Yɔhánɛsɛ 9

Yə́susu a nɔ́ mɔndɔ niŋəsiə ɔwá bá ná bíə́nə́ na indímə́

1Yə́susu ɔ tɔ́mbáka ɔ ɛnɔ́mɛ, a ná mɔndɔ ɛ́nyánána ɔwá bá ná bíə́nə́ na indímə́. 2Báyɛ́á bɔkɔ́nɛna bá ná wɛɛ́ya batá bá sɛ́á: «Á Mulə́liə, ɛlɔ́áyɛ́ yatɛ́ bá ná wɔ́ɔwɔ mɔndɔ bíə́nə́ na indímə́ əə́? Ɛlɔ́áyɛ́ bɔ́áyɛ́á bɔbɛ́á, alɛ́ɛ́, ɛlɔ́áyɛ́ bɔbɛ́á bɔ́ híə́yíə́ hikúlə əə́?» 3A sɛ́á: «Tátá ɛlɔ́áyɛ́ bɔ́áyɛ́á bɔbɛ́á, ata ɛlɔ́áyɛ́ bɔbɛ́á bɔ́ híə́yíə́ hikúlə. A lɛa na indímə́ ɔkɛaka ɔwá, bɛndɔ bá injiŋə yɛ Huɛlɛ́ síə́kínə ɔ buolí ɔ tɔ́mbákɛna na wɛɛ́ya. 4Hata yɛ ikúílí ɔyɛ́á buɔsɛ́ bɔ́ na lɛ́á, tɔ ná hɔ́ánána ɔ biolí bɔ́ wɛ́ɛ́yɛ́ ɔnyɔɔ ɔwá a ná mɛaŋɔ́á lɔma. Ɛkasɛ ibínə́binə yɛ́ kɔ́á ɔwá ata mɔndɔ a sa ósó ɔnyɔɔ. 5Ɔ ikúílí mɛ nalɛ́á ɔ misí, mɛ lɛa isəmú yɛ́ bɛndɔ bá misí.»

6Ɛnaka a bɛ́ɛ́yɛ́ bɛtambá hɔ́ɔ́kɔ́, a ná malá túə́ ɔ misí, a ná umbunə́ njɔ́kɔ́tɛ́lá na tɔ́áyɛ́á tɔnɔnɔ́, a ná ɔndiɔbɛ ɛta, a ná kɔ́kɔ́sála ɔ məə́sə má mundímə́ndímə. 7A ná wɛɛ́ya lɛ́na a sɛ́á: «Káka busíə́ sɔ́áka ɔ hindoŋó hɛ́ Silowə́.» (Nɛ́ɛ́yɛ́ niínyə nɛ́ ndɔ siə ɔlaa nɛ́ sɛ́á: «Mɔsɔ́másɔma»). Mundímə́ndímə a ná ákáná umə́, a ná busíə́ bɛ́sɔ́áka. Ɛnaka a ndáhíáná, a siəkinənə muɛsɛ.

8Bəkúlə́kulə na bááyɛ́ ɔbá bá ná wɛɛ́ya siəkínə́ buɔnɔ́ a ndɔ húlə́ ndɔlɔ, bá bɛ́bátaka bá sɛ́á: «Baánɛ, tátá ɔ́ wɛ́ɛ́yɛ́ mɔndɔ ɔwá ná báá tuənə́tɔ́ ɔ ɔndɔlɔ əə́?» 9Báaba bá sɛ́á: «Wɛɛ́ya». Bə́ə́ní bá sɛ́á: «Bóo! Tátá wɛɛ́ya, mba a ná wɛɛ́ya hɔ́áka ɔbánɔ́.» Mba mundímə́ndímə a sɛ́á: «Ɔ́ mɛaŋɔ́á bɛ́múɛ́tɛ́ wɔ́ɔwɔ.» 10Bɛndɔ bá ná wɛɛ́ya batá bá sɛ́á: «Yatɛ́ yɛ́ ná kɛ́áka ɔ ndɔ sinənə isíŋáka əə́?» 11A sɛ́á: «Mɔndɔ ɔwá bá ndɔ ɛ́lɛnɛna bá sɛ́á á Yə́susu, a ná umbunə́ nyɔ́kɛ́la, a ná mɛaŋɔ́á ɔndiɔbɛ kɔ́kɔ́sála ɔ məə́sə a sɛ́á: “Káka busíə́ bɛ́sɔ́áka ɔ Silowə́.” Ɛnaka mɛ ákáná ɔmɔ́tɔ́yɛ́, mɛ ná bɛ́sɔ́áka, isíŋáka mɛ ndɔ sinənə muɛsɛ.» 12Bɛndɔ bá ná wɛɛ́ya batá bá sɛ́á: «Hə́níə́ mɔ́táyɛ́ mɔndɔ a lɛ́á əə́?» A sɛ́á: «Mɛ lɛ ndɔ manya.»

