Lúkasɛ 22
22
Bá nɔ́ Yə́susu hɛtɔkɔ hɔ́kɛna
(Mat 26.1-5, 14-16; Mə́l 14.1-2, 10-11)
1Ɛŋganda yɛ bɛbɛlɛ́tɛ bɛ́ ɛŋaná mətəkí ɔyɛ́á bá ndɔ ɛ́lɛnɛna Básɛ́ka, yɛ́ ka bá yɛ́ ndɔ bɛ́nya. 2Bisə́lúkú bɛ́ bətitiəmahánɛna na bamanyumbə́ndə́, bá ihə́lí siəkə ɔyɛ́á bá Yə́susu ɔnɔkɔ, mba, bá ka báá bá ndɔ bɛndɔ kɔ́lɔ́ma. 3Nɔ́yɛ́, Sátana a ná fínə́ ɔ mɔlɛ́má wɔ́ Yútasɛ ɔwá bá ndɔ ɛ́lɛnɛna bá sɛ́á á Isikalióto. A ka báá umúlə wɔ́ niómo na báfandɛ́ nɛ́ bɔkɔ́nɛna. 4A ná káhɔ́ɔ́kɔ́ na bisə́lúkú bɛ́ bətitiəmahánɛna, na bisə́lúkú bɛ́ batáta Tɛ́mbɛlɛ, nəníə́ a óso ɔ uwəbú á Yə́susu ɔsɛmɛna. 5Bisə́lúkú bá ná nɛhɔnɔ ɔkɔ, bá ná Yútasɛ bílíhə́níə́ ɔwá mbá bá wɛɛ́ya mɔnɛ́á índíə́. 6A ná lumínə, a ná lúmə́ ikúílí yɛɛsɛ ɔ usiə ɔyɛ́á a bəə́bu Yə́susu sɛmɛ́ná ɔ kɛaka ɔwá nɛmɔndɔ nɛ́ lɛ manya.
Nɛbɛ́tábɔ́na nɛ́ ɛŋganda yɛ Básɛ́ka
(Mat 26.17-25; Mə́l 14.12-21; Yɔh 1.21-30)
7Ikúílí yɛ́ ɛŋganda yɛ bɛbɛlɛ́tɛ bɛ́ ɛŋaná mətəkí yɛ́ ná ndáfámá ɔyɛ́á yɛ́ ná báá ɔwá, bá tɔndɔ́mbándɔ́mbá ɔ́nɔ́kɔ́ ɛlɔáyɛ́ bɛ́labɔ́nɛ́á bɛ́ Básɛ́ka, 8Yə́susu a ná Bíə́lə na Yɔhánɛsɛ lɔ́má a sɛ́á: «Nɔ́ ákáná nɔ́ ká bəsú bɛ́labɔ́nɛ́á bɛ́ Básɛ́ka tábɔ́nákɛ́na.» 9Bá ná wɛɛ́ya batá bá sɛ́á: «Hə́níə́ ɔ ndɔ siə ɔwá tɔ bɛɛ́ta tábɔ́náka əə́?» 10A sɛ́á: «Ikúílí ɔyɛ́á nɔ ndɔ kafámáká ɔ bətínə́, nɔ ndɔ mɔndɔ ɛ́nyánakana na itókótókó yɛ́ mənífə́ túánátɔ. Nɔ́ wɛɛ́ya ɔŋgɔ́kɔ ɔ miímə ɔyɛ́á a ndɔ fíə́kinə. 11Nɔ́ muití miímə lɛná nɔ sɛ́á: “Mulə́liə a ndɔ aŋɔ́á bata a sɛ́á hə́níə́ ɛtaŋɛ́á yɛ́ lɛ́á ɔyɛ́á ɛkasɛ mɛ Básɛ́ka nɛ́áka na bámɛ́á bɔkɔ́nɛna əə́?” 12A ndɔ bənú ɛtaŋɛ́á yɛŋɛ́ŋa ínə́kiniə hɔ́átɔ́ ɔ ɔtábɔ́na, ɔmɔ́tɔ́yɛ́ mbá nɔ Básɛ́ka tábɔ́náka.» 13Bɔkɔ́nɛna bá ná ákáná, bá ná bɛkɔa bikimə níbə́ ɛ́sɛ́á Yə́susu a ná bəə́bu lakɛ́na, bá ná bɛ́labɔ́nɛ́á bɛ́ Básɛ́ka tábɔ́náka.
Bɛ́labɔ́nɛ́á bɛ́ Isə́lúkú
(Mat 26.26-30; Mə́l 14.22-26; 1Kɔ 11.23-26)
14Ikúílí yɛ́ ɔnɛ́á yɛ́ ná ndáfámá, Yə́susu a ná tuənə ɔ ɛtáka na báyɛ́á basɔ́másɔma. 15A ná bəə́bu lɛ́na a sɛ́á: «Mɛ ná síə́kə ɔ bɛɛ́bɛ bɛ́labɔ́nɛ́á bɛ́ Básɛ́ka ɔ ɔwɛta na bənú na ilókí yɛŋɛ́ŋa ɔ busíə́ ɔbɔ́á mɛ məsə́kə kusə́nə. 16Ɔ taká, mɛ ndɔ bənú nɔ́yɛ́ lɛna, mɛ sɔ́ ŋɔ bɛɛ́bɛ bɛ́labɔ́nɛ́á nɛ́á tɔ́na ɔkafámáká ɔ hinó ɔhɛ́á Huɛlɛ́ a ŋɔ bɛɛ́ta úndúsiniə bikimə ɔ ɔwayɛ́ Nɛmanɛna.» 17Ɔ yɛ́ɛ́yɛ́ ikúílí, bá ná wɛɛ́ya ɛnyɛ́ná yɛ́ məluku índíə́, a ná Huɛlɛ́ mohóloniə híə́níníə́, a sɛ́á: «Nɔ́ yɛ́ɛyɛ ɛnyɛ́ná yɛ́ məluku ɛtá, nɔ́ áfákána. 18Ɛ́ɛ! Mɛ ndɔ bənú nɔ́yɛ́ lɛna, ɔ botolokiə isíŋáka, mɛ sa ndá máama məluku nyɛ́ná tɔ́na ɔkafámáká ɔ ikúílí ɔyɛ́á Nɛmanɛna nɛ́ Huɛlɛ́ nɛ́ ndáfama.»
