Génesis 41

Faraón sueñushqan

1Tsaypita ishkay wata pasarkuptinnami sueñuynincho Faraónqa Nilo mayu kuchuncho ichiraykarqan. 2Tsaychöshi rikarqan kuyaylapaq qanchis wera wäkakuna mayupita yarqaramur ututu chawpincho qewata mikurkaykaqta. 3Tsay wäkakunapa qepantanashi yarqamurqan melanaypaq qanchis aqra wäkakuna. Tsay wäkakunashi talukarqan mayu kuchuncho kuyaylapaq wera wäkakunaman. 4Melanaypaq aqra wäkakunashi mikukurkurqan qanchis kuyaylapaq wera wäkakunata. Tsayta sueñuykashqanchöshi Faraónqa rikcharkurqan.

5Tsaypita yapay punurshi sueñurqan juk yöralapita qanchis espïga trïgukuna winaykämuqta. Tsay espïgakunaqa karqan kuyaylapaq jatusaqshi. 6Ali espïgakuna winamushqan qepantashi yapay winamurqan juk yöralapita qanchis espïgayuq trïgukuna. Tsay trïgukunaqa inti jeqamunan kaq lädupita shamuq wayra rupaptin pasha pashala karqan. 7Tsay qarwashtashqa espïgakunashi mikukurkurqan qanchis kuyaylapaq jatusaq espïgayuq kaq trïgukunata. Tsayta sueñuykashqancho Faraónqa rikcharkamur tantiyakunanpaqqa sueñuynilanmi karqan.

8Tsay sueñushqan tutami fiyupa lakikur Faraón qayatsirqan Egiptucho kaykaq lapan musyakuqkunata y yachaqkunata. Qayatsishqan runakuna chayaykuptinnami wilaparqan imata sueñushqantapis. Tsayno wilapaptin manami mayqanpis tantiyarqantsu sueñushqankuna imapaq kashqantapis.

9Pipis tantiyatsiyta mana kamäpakuptinmi vïnu ruraqkunapa mandaqnin kayno nirqan: <<Tayta Faraón, juk runa ruwakamashqanta kanan yarparkü. 10Fiyupa rabyashpaykimi noqata y tanta ruraqkunapa mandaqninta watatsimarqayki capitanpa wayincho kaykaq carcilman. 11Tsaychömi tanta ruraqkunapa mandaqnin y noqapis ima pasamänanpaq kashqantapis tsay tsakay sueñupäkurqä. 12Tsay carcilchömi juk hebreo mözupis wataraykan. Pay karqan wardiakunapa capitanninpa ashmayninmi. Sueñushqäkunata wilapaptïmi tantiyatsipäkamarqan imapaq kashqantapis. 13Tsay mözu nimashqannölami noqata yapay arunäpaq kutitsimashqanki y tanta ruraqkunapa mandaqninta wanurkatsir qeruman warkutsishqanki>>.

14Tsayno niptinmi Faraónqa Joséta qayatsimurqan. Tsaymi carcilpita jorqaramuptin Joséqa aqtsanta y shapranta chipyaq rutukurir ali röpata trukakurir Faraón kaqman aywarqan. 15Chayaykuptinnami Faraón kayno nirqan: <<Manami pipis tantiyayta kamäpakuntsu sueñushqä imapaq kashqantapis. Qampaqmi musyashqä sueñushqäkuna imapaq kashqantapis tantiyashqaykita>>.

16Tsayno niptinmi José kayno nirqan: <<Noqaqa manami kikiläpitatsu tantiyä runa imapaq sueñushqanta, sinöqa Tayta Dios tantiyatsimaptinraqmi sueñushqayki imapaq kashqantapis tantiyatsishayki>>.

