Jọn 20
20
Oḍi dị ịyaar ologhi ílho
(Matiu 28.1-8; Mạk 16.1-8; Luk 24.1-12)
1Eḅon ạḍiroor ạSondi phọ dị kọ̋kar ri ọmiina siloor, kụ aMeri ọpo ạMagdala phọ ạghi asi sịphe oḍi phọ, kụ ạmiin dị mọsighe ḍighiigh phọ opukiom bọ ọnhu oḍi phọ ọghiom ḍiniin ạḍighaagh. 2Kụ ọdi aghiil ạghi ạteeny Saimon Pita rꞌọphori phọ ạmatuan phọ ọpo ạJizos ạphomoghian bọ kụ ạḅeni bịdi mọ, “Mọsighe Ọmoogh-we phọ sịphe oḍi phọ ọḍuanam, kụ yoor úlegheri ekpisi lọ oseere nyọdi.”
3Kụ aPita rꞌọphori phọ ạmatuan phọ ọḍua onyeene ẹpe oḍi phọ. 4Ịyal phọ ạbidi ughiil li, kụ ọphori phọ ạmatuan phọ aghiil apu Pita, kụ ạphur asi ẹpe oḍi phọ. 5Kụ ọdi aḅiriman aphogh, kụ ạmiin ịphalaḅaal iidugha phọ, kụ ọdi óḍigh. 6Kụ aSaimon Pita ạdaph ni nyọdi asi aani, kụ aḍigh ologhi oḍi phọ, kụ ạmiin ịphalaḅaal iidugha dị ezuan sịphe phọ bịn. 7Ạpookisi phọ ọpo ọkagham bọ ẹmhu phọ ạakpulughian ni gem esi, ọ́rol otuman aani ịphalaḅaal iidugha phọ. 8Kụ ọphori phọ ạmatuan phọ ọpo ạphur bọ asi sịphe oḍi phọ aḍigh aani ni kụ ạmiin kụ ameeraam. 9(Kꞌạnyiidipho bịn bịdi úlegheri ni ẹmhu ẹkpigh ạḍinya iigbia phọ ẹghaaph bọ mọ ọdi kaḅetenu ni esi aḍuugh phọ ọdi.) 10Kụ ạbumatuan phọ ọḍua ogheel kꞌạbidi.
ẠJizos amite egaan aḍeenaan loor Meri ọpo ạMagdala phọ
(Matiu 28.9-10; Mạk 16.9-11)
11Kụ aMeri ạmeera ni atuman oḍi phọ amoghi ghan. Kụ ịdipho ọdi ramoghi bọ, kụ aḅiriman aḅiila ologhi oḍi phọ, 12kụ ạmiin dị ịyal ạruukpaany kꞌẸnaan dị oonmenan ịphalaḅaal iinmenan ọrologhu ude, oniin ẹpe ẹmhu phọ, ọphori phọ ẹpe aruwol phọ, pạ ọmuneen bọ ḍizu phọ ạJizos. 13Kụ bịdi opuru nyọdi mọ, “Nịr phọ, uḍighi ika kụ nạ ramoghi bọ?”
Kụ ọdi mọ, “Ịdi eḍighi bọ mọsighe Ọmoogh-we phọ ạmi, kụ mị úlegheri esi lọ oseere nyọdi.”
14Ọdi rọḅem bọ ịphen phọ kụ akiton aphogh ọman kụ ạmiin Jịzos dị ạmeera, kụ ólhegheri mọ ạJizos phọ ni. 15Kụ ạJizos apuru nyọdi mọ, “Nịr phọ, uḍighi ika kụ nạ ramoghi bọ? Nạ rạwa ghan ạnhian?”
Kụ ọdi agbi mọ ọdi opoghom oghoony phọ, kụ ạḅeni nyọdi mọ, “Oye phọ, eḍighi ịyaar dị nạ kụ ạsighe nyọdi, pọ ụḅeni ịmi esi phọ nạ aseere bọ nyọdi, mị kakori ạki ạsighe nyọdi ạḍuanam.”
16Kụ ạJizos ạmagh nyọdi mọ, “Meri.”
Kụ ọdi akiton aphogh, kụ ạḅeni nyọdi ọnhu aHibru mọ, “Rạbonai.” (Ịduon phọ pọ “Ọtughemia”.)
17Kụ ạJizos ạḅeni nyọdi mọ, “Ịmi kụ́ḅol loor ạna, ịdi eḍighi bọ mị kőgheel ọteeny Ọde phọ ạmi ẹpe kꞌạke. Kịa ạḅeni bụo asiya phọ ạmi mọ, ‘Mị rakeel kꞌỌde phọ ạmi rꞌỌde phọ anyina, ḅịle kꞌẸnaan phọ ạmi rꞌanyina.’”
