Ləwke 6
6
Yɛsə ba'a veci kezhɛne mpi
(MAT 12.1-8; MRK 2.23-28)
1Ma te veci kezhɛne mpi ne, ntəŋə Yɛsə jive mbe yɛ wəvea ha. Pa mbeli nyi ketəkwə təkwə ɓeɓeleve yɛ ghəa ha kezha wembele hɛ le dzeve kazeme. 2Ma ke kweci ka Fariziyɛn sha hɛ: «Wa raberə mene wəsə nya fɛa ɓəmə wəsə mahalegəa ɓəmə kemene yɛ te veci kezhɛne mpi wa?» 3Ma ke Yɛsə sha hɛ: «Kegha yɛ kajaŋgate wəsə nya menete David vəa ŋkwa nya hɛ shewə va ma le mbelia ŋkɛ wəka? 4Pa ŋkɛ dzembe ghɛa Shala, laŋe ŋkɛ sha ɗafa nya ndeke nda mbeli Shala, pa zehwe, pa ŋkɛ ndeke nda ke mbelia ŋkɛ. Ndagwara kendeke nda hweŋkwa wəsə mahalegəa ɓəmə ke kwete wəndə kazeme ɗafa shɛ we, deke ka dzeghe Shala.» 5Ma ke Yɛsə sha hɛ zhɛkwa: «Wəzege ta za ya kande sleke veci kezhɛne mpi.»
Wəndə nya kemte mtea dzeve
(MAT 12.9-14; MRK 3.1-6)
6Ma te kwete veci kezhɛne mpi ɓiyitsa ne, pa Yɛsə dzembe cɛ kesəkwə ghə, ntake ŋkɛ kateke nda wəshi ke mbeli. Tagha kwete wəndə nya kemte mte dzeve kwa zeme. 7Kavereghe Yɛsə ka rafe wəsə mahalegə ba'a ka Fariziyɛn kezha newe kenza ŋkɛ katembe ŋkwa ŋkɛ te veci kezhɛne mpi, kwa nza ŋkɛ kaɗe hɛ kave nda fete. 8Ama nahe Yɛsə keɗepete zəzə ta nci. Ma ke sha wəndə nya kemte mtea dzevea shɛ: «Sate, slete ŋa kwa kema ta mbeli pɛtɛ.» Pa wəndəa shɛ sate ba'a sletenyɛ te ŋkwa shɛ. 9Ma ke Yɛsə sha hɛ: «'Ya ka'yɛwe va gheyɛ kenza nahe wəsə mahalegəa ɓəmə kendeke nda hweŋkwa ke wəndə kamene nda ganyɛ keɗema wəsə kwa ndiremi, kambele wəndə keɗema kaza ŋkɛ te veci kezhɛne mpi.» 10Newe ke Yɛsə sha hɛ, ma ke sha wəndəa shɛ: «Nteɗete dzeve ta ŋa.» Tsagha menete wəndəa shɛ, pa dzeve ta ŋkɛ zhɛrenyɛ megela. 11Kwele kwele hwepete wənə mbelia shɛhɛ. Ntake hɛ kaŋwashɛ ŋwashɛ kwelɛ ghəa nci te wəsə nya temene nda hɛ ke Yɛsə.
Yɛsə katseha mbeli nyi ketəkwə təkwə meŋe bakeghəmbe
(MAT 10.1-4; MRK 3.13-19)
12Ma vəa ŋkwa shɛ, pa Yɛsə dzeme pelɛ ghweme kezha səkwə ghə, hwencɛke ncɛke ŋkɛ le ntsə kezha səkwə Shala. 13Ma kwa kiɗi ŋkwa ne, pa hekakɛ mbeli nyi ketəkwə təkwə ba'a tsehave mbeli meŋe bakeghəmbe hwa hɛ. Pa ŋkɛ ndeke nda slə ke hɛ kaka ghwene ta ŋkɛ, 14Simon nya hekate nda slə ŋkɛ kaPiyɛre ba'a Andrɛ, wəza meghekɛ, Zhake ba'a Zhaŋe, Filipe ba'a Bartɛlemi, 15Matiye ba'a Tomas, Zhake wəzege ta Alfɛ ba'a Simon nya heka mbeli kande mpa yitea hɛɗia ŋkɛ, 16Zhəwdas, wəzege ta Zhake ba'a Zhəwdas Iskariyote, nya ketepamte Yɛsə.
