Gha ta Wəshi 41
41
Yɛ shiwəa Farawon
1Va bake kadzeghə ne, pa Farawon shiwəte shiwə: ma newe ŋkɛ ne, mɛa hələa Nil ŋkɛ. 2Pa ŋkɛ nakɛ mbəkwəa lɛməa sla mberefaŋe same kwa hələa shɛ kedɛɓedɛa dɛɓedɛanji. Ntake hɛ kazeme gwəzə dzeyi mɛa hələbə. 3Kwetere wəmbəa ŋkɛ, pɛkwe kweci mbəkwəa lɛmə mberefaŋe same kwa hələ kepahe pahe ba'a 'yɛrazlɛŋwe zlɛŋwe te sebe ta nci. Pa hɛ nzanji vare nyi keghate mɛa hələbəa Nil. 4Tagha gɛ, pa sla nyi kepahe pahe nyi zehwe nyi dɛɓedɛa dɛɓedɛa nyi mberefaŋe. Te vəa shɛ, feɗeghe Farawon feɗeghenyɛ. 5Zhɛne shelɛŋe ŋkɛ yitea hɛ, pa ŋkɛ shiwəte kwete shiwə. Ma newe ŋkɛ ne, mberefaŋe ghəa ha kejama jamanji ba'a kevərəzlə vərəzlə pesete geva te cafecɛge nya kwetɛŋe. 6Kwetere wəmbəa ŋkɛ, mberefaŋe kweci keshilə shilə ba'a keghwele ghwele va sefə nya kevɛ se te ɓerama pesete geva te sebe ta nci. 7Pa nyi ketiwɛɗi tiwɛɗi nyighɛ ndahwe ghəa ha nyi jama jama ba'a kevərəzlə vərəzlə nyighɛ. Tagha ne, feɗeghakwe Farawon feɗeghenyɛ, pa ŋkɛ ɗepete shiwə yashiwəte ŋkɛ.
8Ma masheke ne, kwetɛ kwetɛŋe mehele ta Farawon. Pa ŋkɛ hekake ka mene ghwɛ ba'a ka ntsehwele ntsehwele nyi mbe Ɛzhipte pɛtɛ. Pa ŋkɛ gezete nda shiwəa ŋkɛ ke hɛ, ama wəndə shɛ kegezete nda ghena nya mbe we. 9Tagha, ma ke wəndə nya te ghəa wəshi kesa sha Farawon: «Meghe yawe, 'ya kancɛ fete ta ɗa ɓeshi! 10Te kwete hɛ vəashi, nahe wənəa ŋa kezhɛte ŋa va 'ya ba'a va wəndə nya te ghəa wəshi kezeme, pa na keseyi n'yɛ kwa daŋgayɛ ki ghɛa wəndə nya te ghəa ka ya ŋkwa. 11Pa n'yɛ shiwəte shiwə mbe viɗi nya kwetɛŋe bake n'yɛ. Ama keghə keghə ghena nyi mbe shiwəa shɛhɛ. 12Nahe kwete wəzege ta ka Ɛbrə kese hwa ghen'yɛ kamava ta wəndə nya te ghəa ka ya ŋkwa. Pa ghen'yɛ gezete nda shiwəa n'yɛ, pa ŋkɛ ncɛte nda ghena nya mbe shiwəa ŋkɛ ke yayata wəndəa n'yɛ. 13Pa wəshia shɛhɛ menete geva kala nya gezete ŋkɛ: pa mbeli zhɛneyi ɗa mbe slene ta ɗa, ghɛke mbeli hwepeyite nda zewe yitea welɛ ke wəndə nya te ghəa wəshi kezeme yitea nza ŋkɛ ŋalawe pelɛ wəfe.»
