Yaahaya 6

Yinsa onjisa khuntti ya atthu

1Paata ya vitthu epile, Yinsa khulokha pahari ya Kalileya theenya eniitthiwaaye Tiperiyaati. 2Khuntti khuluyeene ya atthu khusala enlotta, maana eettiye woona alama za minjuza aarettiyeezo za owaavonisa alwele. 3Ye khuwela vamwaako khwiikhala attaapho na anakhiyoni awe. 4Esaleelaka ofiya siikhu ya orettiwa njampo la Paashikowa la mayaahuuti.

5Aphano alansiyeevo maasho khoona khuntti khuluyeene ya atthu yeettaka onteela, Yinsa khumuuzela Filiipe yoori: “Noozanye vayi phaawu niwenkhe atthu apa aje?” 6Aamuzeliye yoori amweeze, maana ye aajuwiye etthu aari weettelaaye oretta.

7Filiipe khujipu araka: “Nzurukhu miiya piiri wa feeta khunfiyela wuuzanya phaawu yoori wakhula ntthu apatthe pattaasu.”

8Aphano nakhiyoni mmote aniitthiwaaye Antere, ttwiiye Simawu Pheeturu, khuri: 9“Shaapu otu ariiye apha onaaye phaawu thaanu na swi piiri, ila epo zaya niini khwa atthu awaatta apa?”

10Yinsa khuri: “Mwiwooze atthu apo eekhale.” Puuro yaya etile zaarivo nyaani zawaatta. Atthu apale khwiikhala, alume aari etthu ya alufu thaanu. 11Aphano Yinsa khuthuula phaawu khunshukhurwela Nluku, khwaawanya na khuretta etthiipo khwa swi, wakhula ntthu khwa khiima aari otakhaaye. 12Paata ya orupala, Yinsa khuwooza anakhiyoni awe yoori: “Mwilokotthele zooshi epo zisaliyeezo yoori ehaashikhevo hatha moote.” 13Khulokotthela tathela za phaawu epile thaanu, khwiitaala khelenke khumi na piiri, aalikhiyeeyo apale aari orafunaaye. 14Ooniyeevo alama etile ya minjuza Yinsa aarettiyeeyo khulupaza yoori: “Woohiivo hatha shaakha otu ti Napiyu aari weettelaaye ota voolumwenku.” 15Yinsa noojuwa yoori aari otakha onthuula na kuvu zaya anrette wiiya mfwalume aya, khulaavo aphale vaya khulawa theenya omwaako otthwe.

Yinsa oneettetta vatulu wa maati

16Njuwa looveva anakhiyoni a Yinsa khwiishukhela ontthatta. 17Khupakhira nkalawa, khulokhela kaapu ya Kafwaranaawu. Vathi waariipiyevo, ila Yinsa khaari vamote na yo. 18Khusala evuma pheevo zawaatta na mpahari khupuwamo mawipi. 19Anakhiyoni eettaka ofuttha alawaka etthiipile eettettiye kiyasi ya phiima alufu thaanu ama sitha, khusala amoona Yinsa eettaka ota eettettaka vatulu wa maati aattamelaka kalawa; yo khwiiya awoova. 20Ila Yinsa khuwooza yoori: “Ti miiyo! Mwihoove!” 21Aphano anakhiyoni apale khumpwekherela na furaha nkalawa mphule nasaapiru khufiya ohali aari weettaawo.

Yinsa phaawu ya ohaayi

22Mmeesho mwaya, atthu apale asaliyeeyo kaapu ya kiina ya ntthatta, khujuwa yoori kalawa moote etile yaari aphale, Yinsa kapakhiriyemo, anakhiyoni awe aalawiye ottho. 23Elottelanaka, kalawa kiina za sitati ya Tiperiyaati khufiya kharipu ya aphale atthu aari orafunaavo phaawu wakathi Mbwana Yinsa ashukhurweliyeevo. 24Wakathi atthu apale ajuwiyeevo yoori Yinsa khaarivo aphale na anakhiyoni awe, khweetta nkalawa mwaya khusala alawa Kafwaranaawu olawa omweekesa.

