Yɔhánɛsɛ 6

Yə́susu a nɔ́ tukóló tɔ́lánɔ tɔ́ bɛndɔ lúkə́kə

(Mat 14.13-21; Mə́l 6.30-44; Lúk 9.10-17)

1Əlimə yɛ nɔ́yɛ́, Yə́susu a ná bíásɛ́na ɔ yííní tanɛ́ yɛ nɛɛ́ŋɛa nɛ́ Kalɛ́lɛa, bá ɛ́lɛakɛnɛna tɔ́na bá sɛ́á: «Nɛɛ́ŋɛa nɛ́ Tibɛlíátɛ.» 2Iloŋo yɛŋɛ́ŋa yɛ́ ka bá yɛ́ ndɔ wɛɛ́ya ɔŋgɔ bɔkɔasɛ́á, bɛndɔ bá ka tɔŋgɛtɛ́nɛ́á tɔ́ yələ́mənə siəkinə ɔtɔ́á a ná bá a ndɔ kɛa ɔ bɛnákɛnákɛ uniŋəsiə. 3Ɛlɔ́áyɛ́ nɔ́yɛ́, a ná báláka ɔ ɔmáá ɔmbáŋá, a ná tuə́nə ɔ misí ɔmɔ́tɔ́yɛ́ na báyɛ́á bɔkɔ́nɛna. 4Básɛ́ka, ɛŋganda yɛ Bɛyútɛnɛ yɛ́ ka báá hoóyi: 5A ná busíə́ bɔkɔna, a ná iloŋo yɛŋɛ́ŋa yámá ɔyɛ́á yɛ́ ná báá ɔ ɔsákɔna ɔwayɛ́ busíə́. A ná Filíbo batá a sɛ́á: «Hə́níə́ ɛkasɛ tɔ́ bɛbɛlɛ́tɛ ɔ́ndɔ́kɔ́ mbá tɔ́ lúkə́kínə ɔ báaba bɛndɔ bəkimə əə́?» 6A ka wɛɛ́ya bata nɔ́yɛ́ ɔkɛaka ɔwá mbá a manyá ɛ́sɛ́á Filíbo a ndɔ wɛɛ́ya bɛ́kámɔsɔkɔna. Ɔ taká, a ka bá a ndɔ manya yatɛ́ ɔyɛ́á a ndɔ kɛaka. 7Filíbo a sɛ́á: «Ata na bɛbɔ́ɛ́yɛa bɛ́fandɛ́ bɛ́ bɛcácɔ́, tɔ sa ósó ɔ bɛbɛlɛ́tɛ ɔwɔ́ndɔ biəŋí ɔkɛaka ɔwá, mɔndɔ tɛ́á á hɛbɛ́sɛ́bɛsɛ kusə́nə.» 8Ɔmɔtɛ́ wa báyɛ́á bɔkɔ́nɛna nɛ́áyɛ́á niínyə á Andɛlɛ́, munínyə́ wa Símono Bíə́lə, a ná wɛɛ́ya lɛ́na a sɛ́á: 9«Mɔná mɛlɛ́mɛndɔ́ a lɛa háha na bɛbɛlɛ́tɛ bɛ́lánɔ na tuɔfɔ́ tɔ́fandɛ́, mba bɛ́ sɔ́ ŋɔ hɔ́ánana ɛlɔ́áyɛ́ báaba bɛndɔ bəkimə.» 10Yə́susu a ná báyɛ́á bɔkɔ́nɛna lɛ́na a sɛ́á: «Nɔ́ bəə́bu bəkimə tuənə́kíníə́.» Tumbuəmbúə́ tɔ ka báá tuəŋí ɔ yɛ́táyɛ́ ɛbɔ́ka. Bɛndɔ bá ná tuənə́kínə, balɛ́mɛndɔ́ bá ka báá hoóyi na tukóló tɔ́lánɔ. 11Ɔ yɛ́ɛ́yɛ́ ikúílí, a ná bɛbɛlɛ́tɛ ɛtá, a ná Huɛlɛ́ mohóloniə híə́níníə́, a ná bəə́bu afákɛ́na. Hɔ́ánánátɔ́, a ná bəə́bu tuɔfɔ́ índíə́kínə́ ɛ́sɛ́á bá ná híkə́kíə́. 12Ikúílí bəkimə bá ná nibíə́kínə, a ná báyɛ́á bɔkɔ́nɛna lɛ́na a sɛ́á: «Nɔ́ tɔbɛ́sɛ́bɛsɛ kɔtáká tukimə ɔtɔ́á tɔ́ ná tíkə́nə́ ɔkɛaka ɔwá, tɔ lɛ ombóko ata bɔɔ́la.» 13Bá ná tɔbɛ́sɛ́bɛsɛ kɔtáká ɔtɔ́á tɔ́ ná tíkə́nə́ ɔ bɛbɛlɛ́tɛ bɛ́lánɔ ɔbɛ́á bá ná nɛaka. Bá ná úndúsíə́ niómo nɛ́ bɛkana na bɛ́fandɛ́. 14Ikúílí bɛndɔ bá ná hɛŋgɛtɛ́nɛ́á hɛ́ yələ́mənə siəkínə ɔhɛ́á Yə́susu a ná kɛ́áka, bá sɛ́á: «Ɔ taká, wɔ́ɔwɔ mɔndɔ a lɛa mɔhɛ́nátɔtányɛ́ ɔwá a ná hɔ́ánána ɔndasá ɔ misí.» 15Mba, Yə́susu a ka bá a ndɔ manya ɔwá ɛkasɛ bá wɛɛ́ya halɛ́na, bá wɛɛ́ya tuəníníə́ munəni. Nɔ́yɛ́, a ná manyɔ́ bísúə́lə bíbúə́ ɔ ɔmáá ɔmbáŋá.