Zhozɛf kageze ghena nya mbe shiwəa Farawon
14Pa Farawon ghwenakɛ ŋkwa kaheka Zhozɛf. Pa mbeli kelakame ŋkɛ kahe kahe same kwa daŋgayɛ, pa mbeli ŋsəmte nda ghə, mbeɗakwe ŋkɛ mbeɗemte lekwesa, cape ŋkɛ kadzawa kema ta Farawon. 15Ma ke Farawon sha Zhozɛf: «Nahe 'ya keshiwəte shiwə, ama wəndə shɛ kegezete ghena nya mbe we. Nahe 'ya kefa wərə na kagezete ghena nyi mbe yɛ shiwə kegezete ŋa hɛ mbeli.» 16Ma ke Zhozɛf sha Farawon: «'Ya ŋkɛ we! Shala nde nza kancɛte ŋa ghena nya mbe tiɗiɗi.» 17Ma ke Farawon sha Zhozɛf: «Ma newe 'ya mbe shiwəa ɗa ne, mɛa hələa Nil 'ya. 18Pa 'ya nakɛ mbəkwəa lɛməa sla mberefaŋe kedɛɓedɛa dɛɓedɛanji ba'a keganji ganjinji kasame kwa hələa Nil. Ntake hɛ kazeme gwəzə dzeyi mɛa hələbə. 19Zhɛne ne, mberefaŋe kweci mbəkwəa lɛməa sla kepahe pahe, kendiremi ndireminji ba'a 'yɛrazlɛŋwe zlɛŋwe same kwa hələa shɛ. Kegha 'ya kanakɛ wəshi keseɗa nyi 'yɛrazlɛŋwe zlɛŋwe kala hɛ te hɛɗia Ɛzhipte we. 20Pa mbəkwəa lɛməa sla nyi kepahe pahe ba'a nyi 'yɛrazlɛŋwe zlɛŋwe mpeɗehwe nyi mberefaŋe nyi keghate kedɛɓedɛa dɛɓedɛanji. 21Ma kwa zehwe hɛ hɛ ne, kaɗepete wəndə nahe hɛ kezehwe wəsə ya ci'a ŋkɛ we. Ma vəa ŋkwa nyagha gɛ ne, pa 'ya feɗeghe ɗa. 22Zhɛne, pa 'ya shiwəte kwete: newe 'ya, mberefaŋe ghəa ha mberefaŋe kejama jamanji ba'a kevərəzlə vərəzlə same te cafecɛge nya kwetɛŋe. 23Ɓiyitsa, mberefaŋe kweci keshilə shilə, keslɛahe slɛahenji ba'a keghwele ghwele va sefə nya kevɛ se te ɓerama pesete geva kwa sebe ta nci. 24Pa ghəa ha nyi slɛahe slɛahe nyighɛ ndahwe nyi jama jama mberefaŋe. Pa 'ya gezete nda shiwəa shɛhɛ ke ka mene ghwɛ ne, ama wəndə shɛ hwa hɛ kegezete ɗa ghena nyi mbe hɛ we.»
25Ma ke Zhozɛf sha Farawon: «Yipə yipə ghena nyi mbe shiwəa ŋa nyi bake nyi meghe yawe. Shala nde ncɛ ŋa wəsə nya teɗe ŋkɛ kamene. 26Ma mbəkwəa lɛməa sla nyi dɛɓedɛa dɛɓedɛa nyi mberefaŋe ne, va mberefaŋe hɛ, ghəa ha nyi jama jama nyi mberefaŋe ne, va mberefaŋe hɛ perə: shiwə nya kwetɛŋe hɛ. 27Ma mbəkwəa lɛmə sla nyi mberefaŋe nyi kepahe pahe ba'a 'yɛrazlɛŋwe zlɛŋwe nyi kesame kwa sebe ta nci ne, va mberefaŋe hɛ. Tsagha ghəa ha nyi mberefaŋe keshilə shilə ba'a keghwele ghwele va sefə nya kevɛ se te ɓerama, ama kava mberefaŋe ta ma tenza hɛ. 28Wa nya ghena nya va 'ya nya kageze nda ke Farawon, Shala nde ncɛte ŋa wəshi nyi temene ŋkɛ. 29Katemene geva va mberefaŋe nyi nza wəshi kezeme kwele kwele te pɛtɛa hɛɗia Ɛzhipte. 30Kwa sebe ta ŋkɛ, katese ma kava mberefaŋe nya ketezaghə nda wəshi nyi kese kwele kwele te hɛɗia Ɛzhipte ke mbeli. Katesa nda gəli ma ke mbeli nyi te hɛɗi. 31Dzawe tenza ma shɛ kaɗema mbeli kateɗepete nahe wəshi kezeme kese kwele kwele te hɛɗi. 32Ma nda shiwəte shiwəa shɛ Farawon bake zhigə ne, va nya tarete Shala ba'a va nya ɗe ŋkɛ katemene kahe kahe. 33Ma tsetsenya ne, zeleve wəndə nya keɗepe wəsə ba'a nya kentsehwele ntsehwele Farawon yitea nza te ghəa Ɛzhipte. 34Nteyi mbelia jama Farawon dzeyi mbe hɛɗia Ɛzhipte yitea kele kwa mcɛfe ta bela ta wəshi nyi kese te wəve mbe va mberefaŋe nyi nza wəshi kezeme kwele kwele. 35Tsene wəshi kezeme hɛ mbe va ganji mberefaŋe nyi ketese, bete ha shɛ hɛ mbe yɛ cɛ kebete wəshi te sləa ŋa dzeyi mbe yɛ meleme kezha wəmbəyi hɛ kambe kwete veci. 36Kawəsə nya wəmbəyi hɛɗi tenza ŋkɛ kezha va ta ma nyi ketemene geva mberefaŋe mbe Ɛzhipte. Ma tsagha, kateza sebe ma te mbeli te hɛɗia Ɛzhipte we.»
