Lucas 1

1Tayta Teófilo, atska runakunami qelqapäkushqa Jesucristo kay patsacho imata rurashqantapis. 2Jesucristuwan qalaykushqanpita patsa puriqkuna wilakushqannölami qelqapäkushqa. Paywan puriqkuna imata rurashqantapis rikashqa kaptinmi wilakärinanpaq Jesucristo kacharqan. 3Tsaymi noqapis qalaykushqanpita patsa imano kashqantapis shumaq tapupakuykur lapanta qampaq qelqaykämü. 4Tsaymi qampis kayta liyir musyankipaq Jesucristupita wilapäshushqayki rasunpa kashqanta.

Bautizaq Juan yurinanpaq kashqanta ángel wilakushqan

5Judeacho Herodes rey kaykashqan witsanmi juk cüra karqan Zacarías jutiyuq. Payqa Abías cürapita miraq karmi tsay aylu cürakunawan Tayta Diosta templucho sirvipäkuq.

Zacaríaspa warminpa jutinmi karqan Elisabet#1.5 Wakin traduccionkunachöqa Isabel ninmi.. Paypis karqan cüra Aarónpita miraqmi.

6Paykunaqa Tayta Dios munashqanno kawarmi mandamientunkunata y leyninkunata imaypis cumplipäkuq. 7Elisabet qoluq kaptinmi wawan mana karqantsu. Paykunaqa ishkanpis chachanami karqan.

8Juk kutimi Zacaríasta y paywan aruq cüra mayinkunata turnun töcarqan templucho Tayta Diosta sirvinanpaq. 9Costumbrinkuna kashqannömi cürakuna suertita jitapäkuq. Tsaymi Zacaríaspaq suerti yarqamurqan templuman yaykur inciensuwan qoshtatsinanpaq.#Éxo. 30.7-9. 10Templucho inciensuwan qoshtatsishqanyaqmi waqtacho runakuna Tayta Diosta manakurkaykarqan.

11Inciensuwan qoshtaykätsiptinmi altarpa alawqa kaq nawpancho Tayta Diospa angilnin Zacaríasta yuriparqan. 12Angilta rikaykurmi Zacarías fiyupa mantsakar ima ruraytapis kamäpakurqantsu.

13Tsawraqa ángel kayno nirqan: <<Zacarías, ama mantsakuytsu. Manakushqaykitami Tayta Dios mayashushqanki. Tsaymi warmiki Elisabet olqu wamrata wachakunqa. Paypa jutinta churapanki Juan kananpaq. 14Tsuriki yuriptinmi pasaypa kushikunkipaq. Tsaynölami pïmay runakunapis kushikärinqa.

15<<Tayta Dios munashqannömi tsuriki kawanqa. Payqa manami vïnuta ni ima shinkatsikuqtapis upunqatsu.#Núm. 6.1-3. Mamanpa pachancho kashqanpita patsami Espíritu Santupa munaynincho kanqa. 16Diospa wilakuyninta wilakuptinmi Israel runakuna jutsankunata kacharir Tayta Dios munashqannöna kawapäkunqa. 17Tayta Diospa munayninwan profëta Elías wilakushqannömi paypis wilakunqa.#1.17 Jesucristo manaraq shamuptin profëta Elíasta Tayta Dios kachamunanpaq kashqanta runakuna shuyäkurqan (Mal. 4.5-6). Elíaspita masta musyanaykipaq liyinki 1Rey. 17.1—19.21; 2Rey. 2.1-18. Wilakuptinmi warmikunapis wawankunawan y runakunapis tsurinkunawan kuyanakunqa. Mana cäsukuqkunatapis Tayta Dios munashqannöna kawapäkunanpaqmi tantiyatsinqa. Tsaynöpami runakunata yachatsinqa Tayta Dios kachamushqan Cristo shamuptin chaskikärinanpaq>>.

18Niptinmi Zacarías kayno nirqan: <<¿Imanöpataq musyäman nimashqaykino kananpaq kashqanta? Noqaqa awkinnami kä. Warmïpis chakwannami>>.

19Tsaymi ángel kayno nirqan: <<Noqaqa Tayta Diospa nawpancho sirviqnin Gabrielmi kaykä. Paymi kachamashqa kay ali wilakuyta qamta wilanäpaq. 20Qamta wilashqäkuna lapanmi cumplikanqa. Nishqäkunata mana criyishqaykipitami kananqa tsuriki yurinanyaq shimiki pashtanqatsu>>.