19Nɔ́yɛ́, a ná bɛlɛ́tɛ ɛtá, a ná Huɛlɛ́ mohóloniə híə́níníə́, a ná mɛɛ́ta bísə́kə́níə́, a ná bəə́bu mɛɛ́ta índíə́ a sɛ́á: «Yɛ́ɛyɛ́ yɛ́ lɛa yamɛ́á mɛɛ́lɔ ɔyɛ́á mɛ ná índíə́ ɛlɔ́áyɛ́ ənú. Nɔ́ nɔ́yɛ́ kɛ́áka ɔ ɔwámɛ ɛbɛ́kɔ́lɔmɔna.» 20Əlimə yɛ ɔnɛ́á, a ná nɔ́yɛ́ híə́núlíníə́ na ɛnyɛ́ná yɛ́ məluku, a sɛ́á: «Yɛ́ɛyɛ ɛnyɛ́ná yɛ́ məluku yɛ́ lɛa nɛtɔana niɔ́sɔ nɛ́ máámɛ́á manɔ́ŋɔ́ ɔmá má ná ólókókíə́ ɛlɔáyɛ́ ənú. 21Mba, wɛ́ɛ́yɛ́ ɔwá a ndɔ mɛaŋɔ́á sɛma, a lɛa háha ɔ ɛtáka na mɛaŋɔ́á! 22Ɔ taká, Mɔná wa mɔndɔ a ŋɔ wə́ə́ ɛ́sɛ́á Huɛlɛ́ a ná tínímíə́, mba, indimisi na wɛ́ɛ́yɛ́ ɔwá a ndɔ wɛɛ́ya sɛma!» 23Bá ná lúmə́ ɔ ɔbɛ́bata bəə́bu na bəə́bu ɔwá ɛ́yánɛ́ ɔ uwəbú ətíə́ a ndɔ nɔ́yɛ́ kɛaka.
Ɛ́yánɛ́ a lɛ́á mɔŋɛ́ŋa ɔ bəkimə ɔyáyɛ́na
(Mat 18.1; 20.25-28; Mə́l 9.34; 10.42-45)
24Bɔkɔ́nɛna bá ná tuənə ɔ tə́ŋə́niə nióni nɛŋɛ́ŋa ɔkɛaka ɔwá bá manyá ɛ́yánɛ́ ɔ uwəbú ətíə́ a lɛ́á mɔŋɛ́ŋa ɔ bəkimə ɔyáyɛ́na əə́? 25Yə́susu a ná bəə́bu lɛ́na a sɛ́á: «Abáka bənəni bá mɔnɔŋɔ bá maáta manakɛna na busə́lúkú bukimə, bááyɛ́ ɔbá bá ndɔ bəə́bu manɛna, bá hikəkiə ɔwá bá bəə́bu ɛ́lɛ́ákɛ́na, bakɛabuɛsɛ. 26Mba, nɔ́yɛ́ yɛ́ sá hɔ́ánana ɔbá ɛlɔáyɛ́ ənú, wɛ́ɛ́yɛ́ ɔwá a lɛ́á mɔŋɛ́ŋa ɔ uwənú ətíə́, a ná hɔ́ánána ɔbáá ɛ́sɛ́á mɔná mɔtɛ́tɛ́á, wɛ́ɛ́yɛ́ ɔwá a ndɔ manɛna, á bámɛ́nɛ́ná ɔ́maná ɛ́sɛ́á ɔwá a lɛ́á mɔnyɛna. 27Ɔ taká, ɛ́yánɛ́ a lɛ́á mɔŋɛ́ŋa; ɔ́ wɛ́ɛ́yɛ́ ɔwá a lɛ́á ɔ ɛtáka alɛ́ɛ́, ɔ́ wɛ́ɛ́yɛ́ ɔwá a lɛ́á mɔnyɛna əə́? Tátá ɔ́ wɛ́ɛ́yɛ́ ɔwá a lɛ́á ɔ ɛtáka əə́? Ɛ́ɛ! Mba ɔ ɔwámɛ, mɛ lɛa ɔ uwənú ətíə́ ɛ́sɛ́á mɔnyɛna.»
28«Uwənú, nɔ lɛa bááyɛ́ ɔbá bá ná makɔsɔnana ísə́bíníə́ na mɛaŋɔ́á. 29Ɔwámɛ, mɛ ndɔ Nɛmanɛna bɛ́lɛ́na ɛlɔ́áyɛ́ búə́núə́ buɛsɛ, ɛ́sɛ́á yamɛ́á Isə́ a ná nɛɛ́ta bɛ́lɛ́na ɔ ɔwámɛ buɛsɛ, 30Nɔ́yɛ́ mbá nɔ ŋɔ nɛ́áka, nɔ́ nyákɛ́ná tɔ́na ɔ ɔwámɛ ɛtáka ɔ ətíə́ yɛ nɛ́ámɛ́á Nɛmanɛna, nɔ́ ŋɔ tuənəkinə ɔ tukómo ɔkɛaka ɔwá nɔ niómo na tɔ́fandɛ́ nɛ́ tutikə tɔ́ Ísilahɛ́lɛ kə́lə́sə́kíə́.»
Yə́susu a ndɔ Bíə́lə mbóŋiə
(Mat 26.31-35; Mə́l 14.27-31; Yɔh 13.36-38)
31Isə́lúkú a sɛ́á: «Á Símono, á Símono, Sátana a ná bənú bəkimə sɔ́káká ɔ kɛaka ɔwá a bənú fúkə́lə́ ɔ́maná ɛ́sɛ́á abáka bá uŋəŋə́ fúmə́kinə. 32Mba, mɛ ná bɛ́kálákɛ́na ɛlɔ́áyɛ́ áwɔ ɔkɛaka ɔwá yáwɔ́á ilumininə yɛ́ lɛ nimə. Ikúílí ɔyɛ́á ɔ ŋɔ ndahíáná, ónókíníə́ báwɔ́á bənínyə́.»
33Bíə́lə a sɛ́á: «Á Isə́lúkú, mɛ lɛa hoóyi ɔ ɔwákaka na aŋɔ́á, ata ɔ ɛbɔka mbá ata ɔ nyɛmbɛ́.» 34Yə́susu a sɛ́á: «Á Bíə́lə, mɛ ndɔ aŋɔ́á lɛna, miɔkɔ́ yɛ́ sɔ ŋɔ lɔ́ŋɔ niɔfɛ́nɛ, ɛŋaná ɔwámɛ ɔbɛ́sáŋɔ́na bikúílí bɛ́lálɔ́ na ɔlaa ɔwá, ɔ lɛ ndɔ mɛaŋɔ́á manya.»
