Jọn 10
10
Aḍidogh dị ọsighe oghoony iyool-ịga kụ odoghom
1“Mị ạkar rịḅeni ghan inyina mọ oye lọ ạwile ọnhu-aḍibuo phọ kụ akpogha ẹnon esi kụ aḍigh oghoony iyool-ịga phọ, pọ ọḅa dị razirion ghan weye rạraar kạanyi. 2Oye phọ ọpo akiton bọ ọnhu-aḍibuo phọ kụ aḍigh kụ opoghom iyool-ịga phọ. 3Ọdi asi, pọ okoriom ọnhu-aḍibuo phọ kakughuronaan ghan ni nyọdi eghuugh phọ. Iyool-ịga phọ kẹnaghan ni ẹḍogh phọ ọdi. Opoghom mọ kạmagh ghan siḍien ạbidi kụ atorori amiteghom. 4Rọmagh bịdi romiteghom, kụ aḍiemiom, kụ bịdi ọdaph nyọdi, ịdi eḍighi bọ bịdi olegheri ni ẹḍogh phọ ọdi. 5Bịdi ooruen oye rọ́daph ghan, rokiilaan ghan ni nyọdi kọḍua, ịdi eḍighi bọ bịdi ẹḍogh phọ ọdi úlegheri.”
6ẠJizos adogh ḍidogh phọ ạḍien ạḅeni bịdi, kụ bịdi úlegheri ẹmhu aḍidogh phọ.
ẠJizos kụ ooḅi Opoghom Iyool-ịga phọ
7Kụ ạJizos ạḅile ạghaaph ạḅeni bịdi mọ, “Mị ạkar rịḅeni ghan inyina mọ mị kụ ọnhu-aḍibuo oghoony iyool-ịga phọ. 8Oomo phọ ạbuphe moru bọ kụ egbi ọteeny ạmi, ạruḅa dị rozirion ghan weye rạraar kạanyi, kụ iyool-ịga phọ bịdi ị́naghanan. 9Mị kụ ọnhu-aḍibuo phọ. Oye lọ akiton esi ạmi kụ aḍigh kạmoogh ni pẹleeny. Ọdi kaḍigh ni, ạḅile amite, kụ ạmiin tụyoghoyogho ạroogho ọḅal. 10Ọḅa ọ́tuan ẹnon ịyaar kụ aru, emuton omi, rꞌọze, rꞌophiemi. Mị uru mọ awe ọmoogh kugey ạkukpol-kpọl aghuḍum.
11“Mị kụ ooḅi Opoghom Iyool-ịga phọ. Ooḅi Opoghom mọ rạtuan ghan ọphel iyool-ịga phọ kụ kamugh. 12Oye lọ ophir, dị útu opoghom mọ, kạbile ni iyool-ịga phọ, akiil ạḍua, mem lọ ọdi ạmiin dị elhom ẹnam retu. Kụ elhom ẹnam mọ ẹki ẹsighiogh iniin iyool-ịga phọ kụ ẹwalalami ịpe esugha bọ. 13Ọpo ophir bọ kakiil li ạḍua, ịdi eḍighi bọ iyool-ịga phọ kị́lo ọdi, ị́man ịyaar esi ọdi. 14-15#Mat 11.27; Luk 10.22Mị kụ ooḅi Opoghom mọ. Mị alegheri ni iyool-ịga phọ ạmi, kụ iyool-ịga phọ ạmi ilegheri kẹn ni ịmi. Ịdipho Ọde phọ ulegheri bọ ịmi kụ ịdi mị alegheri ni nyọdi. Mị rạtuan ghan iyool-ịga phọ kụ kamugh. 16Mị ạḅile ni ạmoogh ịnon iyool-ịga dị íloom aani sịen oghoony phọ ọphon. Mị kạsighe aani ni bịdi atu kụ bịdi kọnaghan aani ni ẹḍogh phọ ạmi. Kọḅaraghi ni bịdi oḍighi ḍiniin aḍita kụ ọmoogh oniin Opoghom.
17“Ọde phọ ụphomoghian ni ịmi, ịdi eḍighi bọ mị ạsighe ghuḍum mọ ạmi kụ ạngo ḍuugh, pịdi mị ạḅile ạsighe ạmoogh. 18Oye ịmi rạ́ar, mị bịn kụ rạngo ni rꞌaloor ạmi. Mị ạmoogh ni ịikpo ọsighe aghuḍum ạmi kụ ọngo. Mị ạḅile kẹn ni ạmoogh ịikpo ọsighe aghuḍum mọ ạmi ọmoogh. Ịduon kụ ịdi Ọde phọ ạmi ạto bọ ụḅeni ịmi mọ mị uḍighi phọ.”
19Amadia ạtuan ni ọghaaph phọ ọphon asoor ogbo ạbuo aJu phọ. 20Ịbadi ạbidi ụḅem ghan mọ, “Eru ekola ni nyọdi. Ẹmhu ọdi ị́po. Uḍighi ika kụ nyina rẹnaghanan bọ nyọdi?”
