Lúkasɛ 24

Nɛhɔŋɔa nɛ́ Yə́susu

(Mat 28.1-10; Mə́l 16.1-8; Yɔh 20.1-10)

1Ɔ ɛsɔ́mbalɛ́ ɔ buɔsɛ́ bɔ́ indílí, bəəndú bá ná ákáná ɔ munyə́ na mooló na mənumbə ɔmá bá ná tábɔ́náka. 2Bá ná muɔkɔ ɔwá wɔ́ ná báá híə́níníə́tɔ́ ɔ munyə́ kɔ́áná bákɛ́átɔ. 3Bá ná finə, mba, bá sa umimə wɔ́ Isə́lúkú á Yə́susu sinə. 4Ɛ́sɛ́á bá ná báá ə́lə́mə́nə́tɔ́ ɛlɔ́áyɛ́ bɔ́táyɛ́ bɔkɔa, bɛndɔ báfandɛ́ bá ná bəə́bu fámɛ́ná həmə́tu na maŋgɔmba nɔmákátɔ. 5Na bɔkɔ́lɔ́ma bukimə, bá ná busíə́ lúmə́ ɔ misí. Bááyɛ́ bɛndɔ báfandɛ́ bá ná bəə́bu bátá bá sɛ́á: «Ɛlɔ́áyɛ́ yatɛ́ nɔ ndɔ muɔmɔ́ siə ɔ ətíə́ yɛ bəwə́nú əə́? 6A lɛ báá háha, mba a ná hɔŋɔ́á. Nɔ́ bɛ́kɔ́lɔ́mɔ́ná ɛ́sɛ́á a ná bənú lɛ́na ɔ ikúílí a ná báá ɔ Kalɛ́lɛa. 7A ka bá a ndɔ bənú lɛna a sɛ́á: “Yɛ́ lɛa hɔ́ánánátɔ́ ɔwá, bá Mɔná wa mɔndɔ sɛmá ɔ makátá má babɛ́á, bá wɛɛ́ya ɔ́mɔ́kɛ́na ɔ ɔmbásá; əlimə yɛ tunó tɔ́lálɔ́, á hɔŋɔ́á.”» 8Ɔ yɛ́ɛ́yɛ́ ikúílí, bá ná bɛtambá bɛ́ Yə́susu bɛ́kɔ́lɔ́mɔ́na. 9Bá ná hɛ́kɛ́á ɔ munyə́, bá ná bɛ́táyɛ́ bɛkɔa bikimə nífúnə́kínə ɔ niómo na ɔmɔtɛ́ nɛ́ basɔ́másɔma, na bənə́bənə́ bəkimə. 10Bátáyɛ́ bəəndú bá ka báa: Malɛ́á Mətəlínə, Yɔhána, na Malɛ́á á inyə́ yɛ Yákɔbɔ. Bɔ́mɔtɛ́ bəəndú tɔ́na ɔbá bá ná báá na bəə́bu, bá ná basɔ́másɔma bɛ́táyɛ́ bɛkɔa bikimə nífúnə́kínə. 11Mba uwəbú, bá bɛ́táyɛ́ bɛtambá ɔ́kɔ́kɛna ɛ́sɛ́á bɛndɛ́sa, ɛlɔ́áyɛ́ nɔ́yɛ́ bá sa luminə yatɛ́ ɔyɛ́á bá ná bəə́bu lakɛ́na. 12Mba, Bíə́lə a ná mɔlɛ́lá ɛ́ta, a ná káfámá ɔ munyə́, á fɛŋɛ́mɛ́na, a ná yámá ɔ́maná há biləbə́. Ɔ yɛ́ɛ́yɛ́ ikúílí, a ná tilə́ ɔ ɔwayɛ́ ɔmbɛ́la, a ka báá ə́lə́mə́nə́tɔ́ ɔ yatɛ́ ɔyɛ́á yɛ́ ná bɛtɔmbaka.