35Nɔ́yɛ́, a ná bəə́bu bəkimə lɛ́na a sɛ́á: «Ikúílí mɛ ná bənú lɔ́ma ɛŋaná ɔmbalá wɔ́ mɔnɛ́á, ɛŋaná mukutə, ɛŋaná bɛtafɛ́ná, nɔ ka báá ɔ nɛsɔ́ka nɛ́ bɔɔ́la əə́?» Bá sɛ́á ata bɔɔ́la. 36A sɛ́á: «Mba isíŋáka, ata ɛ́yánɛ́ ɔwá a lɛ́á na ilímbí yɛ́ mɔnɛ́á á yɛɛ́ta ɛta, ata ɔwá a lɛ́á na mukutə á muítə ɛta. Wɛ́ɛ́yɛ́ ɔwá a lɛ bá na mɔkɔ́átá, a nɛ́áyɛ́á nilókiə lúə́ ɔkɛaka ɔwá a muítə ɔndɔ. 37Ɔ taká, mɛ ndɔ bənú lɛna, yɛ́ lɛa hɔ́ánánátɔ́ ɔwá yɛ́ɛyɛ ɛtambá ɔyɛ́á yɛ́ lɛ́á tilə́kə́tɔ́, Huɛlɛ́ á yɛɛ́ta úndúsíníə́ ɔ ɔwámɛ ɛlɔ́á yɛ́ sɛ́á: “Bá ka wɛɛ́ya fanɛna ɔ umúlə wɔ́ bakɛamabɛ́á”. Ɔ taká, yatɛ́ ɔyɛ́á Huɛlɛ́ a ná lááka ɛlɔ́áyɛ́ ámɛ yɛ́ lɛa hoóyi ɔ ubíúndúsiniə.» 38Bɔkɔ́nɛna bá sɛ́á: «Á Isə́lúkú, ɔ́ mɛkɔ́átá ífəndí yíiyi.» Mba a sɛ́á: «Nɔ́yɛ́ yɛ́ ná hɔ́ánána.»
Yə́susu a ndɔ bɛ́kálɛ́na ɔ ɔmáá wɔ́ Olífia
(Mat 26.36-46; Mə́l 14.32-42)
39Yə́susu a ná fama, a ná ákáná ɛ́sɛ́á yáyɛ́á ihílí ɔ ɔmáá wɔ́ Olífia. Báyɛ́á bɔkɔ́nɛna bá ná wɛɛ́ya ɔŋgɔ́kɔ. 40Ɛnaka bá káfámá umə́, a ná bəə́bu lɛ́na a sɛ́á: «Nɔ́ bɛ́kálákɛ́na ɔkɛaka ɔwá nɔ lɛ kɔ́á ɔ mɔkɔ́lɛna.» 41Ɔ yɛ́ɛ́yɛ́ ikúílí, a ná bísúə́lə́ na báyɛ́á bɔkɔ́nɛna hoóyi na tɛ́tɛ́á yɛ mabaná. A ná moŋgóndi lúmə́ ɔ misí, a ná bɛ́kálákɛ́na, 42a sɛ́á: «Á Isə́, ábá ɔ ndɔ nɔ́yɛ́ hikiə, ə́kə́nə́síə́ yɛ́ɛ́yɛ́ ɛnyɛ́ná yɛ́ məsə́kə hata na mɛaŋɔ́á. Tátá ɛ́sɛ́á mɛ ndɔ hikiə, mba ɛ́sɛ́á ɔ ndɔ siə.» [43Ɔ umisíumə́, áŋgɛlɛ a ná húlínə́ ɔ nɔɔ́mɛná, a ná wɛɛ́ya bínə́níə́ ɛlɔ́áyɛ́ ɔwayɛ́ uwoníniə. 44Bɔkɔ́lɔ́ma bɔ́ ná Yə́susu itíə́, a ná botólíə́ ɔ ubíyə́bə a bɛ́kálákɛna mɔŋɛ́ŋa. Ilúhə́ ɔyɛ́á yɛ́ ná bá yɛ́ ndɔ wɛɛ́ya fáma, yɛ́ ka báá ɛ́sɛ́á mətə́bí má manɔ́ŋɔ́ ɔmá má ndɔ kɔa ɔ misí]. 45Əlimə yɛ́ mabɛ́kálɛ́na, a ná hɔalɛ́na, a ná ndáhíáná ɔ ɛmɛ́ŋɛ́ yɛ báyɛ́á bɔkɔ́nɛna; a ná bəə́bu kɔ́ána ɔ hinó, na busə́kə ɔ mɔlɛ́má. 46A ná bəə́bu lɛ́na a sɛ́á: «Yatɛ́! Nɔ lɛa ɔ hinó! Nɔ́ hɔalɛ́na, nɔ́ bɛ́kálákɛ́na ɔkɛaka ɔwá nɔ lɛ kɔɛ́na ɔ mɔkɔ́lɛna.»
Bá nɔ́ Yə́susu halɛna
(Mat 26.47-56; Mə́l 14.43-50; Yɔh 18.3-11)
47Ikúílí Yə́susu a ná bá a ndɔ hɔ́ɔ́ nɔ́yɛ́, mɔlɔ́ŋɔ́ wɔ́ bɛndɔ wɔ́ ná ndáfama. Wɛ́ɛ́yɛ́ ɔwá bá ná báá bá ndɔ ɛ́lɛnɛna bá sɛ́á á Yútasɛ, ɔmɔtɛ́ ɔ ətíə́ yɛ niómo na báfandɛ́ nɛ́ bɔkɔ́nɛna, a ná tɔ́mbálɛ́la ɔ uwəbú busíə́, a ná kátɛ́nɛ́má á Yə́susu busíə́ ɔkɛaka ɔwá a wɛɛ́ya bíə́ŋə́lə́níə́. 48A ná Yútasɛ lɛ́na a sɛ́á: «Á Yútasɛ, na nibíə́ŋə́ləniə ɔ ndɔ Mɔná wa mɔndɔ fíɔ́tɔ əə́?» 49Ɛnaka báyɛ́á bɔkɔ́nɛna bá síə́kínə́ yatɛ́ ɔyɛ́á yɛ́ ndɔ siə ɔbɛ́tɔ́mba, bá ná wɛɛ́ya batá bá sɛ́á: «Á Isə́lúkú, tɔ ósó ɔnɔaka na mɔkɔ́átá əə́?» 50Ɔmɔtɛ́ ɔ uwəbú ətíə́ a ná mɔnyɛna wa mutitiəmahánɛna mɔŋɛ́ŋa mulúə́ wɔ́ mɔkátá ɔ bɛnɔ́mɛ fala. 51Mba, Yə́susu a sɛ́á: «Nɔ́ niása yɛ́ bɛ́kɛ́áká ɛ́sɛ́á nɔ́yɛ́ yɛ́ ná hɔ́ánána.» A ná mulúə́ wɔ́ wɛ́ɛ́yɛ́ mɔnyɛna itíə́lə, a ná wɛɛ́ya niŋə́síə́.
52A ná yɛ́ɛ́yɛ́ ikúílí hɔ́lɛ́na ɔ bááyɛ́ ɔbá bá ná ndásá ɔ ɔwayɛ́ ɔhalɛna; bɛnatákɛ bɛ́ bɔnɔŋɔ, bisə́lúkú bɛ́ bətitiəmahánɛna na bisə́lúkú bɛ́ bɔkɔfɔnɛa bá Tɛ́mbɛlɛ, a sɛ́á: «Nɔ ná húlə́kə́ na mɛkɔ́átá, na ɛmbɔ́ŋɔ́ ɔ ɔwámɛ ɔndahalɛ́ná ɛ́sɛ́á mɔtɔnɛba. 53Mɔɔsɛ́ məkimə mɛ ka báá na bənú ɔ Tɛ́mbɛlɛ, nɔ sa siə ɔ ɔwámɛ ɔhalɛna, mba uwənú isíŋáka, ɔ́ ikúílí yɛ́ɛyɛ, ɔ́ yə́núə́ ikúílí yɛ́ɛyɛ, ikúílí yɛ́ iŋgínə́ yɛ tubíndindíə́.»
