Lúkasɛ 19

Yə́susu na Sakíyo

1Yə́susu a ná fínə́ ɔ Yəlíko, a bətínə́ bíásakɛna. 2Mɔndɔ a ka báá ɔmɔ́tɔ́yɛ́ nɛ́áyɛ́á niínyə á Sakíyo. A ka báá bɔ́ŋɔ́tɔ, isə́lúkú tɔ́na yɛ bakɔtabɛtásɛ. 3A ka bá a ndɔ siə ɔwá, a manyá ɛ́yánɛ́ a lɛ́á Yə́susu. Mba, ɛ́sɛ́á ilúkunə yɛ́ ná wɛɛ́ya lindíə́, a sá óso ɔ ɔwayɛ́ usinə bɔkɔasɛ́á, a ka báá mukítíkiti. 4A ná tɛbálɛ́na, a ná ákáná ɔ busíə́, a ná báláka ɔ bɔlɛ́á ɔbɔ́á bá ndɔ ɛ́lɛnɛna bá sɛ́á sikɔmɔ́lɛ ɔkɛaka ɔwá, a Yə́susu siəkínə, a ka bá a ndɔ manya a sɛ́á a ndɔ tɔ́mbákɛna ɔ ɔmɔ́tɔ́yɛ́. 5Ikúílí Yə́susu a ná káfámá ɔ indínə́ yɛ bɔ́táyɛ́ bɔlɛ́á, a ná məə́sə bə́líə́, a ná Sakíyo lɛ́na a sɛ́á: «Á Sakíyo, tukínə́ tɔfá bɔkɔasɛ́á, niɔfɛ́nɛ mɛ ndɔ siə utuənə ɔ ɔwáwɔ ɔmbɛ́la.» 6Sakíyo a ná tukə́kínə́ tɔfá, a ná Yə́susu káhá na nɛhɔnɔ. 7Bəkimə ɔbá bá ná síə́kínə́ nɔ́yɛ́, bá ná bótólíə́ ɔ ubílúlə, bá sɛ́á: «Nəníə́ ɛ́kɛ wɔ́ɔwɔ mɔndɔ a óso ufínə ɔ miímə yɛ wɔ́ɔwɔ mɔkɛamabɛ́á.» 8Mba, Sakíyo a ná bɛ́nyálɛ́lá á Isə́lúkú busíə́ a sɛ́á: «Á Isə́lúkú ɔ́kɔ́kɛ́na, abáka mɛ mámɛ́á maasɛ sələniə ɔ ətíə́, mɛ yɛ́mɔtɛ́ ɛsalɛ índiə ɔ tɔtɔyɔ́nɔ́, ábá mɛ ka mɔnɛ́á má mɔndɔ ɛta məəŋí ɛŋana hɛkɔma, mɛ wɛɛ́ya híə́niniə bikúílí bínisə.» 9Yə́susu a ná wɛɛ́ya lɛ́na a sɛ́á: «Ɔ niɔfɛ́nɛ Huɛlɛ́ a ná bɛndɔ bá yɛ́ɛyɛ miímə nuəkə́níə́ bɔkɔasɛ́á, aŋɔ́á tɔ́na ɔ báka wa hikúlə hɛ́ Ábɛlaháma. 10Ɔ taká Mɔná wa mɔndɔ a ka ndasá ɔ ndəsíə́ na unuəniə bɛndɔ bəkimə ɔbá bá ná nyɔaka.»

Ɔŋana wɔ́ bɔnyɛna bálálɔ́

(Mat 25.14-30)

