Éxodo 7

Moiséspa tukrun culebraman tikrashqan

1Tsayno niptinmi Moisésta Tayta Dios kayno nirqan: <<Shumaq wiyamay. Qamtami churashqä Faraónpa nawpancho noqapa trukä kanaykipaq. Wawqiki Aarónnami wilakuqniki kar Faraónta parlapanqapaq. 2Qammi Aarónta wilanki lapan nishqäkunata. Paynami Faraónwan parlanqa Israel runakunata nacionninpita kachapäshunaykipaq. 3Tsayno parlapaptinpis Faraónpa shonqunta chukruyätsiptï manami juklaqa kachapäshunkipaqtsu. Mana kachapäshuptikimi mantsariypaq castïgukunawan Egipto runakunata castigashaqpaq.#Hech. 7.36. 4Castigaykaptïpis Faraónqa manami cäsushunkipaqtsu. Tsaymi Egipto runakunata masraq castigarkur kuyashqä Israel runakunata punta punta shuntarkur jorqamushaqpaq. 5Israel runakunata tsayno jorqamuptïmi Egipto runakuna tantiyakunqa munayniyuq Tayta Dios kashqäta>>.

6 Tayta Dios nishqannölami Moisés y Aarón aywapäkurqan Faraónwan parlananpaq. 7Faraónwan parlashqan witsanmi Moisés kaykarqan pusaq chunka (80) watayuq y Aarónnami kaykarqan pusaq chunka kimsa (83) watayuq.

8Tsaypita Moisésta y Aarónta Tayta Dios kayno nirqan: 9<<Faraón ima milagrutapis ruranaykipaq nishuptikiqa Aarónta ninki tukrunta Faraónpa nawpanman jitaykunanpaq. Jitaykuptinmi culebraman tikranqapaq>>.

10Tsayno niptinmi Moisés y Aarón aywar Tayta Dios nishqannöla Faraónpa nawpancho lapantapis rurarqan. Tsaymi Faraónpa y mandäshiqninkunapa nawpancho tukrunta pampaman Aarón jitaykuptin culebraman tikrarqan. 11Tsayta rikaykurmi Faraónpis qayatsirqan rikakuqkunata y brüjukunata. Paykunapis Aarón rurashqannölami rurapäkurqan. 12Tsaymi tukrunkunata pampaman jitaykuptin culebraman tikrarqan. Tsaychömi Aarónpa tukrun paykunapa tukrunkunata mikukurkurqan. 13Tsayta rikaykarpis Tayta Dios nishqannölami Faraónqa chukru shonqu rikakur Moisésta y Aarónta mana cäsurqantsu.

Yawarman yaku tikrashqan

14Tsaypita Moisésta Tayta Dios kayno nirqan: <<Faraónqa chukru shonquyashqami kaykan. Tsaymi Israel runakuna yarqamunanta mana munantsu. 15Tsawraqa wara tuta mayupa aywanki Faraón armakuq aywaptin shuyänaykipaq. Tsayman aywar apanki culebraman tikraq tukruykita. 16Faraónwan tinkurmi kayno ninki: <Hebreo runakunapa#7.16 Hebreo runakunaqa Israel runakunami karqan. Tsaymi Moiséspis hebreo runa karqan. Tayta Diosninmi kachamashqa qamta kayno ninäpaq: <<Kuyashqan runakunatashi kacharinki chunyaq jirkaman aywaykur payta adorapäkunanpaq>>.

<< <Tayta Dios tsayno nimashqanta niykaptïpis kananyaq manami cäsumashqankitsu. 17Kananmi musyanki Tayta Dios pï kashqantapis. Tayta Dios nimashqannölami kay aptaraykashqä tukruwan mayuta wiruptï yawarman tikranqapaq.#Apoc. 8.8; 16.4. 18Tsawraqa mayucho lapan pescädukuna wanur ushakanqapaq. Fiyupa asyaptin Egipto runakunapis tsay yakuta melanar manami upunqapaqtsu> >>.

19Mastapis Moisésta Tayta Dios kayno nirqan: <<Aarónta ninki tukrunta aptarkur mayukuna, raqrakuna, qochakuna y pukyukuna jananpa toqrinanpaq. Tsaynöpami lapan yakukuna yawarman tikranqapaq. Rumipita y qerupita rurashqa yaku winaräkunanchöpis yawarlanami kanqapaq>>.

20 Tayta Dios nishqannölami Moisés y Aarón lapanta rurarqan. Tsaymi Faraónpa y mandäshiqninkunapa nawpancho Aarónqa mayuta tukrunwan wirurqan. Tsawraqa jinan hörami lapan yaku yawarman tikrarqan. 21Tsaymi mayucho kaq pescädukuna wanurqan y mayupis fiyupami asyarqan. Tsayno asyaptinmi Egipto runakuna tsay yakuta manana upurqannatsu. Tsaynöpami intëru Egiptucho lapan yaku yawarman tikrarqan.

22Tsawraqa Egiptucho taq brüjukunapis yakuta yawarman tikratsirqan. Tsayta rikarpis Tayta Dios nishqannölami Moisés y Aarón nishqanta Faraón mana cäsurqantsu. 23Tsaymi imatapis mana cäsuypa palaciunman Faraón kutikurqan. 24Mayu yaku mana upuypaq kaptinmi Egipto runakuna mayu kuchunkunacho pözukunata uchkupäkurqan chuya yakuta upupäkunanpaq.

Tsaytsika ratsak yurishqan

25Mayuta wirutsishqanpita qanchis junaqtami

Currently Selected:

Éxodo 7: qvmB

Highlight

Copy