Maaruku 4
4
Nlikaniso wa Namazala
1Yinsa khurutela osomisa nshini wa ntthatta. Khutavo atthu awaatta aphale aariivo, khusala ahithajiya weetta nkalawa yoori eekhale nttumpho. Kalawa yaari mpahari, atthu ooshi khwiikhala nshini wa pahari. 2Ye aari owaasomisa vitthu zawaatta nkatthi wa nlikaniso, asomisaka khuri: 3“Mwisiile! Namalima aalawiye ozala. 4Wakathi aari omwazaavo peewu, phantte kiina khukwela nshini wa tarikhi anyannyi khuta khuja. 5Kiina khukwela vahali aariivo mawe, vahali laarivo nttophe vattitthiiru; nasaapiru khoottha, maana nttophe ntthile khaleechiye. 6Aphano noopuwa njuwa khulukuza peewu yaya; maana khazaarina mitathaari, khuuma. 7Peewu kinoko khukwela va miiwa, khuwula vamote na miiwa, khurapeliwa pi miiwa, khwa nanna zahawahiyeeyo wiima mishumo. 8Kiina khukwela vanshaka wooshapweya, khoottha, khuwula na khwiima mishumo zooshwapweya, talaathiini, siithiini na mpakha miiya wakhula mmote.” 9Yinsa khumarisela alupaka yoori: “Otule ariina mashiilo, ti asiile!”
Otaphuleliwa wa nlikaniso
10Wakathi ye aari otthwe, anakhiyoni apale khumi na awiri na akinoko aari kharipu ya attaaphale khumuuzela monkoni wa milikaniso. 11Ye khuwooza yoori: “Mweeyo mwenkhiwa ojuwa siiri za ofwalume wa Nluku, ila apale ari oje, zooshi anuuzaniwa milikaniso, 12yoori
“ ‘hatha nkhama oona ahijuwe,
hatha nkhama asiila ehiweeleye
yoori ahizukulise rooho zaya aswaamihiwa!’ ”
13Aphano Yinsa khuwoozela yoori: “Mweeyo khuniweeleyani nlikaniso opu, nanna-ni enteelaaye oweeleyani epi mikina? 14Namazala onzala nttakhuzi. 15Atthu akina ari nkhama peewu eriiye nshini wa tarikhi, nhali lizaliweemo nttakhuzi. Paata ya osiila, epiliisi onta, khulazavo nttakhuzi ntthile nroho mwawe. 16Akina, ari nkhama peewu ezaliweeyo vahali wawiiyavo mawe, ansiilaaye nttakhuzi nasaapiru khupwekherela na furaha. 17Ila paata ya wakathi vattitthiiru, atthu aya apo anlawa akatthale hapari maana kharetteeni wiiya nchina laya, amana ziwaapattha tafwawuthi ama lupattha mwaasa wa mattakhuzi apale antta wanswi. 18Theenya akina anlattanana na peewu ezaliweeyo vakatthi wa mwiiwa. Apo ansiila hapari, 19ila, amana ziwaapuwelelaka tafwawuthi za ohaayi, tuvela za maali na otakha kiina, vitthu zaya epo enshawa nttakhuzi na ahifiyelelaka wiima mishumo. 20Awaapho theenya atthu akina, anlikananaaye peewu ezaliweeyo nti wooshapweya. Apo aya ansiila nttakhuzi khukhupalela na khuttheerisa talaathiini, siithiini na mpakha miiya khwa etile aazaliyeeyo.”
Nlikaniso wa likhompe
21Ye khuwooza yoori: “Paani ankhozaaye khantteya yawe khuttha n'yuuku ama nlivuku? Olikha toowo kampweha vahali wawooneyavo? 22Maana khayiivo hatha etthu moote yoovithiwa, ehinttelaaye wiiya payana na khayiivo moote yoovithiwa ehinttelaaye ovithuliwa. 23Nkhama ntthu onaaye mashiilo oosiila, asiile!” 24Aphano, khuwooza yoori: “Phoole na epile mwinsiilaaye. Na mphimo otthuupo mwinttelaaye owaaphimela azeenu, mwinttela ophimeliwa otthuupo, na theenya mwinkeene mwinlawa mweekezeliwe. 25Otule ariina, onlawa eekezeliwe; ila otule ahina hatha etile vattitthiiru ariinaaye ontta onyakanyiwa.”
Nlikaniso wa Peewu
26Ye khurutela olupa yoori: “Ofwalume wa Nluku ori nkhama ntthu anzalaaye peewu yawe vathi. 27Hatha nkhama eetta olankha, ama hatha nkhama eetta olala, epo zinoottha na zinwula, ye woohijuwi nanna erettikhaniyeeyo. 28Otthuupo oniima mishumo zaya: yamwanzo nyaani, elottelanaka ntathi, mwiisho, phunje zawiitaala va ntathi. 29Amana peewu ekhomaala, ntthu onttela othuula eesu, maana wafiya wakathi wa wuurula.”
Nlikaniso wa phunje ya samuli
30Yinsa khurutela olupa theenya yoori: “Ofwalume wa Nluku onlattanana niini? Nlikaniso ni ninttelaaye orumeyela yoori nithoonyeze? 31Ori nkhama phunje ya samuli, etile yiiyiye phunje yootepa opushuwa vathi apha. 32Ila, paata ya ozala, zintta owula channu, zayita mathapa ooshi mpakha anyannyi khupattha ovumula mwiivuuli mwaya.” 33Khwa milikaniso zooshi zoolattana, Yinsa aari owooza monkoni wa nttakhuzi, nanna aari owahaaye oweeleya. 34Khaari owooza hatha etthu ahirumeyeleeni nlikaniso, ila amana eeya na anakhiyoni awe paasi, eetta owoozaka zooshi.
Yinsa onnyamaza pheevo
35Siikhu etile, weettelaka oripa, Yinsa khuwooza anakhiyoni awe yoori: “Nlaweni kaapu kiina ya ntthatta.” 36Paata ya osusa khuntti etile, yo khupakhira nkalawa mphule aariimo Yinsa. Na kalawa kiina zeetta owaaperekha. 37Khwaaza ovuma pheevo zawoopisa, na mawipi khusala apiya kalawa yaya khwa nanna aari wiitaalaamo maati. 38Yinsa aarettiye eettaka olala sheezi aphiteeziye nsaawu. Aphano anakhiyoni awe khunlansa na khumuuza yoori: “Mwaaliimu, khinuujali fweeyo nifwaka?” 39Yinsa khulankha khunyamaza pheevo na khuuza pahari yoori: “Etthe nreke! Onyamale!” Pheevo khunyamala na zooshi khwiiya zawiitthaala. 40Aphano khuwoozela anakhiyoni awe yoori: “Mwinoovani? Nalelo khamwina amini?” 41Anakhiyoni apale ari awoova channu, khusala oozana yoori: “Ti paani otu aya, anshututeliwaaye ti pheevo na pahari?”
Currently Selected:
Maaruku 4: eko
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