25Nonsikana kaapu ya ntthatta, khumuuzela yoori: “Rabi, wafiya lini okhuno?” 26Yinsa khuwaajipu yoori: “Miiyo kiniwuuzani khweele yoori, mweeyo mwinikeekesa, khahiyo mwaasa wa woona alama za minjuza, ila mwaasa wa orafuna phaawu khwiiya woorupala. 27Mwihikhole khaazi khwa etthu yoojiwa enharipweyaaye, ila khwa etthu yoojiwa eninkhaaye ohaayi wa mileele, ethiito Mwaana wa Pinaatamu aniwinkhaanini. Maana, Nluku Paapa, anttheliyeeyo alama yawe ya onhakikhi.”

28Aphano khumuuzela Yinsa yoori: “Ninhithajiya oretta niini yoori nikhole khaazi Nluku antakhaaye?”

29Yinsa khuwaajipu yoori: “Khaazi Nluku antakhaaye tiiti, onkhupali otule anrumiyeeyo.”

30Aphano khumuuzela yoori: “Alama ni ya minjuza onttelaaye onithoonyeza yoori noone na nuukhupali weeyo? Wala onttela oretta ni? 31Amarehemu apapazetthu aja mana n'yaara, nkhama etthiipo enlupaazo Zawaatikhiwa Ttakatthiifu eraka: ‘Ye awenkha etthu yoojiwa ya pinkuuni.’ ”

32Yinsa khuwooza yoori: “Miiyo kiniwuuzani khweele yoori, khahiyo Munsa awinkhiyeenini phaawu ya pinkuuni, ila Paapa ti aninkhaaye phaawu ya khweele ya pinkuuni. 33Maana phaawu ya Nluku ti otule eeshukhiyeeyo pinkuuni khwinkha ohaayi olumwenku.”

34Yo khuri: “Mbwana, oninkhe phaawu ethiito khwa mileele!”

35Aphano Yinsa khulupa yoori: “Miiyo ki phaawu ya ohaayi. Otule anikiteelaaye miiyo khinteela onkhola theenya jala na otule anikikhupalaaye miiyo khalinteela onkhola theenya nnyottha. 36Ila nkhama etthiipo miiyo kiwuuziyeenini yoori, mweeyo mwakoona, ila nalelo khamwinkikhupali. 37Wakhula otule Paapa anikinkhaaye, onikiteela miiyo, na otule anikiteelaaye miiyo akinteela onthanya. 38Maana keeshukha pinkuuni, khahiyo yoori kirette matakhelo aka, ila kirette matakhelo awe otule akirumiyeeyo. 39Matakhelo a otule akirumiyeeyo pi apa: ahikaashikhe hatha mmote wa otule akinkhiyeeyo, ila miiyo kinsisimule siikhu ya mwiisho. 40Maana matakhelo a Paapa pi yoori wooshi otule animoonaaye Mwaana na khunkhupali eeyane ohaayi wa mileele na miiyo kintta onsisimula siikhu ya mwiisho.”

Waapa wa mayaahuuti

41Mayaahuuti khusala aapa mwaasa wa Yinsa owooza yoori: “Miiyo ki phaawu yiishukhiyeeyo pinkuuni.” 42Khurutela olupa yoori: “Khahi Yinsa otu, mwaana wa Yuusufu? Onoona yoori fweeyo khanninjuwa papaawe na mamaawe? Onlupa toovi yoori: ‘Keeshukha pinkuuni’?”

43Yinsa khuwaajipu yoori: “Mwilikhe okaapa. 44Khaavo ankiteelaaye miiyo woohiiyi otiisiwa ti Paapa, otule akiperekhiyeeyo na miiyo kininsisimula siikhu ya mwiisho. 45Yaatikhiwa nkithaapu za manapiyu yoori: ‘Ooshi anttela osomisiwa ti Nluku.’ Nakataalikha, wooshi otule asiiliyeeyo phantte ya Paapa na khujuwa, onikiteela miiyo. 46Khina anamoone Paapa, ila otule alankhiyeeyo wa Nluku ti amooniyeeyo Paapa. 47Miiyo kiniwuuzani khweele yoori, otule anikikhupalaaye onaaye ohaayi wa mileele. 48Miiyo ki phaawu ya ohaayi. 49Apapazenu aja mana n'yaara na khufwa. 50Eti phaawu yiishukhiyeeyo pinkuuni, yoori wakhula otule anjaaye ahifwe. 51Miiyo ki phaawu ya ohaayi yiishukhiyeeyo pinkuuni. Ntthu amana aja phaawu yaya eto, ontta wiiyana ohaayi wa mileele na phaawu kininkhaaye olumwenku yoori wiiyane ohaayi, mwiili aka.”

