɔ sa ósó ɔkɛa ata bɔkɔa. 6Wɛ́ɛ́yɛ́ ɔwá a lɛ bá ɔ bɔlatɔ́ na mɛaŋɔ́á, bá ŋɔ wɛɛ́ya omboko ɔ níə́lətíə́, ɛ́sɛ́á mɛlɛ́áfɛ mɛkɔ́tákánɔ́, bá miítə bátáka, bá miítə əmbəkinə ɔ hiwə, yɛ́ titəkə. 7Ábá nɔ lɛa ɔ bɔlatɔ́ na mɛaŋɔ́á, ábá nɔ ndɔ bɛ́ámɛ́á bɛtambá tə́tə́niə, nɔ́ batá ata yatɛ́ ɔyɛ́á nɔ ndɔ hikiə, nɔ ŋɔ kusənə. 8Nɔ́ tɔtámátámá hákɛ́ná tuəŋí, nɔ́yɛ́, nɔ ŋɔ báá bámɛ́á bɔkɔ́nɛna. Əlimə yɛ nɔ́yɛ́ nɔ ŋɔ tuúmə tɔ́ yamɛ́á Isə́ ínə́niə. 9Mɛ ndɔ bənú hikiə ɛ́sɛ́á yamɛ́á Isə́ a ndɔ mɛaŋɔ́á hikiə. Nɔ́ bámɛ́nɛ́na ətíə́ yɛ nɛ́ámɛ́á nibo. 10Ábá nɔ ndɔ yə́míə́ imbə́ndə́ tə́tə́niə, nɔ ŋɔ bámɛnɛna ətíə́ yɛ nɛ́ámɛ́á nibo, ɛ́sɛ́á mɛ ná imbə́ndə́ yɛ́ yamɛ́á Isə́ tə́tə́niə, mɛ báka ətíə́ yɛ nɛ́áyɛ́á nibo.»

11«Mɛ ná bənú hɔ́kɛ́na nɔ́yɛ́ ɔkɛaka ɔwá nɛ́ámɛ́á nɛhɔnɔ nɛ́ báá na bənú, ɔkɛaka ɔwá níə́núə́ nɛhɔnɔ tɔ́na nɛ́ báá úndúə́tɔ. 12Ɔ́ wə́míə́ umbə́ndə́ wúuwu: Nɔ́ hikə́kə́níə́ bənú na bənú ɛ́sɛ́á mɛ ná bənú híkə́kíə́. 13Nibo nɛŋɛ́ŋa nɛ́ yáyɛ́nánátɔ́ ɔnɛ́á mɔndɔ a ósó uwinə́niə, ɔ́ bɔ́áyɛ́á buɔmɔ́ uwíndiə ɛlɔ́áyɛ́ bɛ́áyɛ́á bɛŋgɔ́áyɛ́. 14Nɔ lɛa bɛ́ámɛ́á bɛŋgɔ́áyɛ́ ábá nɔ ndɔ kɛa yatɛ́ ɔyɛ́á mɛ ndɔ bənú lɛna. 15Mɛ lɛ ndɔ bənú ɛ́lɛnɛna tɔ́na bɔnyɛna bɔkɔasɛ́á, mɔnyɛna a lɛ ndɔ mafɛka má yayɛ́á isə́lúkú manya. Mɛ ndɔ bənú ɛ́lɛnɛna bɛ́ámɛ́á bɛŋgɔ́áyɛ́ bɔkɔasɛ́á, bikimə ɔbɛ́á yamɛ́á Isə́ a ná mɛaŋɔ́á lákɛ́na, mɛ ná bənú bɛɛ́ta mənyə́síə́. 16Tátá bənú nɔ́ ná mɛaŋɔ́á tɛfa, mba, mɛaŋɔ́á ɔbánɔ́ mɛ́ ná bənú tɛfa, mɛ ná bənú bɔsɔ́ma índíə́ ɔkɛaka ɔwá nɔ tɔtámátámá hákɛ́na, tɔtámátámá ɔtɔ́á tɔ́ ŋɔ bámɛnɛna. Nɔ́yɛ́, yamɛ́á Isə́ a ŋɔ bənú índiə bikimə ɔbɛ́á nɔ ŋɔ wɛɛ́ya bata ɔ ɔwámɛ niínyə. 17Mɛ ndɔ bənú lɛna ɔwá, nɔ hikə́kə́níə́ bənú na bənú.»

