Luk 22
22
Omitenom Jịzos ẹkaraph ezue
(Matiu 26.1-5; Mạk 14.1-2; Jọn 11.45-53)
1 #
Ẹḍua 12.1-27
Retu ọteeny amem ẹyaal phọ roliom ghan bọ ạbred phọ ọpo yist rọ́logh ghan bọ, nyẹpe oghol bọ mọ ẹyaal ọphel otene phọ, 2kụ loor oghiilaan awe phọ, ạbuo ạrumhu ariil ạrikia phọ rꞌạbutughemia iilogh phọ ọḅoph ọnhu oosophoghian ịlo ọlogh ạJizos esi aḍuugh.
AJudas ameeraam aal ạJizos
(Matiu 26.14-16; Mạk 14.10-11)
3Kụ aSetan ạar ologhi aJudas Ịskariot, oniin sịphe aḍioph rꞌịyal ạbumatuan phọ. 4Kụ ọdi ạghi ạteeny bụo ạrumhu ariil ạrikia phọ rꞌabugbogh awe sịphe abukoriom ogiga phọ ịlo aalha ạJizos. 5Kụ ẹḅaal iloghi phọ ạbidi kụ omerenyan ọngo ọdi ikpoki, 6kụ aJudas ameeraam, kụ ọdi aagonoghian ghan eepoogh aal ạJizos dị ọphenekpe kạ́tol.
ẠJizos aakolobian olhe amalhe ọphel otene phọ
(Matiu 26.17-25; Mạk 14.12-21; Jọn 13.21-30)
7Kụ ẹteeny bọ ḍio ẹyaal phọ roliom ghan bọ ạbred phọ ọpo yist rọ́logh ghan bọ, mem mọ rọpighironaan ghan bọ ẹkia ọphel otene phọ. 8Kụ ạJizos arom Pita rꞌạJon mọ, “Ịki eekolobian malhe ọphel otene phọ yira olhe.” 9Kụ bịdi opuru nyọdi mọ, “Nạ rạwa mọ yoor oselemi ḍighen esi?” 10Kụ ọdi ạḅeni bịdi mọ, “Ịnaghan! Nyina etelhe remite ẹmha phọ, nyina kẹmiin ni oye dị arool oko ạmuum, ịdaph nyọdi. Kụ otu lọ ọdi aḍigh, 11ipuru uwotu phọ mọ, ‘Ọtughemia phọ ạḅem mọ ọghen kụ osoph phọ ọno, ọpo ọno rꞌạbumatuan phọ ọno kọtol bọ kụ ole amalhe ọphel otene phọ?’ 12Kụ ọdi kiḍeenaan ni inyina oboom osoph-ạnyu, sịphe otu ẹedaneen phọ, dị moselemi ni. Ịsiphe kụ ẹdi nyina keekolobian bọ.” 13Kụ bịdi ọghi kụ ọmiin ịdipho ạJizos ạḅeni bọ bịdi, kụ ookolobian ịlo ẹyaal phọ.
Eḍien adulhe Ọmoogh-we phọ
(Matiu 26.26-30; Mạk 14.22-26; 1 Bụo ạKorint 11.23-25)
14Kụ ẹteeny bọ mem amalhe phọ, ạJizos alian ni eḍien rꞌabutelhedom mọ ọdi. 15Kụ ọdi ạḅeni bịdi mọ, “Mị ụwa ghan ni iboom olian amalhe ẹyaal ọphel otene phọ rꞌanyina, kụ egbi ọteeny amem ịminimiin phọ ạmi, 16ịdi eḍighi bọ mị rịḅeni ghan inyina mọ mị kále mun ẹyaal phọ ẹphen tụtu ọgba ẹmhu phọ omitiom ẹpe ọmar phọ kꞌẸnaan.”
17Kụ ạJizos ạsighe ọphaal amiim, kụ rọngo ḍịseph Ẹnaan, kụ ạḅem mọ, “Itiin ọphaal amiim mọ ạmuen oomo anyina eetinyian. 18Mị rịḅeni ni inyina mọ mị kạ́pughol mun miim mọ ạmuen egbi kꞌạnyiidipho ẹghiom ghisigh tụtu ẹteeny mem mọ ọmar phọ kꞌẸnaan katu bọ.”