Bɛfalísia bá ndɔ mundímə́ndímə wa niŋə́tɔ́ bɛkɔa bata

13Əlimə yɛ nɔ́yɛ́, bá ná mundímə́ndímə wa niŋə́tɔ́ ákánána ɔ busíə́ bɔ́ Bɛfalísia. 14Ɔ buɔsɛ́ ɔbɔ́á Yə́susu a ná umbunə́ nyɔ́kɛ́la, a ná mundímə́ndímə niŋə́síə́, yɛ́ ka báá hinó hɛ́ Sábatɛ. 15Ɔ́ ɛlɔ́áyɛ́ nɔ́yɛ́, Bɛfalísia bəə́bu tɔ́na, bá ná mɔndɔ batá yatɛ́ yɛ́ ná kɛ́áka a ndɔ sinənə isíŋáka. A ná bəə́bu lɛ́na a sɛ́á: «A ná mɛaŋɔ́á ɔndiɔbɛ kɔ́kɔ́sála ɔ məə́sə, mɛ ná busíə́ bɛ́sɔ́áka, isíŋáka mɛ ndɔ sinənə.» 16Bɛ́mɔtɛ́ Bɛfalísia bá ná lúmə́ ɔ utə́ŋə́niə bá sɛ́á: «Wɔ́ɔwɔ mɔndɔ ɔwá a ná bɔ́ɔbɔ bɔkɔa kɛáka a sa ósó uhúlínə na Huɛlɛ́ bɔkɔasɛ́á, a lɛ ndɔ umbə́ndə́ wɔ́ Sábatɛ bítə́tə́niə.» Mba, bə́ə́ní bá laaka bá sɛ́á: «Nəníə́ mɔkɛamabɛ́á a óso ɔ nɛ́tána nindínə́ nɛ́ tɔŋgɛtɛ́nɛ́á tɔ́ yələ́mənə ɔkɛa əə́?» Kɛsalɛ́á yɛ́ ná fínə́ ɔ uwəbú ətíə́. 17Nɔ́yɛ́, Bɛfalísia bá ná manyɔ́ mundímə́ndímə bata bá sɛ́á: «Mba ɔwáwɔ, nəníə́ ɔ ndɔ aŋɔ́á laa ɛlɔ́áyɛ́ wɛ́ɛ́yɛ́ ɔwá a ná aŋɔ́á níŋə́síə́ əə́?» A ná bíhíə́níníə́ a sɛ́á: «A lɛa wɔmɔtɛ́ mɔhɛ́nátɔtányɛ́.» 18Mba, bisə́lúkú bɛ́ Bɛyútɛnɛ bá sa hikiə uluminə ɔwá a ka báá na indímə́, isíŋáka a ndɔ sinənə, ɛlɔ́áyɛ́ nɔ́yɛ́ bá ná híə́yíə́ hikúlə ɛ́lɛ́ákɛ́na. 19Ɛnaka híə́yíə́ hikúlə hɛ́ ndáfámá, bá ná bəə́bu batá bá sɛ́á: «Baánɛ! Wənúə́ mɔná wɔ́ɔwɔ əə́? Bá ka wɛɛ́ya bíə́nə na indímə́ əə́? Yatɛ́ yɛ́ ná kɛ́áka a ndɔ sinənə isíŋáka əə́?» 20Hikúlə bá sɛ́á: «Ɛ́ɛ! Tɔ ndɔ manya muɛsɛ muɛsɛ ɔwá wəsúə́ mɔná, tɔ ka wɛɛ́ya bíə́nə na indímə́. 21Mba, ata yatɛ́ ɔyɛ́á yɛ́ ná kɛ́áka ɔwá a siəkínə́nə́ isíŋáka, ata mɔndɔ ɔwá a ná wɛɛ́ya məə́sə úbúnə́, tɔ lɛ ndɔ manya. A lɛ bá tɔ́na hɛlɔ́matɔ́, nɔ́ batáka ɔ ɔwayɛ́, á bínífúnə́ wɛɛ́ya bɛ́múɛ́tɛ́.»