Bíə́lə a nɔ́ Yə́susu bɛ́sáŋɔna
(Mat 26.57-58, 69-75; Mə́l 14.53-54, 66-72; Yɔh 18.12-18, 25-27)
54Bá ná Yə́susu halɛ́na, bá ná wɛɛ́ya ákánána, bá ná wɛɛ́ya fínə́nə ɔ miímə yɛ́ mutitiəmahánɛna mɔŋɛ́ŋa. Bíə́lə a tíkə́ bəə́bu ɔŋgɔkɔ əlimə hata. 55Bá ka hiwə hɛŋɛ́ŋa kɔtaka ɔ niə́lətíə́; Bíə́lə a ná tuə́nə́ ɔ ɛbɔ́ka ɔyɛ́á bɛndɔ bá ná báá buɔnɔ́ hiwə nɛŋɛ́lɛ́nátɔ.
56Mɔnyɛna muəndú ɔmɔtɛ́, a ná Bíə́lə yámá ɔ isəmú yɛ́ hiwə tuənə́tɔ, a ná wɛɛ́ya məə́sə tala, a sɛ́á: «Wɔ́ɔwɔ mɔndɔ tɔ́na a ná báá na Yə́susu.» 57Mba Bíə́lə a ná sáŋɔ́ná a sɛ́á: «Á muəndú, mɛ lɛ ndɔ wɛɛ́ya manya!» 58Tɛ́tɛ́á yɛ ikúílí, wɔmɔtɛ́ mɔndɔ á wɛɛ́ya yámá, a sɛ́á: «Aŋɔ́á tɔ́na ɔ lɛa wəbú.» Mba, Bíə́lə a sɛ́á: «Bóo! Mɛ lɛ bá wəbú.» 59Əlimə yɛ háwɔa ɛmɔtɛ́, wɔmɔtɛ́ mɔndɔ tɔ́na a ná híánɔ́lɔ́ná a sɛ́á: «Taká, wɔ́ɔwɔ mɔndɔ a ná báá ná wɛɛ́ya bɔkɔasɛ́á, a lɛa wa Kalɛ́lɛa.» 60Bíə́lə a sɛ́á: «Mɛ lɛ ndɔ manya yatɛ́ ɔyɛ́á ɔ ndɔ siə ɔlaa.» Ɔ umisíumə́ ɛ́sɛ́á a na bá a ndɔ hɔ́ɔ́ nɔ́yɛ́, miɔkɔ́ yɛ́ ná lɔŋɔ. 61Isə́lúkú a ná bɛ́kɔ́ŋɔ́ná, a ná wɛɛ́ya məə́sə tala. Ɔ yɛ́ɛ́yɛ́ ikúílí, Bíə́lə a ná ɛtambá bɛ́kɔ́lɔ́mɔ́na ɔyɛ́á Isə́lúkú a ná wɛɛ́ya lɛ́na a sɛ́á: «Ubusíə́ ɔbɔ́á miɔkɔ́ yɛ́ lɔ́ŋɔ́ niɔfɛ́nɛ, ɔ ŋɔ bá ɔ nɔ́ mɛaŋɔ́á bɛ́sáŋɔ́na bikúílí bɛ́lálɔ́.» 62A ná fáma, a ná lɛláká mɔŋɛ́ŋa ɛmbáta.
Bá ndɔ Yə́susu kɔ́ba, bá wɛɛ́ya súbə́kə
(Mat 26.67-68; Mə́l 14.65)
63Bɛndɔ ɔbá bá ná báá bá ndɔ Yə́susu táta, bá wɛɛ́ya kɛ́kɛ́lakɛna, bá wɛɛ́ya súbə́kə. 64Bá ná wɛɛ́ya busíə́ sɛ́ŋɛ́ná na iləbə́; bá ná wɛɛ́ya batá bá sɛ́á: «Lɛná bəsú, baánɛ, ɛ́yánɛ́ a ná aŋɔ́á súbə́ əə́? Hɔ́lɔ́ ɛ́sɛ́á mɔhɛ́nátɔtányɛ́.» 65Bá wɛɛ́ya bɛ́mɔtɛ́ bɛkɔ́bálɛ́ biəŋí laaka.
Yə́susu ɔ busíə́ bɔ́ nindúmə́ nɛŋɛ́ŋa nɛ́ bəkə́lə́siə
(Mat 26.59-66; Mə́l 14.55-64; Yɔh 18.19-24)
66Ɛnaka ɔyáá wɔ́ yáá, nɛkɔta nɛ́ bɛnatákɛ bɛ́ bɔnɔŋɔ, bisə́lúkú bɛ́ bətitiəmahánɛna na bamanyumbə́ndə́ nɛ́ ná fíə́kínə, bá ná Yə́susu ákánána ɔ nindúmə́ nɛŋɛ́ŋa nɛ́ bəkə́lə́siə. 67Bá ná wɛɛ́ya batá bá sɛ́á: «Lɛná bəsú ábá aŋɔ́á ɔ́ lɛ́á Mɛ́sia.» A ná bəə́bu bíhíə́níníə́ a sɛ́á: «Ata mɛ ndɔ bənú lakɛna, nɔ sɔ́ ŋɔ luminə. 68Ábá mɛ ná bənú bɔkɔa batá, nɔ sɔ́ ŋɔ mɛaŋɔ́á bɛ́kámɔsɔna. 69Mba ɔ botolokiə isíŋáka, Mɔná wa mɔndɔ a ndɔ tuənəkinə ɔ ɛsalɛ yɛ́ bɛnɔ́mɛ yɛ́ Huɛlɛ́ yɛ injiŋə.» 70Bəə́bu bəkimə bá sɛ́á: «Aŋɔ́á, ɔ lɛ́á Mɔná wa Huɛlɛ́ əə́?» A sɛ́á: «Ɛ́sɛ́á nɔ ndɔ laa, taká, mɛ nɔ́yɛ́ báka.» 71Mba, bá sɛ́á: «Yatɛ́ tɔ́na tɔ ndɔ siə, tɔ lɛ bá na ilókí yɛ́ bəmbóŋímboŋi. Ɔ taká, bəsú bɛ́múɛ́tɛ́ tɔ ná bɛtambá ɔ́kɔ́kɛ́na ɔbɛ́á bɛ́ ná fámáká ɔ ɔwayɛ́ munuə.»
