Jọn 7
7
ẠJizos rꞌabumor phọ ọdi
1Ịphen phọ reten kụ ạJizos arelhe yogh ghan eelhe aGalili. Ọdi ọ́wa mun orelhe yogh eelhe aJudia, loor esi dị ạbuo aJu phọ rọwa ghan nyọdi oghiigh. 2#Lịv 23.34; Dut 16.13Ẹyaal arugbogo ạbuo aJu phọ retu ọteeny, 3kụ abumor phọ ạJizos ọḅeni nyọdi mọ, “Ḍụa ẹphen ạghi ẹpe Judia, pịdi ạbumatuan phọ ạna ọmiin ghan iiḍighi phọ nạ raḍighi yogh bọ. 4Oye lọ rạwa mọ aḍien phọ ọdi eeleghaan ráḍighi ghan iiḍighi esi ịbooghian. Ịdipho nạ raḍighi yogh bọ ịphen phọ, ḍeenaan loor ạna aḅirini phọ.” 5(Rꞌabumor phọ ọdi bịn nyọdi úmeeraam.)
6Kụ ạJizos ạḅeni bịdi mọ, “Amem mụo ạmi kẹ̋teeny. Tọrobo amem ịkasian ni inyina. 7Aḅirini phọ kátue ịlogh inyina ḍien, kụ mị ghụn kụ ẹdi ạlogh ḍien, ịdi eḍighi bọ mị rạḅeni ghan ni mọ iiḍighi phọ ọdi ị́nighe. 8Iḍia ghan olhe ẹyaal phọ. Mị rạ́ki aani olhe ẹyaal phọ kụ, ịdi eḍighi bọ amem mụo ạmi kẹ̋teeny.” 9Rọghaaph ịphen phọ, kụ ạrolom ni ẹpe Galili ẹphurukpu amem.
ẠJizos ạki aani olhe ẹyaal arugbogo phọ
10Mem dị abumor phọ ọdi moten ẹpe ẹyaal phọ, kụ ọdi agbi nụun ọghi aani ịlo ịbooghian. 11Ạbuo aJu phọ ụwa ni nyọdi ẹpe ẹyaal phọ, kụ oopuruan ghan mọ, “Ọdi phọ odi ẹghen?”
12Kụ awe phọ ogum iboom ịlo ọdi; buniin mọ, “Ọdi phọ ogey oye ni,” buniin mọ, “Eeye, ọdi raakeleghi ghan we.” 13Ghạlamo ịduon phọ bịn oye ómighirom ọghaaph ịlo ọdi omitiom loor eegu ạbuo aJu phọ.
14Molhe ẹyaal phọ oolemi rodi, kụ ạJizos ạghi pạ Otu Ịiḅereghi phọ kụ amiigh ọtughemi. 15Iḍigh ni iikia esi ạbuo aJu phọ kụ opuru mọ, “Oye phọ ọphon kꞌekulha otu ịtuugha ụ́ki bọ ạmaar ri ika ḍịnya phọ ạḍien phọ?”
16Kụ ạJizos mọ, “Ịphen mị rạtughemi bọ kị́lo ạmi, ịḍua esi Ẹnaan phọ irom bọ ịmi kụ eru. 17Tọrobo oye lọ aseere ologhi oḍighi ịpe Ẹnaan rẹwa bọ kalegheri ni mụghumo ịtughemi phọ ạmi ịḍua kꞌẸnaan kụ eru, ḅịle mọ mị rạkaaphom ghan ịitughian ologhi ạmi bịn. 18Oye lọ rạkaaphom ghan ịitughian ologhi ọdi bịn rạwa ghan rughuenian. Kụ ọlo rạwaanaan eghuan ọpo arom bọ nyọdi, pọ ọgbaam igey dị iguegue ụ́ḅaram. 19AMozis ḍịen kụ inyina ị́ngo bọ iilogh phọ? Kụ rꞌoniin ọnyo anyina maako ghan ni. Uḍighi ika kụ nyina rẹwa bọ oghiigh ạmi?”
