Génesis 24

Isaacpaq warmita ashishqan

1Abrahamqa awkinnami karqan. Tsaynöpis lapan rurashqankunachömi Tayta Dios yanaparqan. 2Abrahampami yärakushqan ashmaynin karqan lapan ashmayninkunapitapis mas awkin. Tsay ashmaynin lapan imaykantapis rikaq kaptinmi qayaykatsir Abraham kayno nirqan: <<Lilïcho yataykamar#24.2 Tsay witsan lilinta yataykur imatapis promitirqa imanöpapis cumplinanpaq kashqantami nipäkuq. 3promitimay kay patsatapis jana patsatapis kamaq Tayta Diospa jutincho lapan nishqäta cumplinaykipaq. Kay tashqä Canaán markakunapitaqa tsurïpaq warmita ama ashinkitsu. 4Tsaypa trukanqa aylükuna taykashqan Harán markaman aywar juk jipashta pushamunki tsurïpa warminpaq>>.

5Tsayno niptinmi ashmaynin nirqan: <<Pushamunäta mana munaptinqa ¿imatataq rurashaq, tayta? ¿Tsurikitatsuraq pushashaq warmipa markanman?>>

6Tsayno niptinmi Abraham kayno nirqan: <<Tsurïta ama pushankitsu. 7Jana patsacho kaykaq Tayta Diosmi nimashqa kay taykashqantsi patsata tsurïkunata, wilkäkunata y paykunapita miraqkunatapis qoykunanpaq kashqanta. Paymi taytäpa wayinpita y markäpita jorqarkamar kayman pushamashqa.#Gén. 12.1-3, 7; 13.14-17; 15.18-21. Tsaymi angilninta kachanqa qamwan aywananpaq. Tsaynöpami tsurïpa warminpaq juk jipashta pushamunkipaq. 8Jipash shamuyta mana munaptinqa parlashqantsi tsaylachönami usharanqa. Imano kaptinpis warmipa markanman tsurïta ama pushankitsu>>.

9Tsayno niptinmi ashmayninqa Abrahampa lilinta yataykur Tayta Diospa jutincho promitirqan patronnin nishqankunata cumplinanpaq. 10Tsaypitami apananpaq kamarikurqan alinnin kaq regälukunata. Tsay regälukunata chunka camëllukunawan cargakurkurmi aywarqan Abrahampa wawqin Nacor tashqan markaman. Tsayqa karqan Mesopotamiachömi. 11Inti jeqaykaptinnami marka yaykunaman Abrahampa ashmaynin chayaykur camëllukunata pözu nawpanman qonqurpatsirqan. Tsay hörami jipashkuna pözupita yakuta apananpaq aywapäkuq.

12Tsaychömi Tayta Diosta manakurqan kayno nir: <<Patronnï Abraham yärakushqan Tayta Dios, patronnïta kuyapashpayki kanan yanapaykalämay lapanpis ali kamakänanpaq. 13Kay pözu nawpalancho yakuta apananpaq shamuq jipashkunata shuyaraykäshaq. 14Mayqan jipashtapis chayamuq kaqtami kayno nishaq: <Puyñuykipita yakuta manakuläshayki, mamïta>. Tsayno nir manakuptï kayno nimätsun: <Upurkulay. Camëlluykikunatapis upurkatsishaq>. Tsayno nimaq kaq katsun Isaacpa warminpaq akrashqayki jipash. Tsaynöpami musyashaq patronnïta kuyapar yanapashqaykita>>.

15Tayta Diosta manakuyta manaraq ushaptinmi juk jipash puyñun umrushqa pözuman yakukuq chayarqan. Tsay jipashqa karqan Betuelpa tsurin Rebecami. Betuelnami karqan Milcacho Nacorpa tsurin. Nacornami karqan Abrahampa wawqin. 16Rebecaqa karqan kuyaylapaq y virgen jipashmi. Paymi pözu kaqman chayaykur puyñuman yakuta wishirkur wayinpa kutikuykarqan. 17Tsaymi Abrahampa ashmaynin taripaykur kayno nirqan: <<Yakuta manakuläshayki, mamïta>>.

18Tsayno niptinmi jipashqa kayno nirqan: <<Upurkulay, tayta>>.

Tsayno nirmi puyñunta tsarapararqan yakuta upunanpaq. 19Tsayno upurkuptinnami Rebeca kayno nirqan: <<Camëlluykikuna upunanpaqpis pözupita yakuta jorqamushaq, tayta>>.

20Tsayno nirmi uywakuna yaku upukunanman warakayla ashtaparqan camëllukuna upunanpaq. 21Tsaymi Abrahampa ashmayninqa Tayta Diosta manakushqanno tsay jipash kashqanta o mana kashqantapis musyayta munar upälala rikapaykarqan. 22Camëllukuna yakuta upuyta usharkuptinnami jipashpa senqanman jatiparqan qori sortëjata. Tsay sortëja soqta grämunömi karqan. Tsaynöpis makinman jatiparqan qoripita rurashqa ishkay brasilëtata. Tsaykuna karqan pachak (100) grämupita masmi.