17Tsawraqa Joséta Faraón kayno nirqan: <<Sueñuynïchömi ichiraykashqä Nilo mayu kuchuncho. 18Tsaycho kaykaptïmi qanchis kuyaylapaq wera wäkakuna mayupita yarqarkamur ututu chawpincho qewata mikurkaykashqa. 19Tsaypita qepantami pasaypa melanaypaq qanchis aqra wäkakuna yarqamushqa. Tsay niraq wäkakunataqa manami imaypis kay Egiptucho rikashqätsu. 20Tsay melanaypaq aqra wäkakunami mikukurkushqa puntata yarqamuq kuyaylapaq wera wäkakunata. 21Wera wäkakunata mikurpis manami aqra wäkakunaqa werayashqatsu. Tsayta sueñuykashqächömi rikchakarkamushqä.

22<<Tsaypita yapay punushqächömi sueñushqä juk yöralapita qanchis espïga trïgukuna winaykämuqta. Tsay espïgakuna kuyaylapaq jatusaqmi kashqa. 23Qepantanami winamushqa pasaypa pashatashqa espïgayuq trïgukuna. Tsayno karqan inti jeqamunan kaq lädupita shamuq wayra rupashqa kaptinmi. 24Tsay pashatashqa espïgakunami mikukurkushqa puntata ali winamuq trïgupa espïgakunata. Tsayno sueñushqäkunatami lapan musyakuqkunata wilapashqä. Manami mayqanpis tantiyantsu imapaq kashqantapis>>.

25Faraón tsayno wilaptinmi José kayno nirqan: <<Tayta, sueñuynikicho rikashqaykiqa ishkanpis tsay yarpaylami kaykan. Qamtaqa Tayta Diosmi imata rurananpaq kaqtapis rikatsishushqanki. 26Qanchis wera wäkakuna y qanchis kuyaylapaq winamuq trïgu espïgakunaqa qanchis watami kaykan. Ishkanpis tsay yarpaylami kaykan. 27Tsaynölami wera wäkakunapa qepanta yarqamuq melanaypaq aqra wäkakuna y wayrawan pashatashqa winamuq trïgukunapis qanchis watakunami kaykan. Tsaykunata sueñushqanki qanchis wata muchuy kananpaqmi. 28Nishqänölami lapanpis pasanqa. Tayta Diosmi sueñuynikicho musyatsishushqanki ali cosëchapis muchuypis kananpaq kashqanta.

29<<Qanchis watami kay Egiptucho shuntaytapis mana atipaypaq mikuy wayunqa. 30Tsaypita qanchis watami pasaypa muchuy kanqapaq. Mikuy wayunanpaq kashqanta manami pipis yarpanqapaqtsu. Pasaypa muchuy kaptinmi runakuna fiyupa nakapäkunqapaq. 31Tsaytsika cosëchata shuntashqankunapis chipyaqmi ushakanqa. 32Tayta Dios tsayno rurananpaq walkalanami pishiykan. Tsayta rasunpa cumplinanpaqmi ishkay kuti sueñutsishushqanki.

33<<Tayta Faraón, tsayno kananpaq kaykaptinqa tantiyakuq y yachaq runata churay kay nacioncho trïguta shuntatsinanpaq. 34Tsaynöpis gobernadorkunata churay kay nacioncho maytsay markamanpis trïgu shuntaq aywananpaq. Paykuna shuntatsimutsun pitsqa arröbapita juk arröbata pirwatsinanpaq. Qanchis wata ali cosëcha kashqanyaq tsaynöla pirwatsitsun. 35Markakunacho tsayno pirwatsitsun qampa munaynikichöna kananpaq. Tsaymi muchuy kaptin runakuna mikunanpaq kanqa. 36Tsaynöpami qanchis wata muchuy kaptin kay Egiptucho trïgu kanqa runakuna yarqaypita mana wanunanpaq>>.

Gobernador kananpaq Joséta churashqan

37José yätsishqantami Faraón y mandäshiqninkunapis chaskikurqan. 38Tsaymi Faraón kayno nirqan: <<¿Maylachöqa tarishuntsuraq kay mözutano Tayta Dios yanapaptin ali yarpayniyuqta?>>

39Tsayno nirmi Joséta kayno nirqan: <<Tayta Diosmi tantiyatsishushqanki sueñushqäkuna imapaq kashqantapis. Qamnöqa manami pipis kantsu tantiyakuq y yachaq runaqa. 40Tsaymi kananpitaqa qampa makikicho kanqa lapan palaciüpis.#Hech. 7.10. Kay nacionchöqa qam mandashqaykitami lapan runa cäsukunqa. Noqalami rey kashpä qampita mas munayniyuq kashaq. 41Qamtami kanan churaykä intëru Egipto nacionpa gobernadornin kanaykipaq>>.

