Luka 18

Umwanachi unsimbe nu Nkombe

1Ayanena unnumbe fino yapepe Leesa manda yoshi nanti kutonta. 2Ati: “Kwali umunsi umwi unkombe atakopa Leesa nanti ukumanya antu, awe. 3Umunsi uo kwene mwali umwanachi umwi unsimbe, wino wayanga kunali, wati: ‘Unputwile unnandu na wino tululemanila nawe.’ 4Nawe walile akana, nga ichisila um-mweso waakwe wati: ‘Nanti fino ntachindike Leesa nanti ukumanya antu; 5leelo fino unsimbe wi atala nsuntila, namputwila unnandu wakwe, atanngasha kuno atala wisa kunondi.’ ” 6Mwene wati “Pulikini fino alulanda unkombe njipe wiyo. 7Nga Leesa, Chene! ataluvwangila yao yano wasolola, yano yalunnilila usiku nu nsanya, nanti ukuyatekelela? 8Ndumunena, aluyafwangila suwa. Leelo pano Mwana-ntu wacha wisa, alusana usumilo kuno ukushi?”

Unfaliseo na kalifya wikodi

9Nga wayenena unndumbe u antu yano yautenshanga fino aya chumi, nu kusula anji yoshi, ati: 10“Antu yaili yapisile ukuya un-ng'anda-nkulu-iyi-Leesa ukuyusalika; wenga unFaliseo nu wa uwili kalifya wikodi. 11UnFaliseo wiwi awimilila nu kusalika um-mweso waakwe fi: ‘We Leesa, nakusamalisha, kuno nemwi ntakosile anji, yakapoka-fya-antu, aipe, apundu, nanti wiwi kalifya wikodi. 12Nemwi nkuishilisha amaila yaili uku juma, nkulufima isempu likumi um-ifintu fyane fyoshi fino ndupata.’ 13Leelo kalifya wikodi wiyo wene wimilila lwa patali, atachili akatusha nanti amaso yaakwe umwiyulu, leelo auma apa chifuwa, wati: ‘We Leesa, undolele inkumbo, nene wa maifyo.’ 14Ndumunena, wiyo waile uku ng'anda ukwakwe atalilwa ichumi, ukuluta unji. Kuno wensi wino waikusha, yalumchefya, na wino wauchefya, yalumkusha.”

Yesu wapepelela anche anono

(Mt 19:13-15; Mk 10:13-16)

15Yannetela ana anono, kuti ayemye; leelo alondeshi pano yalola, yayakalipila. 16Leelo wene Yesu aita yize kunali, ati: “Lekini anche yanono yize kunondi; mutachi yalesye, kuno antu ndi yao uwene wi Leesa uwao. 17Umwenemo ndumunena, untu wensi wino ataupokelile uwene-wi-Leesa wa mwana unnono, atalwingila mwenemo nanti uche.”

Unsafi umwi watondosha Yesu

(Mt 19:16-30; Mk 10:17-31)

18Kaili untu wikolo umwi amtondosha, wati: “Kasambilisha nsipe, nchite uli, kuti mpyane upuma wa manda ti?” 19Yesu wannena, waati: “Uku chani ulungita ne nsipe? Kushi unsipe, leelo wenga, nawe uli Leesa. 20Umanyile ifilangaso: Utachita ifya upundu; utumola untu; utachiya; utashutila ufi; uchindike so na nyoko.” 21Wene wati: “Yonsi yao nayalema fuma uwanche wane.” 22Yesu pano wapulika fiyo, annena wati: “Waulilwa ichintu chonga, kakashe fyoshi fino uli nafyo, uwankanya apina; newe uluwa wawika umwiyulu, apano uwise undondele.” 23Leelo pano wapulika ifintu fi, awa ni chikonko nkani, kuno walu nsafi nkani.

24Nga Yesu pano walola fiyo, wati: “Lolini, fino chatala asafi yano yataila ifyuma, ukwingila um-wene-wi-Leesa. 25Kuno changupala ntwanga-mwendo ukufuminkana umwilina lya sindani, ukuluta apakuti unsafi angingila um-wene-wi-Leesa.” 26Na yano yapulika, yaati: “Uwini wino angafyuka ngi fiyo?” 27Leelo wene wati: “Fintu fino fitangi fiombeke uku antu, fingaombeka kuli Leesa.”

28Nga Petlo annena, wati: “Lola, swemwi twasha ifintu fitu fyoshi nu kukulondela.” 29Ayanena, wati: “Umwenemo ndumunena, kushi untu wino washa ing'anda yaakwe, nanti unchi, nanti anina, nanti afyasi, nanti ana yaakwe, ku nnandu wa wene-wi-Leesa, 30wino atapokelela nkani amaila tupu um-manda ya, nu m-manda yano yalwisa upuma wa manda ti.”

Yesu walanda ilya utatu apa nfwa nu kututuluka kwakwe

(Mt 20:17-19; Mk 10:32-34)

31Nga atola yaya ikumi na yaili, ayanena, wati: “Lolini, twapita ukuya uku Yelusalemu, ni ifintu fyoshi fino uMwana-ntu waandikilwe na malau, filuombeka. 32Kuno alufimwa um-makasa ya antu yakulukuwa, yalumsoweka nu kumsewanya, yalumswila na mati. 33Yalumuma ni mikowa ni chisila yalumumola; nu wanda wa utatu alututuluka.” 34Leelo yatamanyile chimwi nanti uche apa maswi yao, ni chintu chi chafisime kuno yali, yatamanyile chino alufwanga.

Yesu waposha umpofu wa ku Yeliko

(Mt 20:29-34; Mk 10:46-52)

35Walangi pano wapalamila uku Yeliko, untu wenga nawe umpofu watensi umbali ya nsila, walombanga uwila. 36Nga pano wapulika amaumba yalupita, watondosha, waati: “Kwawa chani?” 37Yannena, yaati: “Yesu wa ku Nazaleti alupita.” 38Nga uma ichongo angaluti: “Yesu, mwana wi Daudi, unkumbukile!” 39Nga yano yalu ku nkolelo, yamchenzela, kuti atushe. Leelo wene alusha nkani ukukusha iswi, wati: “We mwana wi Daudi, unkumbukile!” 40Nga Yesu wimilila, walanda yannete kunali; na pano wampalamila, amtondosya, ati: 41“Ulushita nkuchitila chani?” Nawe ati: “Mwene, umpe ukulola.” 42Nga Yesu annena, ati: Pokelela ukulola; usumilo wako wakuposha.” 43Liyo kwene apiwa ukulola, annondela, na kuno alutensha Leesa. Na antu yoshi pano yalola ichintu chiyo, yatensha Leesa.

Currently Selected:

Luka 18: FNT1988

Highlight

Copy