22Hikúlə bá ka hɔ́ɔ́kɔ nɔ́yɛ́ bɔkɔasɛ́á, bá ka báá bá ndɔ bisə́lúkú bɛ́ Bɛyútɛnɛ kɔ́lɔ́ma. Ɔ taká, báaba bá ka ɔ́kɔ́nɔ ɔwá, ata ɛ́yánɛ́ ɔwá a ŋɔ fə́mə́ləniə a sɛ́á á Yə́susu á lɛ́á Mɛ́sia, bá ŋɔ wɛɛ́ya bulə ɔ miímə yɛ mabɛ́kálɛ́na. 23Ɔ́ ɛlɔ́áyɛ́ nɔ́yɛ́ á hikúlə hɛ́ ná láá hɛ́ sɛ́á: «A lɛ bá tɔ́na hɛlɔ́matɔ́, nɔ́ batáka ɔwayɛ́.»

24Ɔ bikúílí bɛ́fandɛ́, Bɛfalísia bá ná mɔndɔ ɛ́lɛ́ákɛ́na ɔwá a ná báá na indímə́, bá ná wɛɛ́ya lɛ́ná bá sɛ́á: «Hɔ́ɔ́kɔ á taká ɔ busíə́ bɔ́ Huɛlɛ́. Tɔ ndɔ manya ɔwá wɛ́ɛ́yɛ́ mɔndɔ a lɛa mɔkɛamabɛ́á.» 25A ná bəə́bu bíhíə́níníə́ a sɛ́á: «Mɛ lɛ ndɔ manya ɔwá a lɛa mɔkɛamabɛ́á, mba, mɛ ndɔ manya bɔkɔa bɔ́mɔtɛ́, mɛ ndɔ sinənə muɛsɛ.» 26Bá ná wɛɛ́ya batá bá sɛ́á: «Yatɛ́ a ná aŋɔ́á kɛ́áka əə́? Nəníə́ a ná aŋɔ́á məə́sə úbúnə́ əə́?» 27Wɛ́ɛ́yɛ́ mɔndɔ a sɛ́á: «Mɛ ná bənú bɛkɔa bikimə nífúnə́kínə, mba, nɔ sá mɛaŋɔ́á ɔ́kɛ́na. Yatɛ́ mɛ láá tɔ́na əə́? Bənú tɔ́na nɔ ndɔ siə ɔhíána báyɛ́á bɔkɔ́nɛna əə́?» 28Ɔ yɛ́ɛ́yɛ́ ikúílí, Bɛfalísia bá ná lúmə́ ɔ ɔwayɛ́ ɔkɔ́ba bá sɛ́á: «Aŋɔ́á ɔ́ lɛ́á wayɛ́á mɔkɔ́nɛna. Uwəsú, tɔ lɛa bɔkɔ́nɛna bá Mósisi. 29Tɔ ndɔ manya ɔwá a Mósisi á Huɛlɛ́ a ná hɔ́kɛ́na, mba wɛ́ɛ́yɛ́ mɔndɔ, tɔ lɛ ndɔ manya ɔ ɛbɔ́ka ɔyɛ́á a nɔ́ húlínə.» 30Wɛ́ɛ́yɛ́ mɔndɔ a sɛ́á: «Ɔ́ yələ́mənə yɛ́ bɔkɔa yɛ́ɛyɛ: Nɔ lɛ ndɔ manya ɔ ɛbɔ́ka ɔyɛ́á a nɔ́ húlínə. Mba nɔ́yɛ́, a ná mɛaŋɔ́á məə́sə ubunə. 31Tɔ ndɔ manya ɔwá abáka Huɛlɛ́ a lɛ ɔ́kɔ́ yatɛ́ ɔyɛ́á mɔkɛamabɛ́á a ndɔ wɛɛ́ya lɛna. Mba, a ndɔ uŋgə́lə́kí wɔ́ wɛ́ɛ́yɛ́ ɔ́kɔ ɔwá a ndɔ wɛɛ́ya bə́tiə, a ndɔ wə́yíə́ uhikiə ɔ́kɛ́na tɔ́na. 32Ata ɔ hííní hinó bá sa ndɔ́ɔ́kɔ ɔwá mɔndɔ a ná məə́sə má wɛ́ɛ́yɛ́ úbúnə́ ɔwá bá ná bíə́nə́ na indímə́. 33Ata wɛ́ɛ́yɛ́ mɔndɔ a lɛ húlínə́ na Huɛlɛ́, há a sa óso ɔkɛa ata bɔkɔa.» 34Bá ná wɛɛ́ya bíhíə́níníə́ bá sɛ́á: «Ɔ hata yɛ ikúílí ɔwáwɔ nibíbíə́nə, ɔ lɛa ɔ bɔbɛ́á, ɔ nɔ́ ndásá uwəsú ɔ uwukúniə əə́?» Nɔ́yɛ́, bá ná wɛɛ́ya bulə́ ɔ miímə yɛ mabɛ́kálɛ́na.