Zhozɛf kazhɛre kaŋgwamna ta Ɛzhipte
37Zeɗehwe ghena shɛ ke yɛ Farawon le mbeli nyi yite pɛtɛ. 38Ma ke Farawon sha hɛ: «Wəndə nya ne, Sefəa Shala ya viɗi mbe. Katenakɛ kwete gheɓəmə wəndə za ma ke gheŋkɛ na?» 39Kwa sebe ta ŋkɛ, ma ke Farawon sha Zhozɛf: «Kwa nza ŋkɛ nahe Shala kencɛte ŋa pɛtɛa wəshia shɛhɛ, wəndə nya ɗepe ma wəsə ba'a nya ntsehwele ma shɛ ke gha we. 40Gha nde nza kawəndə nya te ghəa hɛɗia ɗa, va gha tefa ghena mbeli nyi te pɛtɛa hɛɗia ɗa, deke va nza pelɛ pasla nza 'ya kwele ma ke gha. 41Tsetsenya ne, 'ya kave ŋa te ghəa pɛtɛa hɛɗia Ɛzhipte.» 42Seɗeŋwe ŋkɛ sha ŋgwedɛba same kwa dzeve ta ŋkɛ, pa ŋkɛ seɗate nda ŋkɛ te dzeve ke Zhozɛf. Pa ŋkɛ seɗaghe nda lekwesa kwa kweɗekwe ba'a seɗeŋwe ŋkɛ sha zhɛɗa mze kwa tere tere kwa welɛ ve. 43Kwa sebe ta ŋkɛ, pa ŋkɛ veyi ŋkɛ pelɛ kwa bake ta wəmata gədəwəa ŋkɛ, ma ke mbeli sha zlape te kema ta ŋkɛ: «Slə mə kwa hweŋkwa!» Tsetse veyi Zhozɛf Farawon te ghəa hɛɗia Ɛzhipte. 44Ma ke sha Zhozɛf zhɛkwa: «'Ya ya kaFarawon! Wəndə shɛ kakafe ya kwatɛka ta dzeve ŋkɛ te pɛtɛa hɛɗia Ɛzhipte keɗema na kendeke nda hweŋkwa we.» 45Ma kwetere wəmbəa ŋkɛ, pa Farawon hekate nda slə ke Zhozɛf kaSafnat-Panɛya, pa ŋkɛ ndeke nda Asnat, wəzha ta Potifɛra nya kande dzeghe Shala mbe meleme ta On kamale. Tagha, cape Zhozɛf kalə kanewe hɛɗia Ɛzhipte. 46Va ta Zhozɛf mahekenemsə nda dzawa kema ta Farawon, meghea ka Ɛzhipte ŋkɛ.