Yɛsə kateke nda wəsə ke mbeli ba'a kambe ka zereghwe
(MAT 4.23-25)
17Ma kwa sawa Yɛsə le hɛ pelɛ ghweme ne, pa ghereŋe te ŋwela. Tagha mbeli nyi ketəkwə təkwə kwele kwele ba'a kweci mbeli tipə tipə nyi kese mbe pɛtɛa Zhəwdɛ, Zhɛrəzalɛm ba'a meleme nyi mɛa ndərə, yɛ Tir le Sidon. 18Ghenci se shɛ kezha fa ghena ta ŋkɛ ba'a kezha mbe ŋkɛ hɛ va zereghwe ta nci. Mbeli nyi shewə va 'yi'yɛghwə perə ne, nahe hɛ kembele. 19Pɛtɛa mbeli keɗe kakwaɗakɛ ŋkɛ, va nya nza kwete berete kashave mbe geva ta ŋkɛ kambe hɛ pɛtɛ.
Zeɗe nza ba'a ndiremi
(MAT 5.1-12)
20Pa Yɛsə newakɛ mbeli nyi ketəkwə təkwə, ma ke:
Zlama ya va gheyɛ ka titikwəa kɛfi,
kwa nza ŋkɛ kaŋa ŋayɛ nza Meghea Shala.
21Zlama ya va gheyɛ nyi shewə va ma tsetsenya,
katekemave wəsə kezeme yɛ kwele kwele.
Zlama ya va gheyɛ nyi kenehwene tsetsenya,
va nya nza ŋkɛ kateŋ'wəshi yɛ.
22Zlama ya va gheyɛ kenza mbeli kazlɛ va gheyɛ, kaɗema ntsə ta ŋayɛ, kaŋele ŋayɛ ba'a kaŋwashɛ ŋwashɛ ŋayɛ, tewəmbəreke Wəzege ta za. 23Zlama mə kese ghena shɛ kadzete gheyɛ, mpereke mə va zlama, kwa nza ŋkɛ neghe yaneghe ŋayɛ zhɛme nya wəba pelɛ ghweme. Tsagha menete nda ka shihɛ nci ke ka mɛ ŋkwa.
24Ama ndiremi ya te gheyɛ ka galɛpi,
kwa nza ŋkɛ nahe yɛ kekemave zeɗe nza ta ŋayɛ teke.
25Ndiremi ya te gheyɛ mbeli nyi behe behe tsetsenya,
kwa nza ŋkɛ katezhɛ ŋayɛ ma.
Ndiremi ya te gheyɛ nyi keŋ'wəshi tsetsenya,
kwa nza ŋkɛ teheɗe tenza kema te gheyɛ ba'a katenehwene yɛ.
26Ndiremi ya te gheyɛ kenza mbeli kageze ghena ganji te gheyɛ,
kwa nza ŋkɛ tsagha menete ka shihɛ nci le ka mɛ ŋkwa tseŋwə.
Ɗe ka jaga
(MAT 5.38-48; 7.12a)
27Ma 'ya sha gheyɛ, gheyɛ mbeli nyi kefa ghena ta ɗa: «Ɗe mə ka jaga ta ŋayɛ, mene nda mə ganyɛ ke mbeli nyi kezlɛ va gheyɛ. 28Wəpikɛ mə mbeli nyi kebezla ŋayɛ, səkwə mə ghə kezha mbeli nyi kegeze ghena kwa ndiremi te gheyɛ. 29Ma kempave ŋa wəndə kwa kwete sleme ne, zhɛrave nda kwete perə. Ma kekelehwe karalamea ŋa wəndə ne, pelakɛ ŋkɛ kakele tɛagwarea ŋa perə. 30Ma ke'yɛwe wəsə wəndə va gha ne, ndeke nda. Ma kekelehwe wəsəa ŋa wəndə, 'yɛwema na ve. 31Kala nya ɗe yɛ kamene ŋayɛ mbeli ne, menete nda mə ke hɛ tsagha.