19Kụ ọdi ạḅile ạsighe ạbred kụ rọngo ḍịseph Ẹnaan, kụ ạparion, kụ ạngo bịdi kụ ạḅeni mọ, “Ọphon kụ aḍizu phọ ạmi [mị aghol bọ ẹmhu phọ anyina kụ rạngo. Iḍighi ghan ịduon ịlo ọotughianam ạmi.” 20#Jer 31.31-34Kụ ọdi ạtuugh egina phọ ẹngoom mọ ạngo bịdi ọphaal phọ kụ ạḅem mọ, “Ọphaal amiim mọ ạmuen mị rịngo bọ inyina ạkparamiom imoom ịyo phọ oghiran bọ rꞌẸnaan, dị ịḅaal phọ ạmi mị azu bọ loor ẹmhu anyina ẹmeera enye.”]
21 #
Ạsuo 41.9
“Kụ ịmiin, ọpo kaal bọ ịmi odi ni sịen rulian iyira eḍien. 22Ọony phọ Oye kamugh ni ịdipho Ẹnaan mẹto bọ, kụ pọ eeghe ịminimiin dị kẹtolonaan oye phọ ọpo kabool bọ nyọdi.”
23Kụ oniin amiigh opuru ghan oniin mọ ạnhian nụun kụ kaḍighi bọ ịphen phọ.
Ọnunuan ịlo oye lọ aḍighi ogbogh
24 #
Mat 18.1; Mạk 9.34; Luk 9.46 Kụ ọnunuan ạrol li esi ạbumatuan phọ ọdi olegheri oye dị kaḍighi ogbogh sịphe aḍita phọ ạbidi. 25Kụ ạJizos ạḅeni bịdi mọ, “Ạbudaam ruuruen phọ ọmoogh ni ịikpo esi awe phọ bịdi ọda bọ, kụ okol bụo ịtooghi phọ mọ ạrighiri awe phọ. 26#Mat 23.11; Mạk 9.35#Mat 20.25-27; Mạk 10.42-44Kụ ḍịen kụ kạ́dol phọ anyina. Ọkaraghi ogbogh phọ sịphe ogbo phọ anyina kạtol ghụn ni dọl ọbumoony, ḅịle kẹn oḍiemiom mọ kạtol ịdipho otelhedom. 27#Jọn 13.12-15Sịphe ọpo ạrol bọ ude kụ rale eḍien phọ rꞌọpo rạngo bọ nyọdi eḍien phọ, ạnhian kụ apu ạnhian? Ọbo ghụn ọpo ạrol bọ ude phọ. Kụ mị odi ni ogbo phọ anyina ịdipho otelhedom.
28“Nyina kụ ịrolan bọ ọman ạmi oomo phọ amem mọ ọdegh ophogh phọ ụteeny ghan bọ ịmi. 29Igina phọ ịdipho Ọde phọ ạmi mụngo bọ ịmi ịikpo ọda phọ kụ ẹdi mị kạtuugh kẹn ni ịngo aani inyina. 30#Mat 19.28Nyina kele ni ẹpughol, ẹpe ọmar phọ ạmi, kụ nyina kẹtolom ni sịgada ọdaam ẹmha eegbo ịiruen ẹngo ḍioph rꞌịyal arughunughun phọ Ịzirel.”
ẠJizos ạḅem mọ aPita kạparanaan ni nyịno
(Matiu 26.31-35; Mạk 14.27-31; Jọn 13.36-38)
31“Saimon, Saimon, nạghan. ASetan mạar ịikpo oḅiligha anyina ịdipho oḅephom iizo rạsal ghan bọ ịzeghe loor ịbiakpa phọ ọdi. 32Kụ mị mạaḅereghi ạngo nyịna, mọ omeeraam mọ ạna kúpe oopho. Kụ mem dị nạ mạḅile akiton aḅula esi ạmi, kpạrami iloghi ạbuo asiya phọ ạna.”
33Kụ aPita ạphagharanaan mọ, “Ọmoogh-we, mị ạnya ni ọdaph ạna ọghi ikoli, ḅịle kẹn rꞌomugh.”
34ẠJizos mọ, “Pita, mị rịḅeni ghan inyina mọ ạkenegh kạ́laay rodon tụtu nạ mạpharanaan ịraar amem, mọ nạ ịmi úlegheri.”
Oḍigh ikpoki rꞌokuru rꞌelhool ẹgham
35 #
Mat 10.9, 10; Mạk 6.8, 9; Luk 9.3; 10.4 Kụ ạJizos apuru bịdi mọ, “Mem mọ irom bọ inyina dom mọ, kụ nyina ị́pam bọ oḍigh ikpoki rꞌokuru rꞌarokoro, ịyaar ikuom ni inyina ḍụghum?”