Pa Zhozɛf sərəakɛ Farawon kezha dzedzeghwa dzeyi mbe pɛtɛa hɛɗia Ɛzhipte. 47Ma va ganji nyi mberefaŋe nyi, kwele kwele menete mene wəshi te hɛɗi. 48Pa Zhozɛf tsenete wəshi kezeme mbe Ɛzhipte kava mberefaŋe. Dzeyi mbe yɛ meleme ne, pa ŋkɛ bebeteyi wəshi kezeme nyi kese mbe wəve nyi dzeyi yitea hɛ. 49Pa ŋkɛ tsenete ha kwele kwele kala ndaleghe nya kwa hələ. Pa mbeli sərəakɛ ɓela hɛ kwa ɗema mbeli kapesle yite. 50Nda tese va ta ma ne, nahe Asnat, wəzha ta Potifɛra, nde dzeghe Shala nya mbe meleme ta On keyake nda ŋwale tezhili bake ke Zhozɛf. 51Pa ŋkɛ ndeke nda slə ke nde ghate ta wəzege ta ŋkɛ kaManasɛ, ma ke: «Nahe Shala kendeke ɗa hweŋkwa kezaghə yaka nyi sahwe 'ya ba'a geva nya nehemte ya le mbelia n'yɛ.» 52Ama nde bake ne, kaƐfrayim hekate nda slə ŋkɛ, ma ke: «Nahe Shala kendeke ɗa ya ŋwale te hɛɗi nya sahwe yaka 'ya.»
53Nahe va mberefaŋe nyi nza nyi wəshi kezeme kwele kwele mbe kekiɗinji mbe Ɛzhipte. 54Pa va ta ma nyi ketemene geva mberefaŋe ghate geva kala nya gezete Zhozɛf. Pa ma pesleyi geva te pɛtɛa yɛ hɛɗi, ama wəshi kezeme ya mbe Ɛzhipte. 55Ma kwa dzete ka Ɛzhipte ma ne, ntake hɛ ka'yɛwe wəshi kezeme va Farawon. Ma ke Farawon sha hɛ: «Kwiɗi mə sha Zhozɛf, mene mə wəsə nya tegeze ŋayɛ ŋkɛ!» 56Pɛtɛ mbeli nyi te hɛɗia shɛ te ma shɛ. Pa Zhozɛf pelemte yɛ cɛ kebete wəshi kezha pamte nda ha ke ka Ɛzhipte. Kwele kwele ma mtsehete geva mbe Ɛzhipte. 57Kase mbeli te yayata hɛɗi kezha pa ha va Zhozɛf, kwa nza ŋkɛ ghyanake ma te yayata ŋkwa.
Currently Selected:
Gha ta Wəshi 41: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.
Gha ta Wəshi 41
41
Yɛ shiwəa Farawon
1Va bake kadzeghə ne, pa Farawon shiwəte shiwə: ma newe ŋkɛ ne, mɛa hələa Nil ŋkɛ. 2Pa ŋkɛ nakɛ mbəkwəa lɛməa sla mberefaŋe same kwa hələa shɛ kedɛɓedɛa dɛɓedɛanji. Ntake hɛ kazeme gwəzə dzeyi mɛa hələbə. 3Kwetere wəmbəa ŋkɛ, pɛkwe kweci mbəkwəa lɛmə mberefaŋe same kwa hələ kepahe pahe ba'a 'yɛrazlɛŋwe zlɛŋwe te sebe ta nci. Pa hɛ nzanji vare nyi keghate mɛa hələbəa Nil. 4Tagha gɛ, pa sla nyi kepahe pahe nyi zehwe nyi dɛɓedɛa dɛɓedɛa nyi mberefaŋe. Te vəa shɛ, feɗeghe Farawon feɗeghenyɛ. 5Zhɛne shelɛŋe ŋkɛ yitea hɛ, pa ŋkɛ shiwəte kwete shiwə. Ma newe ŋkɛ ne, mberefaŋe ghəa ha kejama jamanji ba'a kevərəzlə vərəzlə pesete geva te cafecɛge nya kwetɛŋe. 6Kwetere wəmbəa ŋkɛ, mberefaŋe kweci keshilə shilə ba'a keghwele ghwele va sefə nya kevɛ se te ɓerama pesete geva te sebe ta nci. 7Pa nyi ketiwɛɗi tiwɛɗi nyighɛ ndahwe ghəa ha nyi jama jama ba'a kevərəzlə vərəzlə nyighɛ. Tagha ne, feɗeghakwe Farawon feɗeghenyɛ, pa ŋkɛ ɗepete shiwə yashiwəte ŋkɛ.