52Aphano mayaahuuti khwaaza onyakulisana atthaaporu araka: “Mwinyi otu onttela oninkha toovi mwiili awe yoori nirafune?” 53Yinsa khuwooza yoori: “Miiyo kiniwuuzani khweele yoori, amana mweeyo mwihirafuni mwiili wa Mwaana wa Pinaatamu na khuhinywi taamu yawe, khamwina ohaayi mwaamweenyewe. 54Wakhula otule anrafunaaye mwiili aka na khunywa taamu yaka onaaye ohaayi wa mileele na miiyo kinteela onsisimula siikhu ya mwiisho. 55Maana mwiili aka etthu yoojiwa ya khweele na taamu yaka etthu yoonywiwa ya khweele. 56Otule anrafunaaye mwiili aka na khunywa taamu yaka oto oniikhala khwa miiyo na miiyo khwa ye. 57Nkhama Paapa akiperekhiyeeyo eeyiyeeyo haayi, na miiyo kiniikhala mwaasa wa ye. Khwa etthiipo otule anrafunaaye mwiili aka oniiyana ohaayi mwaasa wa miiyo. 58Eti phaawu elankhiyeeyo pinkuuni. Apapazenu aja mana na khufwa, ila otule anrafunaaye phaawu eti oniiya haayi mileele.” 59Ye aalupiye mattakhuzi apa wakathi aari osomisaaye nsinakooka ya Kafwaranaawu.

Anakhiyoni awaatta anintthira Yinsa

60Paata ya osiila mattakhuzi apale, anakhiyoni enkeene khulupa yoori: “Olipa mattakhuzi aya apa. Paani anwahaaye okhitiri?”

61Ila Yinsa khujuwa nkatthi mwawe yoori anakhiyoni awe eetta onyakulisana khuwoozela yoori: “Mattakhuzi aka antta wuutapanyani? 62Khi enttela wiiya toovi amana mwimoona Mwaana wa Pinaatamu arutelaka okhu alankhiyeewo? 63Rooho ya Nluku eninkha ohaayi, ila mwiili khuna fwayita. Mattakhuzi apa kiwuuziyeenini pi a rooho na ohaayi. 64Ila khwa etthiipo awaapho vakatthi venu akina ahinkhupalelaaye.” Ila Yinsa aari ojuwa omwanzweene paavi apo aya ahaari okhupalaaye na paani aari weettelaaye onzinkula. 65Ye khuri: “Tiito kiniwuuzaanini yoori, khina anwahaaye okiteela miiyo kiheetteeni winkhiwa ti Paapa.”

66Wakathi otthuupule anakhiyoni enkeene khuntthira na khulikha onlotta.

67Yinsa khuwoozela apale khumi na awiri yoori: “Na mweeyo mwintakha okitthira mwilawe?”

68Simawu Pheeturu khujipu yoori: “Ninttela onlotta paani? Weeyo onaaye mattakhuzi a ohaayi wa mileele. 69Fweeyo ninkhupalela na ninjuwa yoori o Ttakatthiifu wa Nluku.”

70Aphano Yinsa khujipu yoori: “Khahi miiyo kiwaathawuliyeeyo apale khumi na awiri? Ila mmote wa mweeyo sheethwani.” 71Ye aari onlupa Yuuda, mwaana wa Simawu Eshikariyoote, aari mmote wa apale khumi na awiri, ila ti aari weettelaaye onzinkula Yinsa.

Currently Selected:

Yaahaya 6: eko

Highlight

Copy