Yə́susu a ndɔ kɛnda ɔ mənífə́ ɔmbáŋá

(Mat 14.22-23; Mə́l 6.45-52)

16Ɛnaka bɛkɔlakɔ́lá bɛ́ ndáfámá, bɔkɔ́nɛna bá Yə́susu bá ná lɔɔ́kɔ ɔ ɛsɛ́lɛ́ yɛ́ nɛɛ́ŋɛa. 17Bá ná fínə́ ɔ isóyí, bá ná botólíə́ ɔ nɛɛ́ŋɛa ɔ ɔbíásɛna ɔ wákaka ɔ bɔnɔŋɔ bɔ́ Kafalanahúmu. Ibínə́binə yɛ́ ka báá kɔ́átɔ, a sa bá a nɔ́ nda bəə́bu bɛtɔa. 18Nuíyi nɛ ka báá na iŋunu bɔkɔasɛ́á, umbúínyi wɔ́ ka bá wɔ́ ndɔ húkə na iŋgínə́. 19Bɔkɔ́nɛna bá ka báá bá nɔ́ kɛndaka hoóyi na tukóló tɔ́lɛ́ndálɔ tɔ́ amaná, bá ná yɛ́ɛ́yɛ́ ikúílí wɛɛ́ya yámá a ndɔ bɛ́nya hoóyi na isóyí, a kɛndaka ɔ mənífə́ ɔmbáŋá, bɔkɔ́lɔ́ma bɔ́ ná bəə́bu itíə́. 20Mba, a ná bəə́bu lɛ́na a sɛ́á: «Nɔ lɛ kɔlɔma, mɛaŋɔ́á!» 21Bá ka siəkə ɔ ɔwayɛ́ ɔtúána ɔ isóyí, mba ɔ umisíúmə́, isóyí yɛ́ ná káfámá ɔ ɛsɛ́lɛ́ ɔ ɛbɔ́ka ɔyɛ́á bá ná bá ɔ ɔwákaka.

