Matewuzhu 27

Ojiheya wa Yuuda

1Supuyeene, mahaakhimu a tiini na attunkhulu a tiini khujilakelela onhukhumwela Yinsa ofwa. 2Khunfuka khunthuula khunlawana wa nsatoro Pilaatu.

3Wakathi Yuuda, otule anzinkuliyeeyo, ooniyeevo yoori Yinsa onttela ohukhumwiwa, khuthupwiya na khulawa owaarutisela mahaakhimu a tiini na attunkhulu a tiini nzurukhu opule talaathiini wa feeta aathuuliyeeyo. 4Khuri: “Kakosa, khwa ozinkula taamu yoohikosi.” Yo khujipu yoori: “Fweeyo ennijali niini? Epo ti weeyo onjuwaaye.” 5Aphano Yuuda khweeselela nzurukhu omwimpari. Khusaruwa nawiisha khulawa khujiheya. 6Mahaakhimu a tiini khukusanya nzurukhu opule, khuri: “Khahi halaali othuula khuttha mmwifukho wa zaakha, maana hisapu ya taamu.” 7Aphano khusiilana orumeyela nzurukhu aya opule khwa wuuzanyela nshapa la namuupa yoori lirettiwe vilalo ya ozikhiwamo aletto. 8Tiito nshapa laya nttho liniitthiwaaye Nshapa la Taamu mpakha siikhu epi za leelo. 9Aphano khurettikhana epile zaalupiweeyo ti napiyu Yeremiiya yoori:

“Athuula nzurukhu talaathiini wa feeta,

hisapu yootthiiwa pi atthu a Ezirayiilu,

10khuuzanyela nshapa la namuupa,

nkhama etthiipo Mbwana aakirumiyeezo.”

Yinsa wa Pilaatu

11Yinsa khutthiiwa omaasho wa nsatoro ye khumuuzela yoori: “Weeyo onfwalume wa mayaahuuti?” Yinsa khujipu yoori: “Pi etthiipo olupiyeezo.” 12Ila eettaka olokoveziwa etthiipile pi mahaakhimu a tiini na attunkhulu a tiini, ye khuhijipu. 13Aphano Pilaatu khumuuzela yoori: “Weeyo khunsiila vitthu epo onlokoveziwaaye pi atthu apo?” 14Ila Yinsa khuhijipu hatha nttakhuzi, khwa ethiito nsatoro khwiiya wooshanka.

Yinsa onhukhumweliwa ofwa

15Amana efiya siikhu ya njampo nsatoro aazowereliye onfukulela ntthu woothawuliwa pi atthu. 16Yo wakathi aya otthuupule aarina napherezu woojuwanikha aari wiitthiwaaye Barapa. 17Pilaatu khuwoozela atthu apale aathukumaniyeeyo attaaphale yoori: “Khwa atthu apa ti tuuvi mwintakhaaye yoori kinfukulele: Barapa ama Yinsa aniitthiwaaye Al-Masiihu?” 18Maana aajuwiye yoori anlawaniye okhule mwaasa wa nrima. 19Pilaatu eekhaliye onyuupa woophukiwamo, muukha awe khumperekha hapari araka: “Ohijiphakanyane apo, maana leelo muulottha kahoowa venkivene monkoni wa ye.” 20Ila mahaakhimu a tiini na attunkhulu a tiini khuwaakhitiri atthu apale yoori aveke ofukuliwa Barapa na ooliiwe Yinsa. 21Aphano Nsatoro khuuzela yoori: “Khwa atthu apa awiri mwinintakhelaaye yoori miiyo kinfukulele ti tuuvi?” Yo khujipu yoori “Barapa!” 22Pilaatu khuuzela yoori: “Khi kinrettele niini Yinsa, aniitthiwaaye Al-Masiihu?” Ooshi khujipu yoori: “Akhomeliwe!” 23Ila Pilaatu khuuzela yoori: “Niini arettiyeeyo yootakhala?” Ila atthu apale khusala avira atepaka onyakula araka: “Akhomeliwe!” 24Pilaatu nawoona yoori khaari opattha hatha swamiima, ila olikha toowo khusala oona weekezeleya nzuuzu, khurumisa otiiseliwa maati, okhuno omaasho wa atthu apale na khulupa yoori: “Akina paathuli khwa taamu ya ntthu otu; eto zwaamu yenu.” 25Atthu ooshi apale khujipu yoori: “Taamu yawe ti eniittikhele fweeyo na aana etthu!” 26Aphano Pilaatu Khunfukulela Barapa, khuruma ojaphiwa Yinsa na khumwinkhelela olawa okhomeliwa.

Anajanka aninveyisa Yinsa

27Elottelanaka, anajanka a nsatoro khunthuula Yinsa khunlawana nlikokoro wa nyuupa khuulu ya nsatoro khukusanyeya anajanka ooshi khunzukulela. 28Khunvula kuwo zawe khunwalisa ajapi yookhuttuwa; 29khuvaasha khaara ya miiwa, khunwalisa mmwishwa mwawe na khunttheela puutta nkhono awe nlume, khunkokhorela khusala anveyisa, araka: “Ojuusuru, mfwalume wa mayaahuuti!” 30Khusala antthemela na khunnyakanya puutta etile, khumpiyana veeshwa. 31Paata ya onveyisa, khunvula ajapi etile khunwalisa kuwo zawe. Elottelanaka khusala alawa onkhomela.

Okhomeliwa wa Yinsa

32Alawaka, khukutthanana mwinyi mmote wa Sireene aari wiitthiwaaye Simawu, khunkhanyarela othuula nsalapa wa Yinsa.

