Hechos 17

Tesalónicachö Pablupa y Silaspa contran shäriyanqan

1Tsaypita Anfípolis y Apolonia markakunapa päsarmi Pabluwan Silas Tesalónica markaman chäyarqan. Tsaychö sinagöga kaptinmi 2imaypis aywanqannö tsay sinagögaman Pablo aywarqan. Tsaychömi Dios Yayapa palabranta kimsa jamay junaq yachatsirqan. 3Tsaynö yachatsikurmi salvamaqnintsik Cristo wañunqanta y kawamunqanta tantiyatsirqan. Tsaynöllam nirqan: <<Jesúsmi salvamaqnintsik Cristo>>.

4Tsaynö niptinmi wakin Israel runakuna Jesucristuman creyikur Pabluwan y Silaswan juntakäyarqan. Tsaynöllam Dios Yayata cäsuq mana Israel runakunapis y reqishqa warmikunapis Jesucristuman atskaq creyikuyarqan. 5Peru Jesúsman mana creyikuq Israel runakunam sïqa Pabluta chikir mana alli runakunata niyarqan: <<Pablupa y Silaspa contran shäriyänanpaq runakunata willapäyay>>.

Tsaynö willapäyaptinmi Pablutawan Silasta ashirnin atskaq runakuna Jasónpa wajinman rabyashqa yaykuyarqan.

6Peru tsaychö mana tarirnam Jasóntawan wakin wawqikunatana autoridäkunaman apaykur niyarqan: <<¡Kay runakunam mana allikunata yachatsikur maytsaypa puriykäyan! ¡Tsaymi kanan kay markamanna chäyämushqa! 7¡Paykunatam Jasón patsatsishqa! <¡Jesús shutiyuq runam mas poderyuq rey> nirmi mandamaqnintsik rey Césarpa leyninkunata manakaqman churayan!>>

8Tsaynö niyaptinmi tsaychö runakuna y autoridäkunapis alläpa piñakuyarqan. 9Peru Jasóntawan wakin wawqikunata multata pägaskatsirmi autoridäkuna librina dëjayarqan.

Pabluwan Silas Berea markachö willakuyanqan

10Tsay paqasmi Pablutawan Silasta wawqikuna y panikuna Berea markaman kachayarqan. Bereaman chaykurmi sinagögaman yachatsikuq aywayarqan. 11Berea runakunaqa Tesalónica runakunapita mas tantiyakuq karmi Dios Yayapa willakuyninta llapan shonqunkunawan chaskiyarqan. Pabluwan Silas yachatsikuyanqan rasunpa kanqanta musyayänanpaqmi Dios Yayapa palabranta waran waran yachakuyarqan. 12Tsay markachömi atskaq Israel runakuna, mana Israel runakuna y mana Israel reqishqa warmikunapis Jesúsman creyikuyarqan.

13Dios Yayapa willakuyninta Bereachöpis Pablo willakuykanqanta musyaskirmi Tesalónicachö täkuq Israel runakuna tsayman aywayarqan. Chaykurmi Pablupa contran shäriyänanpaq runakunata willapäyarqan. 14Tsaymi wawqikuna y panikuna jina höra lamar kuchunman aywakunanpaq Pabluta despachayarqan. Silaswan Timoteunam Bereachö quëdayarqan. 15Pabluta pushaqkunanam Atenas markayaq chätsiyarqan. Kutikuyaptinnam Pablo nirqan: <<Bereaman chaykur Silastawan Timoteuta saslla kachayämunki>>.

Atenas markachö Pablo willakunqan

16Atenaschö Silastawan Timoteuta shuyararnin purirmi atska ïdulukunata rikar Pablo alläpa rabyanarqan. 17Tsaymi sinagögaman aywar Israel runakunata y Diosta cäsuq mana Israel runakunata Dios Yayapa willakuyninta tantiyatsiq. Pläzaman waran waran aywarmi runakunata willakuq.

