Maaruku 6
6
Napiyu mmote wootarawiwa
1Yinsa khulaawo okhule waya, khweetta sitati ya owawe, anakhiyoni awe khusala amperekha. 2Noofiya saapatu, khwaaza osomisa nsinakooka, awaatta aari onsiilaaye khwiiya ooshanka, alupaka yoori: “Zininlankha vayi vitthu zaya epi? Akhili ni epi enkhiweeyo? Na onretta toovi minjuza? 3Khahiyo kalapinteero otu, mwaana wa Mariyamu, ttwiiye Tiyaaku, Yuusufu, Yuuda na Simawu! Alupuwe khari nttumphu!” Khusala ajoona oveyisiwa ti ye. 4Yinsa khuwooza yoori: “Mmuti mwawe, vakatthi wa ajamaaze na vaje vawe pi attaapho napiyu ahinshitahiwaavo.” 5Ye khawahiye oretta minjuza Nazareeti, woohiiyi owaavonisa alwele vattitthiiru khwa owaattheela makhono. 6Khwiiya wooshanka mwaasa wa othowawo amini okhule waya. Yinsa khuvira asomisaka miti zaattameliyeeyo ottuukhule.
Yinsa oniwaaruma anakhiyoni awe khumi na awiri
7Khuwaakhuwela anakhiyoni awe apale khumi na awiri, khuwaaruma awiri khwa awiri na khuwenkha owahi wa wiikara masheethwani. 8Khuwaaruma yoori: “Mwihithuule hatha etthu, yohiiyi pakhora, khamwaarina ya othuula etthu yoojiwa wala kaapiyaka wa safwari wala nzurukhu. 9Mwiwale jampali, ila mwihithuule ajapi piiri. 10Amana mwifiya nyuupa moote, mwiiye attaapho mpakha siikhu mwinttelaaye olaavo. 11Na miti mikinoko amana zihuupwekhereleni na khuhuusiilini, mwitathe lifufu la mmoolu mweenu mwilaakamo, nkhama oshaahiti vakatthi vaya.” 12Yo khulawa khuwaatafusirela atthu yoori athupwiye. 13Yo aari wiikara masheethwani awaatta na owaavaaza mafuttha mmwishwa mwaya na owaavonisa alwele awaatta.
Ofwa wa Yaahaya Namoosa
14Mfwalume Herooti khusiila elupiwaka hapari epile, maana nzina la Yinsa laajuwiwe saaneene. Atthu akina khwaaza olupa yoori: “Yaahaya Namoosa eetta osisimuwa muufwa! Tiito zinrettikhanaaye minjuza zootikinisa khwa ye.” 15Akina aari olupa yoori: “Ye ti Aliyaasi.” Akinoko khusala olupa araka: “Ye napiyu, nkhama manapiyu apale a raku.” 16Ila Herooti wakathi asiiliyeevo vitthu epile, khuri: “Yaahaya, mwinyi kinshijiyeeyo, asisimuwa muufwa!”
17Maana Herooti aarumiye yoori akholiwe Yaahaya, afukeliwe nkalapooso, mwaasa wa Herotiiya, muukha wa Filiipe ttwiiye, othuuto anraliyeeyo. 18Mwaasa wa Yaahaya aari omuuza Herooti yoori: “Khahi halaali weeyo onrala muukha wa ttwiiyo.” 19Herotiiya aarina katapu khwa Yaahaya, khusala atakha omuula, ila khuhisala awahi oretta, 20mwaasa Herooti aari omoova Yaahaya na aari omwiinanela, maana aari ojuwa yoori ye mwinyi wa shariya na ttakatthiifu. Amana ansiilaka, eetta oshanka; khwa etthiipo waari ontuvela onsiila.
21Omwiisho Herotiiya khupattha kiphenyo siikhu ya oretta mwaakha Herooti. Khuretta njampo na anamalokozela awe awulu, attunkhulu a anajanka na ooshi apale eeyiye afwalume a nti wa Kalileya. 22Wakathi mwaana wa Herotiiya aviriyeeyo khwiina, khuntuvela Herooti na apale awaakharipushiyeeyo. Mfwalume khumuuza mwanankha otule yoori: “Okivekele wakhula etile ontakhaaye kintta owinkha.” 23Khumwaahiti khwa olapha yoori: “Wakhula onikivekelaaye, kintta owinkha, mpakha phantte ya ofwalume aka.” 24Mwaana otule khusaruwa khumuuzela mamaawe yoori: “Kiveke niini?” Mamaawe khunjipu yoori: “Oveke eeshwa ya Yaahaya Namoosa.” 25Nasaapiru mwanankha otule khwaakuva khulawa wa mfwalume khuveka yoori: “Kintakha mwikinkhe nasaapi eeshwa ya Yaahaya Namoosa mparathu.”