8Ma masheke ne, kwetɛ kwetɛŋe mehele ta Farawon. Pa ŋkɛ hekake ka mene ghwɛ ba'a ka ntsehwele ntsehwele nyi mbe Ɛzhipte pɛtɛ. Pa ŋkɛ gezete nda shiwəa ŋkɛ ke hɛ, ama wəndə shɛ kegezete nda ghena nya mbe we. 9Tagha, ma ke wəndə nya te ghəa wəshi kesa sha Farawon: «Meghe yawe, 'ya kancɛ fete ta ɗa ɓeshi! 10Te kwete hɛ vəashi, nahe wənəa ŋa kezhɛte ŋa va 'ya ba'a va wəndə nya te ghəa wəshi kezeme, pa na keseyi n'yɛ kwa daŋgayɛ ki ghɛa wəndə nya te ghəa ka ya ŋkwa. 11Pa n'yɛ shiwəte shiwə mbe viɗi nya kwetɛŋe bake n'yɛ. Ama keghə keghə ghena nyi mbe shiwəa shɛhɛ. 12Nahe kwete wəzege ta ka Ɛbrə kese hwa ghen'yɛ kamava ta wəndə nya te ghəa ka ya ŋkwa. Pa ghen'yɛ gezete nda shiwəa n'yɛ, pa ŋkɛ ncɛte nda ghena nya mbe shiwəa ŋkɛ ke yayata wəndəa n'yɛ. 13Pa wəshia shɛhɛ menete geva kala nya gezete ŋkɛ: pa mbeli zhɛneyi ɗa mbe slene ta ɗa, ghɛke mbeli hwepeyite nda zewe yitea welɛ ke wəndə nya te ghəa wəshi kezeme yitea nza ŋkɛ ŋalawe pelɛ wəfe.»
Zhozɛf kageze ghena nya mbe shiwəa Farawon
14Pa Farawon ghwenakɛ ŋkwa kaheka Zhozɛf. Pa mbeli kelakame ŋkɛ kahe kahe same kwa daŋgayɛ, pa mbeli ŋsəmte nda ghə, mbeɗakwe ŋkɛ mbeɗemte lekwesa, cape ŋkɛ kadzawa kema ta Farawon. 15Ma ke Farawon sha Zhozɛf: «Nahe 'ya keshiwəte shiwə, ama wəndə shɛ kegezete ghena nya mbe we. Nahe 'ya kefa wərə na kagezete ghena nyi mbe yɛ shiwə kegezete ŋa hɛ mbeli.» 16Ma ke Zhozɛf sha Farawon: «'Ya ŋkɛ we! Shala nde nza kancɛte ŋa ghena nya mbe tiɗiɗi.» 17Ma ke Farawon sha Zhozɛf: «Ma newe 'ya mbe shiwəa ɗa ne, mɛa hələa Nil 'ya. 18Pa 'ya nakɛ mbəkwəa lɛməa sla mberefaŋe kedɛɓedɛa dɛɓedɛanji ba'a keganji ganjinji kasame kwa hələa Nil. Ntake hɛ kazeme gwəzə dzeyi mɛa hələbə. 19Zhɛne ne, mberefaŋe kweci mbəkwəa lɛməa sla kepahe pahe, kendiremi ndireminji ba'a 'yɛrazlɛŋwe zlɛŋwe same kwa hələa shɛ. Kegha 'ya kanakɛ wəshi keseɗa nyi 'yɛrazlɛŋwe zlɛŋwe kala hɛ te hɛɗia Ɛzhipte we. 20Pa mbəkwəa lɛməa sla nyi kepahe pahe ba'a nyi 'yɛrazlɛŋwe zlɛŋwe mpeɗehwe nyi mberefaŋe nyi keghate kedɛɓedɛa dɛɓedɛanji. 21Ma kwa zehwe hɛ hɛ ne, kaɗepete wəndə nahe hɛ kezehwe wəsə ya ci'a ŋkɛ we. Ma vəa ŋkwa nyagha gɛ ne, pa 'ya feɗeghe ɗa. 22Zhɛne, pa 'ya shiwəte kwete: newe 'ya, mberefaŋe ghəa ha mberefaŋe kejama jamanji ba'a kevərəzlə vərəzlə same te cafecɛge nya kwetɛŋe. 23Ɓiyitsa, mberefaŋe kweci keshilə shilə, keslɛahe slɛahenji ba'a keghwele ghwele va sefə nya kevɛ se te ɓerama pesete geva kwa sebe ta nci. 24Pa ghəa ha nyi slɛahe slɛahe nyighɛ ndahwe nyi jama jama mberefaŋe. Pa 'ya gezete nda shiwəa shɛhɛ ke ka mene ghwɛ ne, ama wəndə shɛ hwa hɛ kegezete ɗa ghena nyi mbe hɛ we.»