32Ma kenza nde deke mbeli nyi keɗe ŋayɛ yaɗe yɛ ne, kashɛ mbeli tsa ŋayɛ hana na? Tsagha mene ka jaɗafa, mbeli nyi keɗe hɛ yaɗe hɛ. 33Ma kemenete nda ganyɛ yɛ ke mbeli nyi kemene ŋayɛ ganyɛ ne, kashɛ mbeli tsa ŋayɛ hana na? Tsagha mene ka jaɗafa. 34Ma kenza ke wəndə nya kenza kaŋkikɛ ŋayɛ nzəɓə nda wəsə yɛ ne, kashɛ mbeli tsa ŋayɛ hana na? Pa le ka jaɗafa kanzəɓə nda wəsə ke ka jaɗafa, va nya nza hɛ kaŋkikɛ nda ke hɛ. 35Ama gheyɛ ne, ɗe mə ka jaga ta ŋayɛ, mene nda mə ganyɛ ke hɛ ba'a nzəɓə nda mə wəsə ke hɛ, kaɗema kave ghə te ŋki ta ŋkɛ. Katenza zhɛme ta ŋayɛ kwele kwele, kaŋwalea Shala tehwə ghweme tenza yɛ. Kwa nza ŋkɛ ganyɛke ŋkɛ laka ka tsa nda hana ba'a ka 'yaghwa mehele. 36Nza mə kaka zhɛ heli yitea mbeli, kala nya nza Yite ŋayɛ kande zhɛ heli yitea mbeli.
Mba yɛ keve nda fete ke kweci mbeli
(MAT 7.1-5)
37Mba yɛ keve nda fete ke kweci mbeli, yagha Shala kateve ŋayɛ fete. Mba yɛ kemeha ghwə te kweci mbeli yagha Shala kameha ghwə te gheyɛ. Kelemte mə ghena nyi bezemte ŋayɛ kweci mbeli te wənə, katekelemte ŋa ŋayɛ Shala te wənə perə. 38Ɗa nda mə wəshi ke kweci mbeli, kateɗa ŋayɛ wəshi Shala. Katebete wəshi kwele kwele mbeli kwa slibə nya wəba ta lekwesa ta ŋayɛ, ketseɓa tseɓa ba'a keshakwe shakwe, katenza hɛ viɗi viɗi kabete bete. Kwa nza ŋkɛ ne, wəsə nya se yɛ kamene nda ke kweci mbeli yatemene ŋayɛ Shala.»
39Ma ke Yɛsə gezete nda kwete ghena keyipə pa ke hɛ zhɛkwa: «Kashɛ ghwələ ncɛte nda hweŋkwa ke kwete ghwələ na? Ma kenza ŋkɛ tsagha ne, bake nci tebete hɛ kwa ki. 40Kenza wəndə nya ketəkwə təkwə kwele ma ke Nde sleke ŋkɛ we. Ama kala nde sleke ŋkɛ tenza wəndə nya ketəkwə təkwə nya ketekeve wəsə tiɗiɗi yite.
41Yitea wa newe kwa shekwəli nya mbe ntsə ta wəza meyɛ ŋa na, sərə təkwə nya mbe ntsə va gha wa? 42Tsema shɛ na geze sha wəza meyɛ ŋa: Wəza meyɛ ɗa, kaba kakelemte ŋa shekwəli 'ya mbe ntsə ta ŋa, a pa, mba təkwə mbe ŋa ŋa wa? Nde mbəɗəkwə, kelemte təkwə nya mbe ntsə ta ŋa. Tagha gɛ, katenewe ŋkwa ghwɛaɗɛaɗɛa kezha kele shekwəli nya mbe ntsə ta wəza meyɛ ŋa.
