Hechos 19
19
Éfesuchö Pablo willakunqan
1Corintuchö Apolos kanqanyaqmi Pabluqa markan markan aywar Éfesuman charqan. Tsaychö discïpulukunata tariskirmi 2tapurqan: <<¿Qamkunaqa Jesucristuman creyikur Espíritu Santuta chaskiyashkankiku?>>
Paykunanam niyarqan: <<Espíritu Santu kanqanta manam ni imaypis musyayashkätsu>>.
3Pablunam nirqan: <<Tsaynö kaptinqa ¿pipa yachatsikuyninta cäsurtan bautizakuyashkanki?>>
Niptinmi niyarqan: <<Juanpa yachatsikuyninta cäsurmi bautizakuyashkä>>.
4Pablunam nirqan: <<Juanmi runakunata bautizarqan jutsankunapita arrepentikur Dios Yaya munanqannö kawakuyänäpaq. Tsaynömi yachatsirqan Jesucristo shamuptin payman creyikuyänanpaq>>.#Mat. 3.11; Mar. 1.4, 7-8; Luc. 3.4, 16; Juan 1.26-27.
5Tsaynö niptinmi Señor Jesucristupa shutinchö bautizakuyarqan. 6Paykunapa umankunata yataykur Dios Yayata Pablo mañakuptinmi Espíritu Santu paykunaman shamurqan. Tsaymi juk idiömakunachö parlar Dios Yaya tantiyatsinqankunata parlayarqan. 7Tsay runakunam chunka ishkaynö kayarqan.
8Éfesuchö täkurmi sinagögaman aywar Dios Yayapa mandakuyninpaq Pablo kimsa killa mana mantsakur yachatsirqan. 9Tsaynö yachatsiptinmi wakin runakuna Jesúsman creyikuyta mana munar llapanpa puntanchö Diospa Näninta#19.9 Diospa Näninpaq parlarqa Jesucristupa willakuyninpaqmi parlaykan. manakaqman churayarqan. Tsaymi Jesúsman creyikuqkunawan sinagögapita yarquskir Tiranno shutiyuq runapa yachatsikuna wajinchöna Pablo waran waran yachatsirqan. 10Ishkay watana tsaynö yachatsikuptinmi entëru Asia provinciachö Israel runakunapis y mana Israel runakunapis Señor Jesucristupa willakuyninta wiyayarqan.
11Tsaychömi Dios Yayapa poderninwan milagrukunata Pablo rurarqan. 12Tsaymi Pablo töpanqan päñukunata y mandilkunatapis qeshyaykaqkunaman apayarqan. Tsaykunata töpatsiyaptinmi qeshyaykaqkuna kutikäyaq y supaykunapis runakunapita yarquyaq.
13Tsay witsaymi wakin Israel runakunapis puriyarqan runakunapita supaykunata qarqur. Paykunapis Jesúspa shutinchö supaykunata qarquyta munarmi niyarqan: <<Pablo willakunqan Jesúspa shutinchömi qarquq>>.
14Tsaynömi rurayarqan mandakuq sacerdöti Escevapa qanchis tsurinkuna. 15Qarquyta munayaptinmi supay nirqan: <<Noqa reqïmi Jesústa. Pablo pï kanqantapis musyämi. Qamkuna ¡pitan kayanki noqata qarquyämänaykipaq!>>
16Tsaynö nirmi supay ñakatsinqan runata löcuyaskatsir paykunata maqatsirqan. Tsaymi yawar püru qarashtulla tsay wajipita qeshpir aywakuyarqan. 17Tsaynö päsanqanta musyaskirmi Éfesuchö täkuq Israel runakuna y mana Israel runakunapis alläpa mantsakäyarqan. Tsaymi Señor Jesucristo poderösu kanqanta maytsaychö runakunapis musyayarqan.
18Jutsata rurayanqanta tantiyarmi Jesucristuman wakin creyikuqkunapis jutsankunata confesakuyarqan. 19Tsaynöllam brüja rurakuyänan mágica librunkunatapis qoriskir llapanpa puntanchö waykayarqan. Tsay librukunapa chaninmi karqan pitsqa chunka waranqa (50,000) jornalpa chanin. 20Tsaynöpam Dios Yayapa willakuynin poderösu kanqanta tantiyar atskaq runakuna chaskiyarqan.