21Kụ ạbunon ụḅem ghan mọ, “Ọghaaph phọ ọphon kọ́lo oye dị eru eghola. Keḍighi ika kụ eru ẹḅarion riḍien awe ikpom ariḍien?”
Ạbuo aJu phọ okel Jịzos
22Mem dị ẹteeny eekuna ạlha phọ, mem olhe ẹyaal owophom Otu Ịiḅereghi phọ ẹpe Jeruselem. 23Eniin aḍio ạJizos ạghi ẹpe emitenom Otu Ịiḅereghi phọ oghol bọ mọ ịisua phọ ạSolomon. Ọdi atelhe raten, 24kụ ạbuo aJu phọ oko nyọdi ọlogh ogbo kụ opuru mọ, “Kokori ẹteeny kꞌạpur amem kụ iloghi phọ ayoor egbi osoor? Kạr ạghaaph ịpe eru bọ ịne. Ụḅeni iyoor mọ ạna kụ aMesaya phọ ni.”
25Kụ ạJizos mọ, “Mị mịḅeni ni inyina, kụ nyina ímeeraam. Iiḍighi phọ mị ạsighe bọ ịikpo Ọde phọ ạmi kụ raḍighinom ghan bọ rịgbaanaan ni ịmi. 26Kụ nyina ímeeraam, ịdi eḍighi bọ nyina kíyool-ịga phọ ạmi. 27Iyool-ịga phọ ạmi rẹnaghanan ghan ni ẹḍogh phọ ạmi. Mị kẹn alegheri ni bịdi, kụ bịdi rụdaph ghan ni ịmi. 28Mị ạngo ni bịdi ghuḍum kꞌagee-pọ, kụ bịdi kópe rꞌamem. Oye ólho dị katue aziton bịdi ḍịghaagh ạmi ạsighe. 29Ọde phọ, ọpo ụngo bọ ịmi bịdi, ạbugh ni apu oomo awe, kụ oye ólho dị katue aziton bịdi ḍịghaagh Ọde phọ ạmi ạsighe. 30Mị rꞌỌde phọ ạmi oḍighi oniin oye.”
31Kụ ạbuo aJu phọ ọḅile ookoroghi ikpo oroḅol ọdi. 32Kụ ạJizos ạḅeni bịdi mọ, “Mị mạsighe ịikpo Ọde phọ ạmi aḍighinom ịbadi igey iiḍighi iḍeenaan inyina. Nyina ịtuan nyọghen kụ rẹwa ghan bọ oroḅol ạmi ikpo phọ?”
33 #
Lịv 24.16
Kụ ạbuo aJu phọ mọ, “Ịyaar phọ yoor ọtuan bọ kụ rọwa bọ oroḅol ạna ikpo phọ ịduon: mọ nạ rạapu Ẹnaan, ạḅile ạsighe loor ạna rạtomaam Ẹnaan. Yoor ụ́tuan ogey oḍighi kụ koroḅol bọ nyịna ikpo phọ.”
34 #
Ạsuo 82.6
Kụ ạJizos apuru bịdi mọ, “Ụ́ge sịphe iilogh phọ anyina mọ Ẹnaan ẹḅeni buugboom ịiruen phọ mọ, ‘Nyina ạrumugh ni’? 35Yoor olegheri ni mọ kótue ọka ịpe edi bọ sịphe ạḍinya iigbia phọ, kụ mọ Ẹnaan ighol li bụphe ọghaaph phọ ọdi aru bọ ạteeny mọ ạrumugh. 36Ọde phọ kụ ụsaḅar bọ ịmi arom mọ mị utu sịen aḅirini phọ. Ịḅile bọ iḍighi ika kụ mịna rọḅem aani bọ mọ mị Ọony phọ Ẹnaan kụ eru bọ ọopu Ẹnaan? 37Eḍighi ịyaar lọ mị oḍighi Ọde phọ ạmi ráḍighi, ịmi kímeeraam. 38Kụ eḍighi ịyaar dị mị raḍighi ghan ni, kụ nyina ịmi ímeeraam, ịtuan iiḍighi phọ ạmi emeeraam, pịdi nyina elegheri ekuphom owol mọ Ọde phọ ụḅophan ni ịmi kụ mị ạḅophan ni nyọdi.”
39Kụ bịdi ọḅile kẹn ọwa osiph ọdi, kụ ọdi akpetenaan bịdi asuma.
40 #
Jọn 1.28
Kụ ạJizos ạḅile ạḅeeny Ọphiiny ạJodan asi esi phọ ạJon awur ghan bọ we mụum mọ, kụ ạrol sịphe phọ. 41Kụ ịbadi awe ọghi ọteeny nyọdi kụ ọḅem ghan mọ, “ẠJon ịiḍaany óḍighi, kụ oomo phọ ịpe ạJon ạghaaph bọ ịlo oye phọ ọphon ọkar igey ni.” 42Kụ ịbadi awe omeeraam nyọdi ẹpe phọ.
Currently Selected:
Jọn 10: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