Wəfe ba'a yɛ ya ta ŋkɛ
(MAT 7.16-20; 12.33-35)
43Kaya wəfe ganyɛ ndiremike we, kaya wəfe nya ndiremi ganyɛke we. 44Te yɛ ya ta ŋkɛ ɗepe yayata wəfe mbeli. Kandave yɛ dasekwa mbeli te tigə na? Kandave mekweɗa mbeli te hwele na? 45Ma wəndə nya ganyɛ ne, wəshi ganji yakele ŋkɛ same kwa wənəa ŋkɛ nya kala tame. Ma nde ndiremia mehele ne, wəsə kwa ndiremi yakele ŋkɛ same kwa wənəa ŋkɛ. Kwa nza ŋkɛ wəshi nyi nza wənə viɗi va hɛ yageze mɛ.
Ghena keyipə pa te ghɛ bake
(MAT 7.24-27)
46Wa raberə nda heka ɗa yɛ: Nde sleke ŋkwa, Nde sleke ŋkwa, pe yɛ, kaɗema yɛ mene wəshi nyi geze ŋayɛ 'ya wa? 47Ma yayata wəndə nya kese sha 'ya, nya kefa ghena nyi geze 'ya ba'a nya kemene slene le hɛ ne, 'ya katencɛ ŋayɛ le wa nza ŋkɛ yipə yipə: 48yipə yipə ŋkɛ le wəndə nya keŋa ghɛ. Pa ŋkɛ late ki lɛame kezha shihəa ŋkɛ hwa'a te keleɓa. Mpəɗə kesenyɛ ghwa, mbeɓe ke yɛmə sha cɛa shɛ, shaŋe ŋkɛ va ŋzla va nya nza ŋkɛ tiɗiɗi ŋate mbeli. 49Ama wəndə nya kefate ghena ta ɗa nda ɗema ŋkɛ kese kamene slene le ne, yipə yipə ŋkɛ le wəndə nya keŋate ghɛ te ghəa hɛɗi, kaɗema ŋkɛ kese kala shihə. Mpəɗə kesenyɛ ghwa kambeɓe ghɛa shɛ, ghwəpə ghɛa shɛ ŋzlanyɛ, rɛɗɛ ŋkɛ.»
Currently Selected:
Ləwke 6: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.
Ləwke 6
6
Yɛsə ba'a veci kezhɛne mpi
(MAT 12.1-8; MRK 2.23-28)
1Ma te veci kezhɛne mpi ne, ntəŋə Yɛsə jive mbe yɛ wəvea ha. Pa mbeli nyi ketəkwə təkwə ɓeɓeleve yɛ ghəa ha kezha wembele hɛ le dzeve kazeme. 2Ma ke kweci ka Fariziyɛn sha hɛ: «Wa raberə mene wəsə nya fɛa ɓəmə wəsə mahalegəa ɓəmə kemene yɛ te veci kezhɛne mpi wa?» 3Ma ke Yɛsə sha hɛ: «Kegha yɛ kajaŋgate wəsə nya menete David vəa ŋkwa nya hɛ shewə va ma le mbelia ŋkɛ wəka? 4Pa ŋkɛ dzembe ghɛa Shala, laŋe ŋkɛ sha ɗafa nya ndeke nda mbeli Shala, pa zehwe, pa ŋkɛ ndeke nda ke mbelia ŋkɛ. Ndagwara kendeke nda hweŋkwa wəsə mahalegəa ɓəmə ke kwete wəndə kazeme ɗafa shɛ we, deke ka dzeghe Shala.» 5Ma ke Yɛsə sha hɛ zhɛkwa: «Wəzege ta za ya kande sleke veci kezhɛne mpi.»