Bɔkɔ́nɛna ɔ ɛnɔ́mɛ yɛ́ Ɛmáyusu

(Mə́l 16.12-13)

13Ɔ bɔ́táyɛ́ buɔsɛ́, bɔkɔ́nɛna báfandɛ́ bá ka báá ɔ ɔwákaka ɔ bɔnɔŋɔ bɔ́ Ɛmayúsu. Hoóyi na bɛháwɔa bɛ́fandɛ́ bɛ́ mɔkɛnda ɔkafámáká ɔ Yəlúsalɛma. 14Bá ka báá bá ndɔ hɛ́na ɔ bɛkɔa bikimə ɔbɛ́á bɛ́ ná bɛtɔmbaka. 15Ikúílí ɔyɛ́á bá ná báá ndɔ hɔ́ɔ́ bá tə́ŋə́kəniə, Yə́susu bɛ́múɛ́tɛ́ a ná tɔ́mbálɛ́la ɔ uwəbú ɛmɛ́ŋɛ́, a ná mɔkɛnda ɛtá na bəə́bu. 16Bɔkɔ́nɛna bá wɛɛ́ya siəkinə, mba, bɔ́mɔtɛ́ bɔɔ́la bɔ́ bəə́bu kotokiə ɔwá bá lɛ wɛɛ́ya lɛnda.

17Yə́susu a ná bəə́bu batá a sɛ́á: «Yatɛ́ abáka nɔ kɛndaka nɔ tə́ŋə́kəniə əə́?» Bá ná tɛ́nɛ́má iŋguə́lə́ŋgə́ti ɔ busíə́. 18Ɔmɔtɛ́ ɔ uwəbú ətíə́ nɛ́áyɛ́á niínyə á Kɛlɛɔ́basɛ, a sɛ́á: «Aŋɔ́á bíbúə́ ɔ lɛ́á ɔ Yəlúsalɛma ɔwá ɔ lɛ ndɔ manya yatɛ́ ɔyɛ́á yɛ́ nɔ́ bɛ́tɔ́mbáka ɔ tɔ́ɔtɔ tunó əə́?» 19A ná bəə́bu bíhíə́níníə́ a sɛ́á: «Yatɛ́ nə́ə əə́?» Bá sɛ́á: «Ɔ bikimə ɔbɛ́á bɛ́ ná bɛ́tɔ́mbáká ɛsalɛ yɛ́ Yə́susu wa Násalɛtɛ, ɔwá a ná báá mɔhɛ́nátɔtányɛ́ wa injiŋə. A ka nɔ́yɛ́ ínə́niə na bɛ́áyɛ́á bɛnyɛná, na bɛ́áyɛ́á bɛtambá á Huɛlɛ́ busíə́ na ɔ bɛndɔ bəkimə. 20Bíə́súə́ bisə́lúkú bɛ́ bətitiəmahánɛna na bə́súə́ bamanɛna bá ná wɛɛ́ya índíə́ ɔwá bá wɛɛ́ya hɔkɛ́na ɔ nyɛmbɛ́, bəə́bu bá ná wɛɛ́ya ɔ́mɔ́kɛ́na ɔ ɔmbásá. 21Uwəsú, tɔ ka báá na ɛnánɛna ɔwá wɛɛ́ya a ŋɔ Ísilahɛ́lɛ háŋɔ́na. Mba na bɛ́táyɛ́ bikimə, ɔ́ álálɔ́ niɔfɛ́nɛ ɛ́sɛ́á bɛ́táyɛ́ bilukusu bɛ́ ná bɛtɔmbaka. 22Bɔ́mɔtɛ́ bəəndú uwəsú ətíə́ bá ná bəsú ə́lə́mə́nə́síə́, bá ná ákáná ɛsɔ́mbalɛ́ ɔ munyə́. 23Mba, bá sa wə́yíə́ umimə kɔana. Bá ná ndá bəsú lɛ́na ɔwá, bá ná bɛáŋgɛlɛ siəkínə, bá ná bəə́bu lɛ́na bá sɛ́á a lɛa muɔmɔ́. 24Bɛ́mɔtɛ́ bíə́súə́ bikindəniə bá ka ákána ɔ munyə́, bá ná bɛkɔa bikimə nibə́ ɛ́sɛ́á bəəndú bá ná nífúnə́kə, mba ɔwayɛ́, bá sa wɛɛ́ya sinə.»