Currently Selected:
Lúkasɛ 22: tvu
Highlight
Share
Copy
Want to have your highlights saved across all your devices? Sign up or sign in
© 2019, CABTAL
Lúkasɛ 22
22
Bá nɔ́ Yə́susu hɛtɔkɔ hɔ́kɛna
(Mat 26.1-5, 14-16; Mə́l 14.1-2, 10-11)
1Ɛŋganda yɛ bɛbɛlɛ́tɛ bɛ́ ɛŋaná mətəkí ɔyɛ́á bá ndɔ ɛ́lɛnɛna Básɛ́ka, yɛ́ ka bá yɛ́ ndɔ bɛ́nya. 2Bisə́lúkú bɛ́ bətitiəmahánɛna na bamanyumbə́ndə́, bá ihə́lí siəkə ɔyɛ́á bá Yə́susu ɔnɔkɔ, mba, bá ka báá bá ndɔ bɛndɔ kɔ́lɔ́ma. 3Nɔ́yɛ́, Sátana a ná fínə́ ɔ mɔlɛ́má wɔ́ Yútasɛ ɔwá bá ndɔ ɛ́lɛnɛna bá sɛ́á á Isikalióto. A ka báá umúlə wɔ́ niómo na báfandɛ́ nɛ́ bɔkɔ́nɛna. 4A ná káhɔ́ɔ́kɔ́ na bisə́lúkú bɛ́ bətitiəmahánɛna, na bisə́lúkú bɛ́ batáta Tɛ́mbɛlɛ, nəníə́ a óso ɔ uwəbú á Yə́susu ɔsɛmɛna. 5Bisə́lúkú bá ná nɛhɔnɔ ɔkɔ, bá ná Yútasɛ bílíhə́níə́ ɔwá mbá bá wɛɛ́ya mɔnɛ́á índíə́. 6A ná lumínə, a ná lúmə́ ikúílí yɛɛsɛ ɔ usiə ɔyɛ́á a bəə́bu Yə́susu sɛmɛ́ná ɔ kɛaka ɔwá nɛmɔndɔ nɛ́ lɛ manya.
Nɛbɛ́tábɔ́na nɛ́ ɛŋganda yɛ Básɛ́ka
(Mat 26.17-25; Mə́l 14.12-21; Yɔh 1.21-30)
7Ikúílí yɛ́ ɛŋganda yɛ bɛbɛlɛ́tɛ bɛ́ ɛŋaná mətəkí yɛ́ ná ndáfámá ɔyɛ́á yɛ́ ná báá ɔwá, bá tɔndɔ́mbándɔ́mbá ɔ́nɔ́kɔ́ ɛlɔáyɛ́ bɛ́labɔ́nɛ́á bɛ́ Básɛ́ka, 8Yə́susu a ná Bíə́lə na Yɔhánɛsɛ lɔ́má a sɛ́á: «Nɔ́ ákáná nɔ́ ká bəsú bɛ́labɔ́nɛ́á bɛ́ Básɛ́ka tábɔ́nákɛ́na.» 9Bá ná wɛɛ́ya batá bá sɛ́á: «Hə́níə́ ɔ ndɔ siə ɔwá tɔ bɛɛ́ta tábɔ́náka əə́?» 10A sɛ́á: «Ikúílí ɔyɛ́á nɔ ndɔ kafámáká ɔ bətínə́, nɔ ndɔ mɔndɔ ɛ́nyánakana na itókótókó yɛ́ mənífə́ túánátɔ. Nɔ́ wɛɛ́ya ɔŋgɔ́kɔ ɔ miímə ɔyɛ́á a ndɔ fíə́kinə. 11Nɔ́ muití miímə lɛná nɔ sɛ́á: “Mulə́liə a ndɔ aŋɔ́á bata a sɛ́á hə́níə́ ɛtaŋɛ́á yɛ́ lɛ́á ɔyɛ́á ɛkasɛ mɛ Básɛ́ka nɛ́áka na bámɛ́á bɔkɔ́nɛna əə́?” 12A ndɔ bənú ɛtaŋɛ́á yɛŋɛ́ŋa ínə́kiniə hɔ́átɔ́ ɔ ɔtábɔ́na, ɔmɔ́tɔ́yɛ́ mbá nɔ Básɛ́ka tábɔ́náka.» 13Bɔkɔ́nɛna bá ná ákáná, bá ná bɛkɔa bikimə níbə́ ɛ́sɛ́á Yə́susu a ná bəə́bu lakɛ́na, bá ná bɛ́labɔ́nɛ́á bɛ́ Básɛ́ka tábɔ́náka.
Bɛ́labɔ́nɛ́á bɛ́ Isə́lúkú
(Mat 26.26-30; Mə́l 14.22-26; 1Kɔ 11.23-26)
14Ikúílí yɛ́ ɔnɛ́á yɛ́ ná ndáfámá, Yə́susu a ná tuənə ɔ ɛtáka na báyɛ́á basɔ́másɔma. 15A ná bəə́bu lɛ́na a sɛ́á: «Mɛ ná síə́kə ɔ bɛɛ́bɛ bɛ́labɔ́nɛ́á bɛ́ Básɛ́ka ɔ ɔwɛta na bənú na ilókí yɛŋɛ́ŋa ɔ busíə́ ɔbɔ́á mɛ məsə́kə kusə́nə. 16Ɔ taká, mɛ ndɔ bənú nɔ́yɛ́ lɛna, mɛ sɔ́ ŋɔ bɛɛ́bɛ bɛ́labɔ́nɛ́á nɛ́á tɔ́na ɔkafámáká ɔ hinó ɔhɛ́á Huɛlɛ́ a ŋɔ bɛɛ́ta úndúsiniə bikimə ɔ ɔwayɛ́ Nɛmanɛna.» 17Ɔ yɛ́ɛ́yɛ́ ikúílí, bá ná wɛɛ́ya ɛnyɛ́ná yɛ́ məluku índíə́, a ná Huɛlɛ́ mohóloniə híə́níníə́, a sɛ́á: «Nɔ́ yɛ́ɛyɛ ɛnyɛ́ná yɛ́ məluku ɛtá, nɔ́ áfákána. 18Ɛ́ɛ! Mɛ ndɔ bənú nɔ́yɛ́ lɛna, ɔ botolokiə isíŋáka, mɛ sa ndá máama məluku nyɛ́ná tɔ́na ɔkafámáká ɔ ikúílí ɔyɛ́á Nɛmanɛna nɛ́ Huɛlɛ́ nɛ́ ndáfama.»