Wəndə nya kemte mtea dzeve
(MAT 12.9-14; MRK 3.1-6)
6Ma te kwete veci kezhɛne mpi ɓiyitsa ne, pa Yɛsə dzembe cɛ kesəkwə ghə, ntake ŋkɛ kateke nda wəshi ke mbeli. Tagha kwete wəndə nya kemte mte dzeve kwa zeme. 7Kavereghe Yɛsə ka rafe wəsə mahalegə ba'a ka Fariziyɛn kezha newe kenza ŋkɛ katembe ŋkwa ŋkɛ te veci kezhɛne mpi, kwa nza ŋkɛ kaɗe hɛ kave nda fete. 8Ama nahe Yɛsə keɗepete zəzə ta nci. Ma ke sha wəndə nya kemte mtea dzevea shɛ: «Sate, slete ŋa kwa kema ta mbeli pɛtɛ.» Pa wəndəa shɛ sate ba'a sletenyɛ te ŋkwa shɛ. 9Ma ke Yɛsə sha hɛ: «'Ya ka'yɛwe va gheyɛ kenza nahe wəsə mahalegəa ɓəmə kendeke nda hweŋkwa ke wəndə kamene nda ganyɛ keɗema wəsə kwa ndiremi, kambele wəndə keɗema kaza ŋkɛ te veci kezhɛne mpi.» 10Newe ke Yɛsə sha hɛ, ma ke sha wəndəa shɛ: «Nteɗete dzeve ta ŋa.» Tsagha menete wəndəa shɛ, pa dzeve ta ŋkɛ zhɛrenyɛ megela. 11Kwele kwele hwepete wənə mbelia shɛhɛ. Ntake hɛ kaŋwashɛ ŋwashɛ kwelɛ ghəa nci te wəsə nya temene nda hɛ ke Yɛsə.
Yɛsə katseha mbeli nyi ketəkwə təkwə meŋe bakeghəmbe
(MAT 10.1-4; MRK 3.13-19)
12Ma vəa ŋkwa shɛ, pa Yɛsə dzeme pelɛ ghweme kezha səkwə ghə, hwencɛke ncɛke ŋkɛ le ntsə kezha səkwə Shala. 13Ma kwa kiɗi ŋkwa ne, pa hekakɛ mbeli nyi ketəkwə təkwə ba'a tsehave mbeli meŋe bakeghəmbe hwa hɛ. Pa ŋkɛ ndeke nda slə ke hɛ kaka ghwene ta ŋkɛ, 14Simon nya hekate nda slə ŋkɛ kaPiyɛre ba'a Andrɛ, wəza meghekɛ, Zhake ba'a Zhaŋe, Filipe ba'a Bartɛlemi, 15Matiye ba'a Tomas, Zhake wəzege ta Alfɛ ba'a Simon nya heka mbeli kande mpa yitea hɛɗia ŋkɛ, 16Zhəwdas, wəzege ta Zhake ba'a Zhəwdas Iskariyote, nya ketepamte Yɛsə.
Yɛsə kateke nda wəsə ke mbeli ba'a kambe ka zereghwe
(MAT 4.23-25)
17Ma kwa sawa Yɛsə le hɛ pelɛ ghweme ne, pa ghereŋe te ŋwela. Tagha mbeli nyi ketəkwə təkwə kwele kwele ba'a kweci mbeli tipə tipə nyi kese mbe pɛtɛa Zhəwdɛ, Zhɛrəzalɛm ba'a meleme nyi mɛa ndərə, yɛ Tir le Sidon. 18Ghenci se shɛ kezha fa ghena ta ŋkɛ ba'a kezha mbe ŋkɛ hɛ va zereghwe ta nci. Mbeli nyi shewə va 'yi'yɛghwə perə ne, nahe hɛ kembele. 19Pɛtɛa mbeli keɗe kakwaɗakɛ ŋkɛ, va nya nza kwete berete kashave mbe geva ta ŋkɛ kambe hɛ pɛtɛ.
Zeɗe nza ba'a ndiremi
(MAT 5.1-12)
20Pa Yɛsə newakɛ mbeli nyi ketəkwə təkwə, ma ke:
Zlama ya va gheyɛ ka titikwəa kɛfi,
kwa nza ŋkɛ kaŋa ŋayɛ nza Meghea Shala.
21Zlama ya va gheyɛ nyi shewə va ma tsetsenya,
katekemave wəsə kezeme yɛ kwele kwele.
Zlama ya va gheyɛ nyi kenehwene tsetsenya,
va nya nza ŋkɛ kateŋ'wəshi yɛ.
