Jọn 14
14
ẠJizos kụ eten phọ kọḍua bọ ọki ọteeny Ọde phọ
1“Kémeera iloghi phọ anyina ịiḅaghami inyina. Imeeraam ghan Ẹnaan, ẹḅile ghan imeeraam ịmi. 2Otu Ọde phọ ạmi ạmoogh ni ịbadi iisoph orughogh. Mụghumo kị́duon, ọbo mị mịḅeni ni inyina. Mị rạki oseleminaan anyina riisi ọrologhu. 3Mị rọghi oseleminaan anyina riisi ọrologhu phọ, kụ mị ạḅile atu ịsighe inyina ạloghoma, pịdi nyina ẹrol aani esi phọ ịpa mị odi bọ. 4Nyina elegheri ni eten ekpisi phọ mị rạki bọ.”
5Kụ ạTomos ạḅeni nyọdi mọ, “Ọmoogh-we, yoor úlegheri bọ ekpisi phọ nạ rạki bọ, yoor kolegheri bọ ika eten phọ?”
6Kụ ạJizos ạḅeni nyọdi mọ, “Mị kụ eten phọ rꞌigey phọ rꞌaghuḍum mọ. Oye dị kạteeny Ọde phọ ạmi ólho, emuton ọḍua esi ạmi kụ ọghi ọteeny ọdi. 7Mọ nyina ilegheri ni ịmi, ọbo nyina milhegheri aani ni Ọde phọ ạmi, kụ emiigh kꞌạnyiidipho ẹghiom ghisigh nyina mẹmiin nyọdi elegheri.”
8Kụ aFilip ạḅeni nyọdi mọ, “Ọmoogh-we, uḍeenaan iyoor Ọde phọ bịn kịgbaanyan ni iyoor.”
9Kụ ạJizos mọ, “Kꞌaḍio phọ ḍịen mị rꞌanyina edianaan bọ, nạ aFilip ịmi elegh kụ̋lhogh? Ọlo mụmiin ịmi pọ mạmiin ni Ọde phọ, kụ nạ ạḅile bọ rạḅem ghan mọ, ‘Uḍeenaan iyoor Ọde phọ’? 10Nạ ómeeraam ḍịen mọ mị odianaan rꞌỌde phọ, ḅịle mọ Ọde phọ ụḅophan ịmi? Ọghaaph phọ ọphon mị ạghaaph bọ rịḅeni inyina kị́itughian ạmi bịn. Ọde phọ odianaan phọ rꞌạmi kụ raḍighi bọ iiḍighi phọ ọdi. 11Imeeraam ịmi mọ mị ạḅophan ni Ọde phọ, ḅịle mọ Ọde phọ ụḅophan ni ịmi. Mọ ịphen ílho, pọ ịtuan ni iiḍighi phọ mị raḍighi bọ imeeraam ịmi. 12Mị ạkar rịḅeni ghan inyina mọ oye lọ umeeraam ịmi kaḍighi aani ni iiḍighi phọ mị raḍighi bọ. Ọdi kaḍighi ghụn ni ịlo epu sịen, ịdi eḍighi bọ mị rakeel ẹpe kꞌỌde phọ. 13Tọrobo ịyaar dị nyina eghol ḍien ạmi kụ epuru Ọde phọ, mị kaḍighi ni, pịdi awe oghol Mọony phọ ọngo Ọde phọ eghuan. 14Tọrobo ịyaar dị nyina eghol ḍien ạmi kụ ipuru ịmi, mị kaḍighi ni.”
Uwaloor Iigbia phọ oguanaan bọ
15“Mọ nyina ịphomoghian ni ịmi, ọbo nyina keeko ghan ni iilogh phọ ạmi. 16Mị kạlom ni Ọde phọ kụ ọdi kịngo ni inyina ọnon Ọodereghia dị kịrolan inyina kꞌagee-pọ. 17Ọdi kụ Uwaloor Igey phọ ọpo aḅirini phọ kótue bọ ọloghoma, ịdi eḍighi bọ bịdi nyọdi kọ̋miin ọḅile olegheri. Kụ nyina elegheri ni nyọdi, ịdi eḍighi bọ ọdi odianaan ni rꞌanyina kụ kịḅophoghan ni inyina.