18Kụ aMeri ọpo ạMagdala phọ ạghi ạḅeni bụmatuan phọ mọ ọno mạmiin Ọmoogh-we phọ, kụ mọ ọdi kụ ạghaaph ịphen phọ ạḅeni nyịno.
ẠJizos amite egaan aḍeenaan loor bụmatuan phọ ọdi
(Matiu 28.16-20; Mạk 16.14-18; Luk 24.36-49)
19Dulhe ạSondi phọ ọpo phọ, ạbumatuan phọ mọtuan oghiilaan ạbuo aJu phọ ookpomoghan eniin esi, okughi yogh rughuugh phọ ọkasaghi, kụ ạJizos aru ạmeera pạ ogbo phọ ạbidi ekperenom, kụ ạḅeni bịdi mọ, “Ẹepho ịrolonaan inyina!” 20Kụ rọḅem bọ ịduon phọ, kụ aḍeenaan bịdi rạghaagh phọ rꞌịkporogaany phọ ọdi. Kụ ẹḅaal ologhi ạbumatuan phọ, mem mọ bịdi ọmiin bọ Ọmoogh-we phọ. 21Kụ ạJizos ạḅile ạḅeni bịdi mọ, “Ẹepho ịrolonaan inyina! Ịdipho Ọde phọ ạmi urom bọ ịmi kụ ẹdi mị rirom inyina.” 22Kụ rọḅem ịduon phọ, kụ aphooghuom bịdi kụ ạḅeni mọ, “Itiin Uwaloor Iigbia phọ. 23#Mat 16.19; 18.18Oye lọ nyina ẹsar ịkaraph ẹwilenaan, pọ mọsar ri ọbilenaan. Kụ oye lọ ịkaraph nyina ị́sar ịbilenaan, pọ kọ́sar ọwilenaan.”
ẠJizos rꞌạTomos
24Kụ ạTomos, ọpo oghol bọ mọ ạDidimos phọ, oniin sịphe aḍioph rꞌịyal ạbumatuan phọ, ọ́rol aani rꞌạbidi mem mọ ạJizos aru bọ. 25Kụ ạbueri phọ ạbumatuan phọ ọḅeni nyọdi mọ, “Yoor mọmiin ni Ọmoogh-we phọ.”
Kụ ạTomos ạḅeni bịdi mọ, “Emuton dị mị mạmiin ropogh iḍugh phọ pạ ạraghaagh phọ ọdi, ạḅile ạsighe ghụnugh ạmi ạlogh ropogh iḍugh phọ, ạḅile ạsighe ḍịghaagh ạmi ạlogh ịkpurugaany phọ ọdi, mị kámeeraam romeeraam.”
26Ọphaanya aḍughul-otu reten, kụ ạbumatuan phọ mọḅile kẹn okughi yogh rughuugh phọ ookpomoghan esi phọ, kụ ạTomos ạrol aani ni rꞌạbidi, kụ ạJizos aru ạmeera pạ ogbo phọ ạbidi ekperenom, kụ ạḅeni mọ, “Ẹepho ịrolonaan inyina!” 27Kụ ạJizos ạḅeni Tọmos mọ, “Sele ghụnugh ạna aruom ẹphen aphogh rạghaagh phọ ạmi: aḅulemi ḍịghaagh ạna ẹphen ạlogh ịkpurugaany phọ ạmi. Kạ́tol mun dọl emeeraam. Tọl aani dọl omeeraam.”
28Kụ ạTomos mọ, “Ọmoogh-we rꞌẸnaan phọ ạmi.”
29Kụ ạJizos ạḅeni nyọdi mọ, “Nạ ụtuan dị nạ mụmiin bọ ịmi kụ ameeraam bọ. Iboh kꞌẸnaan edianaan ni bụphe kọ̋miin bọ kụ omeeraam bọ.”
Ẹmhu ọghaaph ạḍinya phọ ạḍien
30ẠJizos aḍighi yogh ni ịbadi ịnon ịiḍaany ghisigh ạbumatuan phọ ọdi, dị sịen ạḍinya phọ ạḍien ụ́ge aani, 31kụ ụge ịphen phọ, pịdi nyina emeeraam mọ ạJizos kụ aMesaya Ọony phọ Ẹnaan ni, ḅịle nyina ẹtuan omeeraam aḍien phọ ọdi ẹmoogh ghuḍum kꞌagee-pọ.
Currently Selected:
Jọn 20: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