19Nɔ́yɛ́, a ná bɛlɛ́tɛ ɛtá, a ná Huɛlɛ́ mohóloniə híə́níníə́, a ná mɛɛ́ta bísə́kə́níə́, a ná bəə́bu mɛɛ́ta índíə́ a sɛ́á: «Yɛ́ɛyɛ́ yɛ́ lɛa yamɛ́á mɛɛ́lɔ ɔyɛ́á mɛ ná índíə́ ɛlɔ́áyɛ́ ənú. Nɔ́ nɔ́yɛ́ kɛ́áka ɔ ɔwámɛ ɛbɛ́kɔ́lɔmɔna.» 20Əlimə yɛ ɔnɛ́á, a ná nɔ́yɛ́ híə́núlíníə́ na ɛnyɛ́ná yɛ́ məluku, a sɛ́á: «Yɛ́ɛyɛ ɛnyɛ́ná yɛ́ məluku yɛ́ lɛa nɛtɔana niɔ́sɔ nɛ́ máámɛ́á manɔ́ŋɔ́ ɔmá má ná ólókókíə́ ɛlɔáyɛ́ ənú. 21Mba, wɛ́ɛ́yɛ́ ɔwá a ndɔ mɛaŋɔ́á sɛma, a lɛa háha ɔ ɛtáka na mɛaŋɔ́á! 22Ɔ taká, Mɔná wa mɔndɔ a ŋɔ wə́ə́ ɛ́sɛ́á Huɛlɛ́ a ná tínímíə́, mba, indimisi na wɛ́ɛ́yɛ́ ɔwá a ndɔ wɛɛ́ya sɛma!» 23Bá ná lúmə́ ɔ ɔbɛ́bata bəə́bu na bəə́bu ɔwá ɛ́yánɛ́ ɔ uwəbú ətíə́ a ndɔ nɔ́yɛ́ kɛaka.
Ɛ́yánɛ́ a lɛ́á mɔŋɛ́ŋa ɔ bəkimə ɔyáyɛ́na
(Mat 18.1; 20.25-28; Mə́l 9.34; 10.42-45)
24Bɔkɔ́nɛna bá ná tuənə ɔ tə́ŋə́niə nióni nɛŋɛ́ŋa ɔkɛaka ɔwá bá manyá ɛ́yánɛ́ ɔ uwəbú ətíə́ a lɛ́á mɔŋɛ́ŋa ɔ bəkimə ɔyáyɛ́na əə́? 25Yə́susu a ná bəə́bu lɛ́na a sɛ́á: «Abáka bənəni bá mɔnɔŋɔ bá maáta manakɛna na busə́lúkú bukimə, bááyɛ́ ɔbá bá ndɔ bəə́bu manɛna, bá hikəkiə ɔwá bá bəə́bu ɛ́lɛ́ákɛ́na, bakɛabuɛsɛ. 26Mba, nɔ́yɛ́ yɛ́ sá hɔ́ánana ɔbá ɛlɔáyɛ́ ənú, wɛ́ɛ́yɛ́ ɔwá a lɛ́á mɔŋɛ́ŋa ɔ uwənú ətíə́, a ná hɔ́ánána ɔbáá ɛ́sɛ́á mɔná mɔtɛ́tɛ́á, wɛ́ɛ́yɛ́ ɔwá a ndɔ manɛna, á bámɛ́nɛ́ná ɔ́maná ɛ́sɛ́á ɔwá a lɛ́á mɔnyɛna. 27Ɔ taká, ɛ́yánɛ́ a lɛ́á mɔŋɛ́ŋa; ɔ́ wɛ́ɛ́yɛ́ ɔwá a lɛ́á ɔ ɛtáka alɛ́ɛ́, ɔ́ wɛ́ɛ́yɛ́ ɔwá a lɛ́á mɔnyɛna əə́? Tátá ɔ́ wɛ́ɛ́yɛ́ ɔwá a lɛ́á ɔ ɛtáka əə́? Ɛ́ɛ! Mba ɔ ɔwámɛ, mɛ lɛa ɔ uwənú ətíə́ ɛ́sɛ́á mɔnyɛna.»
28«Uwənú, nɔ lɛa bááyɛ́ ɔbá bá ná makɔsɔnana ísə́bíníə́ na mɛaŋɔ́á. 29Ɔwámɛ, mɛ ndɔ Nɛmanɛna bɛ́lɛ́na ɛlɔ́áyɛ́ búə́núə́ buɛsɛ, ɛ́sɛ́á yamɛ́á Isə́ a ná nɛɛ́ta bɛ́lɛ́na ɔ ɔwámɛ buɛsɛ, 30Nɔ́yɛ́ mbá nɔ ŋɔ nɛ́áka, nɔ́ nyákɛ́ná tɔ́na ɔ ɔwámɛ ɛtáka ɔ ətíə́ yɛ nɛ́ámɛ́á Nɛmanɛna, nɔ́ ŋɔ tuənəkinə ɔ tukómo ɔkɛaka ɔwá nɔ niómo na tɔ́fandɛ́ nɛ́ tutikə tɔ́ Ísilahɛ́lɛ kə́lə́sə́kíə́.»
Yə́susu a ndɔ Bíə́lə mbóŋiə
(Mat 26.31-35; Mə́l 14.27-31; Yɔh 13.36-38)
31Isə́lúkú a sɛ́á: «Á Símono, á Símono, Sátana a ná bənú bəkimə sɔ́káká ɔ kɛaka ɔwá a bənú fúkə́lə́ ɔ́maná ɛ́sɛ́á abáka bá uŋəŋə́ fúmə́kinə. 32Mba, mɛ ná bɛ́kálákɛ́na ɛlɔ́áyɛ́ áwɔ ɔkɛaka ɔwá yáwɔ́á ilumininə yɛ́ lɛ nimə. Ikúílí ɔyɛ́á ɔ ŋɔ ndahíáná, ónókíníə́ báwɔ́á bənínyə́.»
33Bíə́lə a sɛ́á: «Á Isə́lúkú, mɛ lɛa hoóyi ɔ ɔwákaka na aŋɔ́á, ata ɔ ɛbɔka mbá ata ɔ nyɛmbɛ́.» 34Yə́susu a sɛ́á: «Á Bíə́lə, mɛ ndɔ aŋɔ́á lɛna, miɔkɔ́ yɛ́ sɔ ŋɔ lɔ́ŋɔ niɔfɛ́nɛ, ɛŋaná ɔwámɛ ɔbɛ́sáŋɔ́na bikúílí bɛ́lálɔ́ na ɔlaa ɔwá, ɔ lɛ ndɔ mɛaŋɔ́á manya.»
