Luuka 8

Aakha aari onrumeyelaaye Yinsa

1Paata ya toole, Yinsa khusala eettetta sitati khwa sitati na nti khwa nti, alaleyaka hapari zooshapweya za ofwalume wa Nluku. Anakhiyoni awe apale khumi na awiri aari vamote na ye, 2na theenya aakha akinoko aya apale aavonisiweeyo masheethwani na marati: Mariyamu aari wiitthiwaaye Mataleena, otule ansaruwiyeeyo masheethwani sapa, 3Zhuwaana muukha wa Kuuza, nsatoro wa vaje wa Herooti, Suzaana na aakha akinoko aari ontthanttaaye Yinsa na vitthu zaya vamote na anakhiyoni awe.

Nlikaniso wa namazala

4Phantte zawaatta za miti aari otawo atthu enkeene oteela okutthanana Yinsa. Aphano ye khulupa nlikaniso mmote araka: 5“Aarivo namalima aalawiye ozala peewu zawe. Amwazaka, kinoko khukwela nshini wa tarikhi, khuluwatthiwa na khujiwa pi anyannyi. 6Peewu kinoko khukwela vahali aariivo mawe, khoottha ila khuuma mwaasa woohiivo maati. 7Peewu kinoko khukwela va miiwa, khuwula vamote na miiwa, khurapeliwa pi miiwa. 8Kiina khukwela vanshaka wooshapweya, khuwula khwiima mishumo miiya wakhula mmote.” Alupiyeevo toole, ye khukhuwelela araka: “Ariina mashiilo ti asiile!”

9Anakhiyoni awe khumuuzela maana a nlikaniso opule. 10Yinsa khuwaajipu yoori: “Mweeyo mwenkhiwa ojuwa siiri za ofwalume wa Nluku, ila akinoko kiniwuuza na nlikaniso yoori

“ ‘oonaka ahijuwe,

asiilaka ehiweeleye.’ ”

Yinsa oneeleza maana a nlikaniso wa namazala

11Maana a nlikaniso opu pi toono: Peewu eti enthoonyeza nttakhuzi la Nluku. 12Peewu zaakweliiye ntarikhi, zinlikanisaniwa atthu apale ansiilaaye nttakhuzi, ila sheethwani khulazavo varoho vaya yoori ahikhupali na ahipatthe wuusurukha. 13Peewu epi zaakweliiye va mawe, zinlikanisaniwa atthu apale ansiilaaye nttakhuzi la Nluku khupokherela na furaha. Ila mwaasa woohiina mitathaari, wakathi vattitthiiru nawootootiwa ti sheethwani anlikha waamini waya. 14Peewu epi zaakweliiye va miiwa, zinlikanisaniwa atthu apale ansiilaaye, ila mwaasa wooshukulikhela opattha tuvela na haali za meekhazi, yo waamini waya vattiitthi-vattiitthi onzima, ahifiyelelaka wiima mishumo. 15Peewu epi zaakweliiye vanshaka wooshapweya, zinlikanisaniwa atthu apale ansiilaaye nttakhuzi la Nluku khuthokorela nroho mwaya khushututela na ovilela, apo aniima mishumo zooshapweya.

Nlikaniso wa khantteya

16Khaavo ankhozaaye khantteya khufinikha na yuuku wala khupweha nlivuku. Entthiiwa vahali wawooneyavo yoori esala ewaamwasikhela apale anviraaye nnyupa. 17Maana khayiivo envithiwaaye ehinttelaaye osaruwela oje, zooshi epile za siiri enttela wiiya payana. 18Nakataalikha, mwiiyane phoole khwa nanna yoosiila. Otule ariina ontta weekezeliwa, ila otule ahina hatha na etile anuupuwelelaaye wiiyana ontta onyakanyiwa.

Mamaawe na attwiize Yinsa

19Mamaawe na attwiize Yinsa khulankha yoori amoone, ila khuhisala ewaheya omwaattama mwaasa yoori aarivo atthu awaatta. 20Khuuziwa Yinsa yoori: “Vaje apho atavo mamaawo na attwiizo antakha owoona.”

21Ye khuwaajipu araka: “Maama na attwiizaku pi apale ansiilaaye Nttakhuzi la Nluku khushututela.”

Yinsa onnyamaza pheevo

22Siikhu moote, Yinsa khuwooza anakhiyoni awe yoori: “Nlaweni kaapu kiina ya pahari.” Khupakhira nkalawa khusala alawa. 23Aphano eettaka olawa Yinsa khusala alala, khupuwa pheevo yawoopisa kalawa khusala esaleela ozama. 24Anakhiyoni apale khusala anlansa Yinsa araka: “Mwaaliimu, Mwaaliimu nasaleela ozama!”

Yinsa khulankha khunyamaza pheevo na mawipi, khupuwa nreke. 25Nawiisha khuwoozela anakhiyoni awe yoori: “Waamini weenu ori vayi?”

Yo khwiiya awoova na ooshanka khusala oozelana, araka: “Otu aya paani anrumaaye pheevo na mawipi khunshututela?”

Ovonisiwa wa nlume mmote aariina masheethwani

26Yinsa na anakhiyoni awe khulokhela Kerazeenu, kaapu ya Kalileya. 27Wakathi Yinsa apakhuwiyeevo nkalawa, khuta nlume mmote wa sitati ethiitile aariina masheethwani. Ye eekhaliye siikhu zawaatta ahiwalaka kuwo na ahiikhalaka vaje, ila nvilalo. 28Noomoona Yinsa khunyakula, khunkokhorela khukhuwa araka: “Onikitakhelani, Yinsa mwaana wa Nluku Nwulu wa Pinkuuni? Kinuuvekela yoori ohikoopopise.” 29Ye aalupiye mattakhuzi apa mwaasa yoori Yinsa aarumiye onsaruwa masheethwani apale aari onwuti swaafu zawaatta. Hatha nkhama eettiye ofukaniwa makwinjili khwinkhiwa atthu oomweekesela, eetta ottumula noothuuliwa pi masheethwani nonlawana n'yaara.