23Nirkurnami kayno nirqan: <<¿Pipa tsurintaq kaykanki? ¿Papänikipa wayincho sitiu kantsuraq patsatsimänaykipaq?>>

24Tsawraqa Rebeca kayno nirqan: <<Noqaqa Betuelpa tsurinmi kaykä. Awkilümi Nacor y awilänami Milca. 25Wayïpis jäkuykanmi patsakunaykipaq. Punshapis qewapis kaykanmi camëlluykikuna mikunanpaq>>.

26Tsayno niptinmi Abrahampa ashmayninqa qonqurpakuykur Tayta Diosta adorar kayno nirqan: 27<<Patronnï Abraham yärakushqan Tayta Dios, alabashqa kaykulay. Patronnïta kuyarmi imaypis yanapashpayki aylunmanpis chayatsimashqanki>>.

28Tsaypitanami Rebeca mamanta wilananpaq warakayla aywarqan. 29-30Rebecapa turin Labánnami rikarqan qoripita rurashqa sortëjata y brasilëtata makincho panin jatiraykaqta. Runa imata nishqantapis mamanta Rebeca wilapaykashqanta mayarmi Labánqa warakayla aywarqan pözu kaqman tsay runawan tinkunanpaq. Aywarmi pözu nawpancho camëllunkunatawan tarirqan. 31Tsawraqa Labán kayno nirqan: <<¡Wayïman aywakushun, tayta! Qamqa kaykanki Tayta Dios yanapashqan ali runami. Kaychöqa manami punuykunkimantsu. Patsakunaykipaq wayi kamarishqanami kaykan. Camëlluykikunata wichqanaykipaqpis corral kaykanmi>>.

32Tsayno niptinmi Abrahampa ashmayninqa Labánpa wayinman aywarqan. Chayaykuptinnami Labánqa camëllukunata paskarir qewata qararqan. Tsaynöpis yakuta kamariparqan Abrahampa ashmaynin y yanaqaq runakuna chakinta maylakärinanpaq.

33Tsaypita mikunanpaq mësaman jamatsiptin Abrahampa ashmaynin kayno nirqan: <<Mikunäpaqpis wilashayki imaman shamushqätapis>>.

Tsayno niptinmi Labán nirqan: <<¡Jukla wilaykalämay!>>

34Tsawraqa tsay ashmay kayno nirqan: <<Noqaqa kaykä Abrahampa ashmayninmi. 35Tayta Diospa bendicionninwanmi patronnï Abrahamqa rïcuyashqa. Tsaymi uyshankuna, cabrankuna, wäkankuna, camëllunkuna y bürrunkunapis atskaman mirashqa. Paypaqa atskami olqupis warmipis ashmayninkuna karkaykä. Tsaynölami qorinpis qellayninpis atska kaykan. 36Patronnïpa warmin Sarapis chakwanna kaykarmi olqu wamrata wachashqa. Paypa wamranpaqmi lapan herencianpis kaykan. 37Tayta Diospa jutinchömi patronnï kayno juratsimashqa: <Kay tashqä Canaán markakunapitaqa tsurïpaq warmita ama apamunkitsu. 38Tsaypa trukanqa aywanki papänïpa aylunkuna kaqman. Paykunapita juk jipashta apamunki tsurï Isaacpa warminpaq>.

39<<Tsayno nimaptinmi kayno nirqä: <Tsay jipash shamuyta mana munaptinqa ¿imataraq rurashaq?>

40<<Tsaymi kayno nimarqan: <Yärakushqä Tayta Diosmi angilninta kachamunqa yanapashunaykipaq. Tsaynöpami aylükunapita juk jipashta apamunki tsurïpa warminpaq. 41Aylükunaman chayaptiki tsurinta mana kachapämushuptikiqa promitimashqayki cumplishqanami kanqa>.

42<<Tsayno nimaptin shamurmi pözu nawpanman kanan junaq chayamushqä. Tsaychömi Tayta Diosta manakushqä kayno nir: <Patronnï Abraham yärakushqan Tayta Dios, yanapaykalämay Isaacpa warmin kananpaq kaq jipashwan tinkunäpaq. 43Kay pözu nawpalancho shuyaraykäshaq jipashkuna yakukuq shamuqta. Kamakaykatsilay Tayta, patronnïpa tsurinpaq warmita tarinäpaq. Tsay jipashtami puyñunpita yakuta manakushaq. 44Tsayno ruwakuptï pay kayno nimätsun: <<Upurkulay. Camëlluykikunatapis yakuta upurkatsishaq>>. Tsayno nimaq kaq jipashmi kanqa patronnïpa lumtsuyninpaq>.