25Nɔ́yɛ́, Yə́susu a ná bəə́bu lɛ́na a sɛ́á: «Á bɛndɔ bá ɛŋaná ɛmanya, na bá mɛlɛ́má natákátɔ́ ɔ ulumininə yatɛ́ ɔyɛ́á bɔhɛ́nátɔtányɛ́ bá ná hɔɔkɔ. 26Yɛ́ sa báá ɔwá Mɛ́sia á ɛmɔ́kɛ́ nyááká ɔ nɛ́táyɛ́ nindínə́, əlimə yɛ́ nɔ́yɛ́ mbá a fínə́ ɔ ɔwayɛ́ tuúmə əə́?» 27Ɔ balakɛna ɔ hiəfulə hɛ́ Mósisi, na hɛ́ bɔhɛ́nátɔtányɛ́ bəkimə, a ná bəə́bu nífúnə́kínə́ ɔ Mətilə məkimə yatɛ́ ɔyɛ́á yɛ́ ná bá yɛ́ ndɔ wɛɛ́ya sinə.

28Ɔkafámáká hoóyi na bɔnɔŋɔ ɔbɔ́á bá ná báá ɔ ɔwákaka, Yə́susu a ná kɛ́á ɛ́sɛ́á a nɔ́ ákána hata. 29Mba, bá ná wɛɛ́ya tínímíə́, bá sɛ́á: «Tɔ́kɔ́lɛ, túə́nə́ na bəsú buɔsɛ́ bɔ́ nɔ́ hɔ́á.» A ná bílúmə́kíníə́, a ná fínə́ ɔ miímə, a ná túə́nə́ na bəə́bu. 30Ikúílí bá ná tuə́nə ɔ ɔnɛ́á, a ná bɛlɛ́tɛ ɛta, a ná Huɛlɛ́ mohóloniə híə́níníə́, a ná mɛɛ́ta bísə́níə́, a ná bəə́bu índíə́. 31Ɔ umisíumə́ məə́sə má bɔkɔ́nɛna má ná yaa, bá ná wɛɛ́ya lɛnda, mba, a ná nyɔ́á mbasɛ́á uwəbú busíə́. 32Bá ná botólíə́ ɔ ɔbɛ́bata bá sɛ́á: «Baánɛ, ikúílí tɔ ndɔ báá ɔ ɛnɔ́mɛ, yə́súə́ mɛlɛ́má yɛ́ sá bá yɛ́ ndɔ kɔnjɔ ikúílí a ná bá a ndɔ bəsú Mətilə nífúninə əə́?»

33Ɔ umisíumə́ bá ná hɔalɛ́na, bá ná tilə́ mɔlɛ́lá ɔ Yəlúsalɛma, bá ná káfámá umə́, bá ná niómo na ɔmɔtɛ́ nɛ́ bɔkɔ́nɛna kɔ́áná kɔtálánátɔ́ na bíə́búə́ bikindəniə. 34Bá ná bəə́bu lɛ́na bá sɛ́á: «Ɔ taká, Yə́susu a lɛa hɔŋɔ́átɔ! A ná Símono bínə́níə́.»

35Bɔkɔ́nɛna báfandɛ́ bá ná bəə́bu nɛŋɔ́nákɛ́ná yatɛ́ ɔyɛ́á yɛ́ ná bɛ́tɔ́mbáká ɔ ɛnɔ́mɛ, nəníə́ bá ná wɛɛ́ya lɛndá ikúílí a ná bɛlɛ́tɛ bísə́níə́.

Yə́susu a nɔ́ bínə́niə ɔ niómo na ɔmɔtɛ́

(Mat 28.16-20; Mə́l 16.14-18; Yɔh 20.19-23; Bɛn 1.6-8)