35Nɔ́yɛ́, a ná bəə́bu bəkimə lɛ́na a sɛ́á: «Ikúílí mɛ ná bənú lɔ́ma ɛŋaná ɔmbalá wɔ́ mɔnɛ́á, ɛŋaná mukutə, ɛŋaná bɛtafɛ́ná, nɔ ka báá ɔ nɛsɔ́ka nɛ́ bɔɔ́la əə́?» Bá sɛ́á ata bɔɔ́la. 36A sɛ́á: «Mba isíŋáka, ata ɛ́yánɛ́ ɔwá a lɛ́á na ilímbí yɛ́ mɔnɛ́á á yɛɛ́ta ɛta, ata ɔwá a lɛ́á na mukutə á muítə ɛta. Wɛ́ɛ́yɛ́ ɔwá a lɛ bá na mɔkɔ́átá, a nɛ́áyɛ́á nilókiə lúə́ ɔkɛaka ɔwá a muítə ɔndɔ. 37Ɔ taká, mɛ ndɔ bənú lɛna, yɛ́ lɛa hɔ́ánánátɔ́ ɔwá yɛ́ɛyɛ ɛtambá ɔyɛ́á yɛ́ lɛ́á tilə́kə́tɔ́, Huɛlɛ́ á yɛɛ́ta úndúsíníə́ ɔ ɔwámɛ ɛlɔ́á yɛ́ sɛ́á: “Bá ka wɛɛ́ya fanɛna ɔ umúlə wɔ́ bakɛamabɛ́á”. Ɔ taká, yatɛ́ ɔyɛ́á Huɛlɛ́ a ná lááka ɛlɔ́áyɛ́ ámɛ yɛ́ lɛa hoóyi ɔ ubíúndúsiniə.» 38Bɔkɔ́nɛna bá sɛ́á: «Á Isə́lúkú, ɔ́ mɛkɔ́átá ífəndí yíiyi.» Mba a sɛ́á: «Nɔ́yɛ́ yɛ́ ná hɔ́ánána.»
Yə́susu a ndɔ bɛ́kálɛ́na ɔ ɔmáá wɔ́ Olífia
(Mat 26.36-46; Mə́l 14.32-42)
39Yə́susu a ná fama, a ná ákáná ɛ́sɛ́á yáyɛ́á ihílí ɔ ɔmáá wɔ́ Olífia. Báyɛ́á bɔkɔ́nɛna bá ná wɛɛ́ya ɔŋgɔ́kɔ. 40Ɛnaka bá káfámá umə́, a ná bəə́bu lɛ́na a sɛ́á: «Nɔ́ bɛ́kálákɛ́na ɔkɛaka ɔwá nɔ lɛ kɔ́á ɔ mɔkɔ́lɛna.» 41Ɔ yɛ́ɛ́yɛ́ ikúílí, a ná bísúə́lə́ na báyɛ́á bɔkɔ́nɛna hoóyi na tɛ́tɛ́á yɛ mabaná. A ná moŋgóndi lúmə́ ɔ misí, a ná bɛ́kálákɛ́na, 42a sɛ́á: «Á Isə́, ábá ɔ ndɔ nɔ́yɛ́ hikiə, ə́kə́nə́síə́ yɛ́ɛ́yɛ́ ɛnyɛ́ná yɛ́ məsə́kə hata na mɛaŋɔ́á. Tátá ɛ́sɛ́á mɛ ndɔ hikiə, mba ɛ́sɛ́á ɔ ndɔ siə.» [43Ɔ umisíumə́, áŋgɛlɛ a ná húlínə́ ɔ nɔɔ́mɛná, a ná wɛɛ́ya bínə́níə́ ɛlɔ́áyɛ́ ɔwayɛ́ uwoníniə. 44Bɔkɔ́lɔ́ma bɔ́ ná Yə́susu itíə́, a ná botólíə́ ɔ ubíyə́bə a bɛ́kálákɛna mɔŋɛ́ŋa. Ilúhə́ ɔyɛ́á yɛ́ ná bá yɛ́ ndɔ wɛɛ́ya fáma, yɛ́ ka báá ɛ́sɛ́á mətə́bí má manɔ́ŋɔ́ ɔmá má ndɔ kɔa ɔ misí]. 45Əlimə yɛ́ mabɛ́kálɛ́na, a ná hɔalɛ́na, a ná ndáhíáná ɔ ɛmɛ́ŋɛ́ yɛ báyɛ́á bɔkɔ́nɛna; a ná bəə́bu kɔ́ána ɔ hinó, na busə́kə ɔ mɔlɛ́má. 46A ná bəə́bu lɛ́na a sɛ́á: «Yatɛ́! Nɔ lɛa ɔ hinó! Nɔ́ hɔalɛ́na, nɔ́ bɛ́kálákɛ́na ɔkɛaka ɔwá nɔ lɛ kɔɛ́na ɔ mɔkɔ́lɛna.»
Bá nɔ́ Yə́susu halɛna
(Mat 26.47-56; Mə́l 14.43-50; Yɔh 18.3-11)
47Ikúílí Yə́susu a ná bá a ndɔ hɔ́ɔ́ nɔ́yɛ́, mɔlɔ́ŋɔ́ wɔ́ bɛndɔ wɔ́ ná ndáfama. Wɛ́ɛ́yɛ́ ɔwá bá ná báá bá ndɔ ɛ́lɛnɛna bá sɛ́á á Yútasɛ, ɔmɔtɛ́ ɔ ətíə́ yɛ niómo na báfandɛ́ nɛ́ bɔkɔ́nɛna, a ná tɔ́mbálɛ́la ɔ uwəbú busíə́, a ná kátɛ́nɛ́má á Yə́susu busíə́ ɔkɛaka ɔwá a wɛɛ́ya bíə́ŋə́lə́níə́. 48A ná Yútasɛ lɛ́na a sɛ́á: «Á Yútasɛ, na nibíə́ŋə́ləniə ɔ ndɔ Mɔná wa mɔndɔ fíɔ́tɔ əə́?» 49Ɛnaka báyɛ́á bɔkɔ́nɛna bá síə́kínə́ yatɛ́ ɔyɛ́á yɛ́ ndɔ siə ɔbɛ́tɔ́mba, bá ná wɛɛ́ya batá bá sɛ́á: «Á Isə́lúkú, tɔ ósó ɔnɔaka na mɔkɔ́átá əə́?» 50Ɔmɔtɛ́ ɔ uwəbú ətíə́ a ná mɔnyɛna wa mutitiəmahánɛna mɔŋɛ́ŋa mulúə́ wɔ́ mɔkátá ɔ bɛnɔ́mɛ fala. 51Mba, Yə́susu a sɛ́á: «Nɔ́ niása yɛ́ bɛ́kɛ́áká ɛ́sɛ́á nɔ́yɛ́ yɛ́ ná hɔ́ánána.» A ná mulúə́ wɔ́ wɛ́ɛ́yɛ́ mɔnyɛna itíə́lə, a ná wɛɛ́ya niŋə́síə́.
52A ná yɛ́ɛ́yɛ́ ikúílí hɔ́lɛ́na ɔ bááyɛ́ ɔbá bá ná ndásá ɔ ɔwayɛ́ ɔhalɛna; bɛnatákɛ bɛ́ bɔnɔŋɔ, bisə́lúkú bɛ́ bətitiəmahánɛna na bisə́lúkú bɛ́ bɔkɔfɔnɛa bá Tɛ́mbɛlɛ, a sɛ́á: «Nɔ ná húlə́kə́ na mɛkɔ́átá, na ɛmbɔ́ŋɔ́ ɔ ɔwámɛ ɔndahalɛ́ná ɛ́sɛ́á mɔtɔnɛba. 53Mɔɔsɛ́ məkimə mɛ ka báá na bənú ɔ Tɛ́mbɛlɛ, nɔ sa siə ɔ ɔwámɛ ɔhalɛna, mba uwənú isíŋáka, ɔ́ ikúílí yɛ́ɛyɛ, ɔ́ yə́núə́ ikúílí yɛ́ɛyɛ, ikúílí yɛ́ iŋgínə́ yɛ tubíndindíə́.»
