Matewuzhu 24

Opwechiwa wa Nyuupa Yoosifwiwamo

1Yinsa khusaruwa Nnyupa Woosifwiwamo, khusala alawa, anakhiyoni awe khumwaattama yoori anthoonyeze ojekiwa wa Nyuupa Yoosifwiwamo. 2Yinsa khuwooza yoori: “Mweeyo mwinoona zooshi epi? Weekhweele miiyo kiniwuuzani yoori khalinsalavo apha liwe vatulu wa liwe lihinttelaaye opwechiwa.”

Alama ya mwiisho wa wakathi

3Wakathi Yinsa eekhaliyeevo va Mwaako Oluveera, anakhiyoni khulawa khwiitthaalana othetekele na khunvekela yoori: “Nkanuuze, zinttela orettikhana lini vitthu zaya epo, wala amana otaaka, alama ni enttelaaye wiiyavo na alama ni ya mwiisho wa olumwenku?”

4Yinsa khuwaajipu yoori: “Phoole, ahiiyevo anttelaaye wuuhatani. 5Maana atthu awaatta anlawa ate khwa nzina laka alupaka yoori: ‘Miiyo ki Al-Masiihu’! Na anteela owahata atthu awaatta. 6Amana mwisiila hapari za viittha ama nzuuzu la viittha, mwihoove, ila khahiyo wiisha woolumwenku. 7Khapila enttela wuumanana khapila kiina, ofwalume na ofwalume nkina, enttela opuwa esikinyaatthi na jala phantte zawaatta. 8Zooshi epo yaazo ya vitthu za olwaaza.

9“Aphano yo anteela owinkhelelani yoori mwilupatthiwe na muuliwe, mwinlawa mweeniwe ti khapila zooshi mwaasa wa nzina laka. 10Wakathi aya opo, atthu awaatta anteela wanswi amini anttela wiiya anamazinkula, na wiinana mmote na nzaaya. 11Na thamani ya manapiyu oojipanka anlawa apuwe na anteela owaattettekha atthu awaatta. 12Mwaasa waweekezeleya vitthu zootakhala, pheta ya atthu awaatta enttela ovukuwa. 13Ila otule anttelaaye ovilela mpakha mwiisho ontta wuusurukha. 14Enttela olaleyiwa hapari epi za ofwalume wa Nluku olumwenku wooshi, nkhama oshaahiti khwa khapila zooshi aphano osala ota mwiisho.

Ohoowa nwulweene

15“Mwinteela woona okufuru wa woopisa wa pala onttelaaye opuwa Puuro Ttakatthiifu, etile alupiyeeyo napiyu Daniyeele, otule ansomaaye entta omweeleya, 16aphano, apale anttelaaye wiiya Yudeya atthirele omwaako. 17Otule anttelaaye wiiya vatulu wa nyuupa ahiishukhe yoori alazemo etthu nnyupa mwawe, 18na otule anttelaaye wiiya omashapa ahirutele onti yoori athuule juupa yawe. 19Ootakhaliwa aakha apale anttelaaye osikaniwa ari awiimittha ama eettaka waamwisa. 20Mwilompe yoori otthira weenu opo ohirettikhane mwiita ama saapatu. 21Maana wakathi aya opo enlawa zapuwe miswipa miwuluzene, thanku mwanzo wa olumwenku, na khunteela opuwa nkina nkhama otthuupo. 22Eriwaka wakathi aya opo khawaavukuliwe, khina aari weettelaaye wuusurukha, ila mwaasa wa apale oothawuliwa, siikhu zaya epo enttela wiiya zoovukuliwa. 23Aphano amana ntthu awuuzani yoori: ‘Moone, Al-Masiihu otu ari apha!’ Ama: ‘Otule ariiye okhule!’ Mwihikhupali. 24Maana anlawa apuwe Al-Masiihu oojipanka na manapiyu oojipanka anttelaaye oretta alama khulukhulu na vitthu zootikinisa yoori awaahate hatha apale oothawuliwa. 25Miiyo kawuuzani khapulathi zihinarettikhane epo zaya. 26Nakataalikha, amana muuziwa yoori: ‘Ori n'yaara,’ mwihilawe, ama oriwa: ‘Ori nnyupa,’ mwihikhupali. 27Maana, nkhama etthiipo taari enlankhaaye khipula, na ojithoonyeza okhu lintupweelaawo njuwa, etthiipo onttela wiiya ota wa Mwaana wa Pinaatamu. 28Vahali aniiyaavo muufwi, akhwaazi ankusanyeya attaapho.