30Aphano Yinsa khumuuzela yoori: “Weeyo, nzina lawo o paani?” Ye khujipu yoori: “Miiyo nzina laka ki omathi,” mwaasa yoori ntthu otule aamweettiye masheethwani awaatta mmwiili mwawe. 31Khusala anvekela Yinsa yoori ahiikarele nkhilintti.

32Liphanko liwululene la kuluwe laari oshukisiwa vamwaako, masheethwani apale khunvekela ruhusa Yinsa yoori eette nkuluwe, ye khukhupalela. 33Wakathi aliiyeemo masheethwani apale mmwiili wa nlume otule khweetta mmwiili wa kuluwe, aphano kuluwe khusala zitthira ziishukhelaka va ntthatta khutupweela.

34Apale aari oshukisaaye kuluwe epile nawoona vitthu epile zaarettikhaniyeezo, khutthira khulawa khulupa hapari epile nsitati mphule na miti mikinoko. 35Khulawa atthu awaatta olawa woona vitthu epile zaarettikhaniyeezo. Wakathi amwaattamiyeeyo Yinsa, khumoona nlume otule ansaruwiyeeyo masheethwani eekhaliye nshini wa moolu a Yinsa awaliye kuwo zawe na atthiiyemo akhili, yo khwiiya awoova. 36Apale ooniyeeyo khuwooza atthu nanna aavonisiweezo mwinyi otule aariina masheethwani. 37Aphano atthu ooshi apale a nti opule wa Kerazeenu khunvekela Yinsa yoori aleemo mmuti mwaya mwaasa wa woova channu. Ye khuwela nkalawa khulaawo.

38Nlume otule ansaruwiyeeyo masheethwani khusala anvekela Yinsa amuuzaka yoori anlikhe alawe vamote na ye. Ila Yinsa khumuuza olawa araka: 39“Orutele owawo wawooze atthu etile Nluku ooretteliyeeyo.” Nlume otule khulankha khusala alawa owawe alaleyaka sitati yooshi etile aaretteliweeyo ti Yinsa.

Owahi wa Yinsa khwa marati na ofwa

40Wakathi Yinsa arutiyeevo, khuntti khuluyeene ya atthu ooshi aari onwejaaye khumpwekherela na furaha. 41Aphano mwinyi mmote aari wiitthiwaaye Yaayiru, namalokozela mmote wa sinakooka, khuta khunkokhorela Yinsa nshini wa moolu awe anvekelaka yoori alawe owawe, 42mwaasa yoori mwanawe aariina mmote paasi wa nyaakha khumi na miwiri aari osaleela ofwa.

Yinsa alawaka, atthu khusala aphunyana. 43Attaaphale khutavo muukha mmote aariina nyaakha khumi na miwiri ari nlwele, yaari omwiittikhaaye taamu wakhula siikhu. Khuharipu nzurukhu awe wooshi aariina khwa akulukhala, ila khuhiivo mmote aawahiyeeyo onvonisa. 44Ye khuta mpakha onyoko wa Yinsa khusapa ajapi yawe vattitthiiru, omuuta otthuupule khulikha wiittikha taamu etile.

45Yinsa khuuzela yoori: “Paani akisapiyeeyo?”

Atthu ooshi khukhana, Pheeturu khulupa yoori: “Mbwana, atthu pi awaatta pi atthaapo anuuphunyaaye na wuusukhuma!”

46Ila Yinsa khusala akhanyarela yoori: “Nna akisapiyeeyo keetta woona okisaruwiye owahi.”

47Aphano muukha otule ooniyeevo yoori khaari owahi ojivitha, khuta eettaka othukumela khunkokhorela Yinsa vakatthi wa atthu ooshi khulupa nanna ansapiyeezo na avoniyeezo nasaapiru. 48Attaaphale Yinsa khumuuza yoori: “Mwanaka, amini yawo yoovonisa! Olawe na heeri.”

49Wakathi nalelo Yinsa eettaka ottakhula, khuta karumeya wa owawe Yaayiru, namalokozela wa nsinakooka, khumuuza yoori: “Mwanawo afwa. Ohimwantipu theenya Mwanliimu.”

50Yinsa noosiila khumuuza Yaayiru yoori: “Ohoove, okhupali paasi. Mwanawo ontta wiiya nkumi.”

51Noofiya owawe Yaayiru, Yinsa khuhinlikhi hatha ntthu ovira nnyupa mphule, woohiiyi Pheeturu, Yaahaya, Tiyaaku, papaawe mwaana na mamaawe. 52Atthu ooshi asaliye vaje eettaka olila, Yinsa khuwooza yoori: “Mwihilile! Otu khafweeni, ontta olala.”

53Yo khusala antheya Yinsa mwaasa wa ojuwa yoori afwa. 54Ye khuntheteezela nkhono awe khumuuza yoori: “Mwaari, lankha!” 55Nafusi yawe khunrutela khulankha nasaapiru. Aphano Yinsa khumuuza papaawe yoori amwinkhe etthu yoojiwa. 56Papaawe na mamaawe khwiiya ooshanka, ila Yinsa khuwooza yoori mwihimuuze hatha ntthu vitthu epi zirettikhaniyeezo.

Currently Selected:

Luuka 8: eko

Highlight

Copy