Kụ bịdi mọ, “Ịyaar iyoor íkuom.”
36Kụ ạJizos mọ, “Kụ nyịidipho, tọrobo oye lọ ạmoogh oḍigh ikpoki rꞌokuru ạsighe ni! Oye lọ ụ́moogh elhool ẹgham aal ạsuoma ọdi aghoom nyeniin, 37#Azay 53.12ịdi eḍighi bọ mị rịḅeni ghan inyina mọ ọghaaph ạḍinya iigbia phọ ọphon katu ni ịne ịlo ekpisi ạmi mọ, ‘Ọloghom ni nyọdi esi awe phọ ạbuphe osoroghu bọ iilogh phọ.’ Ịpe mọge bọ ịlo ạmi retu ni omite.”
38Kụ ạbumatuan phọ ọḅeni nyọdi mọ, “Ọmoogh-we, pogh. Pọono ịyal arolhool ẹgham.”
Kụ ọdi mọ, “Mẹkasian ni.”
ẠJizos ạaḅereghi Ẹnaan Ọde phọ
(Matiu 26.36-46; Mạk 14.32-42)
39Kụ ạJizos ạtuan ni ẹeghara phọ ọdi amite ạghi Eegum Ọlivs, kụ ạbumatuan phọ ụdaph ni nyọdi ọghi aani. 40Mem dị ọdi aru bọ asi esi phọ, ọdi ạḅeni ni bịdi mọ, “Ịiḅereghi mọ nyina kímeel iḍighanaan ọdegh ophogh.”
41Kụ ọdi atenom bịdi asi esi dị ẹman oroph ekpo osiemi, kụ akpuḍian ạaḅereghi mọ, 42“Ọde, mọ ẹḅeeraan nyịna, pọ ạar ịmi ẹgo ịminimiin phọ ịphen, kụ ọlo káḍighi ịpe ịḅeeraan bọ ịmi, ḍighi ghụn ni ịpe ẹḅeeraan bọ nyịna.” [ 43Kụ ọokpaany Ẹnaan amite aru, ạngo nyọdi ịnyaam. 44Rꞌamukum ologhi kụ ọdi ạaḅereghiom rꞌịikpo ạkananaam. Itẹph elhoman ikilogh ni loor ọdi ịdipho ịḅaal, kụ emeleghu ghan ude.]
45Ọdi roḅetenu esi ịiḅereghi phọ, kụ aḅula ạteeny bụmatuan phọ kụ ạmiin dị bịdi rọnaani yogh loor oboom ọto. 46Kụ ọdi apuru bịdi mọ, “Nyina ịtu eeghe kụ rẹnaani yogh bọ? Iḅerenu ẹeḅereghi mọ nyina kímeel iḍighanaan ọdegh ophogh.”
Ịdi osiph Jịzos
(Matiu 26.47-56; Mạk 14.43-50; Jọn 18.3-11)
47Ọdi odi ni rạkaaph, kụ aḍita awe oru osi. AJudas, oniin sịphe aḍioph rꞌịyal ạbumatuan phọ, kụ aḍiemiom bịdi kụ ọdi aru ạteeny Jịzos ịlo ọkpun okpo phọ. 48Kụ ạJizos ạḅeni mọ, “Judas, nạ ạsighe ḍịkpun kụ raboolom Mọony phọ Oye ḍụghum?”
49Mem dị ạbumatuan phọ ạbuphe ọrolan bọ rꞌạJizos ọmiin bọ ịpe kemite bọ, bịdi upuru ni mọ, “Ọmoogh-we, yoor oruphogh rolhool ẹgham mọ ayoor obenoghom ḍụghum?” 50Kụ oniin ọnyo ạbidi ạsighe elhool ẹgham abenom aḅeri-elhiom ẹbene uwo ẹmhu oyil ạrikia phọ asoph. 51Kụ ạJizos mọ, “Ịphen phọ mẹkasian,” kụ ạḅogh aḅeri oye phọ bịn atulan.
52Kụ ạJizos apuru bụo ạrumhu ariil ạrikia phọ rꞌabugbogh awe sịphe abukoriom ogiga phọ, rꞌikumoor awe phọ oru bọ osiph nyọdi mọ, “Nyina ẹsighenom mọ mị ọḅa ḍụghum, kụ ẹpham bọ rolhool ẹgham rꞌạraḅam kụ erumom bọ sịen phọ? 53#Luk 19.47; 21.37Aḍio etum ḍio mị rꞌanyina kụ ịrolan ghan ni sịphe Otu Ịiḅereghi phọ, kụ nyina ípiigha ịpue osiph ạmi, kụ mụen phọ kụ amem mọ anyina rꞌịikpo ufiri.”