18“Mị inyina rị́wile ịgo; mị kạḅile ni aḅula ịteeny inyina. 19Ọony amem bịn aḅirini phọ ịmi kụ́miin mun, kụ nyina kịmiin ghan ni ịmi. Ịdipho mị odi bọ ni, nyina kẹtol aani ni. 20Ḍio phọ ạḍiphe nyina kelegheri ni mọ mị ạḅophan ni Ọde phọ, ḅịle nyina ịḅophoghan ni ịmi, kụ mị ịḅophoghan ni inyina.
21“Oye phọ ọpo ạnaghan bọ iilogh phọ ạmi kụ aako, pọ ọdi kụ ụphomoghian bọ ịmi. Ọde phọ ạmi kạpomoghian ni nyọpo ụphomoghian bọ ịmi. Mị phọ kẹn kạpomoghian ni nyọdi, ạaweleghian loor phọ ạmi aḍeenaan nyọdi.”
22Kụ aJudas (kọ́po Ịskariot phọ) ạḅeni nyọdi mọ, “Ọmoogh-we, ika kụ ịdi nạ kạbile bọ we aḅirini phọ kụ ạaweleghian loor phọ ạna uḍeenaan iyoor?”
23Kụ ạJizos mọ, “Oye lọ ụphomoghian ịmi kạpamanam ni ikpo ọnhu phọ ạmi. Ọde phọ ạmi kạpomoghian ni nyọdi, kụ mị rꞌỌde phọ ạmi kotu ni otughan rꞌọdi. 24Oye lọ ịmi ụ́phomoghian rạ́pamanam ghan ikpo ọnhu phọ ạmi. Ọghaaph phọ ọphon nyina rẹnaghan bọ kị́itughian ạmi, ọlo Ọde phọ urom bọ ịmi.
25“Mị odi ni ọman anyina kụ ạkaaph ghan bọ ịphen phọ rịḅeni inyina. 26Kụ Ọodereghia phọ, Uwaloor Iigbia phọ ọpo Ọde phọ kạtuan bọ ḍien phọ ạmi kụ ạsighe atu, kịtughemi ni inyina oomo ạraraar phọ, ạḅile ịghiom inyina ologhi oomo phọ ịpe mị ịḅeni bọ inyina.
27“Ẹepho kụ ẹdi mị riseenaan inyina, ẹepho phọ ẹpe ạmi kụ ẹdi mị rịngo inyina, kọ́do ẹepho phọ ẹpe aḅirini phọ rạngo ghan bọ. Kémeera mun iloghi phọ anyina ịiḅaghami inyina. Kékiil eepuph. 28Nyina mẹnaghan ni ịphen mị ịḅeni bọ inyina mọ, ‘Mị kạḍua, kụ mị kạḅile ni atu ịteeny inyina.’ Mọ nyina ịphomoghian ni ịmi, ọbo nyina mịmoogh ni iboh, ịduon mị rakeel bọ kꞌỌde phọ, ịdi eḍighi bọ ọdi kụ upu ịmi. 29Mị rạkaaph ghan ịphen phọ kịḅeni inyina nyịidipho kụ egbi ọteeny amem mọ kemite bọ, ọbo ẹteeny mem mọ nyina emeeraam. 30Mị kạ́kaaph mun ạdoonye, ịdi eḍighi bọ ọdaam aḅirini phọ ratu, kụ ọlo rꞌesi lọ ịikpo phọ ọdi ẹmoogh ịyaar oḍighinom ạmi ílho. 31Mị ụtuan mọ aḅirini phọ olegheri mọ mị ạpomoghian ni Ọde phọ kụ mị ạtuugh ghan bọ oomo ịlo dị ạto raḍighi ghan.
“Iḅerenu ọḍua sịen phọ.”
Currently Selected:
Jọn 14: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