18Tsaychömi Epicúreo y Estoico niyanqan yachayyuq runakunawan piñanakuyaq. Jesúspaq willakuptin y wañushqakuna kawayämunanpaq kanqanta willakuptinmi wakin runakuna niyarqan: <<Kay yachayyuq tukuq runa ¿imataraq parlanpis?>>

Wakinnam niyarqan: <<Kay runaqa mana reqinqantsik dioskunapaqmi parlan>>.

19Tsaymi mas tantiyatsinanpaq tsay runakuna Pabluta pushayarqan autoridäkuna qorikäyanqan Areópago niyanqanman. 20Tsaychömi Pabluta niyarqan: <<Qammi imaypis mana wiyayanqäta yachatsikuykanki. Tsaymi imanö kanqanta shumaq musyayta munayä>>.

21(Atenas runakuna y tsaychö täkuq juklä runakunam mushuq yachatsikuy kaptin imaypis wiyayaq. Tsaymi waran waran tsay wiyayanqanllata parlayaq.)

22Tsaynam Areópaguchö qorikashqa autoridäkunapa puntanman ichiykur Pablo nirqan: <<Atenas runakuna, noqa rikaykämi dioskunata respitar adoraykäyanqaykita. 23Kaychö purirmi ïdulu adorayänan wajikunata, altarkunata y ïdulukunatapis rikashkä. Tsaynöllam juk altarchö rikashkä <kay altarmi mana reqinqantsik diospaq> nir qellqashqa kaykaqta. Tsay mana reqiyanqayki Diospaqmi willakuykä.

24<<Paymi kay patsatawan llapan imaykata kamashqa. Ciëlutapis y kay patsatapis poderninchömi katsin. Tsaymi runakuna rurayanqan templuchöqa täkuntsu.#1Rey. 8.27; Isa. 42.5. 25Noqantsikqa manam ni imatapis payta alistapantsiktsu. Taypa rantinmi kawanapaqpis jamaynintsik y llapan wananqantsikkunatapis qaramantsik.

26<<Juk runallata kamaskirmi bendicionninta churamurqan atskaqman mirayaptin nacionkuna maytsaychöpis kananpaq. Paymi destinarqan tsay nacionkuna imayyaq kayänanpaq y mujunninkunapis maypa kananpaq. 27Dios Yayam tsaynö rurashqa imaykanöpapis payman creyikunapaq. Payqa manam noqantsikpita karuchötsu kaykan, sinöqa puntantsikchömi. 28Dios Yaya yanapamashqaraqmi kawantsik y purintsikpis. Marka majikipis shumaq yarpachakuskirmi qellqar nirqan: <Llapantsikmi paypa wamrankuna kantsik>.

29<<Dios Yayapa wamran kaykarqa ama yarpäshuntsu qoripita, qellaypita o rumipita rurashqa ïdulukunanö kanqanta. Tsaykunataqa runakunam yarpayllankunapita rurayan. 30Runakuna mana musyarnin ïdulukunata rurayanqanpita Dios Yaya manam castigarqantsu. Kananqa maytsaychö täkuq runakunatam nin ïdulukuna adorayta dëjaskir pay munanqannöna kawakuyänanpaq. 31Llapan runakunata mana jananpar juzgananpaqmi#Sal. 9.8. Dios Yaya juk runata akrashqa. Tsay runa pï kanqanta musyanapaqmi wañunqanpita kawatsimushqa>>.

32Wañunqanpita kawamunqanta niptinmi wakin runakuna Pabluta burlakur asipäyarqan. Wakin runakunanam niyarqan: <<Juk junaq mas tantiyatsiyämänaykipaqmi qayayäshayki>>.

33Tsaymi tsaypita yarquskir Pablo aywakurqan. 34Peru juk ishkay runakunam sïqa Pablo willakunqanman creyikur paywan qorikäyarqan. Paykunam kayarqan Areópaguchö mandakuq Dionisio, Dámaris shutiyuq warmi y mas wakin kaqkunapis.

Currently Selected:

Hechos 17: qxn

Highlight

Copy