APita ạparanaan Jịzos
(Matiu 26.57-58, 69-75; Mạk 14.53-54, 66-72; Jọn 18.12-18, 25-27)
54Kụ bịdi usiph ni Jịzos ọpham oḍighom ologhi otu kꞌuwo ẹmhu oyil ạrikia phọ, kụ aPita ạdaph aani ni kꞌẹgboogh ọman. 55Mọkpooni nịan sịphe ogbo ogiga phọ, kụ aPita ạghi ạrol ude aaḍikuan bụphe rọonma bọ nịan phọ. 56Kụ ịdipho ạnian phọ esoorom bọ nyọdi, kụ oniin ọnyani aḅiila ghisigh ọdi kụ ạḅem mọ, “Oye phọ ọphon ạdaph aani ghan ni nyọdi.”
57Kụ ọdi ạpharanaan mọ, “Nyạni phọ, mị úlegheri nyọdi.”
58Onyebel aten bịn ọnon oye ạmiin nyọdi kụ ạḅem kẹn mọ, “Nạ oniin ọnyo ạbidi aani ni.”
Kụ aPita mọ, “Ye phọ. Mị úḍigh aani.” 59Ephu oniin ạwa rẹḅile reten kụ ọnon oye ạḅem ạkpaariom mọ, “Igey ni, oye phọ ọphon ạdaph aani ghan ni nyọdi, esi dị ọdi ọlo aGalili ni.”
60Kụ aPita mọ, “Ye phọ, mị úlegheri aani ẹmhu ịphen nạ rạkaaph bọ.”
Ọdi ạkaaph rạmadan bịn ạkenegh ạlaay. 61Kụ Ọmoogh-we phọ akiton aphogh Pita, kụ aPita ạatughian ịpe Ọmoogh-we phọ ạḅeni bọ nyọdi mọ, “Tụtu ạkenegh rạlaay rodon nạ mụpharanaan ịmi ịraar amem.” 62Kụ ọdi amite kụ amoghi igey.
Ọgilaam Jịzos ọḅile ọgurogh ọḅaram
(Matiu 26.67-68; Mạk 14.65)
63Kụ bụphe rokori ghan bọ Jịzos ụgilaam ni nyọdi kụ ọgurogh, 64kụ ọkagh riḍien ọdi ukpe kụ ọḅeni ghan nyọdi mọ, “Mịin uḍien. Ụḅeni iyoor oye phọ ọpo aḅor bọ nyịna.” 65Bịdi ụḅeni ni nyọdi ịbadi ịnon ạraraar ạrigilaam.
Ọmeremi Jịzos ghisigh ookpomoghan ikpolom awe phọ
(Matiu 26.59-66; Mạk 14.55-64; Jọn 18.19-24)
66Mem dị mẹḅaal ḍịroor kụ ikumoor awe ạbuo aJu phọ, rꞌạbuo ạrumhu ariil ạrikia phọ, rꞌạbutughemia iilogh phọ ookpomoghan, kụ ọpham Jịzos osiemi otu ezue phọ ạbidi. 67Kụ bịdi mọ, “Ụḅeni iyoor, nạ kụ aMesaya phọ ḍụghum?”
Kụ ọdi mọ, “Mị kụ ịḅeni inyina, nyina ịmi kímeeraam. 68Kụ mị ipuru inyina ḍipuru, nyina ịmi kị́phagharanaan. 69Kụ emiigh kꞌạnyiidipho ẹghiom ghisigh, kọtolomi ni Mọony phọ Oye ḍịghaagh elhiom Egbogh Ẹnaan phọ.”
70Kụ oomo phọ ạbidi opuru mọ, “Kụ ẹrol dị nạ kụ Ọony phọ Ẹnaan ḍụghum?”
Kụ ọdi mọ, “Nyina kụ rẹḅem mọ mị kụ ọno phọ.”
71Kụ bịdi mọ, “Yira ọḅile kẹn rọwa ghan bụo ạsiagba phọ oḍighinom eeghe? Yira rꞌaloor ayira mọnaghan bọ ni ọkar ikpo ọnhu phọ ọdi.”
Currently Selected:
Luk 22: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