21Tsaypitanam Pablo yarparqan Jerusalénpa aywananpaqqa Macedonia provinciachö y Acaya provinciachö wawqikunataraq y panikunataraq watukaq aywananpaq. Tsaynöllam yarparqan Jerusalénpita Romapa aywananpaq. 22Tsaymi Macedonia provinciaman puntayänanpaq Timoteutawan Erastuta kacharqan. Peru Pablum sïqa Asia provinciachö quëdakurqan.
Éfesuchö Pablupa contran shäriyanqan
23Tsay witsaymi Diospa Näninpaq#19.23 Diospa Näninpaq parlarqa Jesucristupa willakuyninpaqmi parlaykan. willakuyaptin Éfesuchö runakuna alläpa piñakuyarqan. 24Tsaynö piñakuyarqan Demetrio shutiyuq runa willaptinmi. Paymi Artemisa#19.24 Artemisatam latín idiömachö Diana niyan. niyanqan diösapa ichishaq templunkunata qellaypita ruraq. Tsaykunata rantikurmi Demetriuqa aruq majinkunawan atska qellayta gänayaq. 25Aruq majinkunata y paykunanö oficiuyuq runakunata qayaskatsirmi nirqan: <<Qamkunam musyayanki kay aruynintsikwan alli gänanqantsikta. 26Rikäyanqaykinöpis y wiyayanqaykinöpis Pablum yachatsikur nikan: <Runa ruranqan ïdulukunaqa manam rasunpa Diostsu>. Tsaynö yachatsikurmi atskaq runakunata creyiykätsin. Manam kay Éfesullachötsu, sinöqa entëru Asia provinciachömi creyiykätsin. 27Tsaynö creyitsiptinmi arunqantsikkunata y diosnintsik Artemisapa templuntapis manakaqman churayanqa. Artemisata entëru Asiachö täkuqkuna y entëru munduchöpis mananam respitayanqanatsu>>.
28Demetrio tsaynö niptinmi aruq majinkuna alläpa piñakur yapay yapay niyarqan: <<¡Diosnintsik Artemisa alabashqa katsun!>>
29Tsaynö niyanqanta wiyarmi tsay markachö täkuq wakin runakunapis qayaykachäyarqan. Alläpa rabyarmi Gayutawan Aristarcuta coliseuman prësu apayarqan. Gayuwan Aristarcuqa Pabluta yanapaqmi Macedoniapita shayämushqa kayarqan. 30Runakunata tantiyatsinanpaq Pablupis coliseuman aywayta munaptinmi wawqikuna y panikuna amatsayarqan. 31Tsay provinciachö wakin autoridäninkuna Pabluwan reqinakurmi willakatsiyarqan coliseuman mana aywananpaq.
32Coliseuchö runakuna juknö juknö qayaykachar büllata rurayaptinmi wakin runakuna imapaq tsayman qorikäyanqantapis musyayarqantsu. 33Tsaychö Israel runakunanam Alejandro shutiyuq runata parlamunanpaq yaykatsiyarqan. Tsaymi runakunapa puntanman Alejandro yaykuskir upälla kayänanpaq makinwan sëñasta rurarqan. 34Alejandro Israel runa kanqanta musyarmi tsay runakuna ishkay höranö qayaykachar niyarqan: <<¡Diosnintsik Artemisa alabashqa katsun!>>
35Tsaynö niyaptinmi markachö mas mandakuq autoridä upälla kayänanpaq sëñasta rurar nirqan: <<¡Éfeso runakuna! Maytsaychömi runakuna musyayan Artemisapa templun kay markachö kanqanta. Tsaynöllam musyayan ciëlupita shikwamuq Artemisanö rumitapis katsinqantsikta. 36Tsaytaqa manam ni pipis nëgayta puëdintsu. Llutalla qayaraykachar cuidädu mana allikunata rurayankiman. 37Prësu apayämunqayki runakuna manam templuntsikpita ni imata apayashqatsu ni diosnintsik Artemisatapis manakaqman churayashqatsu. 38Tsaynö kaykaptinqa Demetrio y aruq majinkuna kay runakunata denunciayta munarqa autoridäkunaman quëjakuyätsun. 39Imapis willanakunapaq kaptinqa llapan autoridäkunawan qorikaskir sesionta rurashun. 40Kaynö büllata rurayaptikim Roma autoridäkuna contran shärinqantsikta yarpäyanqa. Tsaypita juzgamashqam ni ima niyta puëdishuntsu>>.
41Tsaynö niskirmi llapan runakuna aywakuyänanpaq nirqan.
Currently Selected:
Hechos 19: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