21Tsayyaqmi waqtacho kaqkuna shuyarpaykarqan kayno ninakushpan: <<¿Imanirraq kay hörayaq Zacarías mana yarqamuntsu?>>

22Templupita yarqarkamurnami shimin mana pashtaptin shuyarpaykaq runakunata sëñalapana parlaparqan. Tsawraqa paykuna yarpapäkurqan templu rurincho imapis yuripashqanta.

23Templucho turnunta cumplirkurnami wayinpana Zacarías kutikurqan. 24Tsaypitanami warmin Elisabet qeshyaq rikakur wayinpita pitsqa killa mana yarqukurqantsu kayno nir: 25<<Tayta Diosmi kuyapaykalämashqa wawata tarinäpaq. Kananpitaqa manami pipis penqapämanqanatsu wawaynaq kashqäpita>>.

Jesús yurinanpaq ángel wilakushqan

26Elisabet qeshyaq rikakushqanpita soqta killatanami ángel Gabrielta Tayta Dios kachamurqan Galileacho Nazaret markaman. 27Tsaychömi virgen María tarqan. Payqa unay rey Davidpa aylun Joséwan tänanpaq parlakushqanami karqan. 28Chayaykurmi ángel kayno nirqan: <<¡Kushikuy, María! ¡Tayta Diosmi akrashushqanki! Payqa qamwanmi kaykan. [Wakin warmikunapitapis masmi qamta Tayta Dios kuyashunki]>>.

29Niptinnami María mantsakashqa yarpachakur kayno nirqan: <<¿Imanirtaq tsayno niman?>>

30Tsawraqa ángel kayno nirqan: <<María, ama mantsakuytsu. Tayta Diosmi kuyapäshushpayki akrashushqanki. 31Kananpitami qeshyaq rikakunki. Wamrayki yuriptinna jutinta churapanki Jesús jutin kananpaq. 32Pasaypa munayniyuq kaptinmi Tayta Diospa Tsurin kashqanta nipäkunqa. Unay aylun Davidno rey kananpaqmi Tayta Dios churanqa. 33Paymi Jacobpita miraq runakunata imayyaqpis mandanqapaq. Pay mandaykashqanqa imaypis manami ushakanqatsu>>.

34Tsawraqa María kayno tapurqan: <<Runata manaraq reqiykarqa ¿imanöpataq qeshyaq rikaküman?>>

35Niptinmi ángel kayno nirqan: <<Espíritu Santu qamman shamuptinmi Tayta Diospa munayninwan qeshyaq rikakunki. Tsaymi santu wawayki yuriptin Diospa Tsurin kashqanta nipäkunqa.

36<<Ayluyki Elisabetpis chakwanna kaykarmi qeshyaqna kaykan. Pay qoluq kashqanta nirkaykaptinpis soqta killanami qeshyaq kaykan. 37Tayta Diospaqqa manami imapis sasatsu>>.

38Tsawraqa María kayno nirqan: <<Noqaqa Tayta Diospa makinchömi kaykä. Nimashqaykino kaykulätsun>>.

Tsayno nirkuptinmi ángel aywakurqan.

Elisabetta María watukushqan

39Tsay junaqkunami María warakayla aywarqan Judea provinciapa jalqankunacho kaykaq juk markaman. 40Chayaykurnami Zacaríaspa wayinman yaykurir Elisabetta winchikurqan. 41Winchikuptinmi Elisabetpa pachancho wamrapis kuyurqan. Tsawraqa Espíritu Santupa munayninwanmi Elisabet 42fuertipa kayno nirqan: <<¡Lapan warmikunapitapis masmi qamtaqa Tayta Dios bendicionninta qoshushqanki! ¡Qeshyaq kaykashqayki wawaykitapis bendicionnintami qoshqa! 43¿Pitaq noqa kä Señornïpa maman kaykar watukaykamänaykipaq? 44Winchikamashqaykita mayaykurmi pachächo wawäpis kushikuypita kuyushqa. 45¡Tayta Dios nishushqaykita cumplinanpaq kashqanta criyishqaykipitami kushishqa kaykanki!>>

Tayta Diosta María alabashqan

46Tsawraqa María kayno nirqan:

<<Lapan shonqüwanmi Tayta Diosta alabä.

47Kushikuypitami salvamaqnï Tayta Diosta alabä.

48Manakaqla kaykaptïpis kuyapämarmi akramashqa.

Kananpitaqa imaypis runakunami nipäkamanqa Tayta Dios bendicionninta noqaman churamushqanta.

49Munayniyuq Tayta Dios alimi rikamashqa.

Payqa santumi kaykan.

50Payta mantsakuqkunataqa imaypis kuyapanmi.

51Pipis mana rurashqankunatami payqa ruran.

Yachaq tukuqkunapa yarpayninkunatapis manakaqmanmi churan.

52Nación mandaqkunatapis mandaq kashqanpita qarqunmi.

