Génesis 21

Isaac yurishqan

1Abrahamta Tayta Dios promitishqannölami Sara qeshyaq rikakurqan. 2Abraham awkinna kaykaptinpis Tayta Dios jitapashqan killachömi olqu wamrata Sara wachakurqan.#Heb. 11.11-12. 3Sara wachaykuptinnami Abrahamqa tsurinpa jutinta churaparqan Isaac jutin kananpaq. 4Yurishqanpita pusaq junaqniyuq kaykaptinmi Tayta Dios nishqannöla tsurinta pishquncho señalarqan.#Gén. 17.12; Hech. 7.8. 5Abraham pachak (100) watayuq kaykaptinmi tsurin Isaac yurirqan.

6Tsaypitana Sara kayno nirqan: <<Wawayuq kanäpaq Tayta Dios wilamaptinmi asikurqä.#Gén. 18.12-15. Wakin runakunapis wawayuq kashqäta musyarmi kushikur asikärinqa. 7Wawayuq kanäpaq kashqantaqa ¡piraq Abrahamta ninman karqan! Runä awkinna kaykaptinpis wawata tarishqämi>>.

Agarta wawantinta Abraham qarqushqan

8Isaac winarkuptinnami maman wasqirqan. Tsay junaqmi Abrahamqa kushikuypita fiestata rurarqan. 9Tsay junaqmi Agarpa wawan Ismael Isaacta asipaykaqta Sara rikarqan. 10Tsaymi Abrahamta Sara kayno nirqan: <<¡Tsay ashmaytaqa wawantinta jukla qarquy! Tsay warmipa wawanqa manami wawä Isaacwan herenciata rakipänakunqatsu>>.#Gál. 4.30.

11Tsayno niptinmi Abrahamqa fiyupa lakikurqan Ismaelpis tsurin kaptin. 12Tsawraqa Abrahamta Tayta Dios kayno nirqan: <<Tsuriki Ismaelpaq y ashmayniki warmipaqqa ama lakikuytsu. Qamta promitishqäqa tsuriki Isaacpaq y paypita miraqkunapaqmi kaykan. Tsayno kaykaptinqa Sara nishushqaykita ruray.#Rom. 9.7; Heb. 11.18. 13Ashmaynikipa wawan Ismaeltapis tsuriki kaptinmi yanapashaq. Tsaymi atskaman mirar jatun nación rikakunqa>>.

14Tayta Dios tsayno niptinmi Abrahamqa waraynin#21.14 Wakin runakunaqa warantin nipäkun. tuta tsaka tsakala Agarta mirkapata y yakutapis kamariparqan. Tsaykunata apariparkurmi wawantinta despacharqan. Tsaymi Agarqa wawanwan Beerseba lädun chunyaqman chayaykur pantakashqa puripäkurqan. 15Apashqan yaku ushakaptinmi wawanta yöra sikinman jamaykatsirqan. 16Yakunaylapita wanuqta rikayta mana munarmi karu niraqman aywaykur jamakuykurqan. Tsaymi wawan fiyupa waqarqan.

17Ismael waqashqanta mayarmi Tayta Diospa angilnin jana patsapita qayakamur kayno nirqan: <<¿Imataq pasaykäshunki, Agar? Ama mantsakamaytsu. Tayta Diosmi mayashqa wawayki waqaykashqanta. 18Kutiykur wawaykita shoqashpayki ama kachaynatsu. Paytapis juk nación rikakunanyaq mirananpaqmi yanapashaq>>.

19Nirkurnami Agarta Tayta Dios rikatsirqan pukyucho yaku kaykaqta. Tsaymi yaku puritsikunanwan wishirkur wawanta uputsirqan. 20Tayta Dios yanapaptinmi wamra ali winarqan. Chunyaq jirkacho tashpanmi flëcha manijayta yachakurqan. 21Paykuna tarqan Parán chunyaq jirkachömi. Mözuyarkuptinnami Egipto jipashwan maman tätsirqan.

Abimelecwan Abraham pactuta rurashqan

22Tsay witsanmi rey Abimelec#Gén. 26.26. soldädunkunapa capitannin Ficolwan aywarqan Abrahamwan parlananpaq. Chayaykurmi kayno nipäkurqan: <<Lapan rurashqaykicho Tayta Dios yanapashushqaykitami tantiyapäkushqä. 23Tsaymi kanan shapäkamushqä shumaq parlakunantsipaq. Tayta Diospa jutincho promitimay noqata ali rikamashqaykino tsurïkunata y paykunapita miraqkunatapis ali rikanaykipaq. Tsaynöla kaycho taqkunatapis ali rikaykulay>>.

24Tsayno niptin Abraham kayno nirqan: <<Diospa jutinchömi promitï nimashqaykino ruranäpaq>>.

25Tsaypitanami Abimelecta Abraham kayno nirqan: <<Ashmaynïkuna yakuta jorqunanpaq uchkushqan pözutami ashmaynikikuna qechumashqa>>.

26Tsawraqa Abimelec kayno nirqan: <<Kananyaq manami tsayta mayashqätsu, tayta. Qampis manami wilamashqankitsu. Manami musyashqätsu mayqan kaq ashmaynï tsayta rurashqantapis>>.

27Tsayno wilanakurkurmi Abrahamqa Abimelecta qoykurqan uyshakunata, cabrakunata y wäkakunata. Tsay junaqmi Abrahamwan Abimelec pactuta rurapäkurqan imaypis ali kawapäkunanpaq. 28Nirkur Abraham uyshankunapita qanchis masta rakirqan. 29Rakiqta rikaykurmi Abimelec tapurqan kayno nir: <<¿Imapaqtaq tsay qanchis uyshakunata rakishqanki?>>

30Tsaynami Abraham kayno nirqan: <<Kay qanchis uyshakunata rakishqä chaskimaptiki tsay pözu noqapa kashqanta pïmaypis musyananpaq>>.

31Tsaycho pactuta rurashqanpitami tsay partipa jutinta churaparqan Beerseba#21.31 Beerseba ninanqa Juramentu Pözu ninanmi. jutin kananpaq. 32Beersebacho pactuta rurarkurnami Abimelecwan Ficol kutikärirqan filisteo runakuna tashqan partiman. 33Beersebachömi Abraham plantarqan tamarisco yörata.#21.33 Tsay yörata plantarqan Tayta Dios yanapashqanta yarparänanpaqmi. Tsaychömi imayyaqpis kawaq Tayta Diosta manakur adorarqan. 34Abrahamqa atska watami filisteo runakuna tashqan particho tarqan.

Currently Selected:

Génesis 21: qvmB

Highlight

Copy