33Yo khufiya puuro eniitthiwaaye Kolokoota, eriina maana a puuro ya likurakuza la eeshwa, 34khumwinkha onywa viinyu yoophakanyaniwa wamwe; ila ye wakathi ootiyeevo, khukatthala onywa. 35Paata ya onkhomela, khwaawanyana kuwo zawe khwa weekesa nasipu. 36Khwiikhala attaaphale khusala amweekesela. 37Vatulu wa eeswa yawe khutthiiwavo lipawu laatikhiweeyo khwa olokoveziwa wawe yoori: “otu ti yinsa, mfwalume wa mayaahuuti” 38Na aakhomelaniwe manantarawu awiri, mmote nkhono nlume nkina nkhono nkha. 39Apale aari oviraaye eetta onttukhana na osakhinya viishwa zaya, 40araka: “Oo weeyo waari weettelaaye opwecha Nyuupa Yoosifwiwamo na khujeka khwa siikhu ttatthu, ojuusuru! Wiishukhe vansalapa apho nkhama omwaana wa Nluku!” 41Khwa nanna etthiipo mahaakhimu a tiini, anamanozela a kano na attunkhulu a tiini eetta onveyisa, 42araka: “Wawoosuru akina, ila khunwahi ojuusuru omweenyewe! Mfwalume wa Ezirayiilu! Eeshukhe nasaapi vansalapa apho, nintta onkhupali. 43Ye amwaamini Nluku. Nluku ti amuusuru nasaapi ethiiti, nkhama ona huruma na ye, maana alupa yoori: ‘Ki mwaana wa Nluku!’ ” 44Theenya anamwiiya apale aakhomelaniweeyo khusala anttukhana.

Ofwa wa Yinsa

45Yaapuwiye yiiza nti wooshi, waaza saasiitha mpakha saakhentta. 46Paata ya ofiya saakhentta, Yinsa khukhuwa woonyakulavo, araka: “Elooyi, Elooyi, lama sabatani?” Eriina maana a “Nluku aka! Nluku aka! Mwaasa wa niini okanswaka?” 47Akina aariivo noosiila epile, khulupa yoori: “Ye oninkhuwela Aliyaasi.”

48Woohirupazi, mmote wa yo khutthirela shiponja, khunaanisa na viinyu yoonyuunya, khuttha pontha wa tteketthe khumwinkha Yinsa yoori anywe. 49Akina khusala alupa yoori: “Mwinlikhe, nimoone nkhama Aliyaasi onteela omuusuru.”

50Paata ya onyakula saaneene theenya, Yinsa khwinkhelela rooho yawe na khufwa.

51Wakathi otthuupule phazira ya omwimpari khwaawanyeya vakatthi, waaza vatulu mpakha vathi. Nti khusakhinyeya na mawe khupwecheya. 52Khapuri epile khufunuwa na mwiili za attakatthiifu awaatta afwiyeeyo khusisimuwa.

53Noolaamo nkhapuri mphule, paata ya Yinsa osisimuwa, atthu apale akina asisimuwiyeeyo khweetta sitati Ttakatthiifu na khooniwa pi atthu awaatta.

54Nttunkhulu wa anajanka na apale aari omweekeselaaye Yinsa, nawoona esikinyaatthi na zooshi zaarettikhaniyeeyo, khwiiya awoova channu khulupa yoori: “Weekhweele, ntthu otu aari mwaana wa Nluku!”

55Aakha awaatta aari attaaphale khusala oona ari peetiwene. Apale amperekhiyeeyo Yinsa waaza Kalileya yoori anrumeyele. 56Vakatthi vaya aarivo Mariyamu Mataleena, Mariyamu mamaawe Tiyaaku na Yuusufu na Maama wa aana a Zepeteewu.

Ozikhiwa wa Yinsa

57Njuwa leettelaka oveva, khuta mwinyi mmote wa thaajiri wa sitati ya Arimateeya aniitthiwaaye Yuusufu aari namalottela wa Yinsa. 58Khulawa wa Pilaatu, khuveka mwiili wa Yinsa. Pilaatu khuruma winkhiwa. 59Aphano Yuusufu khuthuula mwiili wa Yinsa khuputaputela va joora, 60khunttha nkhapuri pheeya, yaathipiweeyo vamwaako. Vanlako wa khapuri yaya khutthaavo liwe liwululene, khulankha khusala alawa. 61Mariyamu Mataleena na Mariyamu nkina, eekhaliye attaaphale omaasho wa khapuri.

Namweekesela wa Khapuri

62Mmeesho mwaya, siikhu ya saapatu, mahaakhimu a tiini na amafwarizeewu khulawa wa Pilaatu. 63Yo khumuuza yoori: “Mbwana, ninfikhiri yoori wakathi aariiye haayi, namattettekha otule aalupiye yoori siikhu ya ttaatthu ontta osisimuwa. 64Apho orume yoori khapuri etile yeekeseliwe saaneene mpakha siikhu ya ttaatthu, yoori ehirettikhane ota anamalottela awe khupwecha khapuri na awooze atthu yoori: ‘Asisimuwa muufwa,’ linttela wiiya nzuuzu lootepa zayita la mwanzo.”

65Pilaatu khulupa yoori: “Apho mwawaathuule anajanka. Mwilawe mweekesele khapuri khwa nanna mwinoonaaye yoori mwinwahi.” 66Yo khulawa khusoromezavo liwe ntthile lafuukaniweeyo khapuri na khuwaalikha attaaphale anajanka eekeselaka.

Currently Selected:

Matewuzhu 27: eko

Highlight

Copy