25Ma ke Zhozɛf sha Farawon: «Yipə yipə ghena nyi mbe shiwəa ŋa nyi bake nyi meghe yawe. Shala nde ncɛ ŋa wəsə nya teɗe ŋkɛ kamene. 26Ma mbəkwəa lɛməa sla nyi dɛɓedɛa dɛɓedɛa nyi mberefaŋe ne, va mberefaŋe hɛ, ghəa ha nyi jama jama nyi mberefaŋe ne, va mberefaŋe hɛ perə: shiwə nya kwetɛŋe hɛ. 27Ma mbəkwəa lɛmə sla nyi mberefaŋe nyi kepahe pahe ba'a 'yɛrazlɛŋwe zlɛŋwe nyi kesame kwa sebe ta nci ne, va mberefaŋe hɛ. Tsagha ghəa ha nyi mberefaŋe keshilə shilə ba'a keghwele ghwele va sefə nya kevɛ se te ɓerama, ama kava mberefaŋe ta ma tenza hɛ. 28Wa nya ghena nya va 'ya nya kageze nda ke Farawon, Shala nde ncɛte ŋa wəshi nyi temene ŋkɛ. 29Katemene geva va mberefaŋe nyi nza wəshi kezeme kwele kwele te pɛtɛa hɛɗia Ɛzhipte. 30Kwa sebe ta ŋkɛ, katese ma kava mberefaŋe nya ketezaghə nda wəshi nyi kese kwele kwele te hɛɗia Ɛzhipte ke mbeli. Katesa nda gəli ma ke mbeli nyi te hɛɗi. 31Dzawe tenza ma shɛ kaɗema mbeli kateɗepete nahe wəshi kezeme kese kwele kwele te hɛɗi. 32Ma nda shiwəte shiwəa shɛ Farawon bake zhigə ne, va nya tarete Shala ba'a va nya ɗe ŋkɛ katemene kahe kahe. 33Ma tsetsenya ne, zeleve wəndə nya keɗepe wəsə ba'a nya kentsehwele ntsehwele Farawon yitea nza te ghəa Ɛzhipte. 34Nteyi mbelia jama Farawon dzeyi mbe hɛɗia Ɛzhipte yitea kele kwa mcɛfe ta bela ta wəshi nyi kese te wəve mbe va mberefaŋe nyi nza wəshi kezeme kwele kwele. 35Tsene wəshi kezeme hɛ mbe va ganji mberefaŋe nyi ketese, bete ha shɛ hɛ mbe yɛ cɛ kebete wəshi te sləa ŋa dzeyi mbe yɛ meleme kezha wəmbəyi hɛ kambe kwete veci. 36Kawəsə nya wəmbəyi hɛɗi tenza ŋkɛ kezha va ta ma nyi ketemene geva mberefaŋe mbe Ɛzhipte. Ma tsagha, kateza sebe ma te mbeli te hɛɗia Ɛzhipte we.»