36Ɛ́sɛ́á bá ná báá bá ndɔ hɔ́ɔ́ nɔ́yɛ́, Yə́susu a ná fáma ɔ uwəbú ətíə́, a ná bəə́bu lɛ́na a sɛ́á: «Bumbə́nú bɔ́ báá na bənú.» 37Bɔkɔ́lɔ́ma bɔ́ ná bəə́bu itíə́, bá kílíməkə, bá fɛkaka bá sɛ́á yití bá ndɔ sinə. 38Mba, a ná bəə́bu lɛ́na a sɛ́á: «Yatɛ́ nɔ ndɔ kɔ́lɔ́mɛna əə́? Ɛlɔ́áyɛ́ yatɛ́ mítə́yí mɛnyɔ́ ɔ uwənú mɛlɛ́má nuúmə əə́? 39Nɔ́ mámɛ́á makátá síə́línə na mámɛ́á makɔlɔ́: Mɛaŋɔ́á. Nɔ́ mɛaŋɔ́á itíə́lə, nɔ́ siəlínə; yití yɛ́ lɛ booko na iməhú ata na biuhə́, mba ɔwámɛ nɔ ndɔ sinə ɔwá bɛ́ ámɛ báka.» 40Əlimə yɛ bɛ́táyɛ́ bɛtambá, a ná bəə́bu máyɛ́á makátá na máyɛ́á makɔlɔ́ ínə́níə́. 41Ɛ́sɛ́á bá sa báá bá nɔ́ luminə, bá ka bá úndúə́tɔ́ na nɛhɔnɔ, ə́lə́mə́nə́tɔ́, Yə́susu a ná bəə́bu batá a sɛ́á: «Nɔ háha báka na bɔ́labɔ́nɛ́á əə́?» 42Bá ná wɛɛ́ya ɛkɛ́tɛ yɛ́ hiɔfɔ́ índíə́ hakákátɔ. 43A na hiítə ɛtá, a ná nɛ́áká ɔ uwəbú busíə́.

44A ná bəə́bu lɛ́na a sɛ́á: «Ikúílí ɔyɛ́á mɛ ná báá na bənú, ɔ́ bɛtambá bɛɛ́bɛ mɛ́ ná bənú lákɛ́na ɛlɔ́áyɛ́ ámɛ: Yɛ́ ka báá ɔwá, bikimə ɔbɛ́á bá ná tílə́kə ɔ tuəfulə tɔ́ umbə́ndə́ wɔ́ Mósisi, tɔ́ Bɔhɛ́nátɔtányɛ́ na tɔ́ Tumboŋo, bɛ́ bíúndúsíníə́.» 45Ɔ yɛ́ɛ́yɛ́ ikúílí, a ná bəə́bu ɛmanya úbúnə́ ɔkɛaka ɔwá bá Mətilə ɔ́kɔ́kɛ́na. 46A ná bəə́bu lɛ́na a sɛ́á: «Náana yɛ́ lɛ́á tilə́kə́tɔ: “Mɛ́sia a ŋɔ ɛmɔ́kɛ́ nyááka, əlimə yɛ tunó tɔ́lálɔ́, a ŋɔ hɔŋɔa. 47Ɔ ɔwayɛ́ niínyə bá ŋɔ nɛkɔ́ŋɔ́na nɛ́ mɔlɛ́má yəmbələkəniə ɛlɔ́áyɛ́ nɛniasɛna nɛ́ mabɛ́á ɔ bɛndɔ bəkimə bá misí, ɔ botolokiə ɔ Yəlúsalɛma.” 48Bənú nɔ́ lɛ́á bəmbóŋímboŋi bá bɛ́ɛ́yɛ́ bɛkɔa. 49Ɔwámɛ, mɛ ŋɔ bənú lɔ́mɛ́na yatɛ́ ɔyɛ́á yamɛ́á Isə́ a ná bənú bílíhə́níə́. Uwənú, nɔ́ tuə́nə ɔtáta ɔ bətínə́ ɔwá nɔ iŋgínə́ yɛ nɔɔ́mɛná kúsə́nə.»

Yə́susu a nɔ́ bálaka ɔ nɔɔ́mɛná

(Mə́l 16.19-20; Bɛn 1.9-11)

50Əlimə yɛ nɔ́yɛ́, Yə́susu a na báyɛ́á bɔkɔ́nɛna ákánána hoóyi na Bɛtánia; ɔmɔ́tɔ́yɛ́, a ná makátá húə́líníə́ a ná bəə́bu sana. 51Ikúílí a ná báá ɔ uwəbú ɔsana, a ná bɛ́álɔ́ná na bəə́bu, a ná báláka ɔ nɔɔ́mɛná. 52Bɔkɔ́nɛna uwəbú, bá ná wɛɛ́ya lúbúnə́kə, bá ná tilə́ ɔ Yəlúsalɛma úndúə́tɔ́ na nɛhɔnɔ. 53Bá ka báá ikúílíə́kimə ɔ Tɛ́mbɛlɛ, bá Huɛlɛ́ nyamaka.

Currently Selected:

Lúkasɛ 24: tvu

Highlight

Copy