Yaahaya 4

Yinsa ompiya mwaasa na muukha wa Samariiya

1Wakathi Yinsa asiiliyeevo yoori mafwarizeewu asiila yoori Yinsa ontta owaaretta anakhiyoni na owoosa zayita Yaahaya, 2eettiye ohiiyiru Yinsa aari woosaaye ila anakhiyoni awe, 3Mbwana noojuwa vitthu epile, khulaawo Yudeya khurutela Kalileya.

4Ila yaari ohithajiya ye ovira nti wa Samariiya. 5Ye khufiya sitati moote ya Samariiya yaari wiitthiwaaye Sikaari yaattamananiyeeyo nshapa la Yaakhumpa amwinkhiyeeyo mwanawe Yuusufu. 6Ottuukhule waariwo nlipu wa Yaakhumpa. Yinsa ari wooshokhera nkatthi wa safwari, khulawa khwiikhala nshini wa nlipu. Zaarettikhaniye payina ya saasiitha.

7Wakathi otthuupule khuta muukha wa Samariiya ottekha maati. Yinsa khumuuza yoori: “Kimeele maati vattitthiiru kinywe.” 8Zaarettikhaniye wakathi anakhiyoni awe eettiyeeyo ositati wuuzanya etthu yoojiwa.

9Muukha otule wa Samariiya khumuuzela Yinsa yoori: “Weeyo oyaahuuti onikivekela maati miiyo, muukha wa Samariiya?” Maana mayaahuuti na asamariiya khansiilana saana.

10Yinsa khunjipu yoori: “Weeyo eriwaka waari ojuwa tthuvo ya Nluku na paani anuuvekelaaye maati, weeyo weetta onvekela na ye eetta owinkha maati ohaayi.”

11Muukha otule khuri: “Mbwana khuna etthu yoottekhana maati maana nlipu opu wiicha. Onttela opattha vayi maati aya apo ohaayi? 12Talili weeyo onwulweene zayita papeetthu Yaakhumpa? Ye aninkha nlipu otthuupo aari onywakaavo na aana awe na mompe zawe.”

13Yinsa khujipu yoori: “Otule annywaaye maati apa onlawa eeyane nnyottha theenya, 14ila otule anttelaaye onywa maati kinttelaaye omwinkha khanlawa wiiyana nnyottha theenya. Olikha toowo, maati kinttelaaye owinkha anttela oretteya naattuuttu wa wiittikha maati a ohaayi wa mileele.”

15Muukha otule khumuuza yoori: “Mbwana, kimeele maati aya apo yoori kihirutele wiiyana theenya nnyottha, wala kihirutele vanlipu apha ottekha maati theenya.”

16Yinsa khumuuza yoori: “Olawe owawo, wankhuwele mannawo mwite.”

17Muukha otule khujipu araka: “Akina manna.”

Yinsa khuri: “Weeyo wajipu saana olupa yoori khuna manna. 18Maana waarina amanna athaanu, ila aphano otu oriina nasaapi khahiyo mannawo. Eto olupiyeeyo nasaapi khweele.”

19Muukha otule khuri: “Mbwana, kiniwoona yoori o napiyu. 20Amarehemu apapazetthu aari waaputwaka vamwaako apha, ila mweeyo mayaahuuti mwinri Yeruzaleemu ti yiiyiye puuro ya waaputwiwawo.”

21Yinsa khumuuza yoori: “Okhupali epi kiniwuuzaaye muukha, maana ontta waattamela wakathi mweeyo mwihinttelaaye omwaaputu Paapa vamwaako apha wala Yeruzaleemu. 22Mweeyo asamariiya mwinaaputu etthu mwihinjuwaaye, ila fweeyo ninaaputu etile ninjuwaaye maana nusura enta khwa mayaahuuti. 23Khwa attaapho ontta ofiya wakathi na khweele wafiya, anamwaaputu eekhweele anttela omwaaputu Paapa khwa rooho na khweele. Anamwaaputu Paapa aniweekesaaye pi atthaapo. 24Nluku rooho ti eto eniwaahithajiyaaye apale animwaaputwaaye omwaaputu khwa rooho na khweele.”

25Muukha otule khuri: “Miiyo kajuwa yoori o Al-Masiihu aniitthiwaaye Namathawaziwa onsaleela ota. Amana ata onteela onuuza zooshi.”

26Aphano Yinsa khumuuza yoori: “Miiyo ki Al-Masiihu! Othuuto onttakhulanaaye.”

Anakhiyoni a Yinsa antta oruti ositati

27Wakathi otthuupule anakhiyoni awe khuruti khwiiya ooshanka mwaasa wa onsikana apiyaka mwaasa na muukha. Ila khuhiivo hatha mmote aamuzeliyeeyo yoori: “Oneekesa ni?” Ama “Ottakhulanaka ye mwaasa aya niini?”