20Kụ aḍita awe phọ mọ, “Eru eghola ni nyịna. Oye nyịna rạ́wa oghiigh.”
21Kụ ạJizos mọ, “Mị uḍighi ni nyeniin eboom eḍighieen dị ịngo inyina iikia. 22#Lịv 12.3; Emi 17.10AMozis ạto ịngo inyina mọ iḍun ghan nmụny anyina. (Kụ ạri ạburude ạburude anyina kụ umiigh ni eḍighinom ịyaar phọ ẹphen, káMozis.) Kụ nyina reḍun ghan ni nmụny ḍio ophooghian. 23#Jọn 5.9Nyina rekiilaan ghan ni ọkaraghi iilogh phọ aMozis keḍunogh nmụny ḍio ophooghian phọ. Nyina ighol eeghe nụun kụ rịghagham bọ ịmi iloghi mọ mị aakonom oye aḍume ḍio ophooghian phọ? 24Kẹ́sighe ghan riḍien bịn esophom ọoruen. Ịnaghan ghan ọnhu aḍighiton phọ kụ.”
Ọdi kụ aMesaya phọ ḍịen ni?
25Buniin ạbuo aJeruselem ụḅem ni mọ, “Ọphon ḍịen kóye phọ bịdi rọwa ghan bọ oghiigh phọ? 26Ịmiin aani. Ọdi amite ni egaan rạkaaphogh rạraar kụ oye ósoph ọnhu ọdi. Ạbuo ịtooghi phọ ọkaraghi nụun ni olegheri mọ ọphon kụ aMesaya phọ? 27Ọbo yira olegheri ni esi phọ oye phọ ọphon ạḍua bọ kụ aru; kụ mem dị aMesaya katu, oye dị kalegheri esi phọ ọdi ạḍua bọ kụ aru ólho.”
28Kụ ạJizos ạtughemi sịphe Otu Ịiḅereghi phọ ạlho ạghiom ạnyu mọ, “Nyina ẹkaraghi nụun ni ilegheri ịmi rꞌesi phọ mị ạḍua bọ kụ aru. Mị ụ́nya rꞌẹmhu ạmi bịn utu. Ọpo urom bọ ịmi kụ ọkaraghi ọno phọ, kụ nyina nyọdi ílegheri. 29Mị alegheri ni nyọdi, ịdi eḍighi bọ ọdi kụ urom bọ ịmi, kụ mị ụḍua loor ọdi kụ aru bọ.”
30Kụ bịdi ọwa osiph ọdi, kụ oye nyọdi óḅol, loor esi dị amem mọ ọdi kẹ̋teeny. 31Kụ ịbadi awe sịphe aḍita awe phọ umeeraam ni nyọdi kụ ọḅem mọ, “Mem dị aMesaya phọ aru, ọdi kạḅile ni aḍighi yogh ịnon ịiḍaany dị epu ịphen oye phọ ọphon ḍụghum?”
Otom bukoriom ogiga mọ ọghi osiph Jịzos
32Kụ aFarisi phọ ọnaghan dị aḍita awe phọ rọgumom ghan nyọdi ịlo ịphen phọ, kụ bịdi rꞌạbuo ạrumhu ariil ạrikia phọ orom bukoriom ogiga phọ mọ ọghi osiph nyọdi. 33Kụ ạJizos ạḅeni bịdi mọ, “Mị rꞌanyina kọḅile ni ọtolan mọony amem bịn kụ mị agbi ogheel kꞌọpo urom bọ ịmi. 34Nyina kịwa ni ịmi, kụ kẹ́miin, ịdi eḍighi bọ ẹpe mị kạtol bọ nyina kétue esi.”