Bundímə́ bɔ́ mɔlɛ́má

35Yə́susu a ná ɔ́kɔ́ ɔwá Bɛfalísia bá ná wɛɛ́ya bulə́kə. A ná ká wɛɛ́ya ɛ́nyánána, a ná wɛɛ́ya batá a sɛ́á: «Ɔwáwɔ, ɔ ndɔ nɛkɔmba tálɛ́na ɔ Mɔná wa mɔndɔ əə́?» 36Wɛ́ɛ́yɛ́ mɔndɔ a sɛ́á: «Á Isə́lúkú, ɛ́yánɛ́ mɔ́táyɛ́, lɛná mɛaŋɔ́á ɔkɛaka ɔwá mɛ nɛ́ámɛ́á nɛkɔmba tálɛ́na ɔ ɔwayɛ́.» 37Yə́susu a sɛ́á: «Ɔ ndɔ wɛɛ́ya sinə muɛsɛ, wɛɛ́ya a ndɔ aŋɔ́á hɛ́na isíŋáka.» 38Wɛ́ɛ́yɛ́ mɔndɔ a sɛ́á: «Á Isə́lúkú mɛ ndɔ nɛ́ámɛ́á nɛkɔmba tálɛ́na ɔ ɔwáwɔ.» A ná kiníə́ ɔwayɛ́ busíə́. 39Ɔ yɛ́ɛ́yɛ́ ikúílí, Yə́susu a sɛ́á: «Mɛ ka ndasá ɔ yɛ́ɛyɛ misí ɔkɛaka ɔwá ɛmbakɔ́ yɛ́ fámálána: Bəndímə́ndímə bá siəkínə́nə, mba, bááyɛ́ ɔbá bá ndɔ sinənə, bá híáná bəndímə́ndímə.» 40Ɛnaka bɛ́mɔtɛ́ Bɛfalísia ɔbá bá ná báá ɔ ɛmɛ́ŋɛ́ yɛ Yə́susu bá bɛ́táyɛ́ bɛtambá ɔ́kɔ́kɛ́na, bá ná wɛɛ́ya batá bá sɛ́á: «Bəsú tɔ́na, tɔ lɛa bəndímə́ndímə əə́?» 41A ná bəə́bu bíhíə́níníə́ a sɛ́á: «Ata nɔ báá taká bəndímə́ndímə, há hɛkɔma hɛ́ lɛ ndɔ bənú sinə.» Mba, isíŋáka ɔwá nɔ ndɔ laa nɔ sɛ́á: «Tɔ ndɔ sinənə» híə́núə́ hɛkɔma hɛ́ ndɔ bənú sinə.

Currently Selected:

Yɔhánɛsɛ 9: tvu

Highlight

Copy