Bɛndɔ bá misí bá nɔ́ Yə́susu na bɔayɛ́ hɛ́tɛ́na

18«Ábá bɛndɔ bá misí bá ndɔ bənú bánya, nɔ́ manyá ɔwá bá ka taŋa ɔwámɛ ɔbánya. 19Ata nɔ bámɛnɛna bá misí, há misí yɛ́ ndɔ bənú hikiə, mba, nɔ lɛ bá bá misí mɛaŋɔ́á, mɛ́ ná bənú tɛfa, mɛ ná bənú húlíə́ ɔ ətíə́ yɛ bɛndɔ, nɔ́yɛ́, nɔ lɛ bá tɔ́na bá misí, ɔ́ ɛlɔ́áyɛ́ nɔ́yɛ́ misí yɛ́ ndɔ bənú bánya. 20Nɔ́ ɛtambá bɛ́kɔ́lɔ́mɔ́na ɔyɛ́á mɛ ná bənú lɛ́ná mɛ sɛ́á: “Mɔnyɛna a lɛ bá mɔŋɛ́ŋa yáyɛ́ná yayɛ́á isə́lúkú.” Ábá bɛndɔ bá ka mɛaŋɔ́á təkəsəkə, bá ŋɔ bənú təkəsəkə tɔ́na, ábá bá ka yámɛ́á ɛtambá tə́tə́niə, bá ŋɔ ənú tə́tə́niə tɔ́na. 21Mba, bá ŋɔ bənú bɛ́ɛ́yɛ́ bikimə kɛaka ɛlɔ́áyɛ́ nɛ́ámɛ́á niínyə bɔkɔasɛ́á, bá lɛ ndɔ wɛ́ɛ́yɛ́ manya ɔwá a ná mɛaŋɔ́á lɔma. 22Ata mɛ lɛ ndasá, ata mɛ lɛ bəə́bu hɛ́na, há bá lɛ bá kɔ́átɔ́ ɔ bɔbɛ́á, mba, isíŋáka bá lɛ bá na nɛniasɛna nɛ́ búə́búə́ bɔbɛ́á.»

23«Wɛ́ɛ́yɛ́ ɔwá a ndɔ mɛaŋɔ́á bánya, a ndɔ yamɛ́á Isə́ bánya tɔ́na. 24Ata mɛ lɛ bɛkɔa kɛ́á ɔbɛ́á mɔndɔ muinə́muinə́ a sa kɛa ɔ uwəbú ətíə́, há bá lɛ bá kɔ́átɔ́ ɔ bɔbɛ́á, mba, isíŋáka ɔwá bá ná bɛɛ́ta siəkínə, bá ndɔ bəsú bánya na mɛaŋɔ́á na yamɛ́á Isə́. 25Mba, ɔkɛaka ɔwá ɛtambá ɔyɛ́á yɛ́ lɛ́á tilə́kə́tɔ́ ɔ uwəbú umbə́ndə́ yɛ́ bíúndúsíníə́ ɔyɛ́á yɛ́ ndɔ laa yɛ́ sɛ́á: “Bá ka mɛaŋɔ́á bánya ɛŋaná hɛkɔma.”»

26«Ɛnáká Mɔkamɛla a ndáfámá ɔwá mɛ ŋɔ bənú lɔ́mɛ́na ɔ húlə́kinə na yamɛ́á Isə́, á Umbúínyi wɔ́ taká ɔwá Isə́ a ŋɔ lɔ́ma, muítə wɔ́ ŋɔ báá wamɛ́á mumbóŋímboŋi. 27Bənú tɔ́na nɔ ŋɔ báá bámɛ́á bəmbóŋímboŋi bɔkɔasɛ́á, nɔ lɛa na mɛaŋɔ́á hata yɛ ikúílí ɔ nɛbalɛ́ná.»

Currently Selected:

Yɔhánɛsɛ 15: tvu

Highlight

Copy