Ota wa mwaana wa Pinaatamu

29“Nasaapiru, paata ya miswipa za siikhu epile, njuwa linttela oripa na mweezi onttela olikha waara, matthottowa anttela okwa otulu na owahi wa pinkuuni onttela osakhinyeya. 30Aphano epuwe pinkuuni alama za Mwaana wa Pinaatamu; khapila zooshi za va tuniya enttela ojikhupanyisa na enttela omoona Mwaana wa Pinaatamu ataaka mmawiku a pinkuuni khwa owahi na siifwa yawaatta. 31Ye onttela operekha malayikha awe na ovuma nwulweene wa malope, yo anttela owaakusanya ananthawuliwa aya ooshi khwa phantte nne zinlankhaawo pheevo, phantte khwa phantte kiina ya pinku.

Ohirimiziwa monkoni wa ojeekesela

32“Mwijuwe osomisa wa mfikeera: amana virapi zaya zootthelaka mathapa onsaleela ofiya mwiita. 33Etthiipo theenya mweeyo, amana moona vitthu epo zooshi zeettaka orettikhana, mwijuwe yoori ye ori kharipu ya va milako. 34Miiyo kiniwuuzani khweele yoori, khapila eti kinvira vitthu epi zihirettikhaneeni. 35Pinku na vathi zooshi zinteela ovira, ila mattakhuzi aka khanviraru.

Siikhu na wakathi khijuweyeeni

36“Ila monkoni wa siikhu na wakathi khina anjuwaaye, wala malayikha a pinkuuni, wala Mwaana, ila Paapa paasi. 37Nkhama etthiipo zaarettikhaniyeeyo wakathi wa Nuuhi, enttela wiiya etthiipo etelo ya Mwaana wa Pinaatamu. 38Nkhama etthiipo siikhu ziviriyeezo za nnyeri, atthu aari oja na onywa, aari oralana na aari oloozana, mpakha siikhu Nuuhi aapakhiriyeeyo mmwaaraka. 39Yo kayaweliyiye hatha etthu mpakha wakathi otiiyeevo nnyeri na khuwaathuula ooshi. Enttela orettikhana etthiipo ota wa Mwaana wa Pinaatamu. 40Aphano awiri anttela wiiya omashapa; mmote athuuliwe, alikhiwe mmote. 41Aakha awiri achilaka tiriku; onttela othuuliwavo mmote, asale mmote.

42“Nakataalikha, mwijeekesele, maana khamwinjuwa siikhu anttelaaye ota Mbwana enu. 43Ila eweeleyeni vitthu zaya epo; maana, mweenyewe nyuupa eriwaka eetta ojuwa wakathi antaaye natarawu, eetta oojeekesela na khaari olikhelela opwechiwa nyuupa yawe. 44Tiito, mweeyo theenya mwiiye woojilikanisa, maana wakathi antaavo Mwaana wa Pinaatamu pi opule mwihinaakhipwelaaye.

Karumeya wa waamineya na karumeya woohaamineyi

45“Ti paani eeyiyeeyo karumeya wa waamineya na wa akhili, otule Mbwana awe amwinkhiyeeyo osala vaje vawe yoori asala awenkha atthu etthu yoojiwa wakathi khaamili? 46Wooparikhiyiwa karumeya otule Mbwana awe amana ataaka anttelaaye onsikana arettaka etthiipo. 47Weekhweele kiniwuuzani yoori onttela olikheliwa maali zooshi. 48Ila karumeya otule amana eeya wootakhala rooho, ajilupezaka mweenyewe yoori: ‘Mbwanaaka ontta orupaza,’ 49na khusala awaapiya ashirikhaawe na oja na onywa na ananhapaliwa, 50Mbwana wa karumeya otule onttela ota siikhu ahaari waakhipwelaaye na wakathi ahinjuwaaye. 51Ye onteela onhukhumu saaneene antthe puuro ya manaafikhi, ottuukho onttelaaye wiiyawo olila na oluma meeno.

Currently Selected:

Matewuzhu 24: eko

Highlight

Copy