42Tsayno nirmi Faraónqa makinpita sëlluyuq sortëjanta jorqurir Joséta jatiparqan. Nirkurmi yanapaqninkunata nirqan lïnupita rurashqa fïnu röpata y qoripita walqatapis jatipänanpaq. 43Nirkurnami Joséta witsätsirqan Faraónpa qepanta aywaq carrëtaman. Tsaynöpis yanapaqninkunata mandarqan puntanta aywar kayno ninanpaq: <<¡Gobernadornintsita chaskikäriy!>>

Tsaynöpami Egiptucho gobernador kananpaq Joséta churarqan. 44Tsayno churarmi Joséta Faraón kayno nirqan: <<Egiptucho noqala mandaq kaptïpis qam mana niptikiqa manami pipis imatapis ruranqatsu>>.

45Nirkurnami Faraónqa Josépa jutinta trukatsirqan Zafnat-panea jutin kananpaq. Tsaypitanami On markapa cüran Potiferapa tsurin Asenatwan tätsirqan. Tsaynöpami Egiptucho gobernador kayman José chayarqan. 46Kimsa chunka (30) watayuq kaykaptinmi Joséta Faraón kaqman aparqan. Tsaypitanami intëru Egiptupa Joséqa markan markan purirqan runakuna kamarikunanpaq yätsishpan.

47Qanchis watami intëru Egiptucho trïgu wayurqan shuntaytapis mana atipashqanyaq. 48Tsaymi Joséqa qanchis wata maytsay markakunachöpis trïguta shuntatsirqan. Shuntatsishqan trïgutami cada markacho pirwatsirqan. 49Aquyshatanöraqmi Joséqa tsaytsika trïguta shuntatsirqan. Aläpa atska kaptinmi ayka kashqanta tupuytapis mana kamäpakurqantsu.

50Manaraq muchuy qalaykuptinmi Josépa ishkay tsurinkuna yurirqan warmin Asenatcho. 51Qechpa tsurin yuriptinmi José kayno nirqan: <<Aylükunata y nakashqäkunata mana yarparänäpaqmi Tayta Dios yanapamashqa>>. Tsaymi jutinta churaparqan Manasés#41.51 Manasés ninanqa qonqätsin ninanmi. jutin kananpaq.

52Shulka kaq tsurin yuriptinmi José kayno nirqan: <<Kay nacioncho aläpa nakashqa kaptïpis tsurïkuna kananpaqmi Tayta Dios yanapamashqa>>. Tsaymi jutinta churaparqan Efraín#41.52 Efraín ninanqa miraq ninanmi. jutin kananpaq.

53Qanchis watami shuntaytapis mana atipaypaq Egiptucho mikuy wayurqan. 54Tsaypitaqa José nishqannölami maytsay nacionchöpis fiyupa muchuy qalaykurqan.#Hech. 7.11. Egiptuchömi itsanqa José pirwatsishqan tsaytsika mikuykuna karqan runakuna rantinanpaq. 55Tsaymi Egiptucho runakuna aywarqan mikuynin ushakaptin Faraónman trïgu manakuq. Chayaptinmi Faraónqa kayno nirqan: <<Trïguta munarqa Joséman aywar pay nishushqaykita rurapäkuy>>.

56Intëru nacioncho muchuy kaptinmi runakunata rantikunanpaq trïgu pirwashqan wayikunata José kichatsirqan. Waranlanta waranlantami pasaypa muchuy karqan. 57May nacionchöpis mikuy mana kaptinnami maytsaypitapis Egiptuman runakuna aywarqan Josépita trïguta rantinanpaq.

Currently Selected:

Génesis 41: qvmB

Highlight

Copy