Zhozɛf kazhɛre kaŋgwamna ta Ɛzhipte
37Zeɗehwe ghena shɛ ke yɛ Farawon le mbeli nyi yite pɛtɛ. 38Ma ke Farawon sha hɛ: «Wəndə nya ne, Sefəa Shala ya viɗi mbe. Katenakɛ kwete gheɓəmə wəndə za ma ke gheŋkɛ na?» 39Kwa sebe ta ŋkɛ, ma ke Farawon sha Zhozɛf: «Kwa nza ŋkɛ nahe Shala kencɛte ŋa pɛtɛa wəshia shɛhɛ, wəndə nya ɗepe ma wəsə ba'a nya ntsehwele ma shɛ ke gha we. 40Gha nde nza kawəndə nya te ghəa hɛɗia ɗa, va gha tefa ghena mbeli nyi te pɛtɛa hɛɗia ɗa, deke va nza pelɛ pasla nza 'ya kwele ma ke gha. 41Tsetsenya ne, 'ya kave ŋa te ghəa pɛtɛa hɛɗia Ɛzhipte.» 42Seɗeŋwe ŋkɛ sha ŋgwedɛba same kwa dzeve ta ŋkɛ, pa ŋkɛ seɗate nda ŋkɛ te dzeve ke Zhozɛf. Pa ŋkɛ seɗaghe nda lekwesa kwa kweɗekwe ba'a seɗeŋwe ŋkɛ sha zhɛɗa mze kwa tere tere kwa welɛ ve. 43Kwa sebe ta ŋkɛ, pa ŋkɛ veyi ŋkɛ pelɛ kwa bake ta wəmata gədəwəa ŋkɛ, ma ke mbeli sha zlape te kema ta ŋkɛ: «Slə mə kwa hweŋkwa!» Tsetse veyi Zhozɛf Farawon te ghəa hɛɗia Ɛzhipte. 44Ma ke sha Zhozɛf zhɛkwa: «'Ya ya kaFarawon! Wəndə shɛ kakafe ya kwatɛka ta dzeve ŋkɛ te pɛtɛa hɛɗia Ɛzhipte keɗema na kendeke nda hweŋkwa we.» 45Ma kwetere wəmbəa ŋkɛ, pa Farawon hekate nda slə ke Zhozɛf kaSafnat-Panɛya, pa ŋkɛ ndeke nda Asnat, wəzha ta Potifɛra nya kande dzeghe Shala mbe meleme ta On kamale. Tagha, cape Zhozɛf kalə kanewe hɛɗia Ɛzhipte. 46Va ta Zhozɛf mahekenemsə nda dzawa kema ta Farawon, meghea ka Ɛzhipte ŋkɛ.
Pa Zhozɛf sərəakɛ Farawon kezha dzedzeghwa dzeyi mbe pɛtɛa hɛɗia Ɛzhipte. 47Ma va ganji nyi mberefaŋe nyi, kwele kwele menete mene wəshi te hɛɗi. 48Pa Zhozɛf tsenete wəshi kezeme mbe Ɛzhipte kava mberefaŋe. Dzeyi mbe yɛ meleme ne, pa ŋkɛ bebeteyi wəshi kezeme nyi kese mbe wəve nyi dzeyi yitea hɛ. 49Pa ŋkɛ tsenete ha kwele kwele kala ndaleghe nya kwa hələ. Pa mbeli sərəakɛ ɓela hɛ kwa ɗema mbeli kapesle yite. 50Nda tese va ta ma ne, nahe Asnat, wəzha ta Potifɛra, nde dzeghe Shala nya mbe meleme ta On keyake nda ŋwale tezhili bake ke Zhozɛf. 51Pa ŋkɛ ndeke nda slə ke nde ghate ta wəzege ta ŋkɛ kaManasɛ, ma ke: «Nahe Shala kendeke ɗa hweŋkwa kezaghə yaka nyi sahwe 'ya ba'a geva nya nehemte ya le mbelia n'yɛ.» 52Ama nde bake ne, kaƐfrayim hekate nda slə ŋkɛ, ma ke: «Nahe Shala kendeke ɗa ya ŋwale te hɛɗi nya sahwe yaka 'ya.»
53Nahe va mberefaŋe nyi nza nyi wəshi kezeme kwele kwele mbe kekiɗinji mbe Ɛzhipte. 54Pa va ta ma nyi ketemene geva mberefaŋe ghate geva kala nya gezete Zhozɛf. Pa ma pesleyi geva te pɛtɛa yɛ hɛɗi, ama wəshi kezeme ya mbe Ɛzhipte. 55Ma kwa dzete ka Ɛzhipte ma ne, ntake hɛ ka'yɛwe wəshi kezeme va Farawon. Ma ke Farawon sha hɛ: «Kwiɗi mə sha Zhozɛf, mene mə wəsə nya tegeze ŋayɛ ŋkɛ!» 56Pɛtɛ mbeli nyi te hɛɗia shɛ te ma shɛ. Pa Zhozɛf pelemte yɛ cɛ kebete wəshi kezha pamte nda ha ke ka Ɛzhipte. Kwele kwele ma mtsehete geva mbe Ɛzhipte. 57Kase mbeli te yayata hɛɗi kezha pa ha va Zhozɛf, kwa nza ŋkɛ ghyanake ma te yayata ŋkwa.
Currently Selected:
:
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.