Génesis 35

Bet-elcho Jacobta Tayta Dios bendicionninta qoshqan

1Tsaypitanami Jacobta Tayta Dios kayno nirqan: <<Imaykitapis apakurkur Bet-elcho tänaykipaq aywakuy. Wawqiki Esaúpita qeshpir aywakuykaptiki yuripashqä#Gén. 28.10-22. Bet-elman chayaykur altarta perqanki adoramänaykipaq>>.

2Tayta Dios tsayno niptinmi tsurinkunata, warminkunata y ashmayninkunatapis Jacob kayno nirqan: <<Tsararashqayki ïdulukunata lapanta jitapäkuy. Purificakur armakushpayki röpaykita trukakäriy. 3Kananqa Bet-elmanna aywashun altarta perqarkur imaypis yanapamaq Tayta Diosta adoranantsipaq. Paymi fiyupa nakar maypa puriptïpis yanapamashqa>>.

4Tsayno niptinmi tsararashqan ïdulukunata y arëtikunatapis#35.4 Tsay arëtikunaqa rikatsikunanpaq y ïdulukunata adorananpaqmi karqan. Tsaymi Jacob mana munarqantsu pipis tsararänanta. jorqurir Jacobta qoykurqan. Tsaykunatami Jacobqa Siquem cercancho kaykaq encina yöra sikinman pampaykurqan.

5Taykashqanpita aywakäriptinmi tsay particho taq runakunapa shonqunman Tayta Dios fiyupa mantsakuyta churarqan mana qatipänanpaq. 6Tsaymi Jacobwan aywaq kaqqa lapan chayarqan Canaáncho kaykaq Luz markaman. Tsay markapa jukaq jutinmi kaykan Bet-el. 7Tsaychömi Jacobqa altarta perqarkur jutinta churaparqan El-Bet-el#35.7 El-Bet-el ninanqa Bet-elcho yuripashqan Dios ninanmi. jutin kananpaq. Tsay jutinta churaparqan wawqinpita qeshpir aywakuykaptin Tayta Dios tsaycho yuripashqanpitami.

8Bet-elcho Jacob kaykaptinmi Débora wanurqan. Déboraqa karqan Rebecata pishilanpita ashmaq warmimi. Wanuykuptinmi pampapäkurqan Bet-el marka cercancho kaykaq encina yöra sikinman. Tsay partipa jutintami churaparqan Alón-bacut#35.8 Alón-bacut ninanqa waqay encina ninanmi. jutin kananpaq.

9Padan-arampita kutiykämuptinmi Jacobta Tayta Dios yapay yuriparkur bendicionninta qorqan kayno nir: 10<<Kananpitaqa mananami Jacobnatsu jutiki kanqa, sinöqa Israelnami>>.#Gén. 32.28. Tsayno nirmi jutinta trukatsirqan.

11Mastapis Tayta Dios kayno nirqan: <<Noqami kaykä El-Shaddai.#35.11 El-Shaddai ninanqa lapanpaq munayniyuq Dios ninanmi. Qampita miraqkuna atskaman miratsun. Paykunamanmi bendicionnïta churashaq tsaytsikaman mirar atska nacionkuna kananpaq. Paykunapitami reykunapis kanqapaq. 12Qamtami qoykushayki Abrahamta y Isaacta rikatsishqä jalqakunata y raqrakunatapis. Wanuptikipis qampita miraqkunatami qoykushaqpaq>>.#Gén. 17.4-8.

13Jacobwan tsayno parlarkurmi Tayta Dios aywakurqan.

14Tsawraqa Tayta Dioswan parlashqan kaqcho wanka rumita Jacob ichitsirqan. Nirkurmi Diosta adorashpan tsay wanka jananman vïnuta y aceitita winaparqan. 15Tayta Dioswan parlashqanpitami tsay partipa jutinta Jacob churaparqan Bet-el#35.15 Bet-el ninanqa Diospa wayin ninanmi. jutin kananpaq.#Gén. 28.19.

Raquel wanushqan

16Bet-elcho taykashqanpitanami Jacob aywakurqan Efrataman. Tsayman chayaykaptinmi killan aypämushqana kaptin Raquelta wachay nanay tsarirqan. Tsaychömi wachayta mana kamäpakur fiyupa nakarqan.

17Tsayno nakaptinmi Raquelta partëra kayno nirqan: <<Ama lakikuytsu. Kanan yuriq wawaykipis olqumi>>.

18Pasaypa wanuykashqanchönami Raquel kayno nirqan: <<Benoni#35.18a Benoni ninanqa nakarraq wachashqä wawä ninanmi. katsun kay wawäpa jutin>>. Papäninnami tsay tsurinpa jutinta churaparqan Benjamín#35.18b Benjamín ninanqa kuyay tsurin ninanmi. jutin kananpaq. 19Nakaytaraq wacharirmi Raquelqa wanurqan. Wanuykuptinnami Efrataman aywaq näni nawpanman pamparqan. Tsay partitami kananqa Belén nipäkun. 20Raquelta pampashqan jananmanmi Jacobqa wankata ichitsirqan señal kananpaq. Tsay wankata rikarmi kananyaqpis musyantsi maynincho Raquel pamparashqantapis.

Jutsata Rubén rurashqan

21Raquelta pampashqan kaqpita aywakurmi Israel#35.21 Israelqa Jacobpa jukaq jutinmi karqan. patsakurqan Edar törri washa lädunman. 22Tsaycho taykaptinmi Jacobpa tsurin Rubén papäninpa concubïnan Bilhata yaykaparqan. Tsurin tsayno yaykapashqanta musyaykurmi taytan pasaypa rabyakurqan.

Jacobpa tsurinkuna

1 Crónicas 2.1-2

Israelpa olqu tsurinkuna karqan chunka ishkaymi.

23Leapa qechpa wawan karqan Rubén.

Paypa qepanman yuriqkunami karqan Simeón, Leví, Judá, Isacar y Zabulón.

24Raquelpa wawankunanami karqan José y Benjamín.

25Raquelpa ashmaynin Bilhapa wawankunanami karqan Dan y Neftalí.

26Leapa ashmaynin Zilpapa wawankunanami karqan Gad y Aser.

Jacobpa tsay tsurinkuna lapanpis yurirqan Padan-aramchömi.

Isaac wanushqan

27Tsaypitanami Jacob aywarqan Mamre partiman taytan Isaacta watukuq. Mamriqa karqan Quiriat-arba cercanchömi. Quiriat-arbapa jukaq jutin kaykan Hebrónmi. Tsaychömi Abrahampis unay tarqan.#Gén. 13.18. 28Pachak pusaq chunka (180) watami Isaac kawarqan. 29Pasaypa awkinyashqa wanukushpanmi unay aylunkuna kaqman aywakurqan. Ayantami Esaú y Jacob pamparqan.

Currently Selected:

Génesis 35: qvmB

Highlight

Copy