45<<Tayta Diosta manakuyta manaraq usharmi rikarqä puyñun umrushqa Rebeca yakukuq aywaykämuqta. Pözupita yakuta jorquptinnami manakurqä kayno nir: <Yakuta manakuläshayki, mamïta>. 46Tsaymi puyñunta marqarkur kayno nimarqan: <Upurkulay, tayta. Camëlluykikunatapis uputsimushaq>. Tsayno nimaptinmi yakuta upushqä. Tsaynölami camëllükunatapis yakuta uputsimushqa. 47Nirkurna kayno tapurqä: <¿Pipa tsurintaq kaykanki?> Tsaymi kayno nimarqan: <Noqaqa kaykä Betuelpa tsurinmi. Awkilümi Nacor y awilänami kaykan Milca>. Tsayno nimaptinmi juk sortëjata senqanman jatipashqä. Tsaynöpis ishkan makinman brasilëtakunata jatipashqä.

48<<Nirkurnami qonqurpakuykur Tayta Diosta adorar kayno nishqä: <Patronnï Abrahampa Diosnin, qammi ali nänipa pushamashqanki patronnïpa aylunpita jipashta tarinäpaq>. 49Tsayno nirmi Tayta Diosta manakushqä. Kananqa niykalämay patronnïta kuyapashpayki tsurikita awnimashqaykita o mana awnimashqaykitapis. Mana awnimaptikiqa alfin imanäshaqtaq>>.

50Tsawraqa Labánpis Betuelpis kayno nirqan: <<Tayta Dios rasunpami yanapashushqanki kayman chayamunaykipaq. Tsayno kaykaptinqa ¿imanirtaq mana awnïmantsu? 51Tayta Dios tsayno kananpaq destinashqa kaykaptinqa patronnikipa tsurinpaq Rebecata apankichari>>.

52Tsayno niptinmi Abrahampa ashmayninqa Tayta Diosta agradëcikushpan urkunpis pampaman töpashqanyaq qonqurpakuykurqan. 53Nirkurnami Rebecata qaraykurqan qoripita qellaypita rurashqa alhäjakunata y fïnu röpakunata. Tsaynölami turinta y mamanta qararqan. 54Tsaypitanami Abrahampa ashmayninqa yanaqaqninkunawan mikurkur upurkur tsaycho punupäkurqan. Patsa wararkuptinnami sharkurkur kayno nirqan: <<Kananqa patronnï kaqman kutikushaqna, tayta>>.

55Tsayno niptinmi Rebecapa turin y maman kayno nirqan: <<Chunka junaqlapis Rebeca qoyäpämätsunraq. Tsaypita itsanqa apakunkipaq>>.

56Tsayno niptinmi Abrahampa ashmaynin kayno nirqan: <<Kayman shamuptï lapantapis Tayta Dios kamakaykätsiptinqa patronnïpa wayinman kutikunäpaq jukla despachaykalämay>>.

57Tsaymi paykuna nirqan: <<Mä, tapunantsipaq jipashta qayashun>>.

58Tsawraqa Rebecata qayaykur tapurqan: <<¿Kay runawan aywayta munankiku?>>

Tsayno tapuptinmi kayno nirqan: <<Awmi>>.

59Tsayno niptinmi despachapäkurqan itilanpita ashmaqnin warmitawan. Tsaymi aywakärirqan Abrahampa ashmayninwan y paywan shamuq runakunawan. 60Tsay yarqushqan hörami lapan aylunkuna bendicionta qoshpan kayno nipäkurqan: <<Wawaykikuna, wilkaykikuna y paykunapita miraqkunapis atskaman mirar waranqanpa waranqanpa kaykulätsun. Tsaynöpis qampita miraqkuna lapan contrankunata vincir munayninman churatsun>>.

61Tsaypitami ashmaynin warmikunawan camëllukunata muntakurkur Abrahampa ashmaynin pushashqanpa Rebeca aywarqan. Tsaynömi Abrahampa ashmayninqa Rebecata pushakurkur kutikurqan.

62Paykuna chayananpaqqa Isaac kutishqanami kaykarqan Beer Lahai-Roí nishqan pözu kaqpita. Pay taykarqan Neguevchömi. 63Tsay hörami inti jeqaykaptinna Isaacqa yarpachakur puriykarqan. Tsayno puriykashqanchömi rikärirqan camëllukuna aywaykämuqta. 64Tsaynölami Rebecapis Isaacta rikaykur muntarashqan camëllupita urarqan. 65Nirkurmi Abrahampa ashmayninta kayno tapurqan: <<¿Pitaq taqay aywaykämuq runa?>>

Tsawraqa kayno nirqan: <<Paymi patronnï>>.

Tsayno niptinmi Rebecaqa vëlunwan qaqlanta tsapakurqan.

66Isaacwan tinkurkurnami ashmayninqa wilaparqan lapan ima pasashqantapis. 67Tsaypitanami Isaacqa Rebecata pusharqan maman manaraq wanur tashqan tolduman. Tsaychönami Rebecawan Isaac pasaypa kuyanakur tarqan. Paywan tarnami maman wanushqanpitapis mana lakikurqannatsu.

Currently Selected:

Génesis 24: qvmB

Highlight

Copy