Ali shonqukunatanami mandaq kananpaq churan.

53Waktsakunataqa imaykatapis kamaripanmi.

Rïcukunatami itsanqa waktsayätsin.

54Sirviqnin Israel runakunataqa kuyapashpanmi imaypis mana qonqaypa yanapan.

55Imayyaqpis tsayno yanapamänantsipaqmi unay ayluntsi Abrahamta y paypita miraqkunata promitirqan>>.#Gén. 12.1-3; 22.16-18.

56Elisabet kaqcho kimsa killano qoyarkurnami wayinpana María kutikurqan.

Bautizaq Juan yurishqan

57Killan aypämushqana kaptinmi Elisabetqa olqu wamrata yuripakurqan. 58Tsayta musyaykurmi aylunkuna y reqinakushqankuna Elisabetman aywaykur kushishqa kayno nipäkurqan: <<¡Tayta Diosmi kuyapäshushpayki yanapashushqanki wawayki kananpaq!>>

59Pusaq junaqniyuq wamran kaykaptinnami Zacaríaspa wayinman aywapäkurqan wamrata señalananpaq.#Gén. 17.10-12; Lev. 12.3. Tsaychömi taytan Zacaríaspa jutilanta churayta munapäkurqan. 60Tsawraqa maman kayno nirqan: <<¡Manami tsaynötsu jutin kanqa, sinöqa Juanmi!>>

61Tsawraqa kayno nipäkurqan: <<Ayluykikuna tsay jutiyuq mana kaykaptinqa ¿imanirtaq Juan jutin kananta munaykanki?>>

62Tsawraqa ima jutita churapänanpaqpis sëñaylapa Zacaríasta tapupäkurqan. 63Tsawraqa takshala tablata manakurir tsayman qelqarqan kayno nir: <<Juanmi jutin kanqa>>. Tsayta liyirmi lapanpis espantashqa rikakärirqan. 64Tsay hörami Zacaríasqa shimin pashtarkuptin Tayta Diosta alabayta qalaykurqan.

65Tsaykunata rikaykurmi lapan reqinakushqankuna espantashqa rikakärirqan. Tsaykuna pasashqanpitami intëru Judea jalqacho pïmaypis parlapäkurqan. 66Tsay wamrata Tayta Dios yanapashqanta parlapäkuptinmi mayaqkuna yarpachakärirqan kayno nir: <<Tsay wamra winarkurqa ¡ima munayniyuqraq kaykunqa!>>

Tayta Diosta Zacarías alabashqan

67Espíritu Santupa munayninwanmi Zacarías kayno nirqan:

68<<Israel runakunata kuyaq Tayta Dios alabashqa kaykulätsun.

Payqa salvamänantsipaqmi shamushqa.

69Sirviqnin Davidpa aylunpita munayniyuq salvamaqnintsi yurinanpaqnami kaykan.

70Tsayno yurinanpaqmi unaypita patsa santu profëtakunawan wilakatsirqan.

71Contrantsikunapa makinpita y chikimaqnintsikunapa munayninpita jorqamänantsipaqmi musyatsimarqantsi.

72<<Unay ayluntsikunata kuyaparmi sagrädu pactuta cumplinqa.

73Jurashpanmi unay ayluntsi Abrahamta promitirqan

74chikimaqnintsikunapa makinpita jorqamänantsipaq

y mana mantsakuypa paylatana sirvinantsipaq.

75Tsawraqa jutsata mana ruraypa pay munashqanno waran waran imaypis kawapäkushun>>.

76Tsurintanami Zacarías kayno nirqan:

<<Kuyay tsurilä, salvamaqnintsi shamuptin chaskikärinanpaqmi nänita kichaqno runakunata wilapankipaq.

Tsaymi munayniyuq Tayta Diospa profëtan kashqaykita nipäkunqa.

77Tayta Dios kuyashqan runakunata perdonar salvananpaq kashqantami wilanki.

78Tayta Diosnintsi kuyapämashpantsimi jana patsapita juk salvadorta kachamunqa.

Tsayqa patsa waraqnömi kushikuypaq kanqa.

79Atskino karmi tsakäpakushqano kawaqkunata y wanuyta mantsakuqkunata salvanqa.

Tsaynöpis tantiyatsimäshun jawka kawanantsipaqmi>>.

80Zacaríaspa tsurinqa Tayta Dios munashqanno kawananpaq winaylan tupumi shumaq tantiyakurqan. Tayta Diospa wilakuyninta Israel mayinkunata wilapayta qalaykushqanyaqmi chunyaq jirkalacho tarqan.

Currently Selected:

Lucas 1: qvmB

Highlight

Copy