22Zlama ya va gheyɛ kenza mbeli kazlɛ va gheyɛ, kaɗema ntsə ta ŋayɛ, kaŋele ŋayɛ ba'a kaŋwashɛ ŋwashɛ ŋayɛ, tewəmbəreke Wəzege ta za. 23Zlama mə kese ghena shɛ kadzete gheyɛ, mpereke mə va zlama, kwa nza ŋkɛ neghe yaneghe ŋayɛ zhɛme nya wəba pelɛ ghweme. Tsagha menete nda ka shihɛ nci ke ka mɛ ŋkwa.
24Ama ndiremi ya te gheyɛ ka galɛpi,
kwa nza ŋkɛ nahe yɛ kekemave zeɗe nza ta ŋayɛ teke.
25Ndiremi ya te gheyɛ mbeli nyi behe behe tsetsenya,
kwa nza ŋkɛ katezhɛ ŋayɛ ma.
Ndiremi ya te gheyɛ nyi keŋ'wəshi tsetsenya,
kwa nza ŋkɛ teheɗe tenza kema te gheyɛ ba'a katenehwene yɛ.
26Ndiremi ya te gheyɛ kenza mbeli kageze ghena ganji te gheyɛ,
kwa nza ŋkɛ tsagha menete ka shihɛ nci le ka mɛ ŋkwa tseŋwə.
Ɗe ka jaga
(MAT 5.38-48; 7.12a)
27Ma 'ya sha gheyɛ, gheyɛ mbeli nyi kefa ghena ta ɗa: «Ɗe mə ka jaga ta ŋayɛ, mene nda mə ganyɛ ke mbeli nyi kezlɛ va gheyɛ. 28Wəpikɛ mə mbeli nyi kebezla ŋayɛ, səkwə mə ghə kezha mbeli nyi kegeze ghena kwa ndiremi te gheyɛ. 29Ma kempave ŋa wəndə kwa kwete sleme ne, zhɛrave nda kwete perə. Ma kekelehwe karalamea ŋa wəndə ne, pelakɛ ŋkɛ kakele tɛagwarea ŋa perə. 30Ma ke'yɛwe wəsə wəndə va gha ne, ndeke nda. Ma kekelehwe wəsəa ŋa wəndə, 'yɛwema na ve. 31Kala nya ɗe yɛ kamene ŋayɛ mbeli ne, menete nda mə ke hɛ tsagha.
32Ma kenza nde deke mbeli nyi keɗe ŋayɛ yaɗe yɛ ne, kashɛ mbeli tsa ŋayɛ hana na? Tsagha mene ka jaɗafa, mbeli nyi keɗe hɛ yaɗe hɛ. 33Ma kemenete nda ganyɛ yɛ ke mbeli nyi kemene ŋayɛ ganyɛ ne, kashɛ mbeli tsa ŋayɛ hana na? Tsagha mene ka jaɗafa. 34Ma kenza ke wəndə nya kenza kaŋkikɛ ŋayɛ nzəɓə nda wəsə yɛ ne, kashɛ mbeli tsa ŋayɛ hana na? Pa le ka jaɗafa kanzəɓə nda wəsə ke ka jaɗafa, va nya nza hɛ kaŋkikɛ nda ke hɛ. 35Ama gheyɛ ne, ɗe mə ka jaga ta ŋayɛ, mene nda mə ganyɛ ke hɛ ba'a nzəɓə nda mə wəsə ke hɛ, kaɗema kave ghə te ŋki ta ŋkɛ. Katenza zhɛme ta ŋayɛ kwele kwele, kaŋwalea Shala tehwə ghweme tenza yɛ. Kwa nza ŋkɛ ganyɛke ŋkɛ laka ka tsa nda hana ba'a ka 'yaghwa mehele. 36Nza mə kaka zhɛ heli yitea mbeli, kala nya nza Yite ŋayɛ kande zhɛ heli yitea mbeli.