Yə́susu a lɛa bɛ́labɔ́nɛ́á ɔbɛ́á bɛ́ ndɔ buɔmɔ́ índiə

22Ɔ ɔyáyáka, iloŋo yɛ́ bɛndɔ ɔyɛ́á yɛ́ ná tíkə́nə́ ɔ yííní tanɛ́ yɛ nɛɛ́ŋɛa, bá ná bínúnə́ ɔwá isóyí ɛ́mɔtɛ́ yɛ́ ná bá ɔmɔ́tɔ́yɛ́. Yə́susu a sa bála ɔ yɛ́táyɛ́ isóyí na báyɛ́á bɔkɔ́nɛna, mba bəə́bu bíbúə́ bá ná ákana. 23Bɛ́mɔtɛ́ bisóyí ɔbɛ́á bɛ́ ná húlínə́ ɔ bətínə́ yɛ Tibɛlíátɛ, bɛ́ ná ndáfámá hoóyi na ɛbɔ́ka ɔyɛ́á bá ná bɛbɛlɛ́tɛ nɛ́ákɛ́na əlimə ɔwá Isə́lúkú a nɔ́ Huɛlɛ́ mohóloniə híə́niniə. 24Ikúílí á iloŋo yɛ́ bɛndɔ bá ná yámá ɔwá Yə́susu na báyɛ́á bɔkɔ́nɛna bá lɛ bá ɔmɔ́tɔ́yɛ́, bá ná fíə́kínə ɔ bɛ́táyɛ́ bisóyí ɔ wákaka ɔ Kafalanahúmu, bá húlə́ wɛɛ́ya siəkə. 25Ikúílí bá ná Yə́susu bɔ́ŋɔ́ ɔ yííní tanɛ́ yɛ nɛɛ́ŋɛa, bá ná wɛɛ́ya batá bá sɛ́á: «Ə́ə́! Á Mulə́liə, úyə́níə́ ikúílí ɔ ná ndá háha fámá əə́?» 26A sɛ́á: «Ɛ́ɛ! Ɔ taká, mɛ ndɔ bənú nɔ́yɛ́ lɛna, nɔ ndɔ mɛaŋɔ́á siə bɔkɔasɛ́á nɔ ná bɛbɛlɛ́tɛ nɛaka, nɔ ná mbɛlɛ́máka, mba, tátá ɛlɔ́áyɛ́ tɔŋgɛtɛ́nɛ́á tɔ́ yələ́mənə ɔtɔ́á nɔ ná siəkínə. 27Nɔ lɛ nyɔ́ɔ́ ɛlɔ́áyɛ́ bɛ́labɔ́nɛ́á ɔbɛ́á bɛ́ ndɔ tɛŋɛa, nɔ́ nyɔ́ɔ́kɔ ɛlɔ́áyɛ́ bɛ́labɔ́nɛ́á bɛ́ ikúílíə́kimə, bɛ́ɛ́yɛ́ bɛ́labɔ́nɛ́á, Mɔná wa mɔndɔ a ŋɔ bənú índiə bɔkɔasɛ́á, ɔ ɔwayɛ́ Huɛlɛ́ á Isə́ a ná hibílíndíníə́ hɛ́ yayɛ́á iŋgínə́ índíə́.» 28Bá ná wɛɛ́ya batá bá sɛ́á: «Yatɛ́ tɔ əsú kɛ́áka mbá tɔ biolí nyɔ́ɔ́kɔ ɔbɛ́á Huɛlɛ́ a ndɔ siə əə́?» 29A sɛ́á: «Buolí ɔbɔ́á Huɛlɛ́ a ndɔ siə ɔwá nɔ nyɔ́ɔ́kɔ bɔ́ báka ɔwá, nɔ nɛkɔmba tálɛ́ná ɔ ɔwámɛ ɔwá a ná lɔma.» 30Bá ná ɛ́mbɛ́nɛ́ná bá sɛ́á: «Mba ɔwáwɔ́, yatɛ́ hɛŋgɛtɛ́nɛ́á hɛ́ yələ́mənə ɔ ósó uwəsú uwinə́niə ɔkɛaka ɔwá, tɔ lumínínə ɔ ɔwáwɔ bɛtambá əə́? Yatɛ́ buolí ɔ óso ɔkɛa əə́?» 31Ɔ makɔ́tákɛ, bíə́súə́ bisə́kínə́ bá ka bɛ́labɔ́nɛ́á nɛ́áka ɔbɛ́á bá ndɔ ɛ́lɛnɛna bá sɛ́á: Maána, ɛ́sɛ́á Mətilə má ndɔ laa má sɛ́á: «Huɛlɛ́ a ka bəə́bu bɛ́labɔ́nɛ́á índiə ɔbɛ́á bɛ́ ndɔ húlínə ɔ nɔɔ́mɛná.» 32Yə́susu a sɛ́á: «Ɛ́ɛ! Taká mɛ ndɔ bənú lɛna, tátá á Mósisi a ná bənú bɛ́labɔ́nɛ́á índíə́ ɔbɛ́á bɛ́ ndɔ húlínə ɔ nɔɔ́mɛná, á yamɛ́á Isə́ a ndɔ bənú tiísi yɛ bɛ́labɔ́nɛ́á índiə ɔbɛ́á bɛ́ ndɔ húlínə ɔ nɔɔ́mɛná. 33Ɔ taká, bɛ́labɔ́nɛ́á ɔbɛ́á Huɛlɛ́ a ndɔ índiə, bɛ́ ndɔ húlínə ɔ nɔɔ́mɛná, bɛ́ ndɔ buɔmɔ́ índiə ɔ bɛndɔ bá misí.»