11Ɛnaka bɛndɔ bá bɛ́táyɛ́ bɛtambá ɔ́kɔ́kɛ́na, Yə́susu a ná ɔŋana táá tɔ́na úmotí bɔkɔasɛ́á, bá ka báá hoóyi na Yəlúsalɛma, bá fɛkaka bá sɛ́á ɛkasɛ Nɛmanɛna nɛ́ Huɛlɛ́ nɛ́ bínə́níə́ ɔ umisíúmə́. 12A ná láá a sɛ́á: «Mɔndɔ ɔmɔtɛ́ wa nikúlə nɛŋɛ́ŋa a ná ákáná ɔ bɔnɔŋɔ bɔ́ hata a sɛ́á bá wɛɛ́ya tɛ́fáká munəni wa bɔ́táyɛ́ bɔnɔŋɔ, a ŋɔ ndahíáná əlimə yɛ ikúílí.» 13Ɔ busíə́ bɔ́ wə́yíə́ ɔwákaka a ná niómo nɛ́ báyɛ́á bɔnyɛna ɛ́lɛ́ákɛ́na, a ná mɔnyɛna tɛ́á índíə́ ɛcácɔ́ ɛ́mɔtɛ́ a sɛ́á: «Nɔ́ nyuŋgə́ kɛ́áká na bɛ́táyɛ́ bɛcácɔ́ ɔkafámáká ɔ ikúílí ɔyɛ́á mɛ ŋɔ ndahiana.» 14Mba, bɛndɔ bá bɔ́ɛ́yɛ́ bɔnɔŋɔ bá wɛɛ́ya bányáka, bá ná tíkə́ basɔ́másɔma lɔ́ma á munəni əlimə bá sɛ́á: «Tɔ lɛ ndɔ hikiə ɔwá a bəsú mánákɛ́na.» 15Nɔ́yɛ́, ɛnaka bá wɛɛ́ya tɛ́fáká munəni, a ná ndáhíáná ɔ ɔwayɛ́ bɔnɔŋɔ. A ná sá báyɛ́á bɔnyɛna ɛ́lɛakɛna ɔkɛaka ɔwá, a manya yatɛ́ mɔsɛ́ŋɛ́ bá ná kusə́nə. 16Wəbusíə́ a ná bɛ́nyálɛ́la a sɛ́á: «Á Isə́lúkú, mɛ ná mɔsɛ́ŋɛ́ nɛ́á niómo nɛ́ bɛcácɔ́.» 17Munəni a sɛ́á: «Muɛsɛ nɔ́yɛ́, á mɔnyɛna muɛsɛ ɛ́sɛ́á ɔ lɛ́á na yɔkɛ́nana ɔ bɛkɔa bɛtɛ́tɛ́á, mɛ ná aŋɔ́á tuəníníə́ mɔmanɛna wa niómo nɛ́ bətínə́.»

18Wa ɔwɔŋgɔkɔnɔ a ná tɔ́mbálɛ́la, a sɛ́á: «Á Isəlúkú, mɛ ná nɛ́á bɛcácɔ́ bɛ́lánɔ.» 19Munəni a sɛ́á: «Ɔwáwɔ tɔ́na bámɛ́nɛ́ná mɔmanɛna wa bətínə́ bɛ́lánɔ.» 20Wɔmɔtɛ́ mɔnyɛna a sɛ́á: «Á Isə́lúkú, ɔ́ yawɔ́á ɛcácɔ́ yɛ́ɛyɛ, mɛ ka yɛɛ́ta tə́tə́niə muɛsɛ, mɛ ná ɔ́lɔ́kɔ́kɔ́ na iləbə́. 21Mɛ ka aŋɔ́á kɔ́lɔ́maka bɔkɔasɛ́á, ɔ lɛa mɔndɔ wa mɔlɛ́má natákátɔ, ɔ ndɔ báta ɔ ɛbɔ́ka ɔyɛ́á ɔ sá bɛ́lɛna, ɔ huəkə tɔ́na ɔ ɛbɔ́ka ɔyɛ́á ɔ sá sɛla.» 22Munəni a ná wɛɛ́ya lɛ́na a sɛ́á: «Ɔ lɛa mɔnyɛna mɔbɛ́á ɛkasɛ mɛ aŋɔ́á kə́lə́sə́kíə́ ɔwɔŋgɔkɔnɔ bɛ́áwɔ́á bɛtambá. Ɔ ka bá ɔ ndɔ manya ɔwá mɛ lɛa mɔndɔ wa mɔlɛ́má natákátɔ, mɛ ndɔ báta ɔ ɛbɔka ɔyɛ́á mɛ sá bɛ́lɛna, mɛ ndɔ huə ɔ ɛbɔ́ka ɔyɛ́á mɛ sá sɛla. 23Nɔ́yɛ́, ɛlɔ́áyɛ́ yatɛ́ ɔ sa mámɛ́á mɔnɛ́á háá ɔ ɛbáŋgɛa ɔhá mɛ ŋɔ bɛtɛmá kusənə ɛnáká mɛ ndáhíáná əə́?» 24A ná bááyɛ́ lɛ́na ɔbá bá ná báá ɔmɔ́tɔ́yɛ́ a sɛ́á: «Nɔ́ yɛ́ɛ́yɛ́ ɛcácɔ́ ɔ́lɔ, nɔ́ índíə́ ɔ wɛ́ɛ́yɛ́ ɔwá a lɛ́á na niómo.» 25Bá sɛ́á: «Á Isəlúkú, bɛ́ sɛ́á a báka buɔnɔ́ na niómo nɛ́ bɛcácɔ́!» 26Munəni a sɛ́á: «Wɛ́ɛ́yɛ́ ɔwá a lɛ́á itíə́nə́tɔ́, a ŋɔ kusənə ɔ ɔyáyɛ́na, mba wɛ́ɛ́yɛ́ ɔwá a lɛ bá itíə́nə́tɔ́, bá ŋɔ yayɛ́á tɛ́tɛ́á kátɔ́na ɔyɛ́á a lɛ́á itíə́nə́tɔ. 27Mba, ɛlɔ́áyɛ́ bámɛ́á bəbəniə ɔbá bá sa hikiə ɔwá mɛ bəə́bu manákɛ́na, nɔ́ bəə́bu húlə́nə́ háha, nɔ́ bəə́bu ɔ́nɔ́kɔ́ ɔwámɛ busíə́.»