Mba yɛ keve nda fete ke kweci mbeli
(MAT 7.1-5)
37Mba yɛ keve nda fete ke kweci mbeli, yagha Shala kateve ŋayɛ fete. Mba yɛ kemeha ghwə te kweci mbeli yagha Shala kameha ghwə te gheyɛ. Kelemte mə ghena nyi bezemte ŋayɛ kweci mbeli te wənə, katekelemte ŋa ŋayɛ Shala te wənə perə. 38Ɗa nda mə wəshi ke kweci mbeli, kateɗa ŋayɛ wəshi Shala. Katebete wəshi kwele kwele mbeli kwa slibə nya wəba ta lekwesa ta ŋayɛ, ketseɓa tseɓa ba'a keshakwe shakwe, katenza hɛ viɗi viɗi kabete bete. Kwa nza ŋkɛ ne, wəsə nya se yɛ kamene nda ke kweci mbeli yatemene ŋayɛ Shala.»
39Ma ke Yɛsə gezete nda kwete ghena keyipə pa ke hɛ zhɛkwa: «Kashɛ ghwələ ncɛte nda hweŋkwa ke kwete ghwələ na? Ma kenza ŋkɛ tsagha ne, bake nci tebete hɛ kwa ki. 40Kenza wəndə nya ketəkwə təkwə kwele ma ke Nde sleke ŋkɛ we. Ama kala nde sleke ŋkɛ tenza wəndə nya ketəkwə təkwə nya ketekeve wəsə tiɗiɗi yite.
41Yitea wa newe kwa shekwəli nya mbe ntsə ta wəza meyɛ ŋa na, sərə təkwə nya mbe ntsə va gha wa? 42Tsema shɛ na geze sha wəza meyɛ ŋa: Wəza meyɛ ɗa, kaba kakelemte ŋa shekwəli 'ya mbe ntsə ta ŋa, a pa, mba təkwə mbe ŋa ŋa wa? Nde mbəɗəkwə, kelemte təkwə nya mbe ntsə ta ŋa. Tagha gɛ, katenewe ŋkwa ghwɛaɗɛaɗɛa kezha kele shekwəli nya mbe ntsə ta wəza meyɛ ŋa.
Wəfe ba'a yɛ ya ta ŋkɛ
(MAT 7.16-20; 12.33-35)
43Kaya wəfe ganyɛ ndiremike we, kaya wəfe nya ndiremi ganyɛke we. 44Te yɛ ya ta ŋkɛ ɗepe yayata wəfe mbeli. Kandave yɛ dasekwa mbeli te tigə na? Kandave mekweɗa mbeli te hwele na? 45Ma wəndə nya ganyɛ ne, wəshi ganji yakele ŋkɛ same kwa wənəa ŋkɛ nya kala tame. Ma nde ndiremia mehele ne, wəsə kwa ndiremi yakele ŋkɛ same kwa wənəa ŋkɛ. Kwa nza ŋkɛ wəshi nyi nza wənə viɗi va hɛ yageze mɛ.
Ghena keyipə pa te ghɛ bake
(MAT 7.24-27)
46Wa raberə nda heka ɗa yɛ: Nde sleke ŋkwa, Nde sleke ŋkwa, pe yɛ, kaɗema yɛ mene wəshi nyi geze ŋayɛ 'ya wa? 47Ma yayata wəndə nya kese sha 'ya, nya kefa ghena nyi geze 'ya ba'a nya kemene slene le hɛ ne, 'ya katencɛ ŋayɛ le wa nza ŋkɛ yipə yipə: 48yipə yipə ŋkɛ le wəndə nya keŋa ghɛ. Pa ŋkɛ late ki lɛame kezha shihəa ŋkɛ hwa'a te keleɓa. Mpəɗə kesenyɛ ghwa, mbeɓe ke yɛmə sha cɛa shɛ, shaŋe ŋkɛ va ŋzla va nya nza ŋkɛ tiɗiɗi ŋate mbeli. 49Ama wəndə nya kefate ghena ta ɗa nda ɗema ŋkɛ kese kamene slene le ne, yipə yipə ŋkɛ le wəndə nya keŋate ghɛ te ghəa hɛɗi, kaɗema ŋkɛ kese kala shihə. Mpəɗə kesenyɛ ghwa kambeɓe ghɛa shɛ, ghwəpə ghɛa shɛ ŋzlanyɛ, rɛɗɛ ŋkɛ.»
Currently Selected:
:
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.