34Bá ná yɛ́ɛ́yɛ́ ikúílí wɛɛ́ya lɛ́na bá sɛ́á: «Ə́ə́! Á Isə́lúkú, índíə́kínə́ bəsú bɛ́táyɛ́ bɛ́labɔ́nɛ́á ikúílí tɛ́á.»

35Yə́susu a ná bəə́bu lɛ́na a sɛ́á: «Mɛaŋɔ́á mɛ lɛ́á bɛ́labɔ́nɛ́á bɛ́ buɔmɔ́, ata ɛ́yánɛ́ ɔwá a ŋɔ ndasá na mɛaŋɔ́á, mɛtaná yɛ́ sa ndá wɛɛ́ya nɔɛ́na, ata ɛ́yánɛ́ ɔwá a ná nɛkɔmba tálɛ́ná ɔ ɔwámɛ, nuiyí nɛ́ sa ndá wɛɛ́ya nɔɛ́ná tɔ́na.» 36Mba, mɛ ka bənú nɔ́yɛ́ lakɛna, nɔ ka mɛaŋɔ́á siəkinə, ata nɔ́yɛ́, nɔ lɛ ndɔ lumininə. 37Bááyɛ́ bəkimə ɔbá Isə́ a ndɔ mɛaŋɔ́á índiə, bá ŋɔ ndasákɔ́ná na mɛaŋɔ́á, ata ɛ́yánɛ́ ɔwá a ndɔ ndasá na mɛaŋɔ́á, mɛ sa wɛɛ́ya bulə, 38bɔkɔasɛ́á mɛ ka húlínə ɔ nɔɔ́mɛná tátá ɛlɔ́áyɛ́ ɔkɛa yatɛ́ ɔyɛ́á mɛaŋɔ́á bɛ́múɛ́tɛ́ mɛ ndɔ hikiə, mba, ɛlɔ́áyɛ́ ɔkɛa uhikiə wɔ́ wɛ́ɛ́yɛ́ ɔwá á ná mɛaŋɔ́á lɔma. 39Ɔ́ uhikiə wɔ́ wɛ́ɛ́yɛ́ wúuwu ɔwá a ná mɛaŋɔ́á lɔma: Yɛ́ lɛa ɔwá, ata ɔmɔtɛ́ ətíə́ yɛ bááyɛ́ bəkimə ɔbá a ná mɛaŋɔ́á índíə́, mɛ sá hɔ́ánana ɔ uwəbú uwomboko, mba ɔ hinó hínítifə́, mɛ ná hɔ́ánána ɔ uwəbú uhuŋuəsiə. 40Ɛ́ɛ! Ɔ́ uhikiə wɔ́ yamɛ́á Isə́ wúuwu: Bááyɛ́ bəkimə ɔbá bá ndɔ Mɔná sinə, ɔbá bá ndɔ nɛkɔmba tálɛ́ná ɔ ɔwayɛ́, bá ŋɔ buɔmɔ́ bɔ́ ikúílíə́kimə kusənə, mɛ ŋɔ bəə́bu huŋuəsiə ɔ hinó hínítifə́.