Yə́susu a nɔ́ fínə ɔ Yəlúsalɛma

(Mat 21.1-11; Mə́l 11.1-11; Yɔh 12.12-19)

28Əlimə yɛ bɛ́táyɛ́ bɛtambá, Yə́susu a ná báláka ɔ Yəlúsalɛma. 29Ikúílí a ná báá hoóyi na Bɛtɛfasɛ́ ɔ Bɛtánia, ɔ ɔwákaka ɔmáá wɔ́ malɛ́á má olífia, a ná bɔkɔ́nɛna buəkíníə́ báfandɛ́. 30A sɛ́á: «Nɔ́ ákáná ɔ bɔnɔŋɔ ɔbɔ́á bɔ́ lɛ́á ɔ busíə́; ɛ́kɛ nɔ́ káfámá umə́, nɔ ndɔ mɔná ɛnjakásɛ yámáka tiŋə́tɔ, ɔyɛ́á ata mɔndɔ a nana talɛma. Nɔ́ yɛɛ́ta tuŋúnə, nɔ́ yɛɛ́ta húlə́nə́ háha. 31Ábá mɔndɔ a ná bənú bátá a sɛ́á: “Ɛlɔ́áyɛ́ yatɛ́ nɔ ná yɛɛ́ta tuŋúnínə əə́”, nɔ́ wɛɛ́ya lɛná nɔ sɛ́á: “Isəlúkú a ndɔ yɛɛ́ta siə.”» 32Bɔkɔ́nɛna bá ná ákáná, bá ná yámá bɛkɔa bikimə ɛ́sɛ́á Yə́susu a ná bəə́bu lakɛ́na. 33Ikúílí bá ná báá ɔ mɔ́táyɛ́ mɔná ɛnjakásɛ ɔ utuŋunə, bəmuití mɛnyama bá ná bəə́bu batá bá sɛ́á: «Ɛlɔ́áyɛ́ yatɛ́ nɔ ndɔ wɛ́ɛ́yɛ́ mɔná ɛnjakásɛ tuŋuninə əə́?» 34Bɔkɔ́nɛna bá sɛ́á: «Isəlúkú a ndɔ yɛɛ́ta siə.» 35Bá ná ɛnjakásɛ ákánána á Yə́susu busíə́, bá ná bɛlɛŋa táláká ɔ mɛnyama ɔmbáŋá, bá ná wɛɛ́ya tuəníníə́. 36Ɛnakaka a kɛndaka tálɛ́mátɔ́ ɔ ɛnjakásɛ, bɛndɔ bá mə́búə́ molókiə tɛ́káka ɔ mɔndɔ́ŋɔ́ ɔwayɛ́ busíə́. 37Á Yə́susu a ná káfámá ɔ ɛnɔ́mɛ yɛ́ ɔlɔɔkɔ ɔ ɔmáá wɔ́ malɛ́á má olífia, hoóyi na Yəlúsalɛma, nɛhɔnɔ nɛ́ ná iloŋo yikimə yɛ́ bɔkɔ́nɛna itíə́, bá ná lúmə́ á Huɛlɛ́ ɔnyama na nióni nɛŋɛ́ŋa ɛlɔ́áyɛ́ bisə́mə́tə́ bɛ́ bɛkɔa ɔbɛ́á bá ná síə́kínə. 38Bá laaka bá sɛ́á: «Huɛlɛ́ á Munəni saná ɔwá a lɛ́á ɔ ɔsákɔna ɔ niínyə nɛ́ Isə́lúkú! Bumbə́nú ɔ nɔɔ́mɛná, tuúmə na Huɛlɛ́!»