28Aphano muukha otule khulikha yuuku yawe khurutela ositati khuwooza atthu yoori: 29“Mwite mwimoone mwinyi akuuziyeeyo zooshi kinrettaazo. Talili khahiyo Al-Masiihu?” 30Aphano khulankha atthu nsitati khulawa okhule aariiwo Yinsa.

31Wakathi wa vitthu epile anakhiyoni awe aari onkhanyarela yoori: “Rabi, mwije etthu yoojiwa.”

32Ila ye khuwooza yoori: “Kinaaye etthu yoojiwa mwihinjuwaaye.”

33Aphano anakhiyoni awe khusala oozelana araka: “Talili owaapho ntthu antiseliyeeyo etthu yoojiwa?”

34Yinsa khuri: “Etthu yoojiwa yaka oretta matakhelo a otule akirumiyeeyo okhola khaazi zawe. 35Mweeyo khamwinlupaka yoori: ‘Nkatthi wa nyeezi mine ninuurula?’ Miiyo kiniwuuzani yoori: Mwifunule maasho enu na moone mmashapa! Vitthu zakhomaala entakha wuuruliwa. 36Otule anuurulaaye ompwekhera phakari yawe na onuurula mishumo za ohaayi wa mileele, khwa nanna namuurula anttelaaye ofurahi vamote na anamazala. 37Maana khweele etile elupiweeyo yoori: ‘Mmote onzala nkina khuurula.’ 38Miiyo koorumani yoori moorule epile mwihizaleeni. Akina akhola khaazi, mweeyo khuta opuhela khaazi yaya.”

Asamariiya awaatta a sitati etile aninkhupali Yinsa

39Asamariiya awaatta a sitati etile khunkhupali Yinsa mwaasa wa oshaahiti aalupiyeeyo muukha otule araka: “Ye akuuza zooshi epile kinrettaazo.” 40Attaaphale paata ya Asamariiya ofiya aphale aariivo Yinsa, khunvekela yoori eeye vamote na yo. Yinsa khwiiya vamote na yo siikhu piiri. 41Mwaasa wa mattakhuzi awe atthu awaatta khukhupali.

42Na khumuuza muukha otule yoori: “Aphano nakhupali, khahiyo mwaasa wa mattakhuzi apa olupiyeeyo, maana fweeyo nansiila na najuwa yoori khweele otu Namuusuru wa olumwenku.”

Yinsa oninvonisa mwaana wa waziri wa mfwalume

43Ziviriyeevo siikhu piiri, khulaawo okhule waya khusala eetta Kalileya. 44Maana Yinsa Mweenyeweene alupa yoori napiyu khanshitahiwa saana mmuti mwawe. 45Afiiyeevo Kalileya, a kalileya khumpwekherela saana yo ooniye zooshi aarettiyeezo Yeruzaleemu, va njampo la Paashikowa, maana yo aari ottuukho.

46Khurutela theenya othotola Kanaani ya Kalileya, ottuukho athatushiyeewo maati khwiiya viinyu. Aariwo waziri mmote aariina mwanawe aari olwaaziwaaye Kafwaranaawu. 47Wakathi asiiliyeevo elupiwaka yoori Yinsa ori Yudeya onlankha Kalileya, khusala amweekesa nonsikana khunvekela yoori anvonise mwanawe, aari osaleelaaye ofwa.

48Yinsa khuri: “Mweeyo mwinkhupali paasi amana moona alama za minjuza miwulu miwulu.”

49Waziri otule khuri: “Mbwana, waakuve okilotte mwanaka ahinafwe.”

50Yinsa khujipu yoori: “Olawe, mwanawo ontta wiiya haayi.” Mwinyi otule khukhupalela mattakhuzi apale a Yinsa khulawa owawe. 51Nalelo mwinyi otule ari ntarikhi, a karumeya awe khusala anthepeeza oteela omuuza yoori mwanawo ori haayi. 52Paata awoozeliyeevo yoori wakathi ni mwaana otule apatthiyeevo ashikhaali, yo khujipu yoori: “Hooma yanlikha taana payina ya saasapa ya makaaripi.”

53Aphano papaawe mwaana khufwahamu yoori wakathi ooziweeyo ti Yinsa waari otthuupule yoori: “Mwanawo ontta wiiya haayi.” Attaaphale khunkhupali Yinsa ye na atthu ooshi a vaje vawe. 54Eto yaari alama ya phiiri ya minjuza Yinsa aarettiyeeyo, paata ya olankha Yudeya eettaka Kalileya.

Currently Selected:

Yaahaya 4: eko

Highlight

Copy