41Ɔ yɛ́ɛ́yɛ́ ikúílí, Bɛyútɛnɛ bá ná botólíə́ ɔ ɔwayɛ́ ubílúlínə bɔkɔasɛ́á a ná láá a sɛ́á: «A lɛa bɔ́labɔ́nɛ́á ɔbɔ́á bɔ́ ndɔ húlínə ɔ nɔɔ́mɛná.» 42Bá sɛ́á: «Baánɛ, táta á Yə́susu á mɔná wa Yɔ́sɛbɛ əə́? Tɔ lɛ ndɔ isə́ na inyə́ manya əə́? Nəníə́ a ndɔ isíŋáka laa ɔwá, a ka húlínə ɔ nɔɔ́mɛná əə́?» 43A sɛ́á: «Nɔ lɛ bílúlə́ bənú na bənú. 44Ata mɔndɔ a sa ósó ɔndasá na mɛaŋɔ́á ábá yamɛ́á Isə́ ɔwá a ná mɛaŋɔ́á lɔ́má a sá wɛɛ́ya bísúínə, ɔwámɛ, ɔ hinó hínítifə́ mɛ ŋɔ wɛɛ́ya huŋuəsiə. 45Bɔhɛ́nátɔtányɛ́ bá ka tiləkə bá sɛ́á: “Huɛlɛ́ a ŋɔ bɛndɔ bəkimə úkúnəkiə.” Ata ɛ́yánɛ́ ɔwá a ná Isə́ ɔ́kɔ́kɛ́na, a ná bɛ́áyɛ́á bilə́líə́ kusə́nə, a ndɔ ndasá na mɛaŋɔ́á. 46Ata mɔndɔ ɔmɔtɛ́ a lɛ boóko a ná Isə́ sínə, úhúlíə́ ɔ wɛ́ɛ́yɛ́ ɔwá a ndɔ húlínə na Huɛlɛ́. Wɛɛ́ya a ná Isə́ síə́kínə. 47Ɛ́ɛ! Taká mɛ ndɔ bənú nɔ́yɛ́ lɛna, wɛ́ɛ́yɛ́ ɔwá a ndɔ lumininə, a báka na buɔmɔ́ bɔ́ ikúílíə́kimə. 48Ɔwámɛ, mɛ lɛa bɔ́labɔ́nɛ́á ɔbɔ́á bɔ́ ndɔ buɔmɔ́ índiə. 49Bíə́núə́ bisə́kínə́ bá ka maána nɛ́áka ɔ mándaŋɛ́á, bá ka wə́kunə. 50Mba, ábá mɔndɔ a ná bɔ́labɔ́nɛ́á nɛ́áká ɔbɔ́á bɔ́ ndɔ húlínə ɔ nɔɔ́mɛná, a sa ndá wəə.»

51«Mɛaŋɔ́á mɛ lɛ́á bɔ́labɔ́nɛ́á bɔ́ buɔmɔ́ ɔbɔ́á bɔ́ ndɔ húlínə ɔ nɔɔ́mɛná. Wɛ́ɛ́yɛ́ ɔwá a ŋɔ bɔ́táyɛ́ bɔ́labɔ́nɛ́á nɛ́áka, a ŋɔ nɔɔmɔkɔ ikúílíə́kimə. Bɔ́labɔ́nɛ́á ɔbɔ́á mɛ ŋɔ índiə, ɔ́ yamɛ́á mɛɛ́lɔ índíə́tɔ́ ɔkɛaka ɔwá, bɛndɔ bá misí bá bámɛ́nɛ́ná na buɔmɔ́.»