39Bɛ́mɔtɛ́ Bɛfalísia ɔbá bá ná bá ɔ ilúkunə, bá ná Yə́susu lɛ́na bá sɛ́á: «Á Muinə́niə, nə́yíə́ báwɔ́á bɔkɔ́nɛna.» 40A sɛ́á: «Mɛ ndɔ bənú nɔ́yɛ́ lɛna, ábá bá ná nə́yə́níə́, miɔkɔ yɛ́ ŋɔ yə́mə́kə.»

Yə́susu a ndɔ lɛla ɛlɔ́áyɛ́ Yəlúsalɛma

41Ɛnaka Yə́susu a bá a ndɔ bɛ́nya ɔ bətínə́, a ná mɛɛ́ta yámá, a ná lɛláka ɛlɔ́áyɛ́ ayɛ́. 42A sɛ́á: «Aŋɔ́á tɔ́na, ata ɔ bá ɔ ndɔ manya ɔ bɔ́ɔbɔ buɔsɛ́ yatɛ́ ɔyɛ́á yɛ́ óso ɔwáwɔ ɔ bumbə́nú uwíndiə, mba isíŋáka, bɔ́ lɛa bítímə́tɔ́ ɔwáwɔ məə́sə. 43Ɛ́ɛ! Mɔɔsɛ́ má ŋɔ ndáfámá ɛlɔ́áyɛ́ áwɔ ɔ ɛbɔ́ka ɔyɛ́á, bəbəniə bá ŋɔ tuənəkinə ɔwáwɔ ɛmɛ́ŋɛ́, bá ŋɔ aŋɔ́á nɛŋɛlɛna na mafalaba má ɔ́nɔ́kɛ́nátɔ, bá ŋɔ aŋɔ́á fɔ́táka bɛsalɛ bikimə. 44Bá ŋɔ aŋɔ́á tɛsaka aŋɔ́á mukimə, na aŋɔ́á na báwɔ́á bɛndɔ bəkimə. Bá sɔ́ ŋɔ niasa ata muɔkɔ úmotí tálátɔ́ ɔ muinə́muinə́ bɔkɔasɛ́á, ɔ sa ikúílí lɛnda ɔyɛ́á Huɛlɛ́ a ná ndásá ɔ ɔwáwɔ unuəniə.»

Yə́susu a ndɔ bəlúə́ kúbə ɔ Tɛ́mbɛlɛ

(Mat 21.12-17; Mə́l 11.15-19; Yɔh 2.13-22)

45Yə́susu a ná fínə́ ɔ Tɛ́mbɛlɛ, a ná lúmə́ ɔ bɛndɔ bəlúə́ ukúbə. 46A bəə́bu lakɛna a sɛ́á: «Huɛlɛ́ a ndɔ laa ɔ tuəfulə a sɛ́á: “Yamɛ́á miímə yɛ́ ŋɔ báá miímə yɛ mabɛ́kálɛ́na”, mba uwənú, nɔ ná mɛɛ́ta híə́nə́síə́ nibítímínə́ nɛ́ boóbi.»

47A ka bá a ndɔ ínə́niə buɔsɛ́ tɛ́á ɔ Tɛ́mbɛlɛ. Bisə́lúkú bɛ́ bətitiəmahánɛna, bamanyumbə́ndə́, bá siəkə ɔ ɔwayɛ́ ɔwɔ́nɔ. 48Mba, bá lɛ manya nəníə́ bá nɔ́yɛ́ kɛ́áka. Ɔ taká, bɛndɔ bəkimə bá ka báá məlúə́ básɛ́átɔ́ ɔ ɔwayɛ́ ɔwɔ́kɔ.

Currently Selected:

Lúkasɛ 19: tvu

Highlight

Copy