26Mfwalume khwiiya woohuzunikha channu, ila mwaasa wa olapha opule aalaphiyeeyo na wa apale awaakharipushiyeeyo, khuhiwahi okatthala etile avekeliweeyo ti mwanankha otule. 27Nasaapiru khunruma najanka khumuuza ontiisela eeshwa ya Yaahaya Namoosa. Ye khulawa okalapooso, khukakatta eeshwa ya Yaahaya Namoosa. 28Khuttha ntthaalu khumwinkha mwanankha otule na ye khumwinkha mamaawe. 29Noosiila hapari epile anakhiyoni a Yaahaya namoosa, khuta khuthuula mwiili awe khulawa khuzikha.
Yinsa oniwaajisa alume alufu thaanu
30Maaswihaapa khurutela aphale aariivo Yinsa khumuuza zooshi aarettiyeezo na asomisiyeeyo. 31Aarivo atthu awaatta aari otaaye na olaavo, Yinsa na anakhiyoni awe nawoona yoori khaarina kiphenyo ya oja. Ye khuwooza yoori: “Mwite nilawe puuro yawiitthaaleyavo navumule vattitthiiru.” 32Aphano yo khulawa nkalawa mpakha puuro yawiitthaaleyavo. 33Atthu awaatta khuwoona alawaka paata ya owaajuwa. Atthu a miti zooshi za ottuukhule, khutthira khufiyawo yo ahinafiye.
34Eeshukhaka nkalawa Yinsa, khoona khuntti khuluyeene ya atthu, khuwoonela huruma, maana zaari nkhama pwittipwitthi zoohiina makhampuzi. Aphano khwaaza owaasomisa vitthu zawaatta. 35Weettelaka oripa, anakhiyoni awe khunsusela khumuuza yoori: “Puuro eti ti yawiitthaaleyavo, na waripa. 36Owaamwaze atthu apa yoori alawe mmashapa na mmiti epile naattamiyeeyo yoori oozanye etthu yoojiwa aje.” 37Ila ye khuwaajipu yoori: “Mwiwenkhe mweeyo ena etthu yoojiwa.” Yo khumuuza yoori: “Atthu apa yoori aje, ninhithajiya miiya piiri za feeta!” 38Yinsa khuuzela yoori: “Mwina phaawu kavi? Mwilawe moone.” Anakhiyoni apale khulawa khoona khujipu yoori: “Ninaaye phaawu thaanu na swi piiri.”
39Aphano, Yinsa khuwaaruma yoori ooshi eekhale, khuntti khwa khuntti va nyaani piishi. 40Khuretta etthiipo khwaawanyeya khwa khuntti ya miiya na khuntti ya hamusiini. 41Athuuliyeevo phaawu epile thaanu na swi piiri khweekesa pinkuuni khuparikhiya. Nawiisha khumeya phaawu epile khuwenkha anakhiyoni awe yoori awaawanyeze atthu apale. Theenya khuwaawanyeza swi epile piiri ooshi aya. 42Ooshi khuja khurupala, 43anakhiyoni khulokotthela khwiitaala khelenke khumi na piiri za nyeenye za phaawu na za swi. 44Atthu aajiyeeyo aari alufu thaanu alume ene.
Yinsa oneettetta vatulu wa maati
45Elottelanaka, Yinsa khuwaaruma anakhiyoni awe yoori apakhire nkalawa na alokoze Betezayiita, wakathi ye aari oleezananaavo atthu. 46Paata ya owaaleeza atthu, khuwela vamwaako yoori alompe. 47Weettelaka oripa, kalawa yaari vakatthi wa pahari na Yinsa aari otthwe vathi. 48Ye khuwoona anakhiyoni awe afutthaka kaafi woovelavelavo, maana eetta wiinyula pheevo. Lifwajiri, Yinsa khulawa aphale aariivo eettettaka vatulu wa maati, khusala asaleela owaavikana. 49Wakathi amooniyeevo eettettaka vatulu wa pahari, khusala amoona nkhama nshitapehe, aphano khusala anyakula. 50Maana ooshi aamoniyeeyo aari oosuthuwa. Ila Yinsa nasaapiru khuwooza yoori: “Mwiminyale! Ti miiyo! Mwihoove!” 51Aphano Yinsa khuwela nkalawa khwiiya vamote na anakhiyoni awe, na pheevo khunyamala, na yo khwiiya ooshanka, 52maana khazaaweleyiye minjuza za phaawu. Rooho zaya zaari zookhomaala.
Yinsa oniwaavonisa alwele a Jenezare
53Paata ya olokha pahari, khufiya Jenezare, ottuukho khufukelela kalawa yaya. 54Wakathi apakhuwiyeevo atthu khunjuwa Yinsa. 55Yo aari ovira azukulelaka nti wooshi opule, na owaathuula alwele aya va nrepa awaalawanaka ohali aari osiilaawo yoori Yinsa ori ottuukho. 56Wakhula vahali aari weettaawo, mmamuti, nsitati ama mmashapa, aari othuuliwaka alwele na olawaniwa mparasa. Noovekeliwa yoori nenkawu awahi osapa nshaka la ajapi yawe; maana ooshi apale aari osapaaye eetta oovona.
Currently Selected:
Maaruku 6: eko
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