52«Əlimə yɛ bɛ́táyɛ́ bɛtambá, Bɛyútɛnɛ bəə́bu na bəə́bu bá ná lúmə́ ɔ utə́ŋə́niə mɔŋɛ́ŋa ɔwá, nəníə́ wɔ́ɔwɔ mɔndɔ a óso uwəsú ɔ yayɛ́á mɛɛ́lɔ uwíndiə ɔkɛaka ɔwá tɔ nɛ́áká əə́?» 53Yə́susu a sɛ́á: «Ɛ́ɛ! Taká mɛ ndɔ bənú nɔ́yɛ́ lɛna, ábá nɔ sá mɛɛ́lɔ yɛ Mɔná wa mɔndɔ nɛ́á, nɔ sá máyɛ́á manɔ́ŋɔ́ nyáá, nɔ sa ndábáá na buɔmɔ́. 54Wɛ́ɛ́yɛ́ ɔwá a ndɔ yamɛ́á mɛɛ́lɔ nɛ́á, a ndɔ mámɛ́á manɔ́ŋɔ́ nyáá, a lɛa na buɔmɔ́ bɔ́ ikúílíə́kimə, mɛ ŋɔ wɛɛ́ya huŋuəsiə ɔ hinó hínítifə́. 55Ɔ taká, yamɛ́á mɛɛ́lɔ yɛ́ lɛa tiísi yɛ bɔ́labɔ́nɛ́á, mámɛ́á manɔ́ŋɔ́ tiísi yɛ mɔnyáá. 56Wɛ́ɛ́yɛ́ ɔwá a ndɔ yamɛ́á mɛɛ́lɔ nɛ́á, a ndɔ mámɛ́á manɔ́ŋɔ́ nyáá, a lɛa ɔ nɛtɔana na mɛaŋɔ́á, mɛaŋɔ́á tɔ́na ɔ nɛtɔana na wɛɛ́ya. 57Isə́ ɔwá a ná mɛaŋɔ́á lɔ́má, a lɛa muɔmɔ́, wɛɛ́ya a ndɔ mɛaŋɔ́á nomosiə, hɔ́ánánátɔ́, mɛ ŋɔ wɛ́ɛ́yɛ́ nomokiə ɔwá a ndɔ yamɛ́á mɛɛ́lɔ nɛ́á. 58Ɔ́ bɔ́labɔ́nɛ́á bɔ́ɔbɔ ɔbɔ́á bɔ́ ná húlínə́ ɔ nɔɔ́mɛná. Bɔ́ lɛ bá ɛ́sɛ́á bɔ́ɛ́yɛ́ ɔbɔ́á bíə́núə́ bisə́kínə́ bá ná nɛaka, uwəbú, bá ka wə́ə́kunə, mba, wɛ́ɛ́yɛ́ ɔwá a ndɔ bɔ́tána bɔ́labɔ́nɛ́á nɛ́á, a ŋɔ nɔɔmɔkɔ ɔ ikúílíə́kimə.» 59Yə́susu a ka bɛ́ɛ́yɛ́ bikimə hɔ́ɔ́kɔ, a ná úkúnə́kíə́ ɔ miímə yɛ mabɛ́kálɛ́na yɛ Bɛyútɛnɛ ɔ Kafalanahúmu.