35Kụ ạbuo aJu phọ mọ, “Ọdi rạwa ghan ọghi ẹghen, dị yira nyọdi kọ́miin mun bọ? Ọdi kạkiighi rạmha phọ ịpe ạbuo aGris odi bọ sịphe ogbo ạbuo aJu phọ ọtughemi ghan ạbuo aGris phọ ḍụghum? 36Rạḅem ghan mọ, ‘Nyina kịwa ni ịmi kụ kẹ́miin; ẹpe mị kạtol bọ nyina kétue esi.’ Ẹmhu ịphen phọ pọ ika?”
Ạmuum aghuḍum kakilogh amiteghu ịdipho ạriphiiny
37 #
Lịv 23.36
Ḍigbogh aḍio ẹyaal phọ kemuneen bọ, ạJizos aḅetenu ạmeera kụ ạlooghi mọ, “Ọlo ạmuum rạpu aru ụteeny ịmi ạphughol! 38#Izik 47.1; Zẹk 14.8Ịdipho ọge bọ pạ ạḍinya iigbia phọ, ‘Ạmuum aghuḍum kạḍua ologhi oye phọ ọpo umeeraam bọ ịmi kụ akilogh amiteghu ịdipho ạriphiiny.’” 39ẠJizos ạghaaph ịphen phọ ịlo Uwaloor Iigbia phọ ọpo bụphe omeeraam bọ nyọdi kọmoogh bọ. Mem mọ ạmuphe phọ kọ̋ngo Uwaloor Iigbia phọ, ịdi eḍighi bọ kőgananami eghuan phọ ạJizos.
Awe phọ odia
40Ịbadi sịphe aḍita awe phọ ụnaghan ni ikpo ọnhu phọ ịphen kụ ọḅem mọ, “Igey ni, ọphon kụ ọkaraghi oyil phọ ni!”
41Buniin mọ, “Ọphon kụ aMesaya phọ!”
Kụ buniin ọḅile kẹn ọḅem mọ, “AMesaya phọ kạ́ḍua Galili kụ atu. 42#2 Sạm 7.12; Maik 5.2Ạḍinya iigbia phọ rẹḅem ghan mọ aMesaya phọ kaḍighi ọnyo ẹemara aDevid ọdaam mọ. Kọmar nyọdi Bẹtilihem, ẹmha phọ aDevid arugh ghan bọ.” 43Kụ awe phọ ọtuan ẹmhu ọdi odia. 44Buniin ạbidi ọwa osiph ọdi, kụ oye nyọdi óḅol.
Emeeraam ạbuo ạrumhu aJu phọ
45Kụ abukoriom ogiga phọ oḅula esi ạbuo ạrumhu ariil ạrikia phọ rꞌaFarisi phọ, dị opuru bịdi mọ, “Uḍighi ika kụ nyina nyọdi ísiph bọ itumom?”
46Kụ abukoriom ogiga phọ mọ, “Oye kọ̋ghaaph ghan ẹghaaphom-ịyaar dị oye phọ ọphon rạkaaph ghan.”
47Kụ aFarisi phọ mọ, “Inyina phọ kẹn kụ ọdi ạḅaram aani ni aakeleghi? 48Nyina ẹmiin ni rꞌoniin ọnyo ịtooghi mụghumo ọnyo aFarisi dị ameeraam nyọdi ḍụghum? 49Ẹnaan meronyon ḍita ighiil awe phọ ạbuen iilogh phọ aMozis úlegheri bọ.”
50 #
Jọn 3.1, 2 ANikodimos phọ ọpo ạghi bọ ophogh ạJizos ạrol aani ni kụ ạḅeni bịdi mọ, 51“Eḍighi ni ologh ayira osophonaan ghan ọoruen oye dị ḍụghum ọnhu ụ́naghan, ụ́ḅile ụuḅeghion upogh ịyaar phọ ọdi aḍighi bọ.”
52Kụ bịdi ọphagharanaan nyọdi mọ, “Nạ phọ kẹn ọlo aGalili ḍụghum? Ḅịle aḅiligha Ḍịnya Iigbia phọ aphogh. Nạ kạmiin ni mọ oyil rámite ghan Galili.” [ 53Kụ oye oye aten agheel kꞌọdi.
Currently Selected:
Jọn 7: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