Bíə́lə a nɔ́ Yə́susu bɛ́sáŋɔna
(Mat 26.57-58, 69-75; Mə́l 14.53-54, 66-72; Yɔh 18.12-18, 25-27)
54Bá ná Yə́susu halɛ́na, bá ná wɛɛ́ya ákánána, bá ná wɛɛ́ya fínə́nə ɔ miímə yɛ́ mutitiəmahánɛna mɔŋɛ́ŋa. Bíə́lə a tíkə́ bəə́bu ɔŋgɔkɔ əlimə hata. 55Bá ka hiwə hɛŋɛ́ŋa kɔtaka ɔ niə́lətíə́; Bíə́lə a ná tuə́nə́ ɔ ɛbɔ́ka ɔyɛ́á bɛndɔ bá ná báá buɔnɔ́ hiwə nɛŋɛ́lɛ́nátɔ.
56Mɔnyɛna muəndú ɔmɔtɛ́, a ná Bíə́lə yámá ɔ isəmú yɛ́ hiwə tuənə́tɔ, a ná wɛɛ́ya məə́sə tala, a sɛ́á: «Wɔ́ɔwɔ mɔndɔ tɔ́na a ná báá na Yə́susu.» 57Mba Bíə́lə a ná sáŋɔ́ná a sɛ́á: «Á muəndú, mɛ lɛ ndɔ wɛɛ́ya manya!» 58Tɛ́tɛ́á yɛ ikúílí, wɔmɔtɛ́ mɔndɔ á wɛɛ́ya yámá, a sɛ́á: «Aŋɔ́á tɔ́na ɔ lɛa wəbú.» Mba, Bíə́lə a sɛ́á: «Bóo! Mɛ lɛ bá wəbú.» 59Əlimə yɛ háwɔa ɛmɔtɛ́, wɔmɔtɛ́ mɔndɔ tɔ́na a ná híánɔ́lɔ́ná a sɛ́á: «Taká, wɔ́ɔwɔ mɔndɔ a ná báá ná wɛɛ́ya bɔkɔasɛ́á, a lɛa wa Kalɛ́lɛa.» 60Bíə́lə a sɛ́á: «Mɛ lɛ ndɔ manya yatɛ́ ɔyɛ́á ɔ ndɔ siə ɔlaa.» Ɔ umisíumə́ ɛ́sɛ́á a na bá a ndɔ hɔ́ɔ́ nɔ́yɛ́, miɔkɔ́ yɛ́ ná lɔŋɔ. 61Isə́lúkú a ná bɛ́kɔ́ŋɔ́ná, a ná wɛɛ́ya məə́sə tala. Ɔ yɛ́ɛ́yɛ́ ikúílí, Bíə́lə a ná ɛtambá bɛ́kɔ́lɔ́mɔ́na ɔyɛ́á Isə́lúkú a ná wɛɛ́ya lɛ́na a sɛ́á: «Ubusíə́ ɔbɔ́á miɔkɔ́ yɛ́ lɔ́ŋɔ́ niɔfɛ́nɛ, ɔ ŋɔ bá ɔ nɔ́ mɛaŋɔ́á bɛ́sáŋɔ́na bikúílí bɛ́lálɔ́.» 62A ná fáma, a ná lɛláká mɔŋɛ́ŋa ɛmbáta.
Bá ndɔ Yə́susu kɔ́ba, bá wɛɛ́ya súbə́kə
(Mat 26.67-68; Mə́l 14.65)
63Bɛndɔ ɔbá bá ná báá bá ndɔ Yə́susu táta, bá wɛɛ́ya kɛ́kɛ́lakɛna, bá wɛɛ́ya súbə́kə. 64Bá ná wɛɛ́ya busíə́ sɛ́ŋɛ́ná na iləbə́; bá ná wɛɛ́ya batá bá sɛ́á: «Lɛná bəsú, baánɛ, ɛ́yánɛ́ a ná aŋɔ́á súbə́ əə́? Hɔ́lɔ́ ɛ́sɛ́á mɔhɛ́nátɔtányɛ́.» 65Bá wɛɛ́ya bɛ́mɔtɛ́ bɛkɔ́bálɛ́ biəŋí laaka.
Yə́susu ɔ busíə́ bɔ́ nindúmə́ nɛŋɛ́ŋa nɛ́ bəkə́lə́siə
(Mat 26.59-66; Mə́l 14.55-64; Yɔh 18.19-24)
66Ɛnaka ɔyáá wɔ́ yáá, nɛkɔta nɛ́ bɛnatákɛ bɛ́ bɔnɔŋɔ, bisə́lúkú bɛ́ bətitiəmahánɛna na bamanyumbə́ndə́ nɛ́ ná fíə́kínə, bá ná Yə́susu ákánána ɔ nindúmə́ nɛŋɛ́ŋa nɛ́ bəkə́lə́siə. 67Bá ná wɛɛ́ya batá bá sɛ́á: «Lɛná bəsú ábá aŋɔ́á ɔ́ lɛ́á Mɛ́sia.» A ná bəə́bu bíhíə́níníə́ a sɛ́á: «Ata mɛ ndɔ bənú lakɛna, nɔ sɔ́ ŋɔ luminə. 68Ábá mɛ ná bənú bɔkɔa batá, nɔ sɔ́ ŋɔ mɛaŋɔ́á bɛ́kámɔsɔna. 69Mba ɔ botolokiə isíŋáka, Mɔná wa mɔndɔ a ndɔ tuənəkinə ɔ ɛsalɛ yɛ́ bɛnɔ́mɛ yɛ́ Huɛlɛ́ yɛ injiŋə.» 70Bəə́bu bəkimə bá sɛ́á: «Aŋɔ́á, ɔ lɛ́á Mɔná wa Huɛlɛ́ əə́?» A sɛ́á: «Ɛ́sɛ́á nɔ ndɔ laa, taká, mɛ nɔ́yɛ́ báka.» 71Mba, bá sɛ́á: «Yatɛ́ tɔ́na tɔ ndɔ siə, tɔ lɛ bá na ilókí yɛ́ bəmbóŋímboŋi. Ɔ taká, bəsú bɛ́múɛ́tɛ́ tɔ ná bɛtambá ɔ́kɔ́kɛ́na ɔbɛ́á bɛ́ ná fámáká ɔ ɔwayɛ́ munuə.»
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2019, CABTAL