Bɛtambá ɔbɛ́á bɛ́ ndɔ buɔmɔ́ bɔ́ ikúílíə́kimə índiə

60Əlimə yɛ bɛtambá bɛ́ Yə́susu ɔwɔ́kɔ, báyɛ́á bɔkɔ́nɛna bəəŋí bá ná botólíə́ ɔlaa bá sɛ́á: «A nɔ́ ɛmbáta híkə, ɛ́yánɛ́ a ná ósó ɔ bɛ́táyɛ́ bɛtambá ɔwɔ́kɔ əə́?» 61A ná bínúnə́ ɔwá báyɛ́á bɔkɔ́nɛna bá ndɔ wɛɛ́ya sɔ́kɔ́nɛna ɔ yɛ́táyɛ́ ɛsalɛ. A ná bəə́bu lɛ́na a sɛ́á: «Nɔ́yɛ́ yɛ́ ndɔ bənú sə́kínə ɔwá nɔ lɛ lumínínə́ tɔ́na əə́? 62Nəníə́ nɔ ŋɔ kɛaka ábá nɔ ná siəkínə́ Mɔná wa mɔndɔ a nɔ́ tilə ɔ ɛbɔ́ka ɔyɛ́á a ná bámɛ́nɛ́na ubusíə́ bɔ́ ikúílí əə́? 63Umbúínyi Mɔnaŋanaŋa wɔ́ ndɔ buɔmɔ́ índiə, mɔndɔ bíbúə́ a sa ósó ɔkɛa ata bɔkɔa. Bɛtambá ɔbɛ́á mɛ ná bənú lákɛ́na, bɛ́ ndɔ Umbúínyi índiə, bɛ́ ndɔ buɔmɔ́ índiə tɔ́na. 64Mba uwənú ətíə́, bɔ́mɔtɛ́ bá lɛ ndɔ lumininə». Ɔ taká, ɔ nibotólíníə́, Yə́susu a ka bá a ndɔ bááyɛ́ manya ɔbá bá sa báá bá ndɔ lumininə, a ka bá a ndɔ manya wɛ́ɛ́yɛ́ tɔ́na ɔwá ɛkasɛ a wɛɛ́ya sɛma. 65A ná kɔndá ɔlaa a sɛ́á: «Ɔ́ ɛlɔ́áyɛ́ nɔ́yɛ́ mɛ ná bənú lɛ́ná mɛ sɛ́á: “Ata mɔndɔ a sa ósó ɔ ndasá na mɛaŋɔ́á ábá Isə́ a sá wɛɛ́ya iŋgínə́ índiə.”»

66Ɔ lúmə́kə́ ɔ yɛ́táyɛ́ ikúílí, báyɛ́á bɔkɔ́nɛna bəəŋí bá ná híáná na əlimə, bá lɛ wɛɛ́ya ɔŋgɔ́ tɔ́na. 67Nɔ́yɛ́, Yə́susu a ná ilúkunə yɛ́ niómo na bɛ́fandɛ́ lɛ́na a sɛ́á: «Uwənú tɔ́na, nɔ ndɔ ənú siə ɔwakána əə́?» 68Símono a sɛ́á: «Á Isə́lúkú, ɔwanɛ́ lɛ́á tɔ ná ósó ɔwakána əə́? Ɔ báka na bɛtambá ɔbɛ́á bɛ́ ndɔ buɔmɔ́ bɔ́ ikúílíə́kimə índiə. 69Uwəsú tɔ ka lumininə, tɔ ndɔ manya ɔwá, aŋɔ́á ɔ lɛ́á Mɔnaŋanaŋa ɔwá Huɛlɛ́ a ná lɔma». 70Yə́susu a sɛ́á: «Uwənú á niómo na báfandɛ́, tátá mɛaŋɔ́á mɛ ná bənú tɛ́fá əə́? Mba ata nɔ́yɛ́, ɔmɔtɛ́ uwənú ətíə́ a lɛa yɛ́mɔtɛ́ yití.» 71A ka bá a ndɔ hɛ́na nɔ́yɛ́ ɛsalɛ yɛ́ Yútasɛ á mɔná wa Símono Isikalióto bɔkɔasɛ́á, Yútasɛ ɔwá ɛkasɛ a wɛɛ́ya sɛmá, a ka báá ɔmɔtɛ́ wa niómo na báfandɛ́.

Currently Selected:

Yɔhánɛsɛ 6: tvu

Highlight

Copy