Hechos 2

Espíritu Santu shamunqan

1 Pentecostés fiesta junaqmi Jesucristuman creyikuqkuna juk wajichö qorikashqa kaykäyarqan. 2Tsaychö kaykäyaptinmi illaqpita shukukuynöraq alläpa qayarar ciëlupita wiyakämurqan. 3Tsaynöllam qallu tamäñu ninanöraq juknin jukninman charqan. 4Llapanmi Espíritu Santupa poderninwan imaypis mana parlayanqan idiömakunata parlar qallaykuyarqan.

5Tsay witsaymi Dios munanqannö kawaq Israel runakuna maytsay nacionpita Jerusalénchö kaykäyarqan. 6Shukukuynö qayaraqta wiyarmi ima päsanqantapis rikaq aywayarqan. Juknin jukninpis markankunachö parlayanqan idiömakunata parlaykäyaqta wiyarmi mantsakashqa kayarqan. 7Tsaymi niyarqan: <<Kay llapan parlaqkunaqa ¿manaku Galilea runakuna kayan? 8Idiömantsikta parlayänanpaq ¿imanöpatan yachakuyashqa? 9Kaychöqa maytsaypitam kaykantsik: Partiapita, Mediapita, Elampita, Mesopotamiapita, Judeapita, Capadociapita, Pontupita, Asiapita, 10Frigiapita, Panfiliapita, Egiptupita, Libiachö kaq Cirenipa cercankunapita y Romapitapis. 11Wakintsikqa yurinqantsikpitam Israel runakuna kantsik. Y wakintsiknam Israel runana kanapaq Dios Yayata chaskishkantsik. Cretapita, Arabiapitam kaychö kaykantsik. Maytsaypita kaykarmi kikintsikpa idiömantsikchö wiyaykantsik Dios Yaya kushikuypaq ruranqankunata>>.

12Tsaymi mantsakar kikinkunapura ninakuyarqan: <<¿Imatan päsaykan?>>

13Wakinnam burlakur niyarqan: <<Kaykunaqa machashqam kaykäyan>>.

Pedro willakunqan

14Tsaynö parlayaptinmi apóstol majinkunawan ichirkur Pedro nirqan: <<Jerusalénchö y maytsaychö täkuq Israel runakuna, shumaq wiyayämay. 15Manam yarpäyanqaykinötsu machashqa kaykäyä. Alliq las nuëvillaraqqa manam ni pipis machantsu. 16Kanan rikaykäyanqayki päsananpaqmi profëta Joel willakur nirqan:

17<< <Dios Yayam nin:

Ultimu tiempuchömi Espïritüta llapan runakunaman kachamushaq.

Tsaymi ollqu tsurikikuna y warmi tsurikikunapis willakuynïta willakuyanqa.

Jövinkunapis revelaciontam rikäyanqa.

Awkinkunatapis sueñuyninkunachömi musyatsishaq.

18Tsay junaqkunam ollqu y warmi servimaqnïkunamanpis Espïritüta kachamuptï willakuynïta willakuyanqa.

19Imaypis mana rikäyanqaykikunatam ciëluchö y kay patsachö rikakätsimushaq.

Yawarta, ninata y qoshnitam rikäyanki.

20Rupaypis tutapanqam.

Killapis yawarmanmi tikranqa.

Tsaykunam kanqa juzganä junaq manaraq chämuptin.

Tsay junaqqa alläpa mantsakaypaqmi kanqa.

21Tsaynö kaptinpis noqaman mañakamuq kaqtam pïmaytapis salvashaq>.#Joel 2.28-32.

22<<Israel runakuna, shumaq wiyayämay. Musyayanqaykinömi Nazaretpita Jesústa Dios Yaya yanaparqan mana rikanqantsik milagrukunata noqantsik kaqchö rurananpaq. 23Tsaynö kaykaptinmi Jesústa prësu achkuskir Diosta mana cäsuq runakunaman entregayashkanki crucificar wañutsiyänanpaq.#Luc. 23.33; Juan 19.18. Tsaynö kananpaqmi unaypitana Dios Yaya nirqan.#Luc. 24.26. 24Wañuskatsiyaptin pamparanqallanchö ushakänanta mana munarmi Dios Yaya kawaskatsimushqa.#Mat. 28.5-6; Mar. 16.6; Luc. 24.5.

25<<Davidpis Jesucristupaqmi nirqan:

<< <Dios Yayatam imay hörapis yarparaykä.

Derëcha kaq lädüchö karmi imaypis yanapaman.

26Tsaymi shonqüpis alläpa kushikun.

Shimïpis paytam alaban.

Payman confiakurmi imaypis tranquïlu kawakü.

27Wañushqakuna pamparäyanqanchö manam dëjamankitsu.

Santu serviqniki kaptïmi sepultürachö cuerpü ismünantapis munankitsu.

28Munanqaykinö kawanäpaqmi alli nänipa pushamanki.

Puntaykichömi imaypis kushishqa kawakü>.#Sal. 16.8-11.

29<<Wawqikuna, musyantsikmi David wañunqanta y maychö pamparanqantapis. 30Profëta karmi David musyarqan castanpita [Cristo] yurinanpaq kanqanta. Tsaynöllam musyarqan paynö rey kananpaq Dios Yaya jurar prometinqanta.#2Sam. 7.12-13; Sal. 132.11. 31Tsaymi kikinpaq qellqanqanpa rantin tsay yuriq runapaq David qellqarqan. Paymi salvamaqnintsik Cristo. Cristo kawamunqanta rikaqnömi David qellqarqan pamparanqanchö Dios Yaya mana dëjananpaq y cuerpun mana ismünanpaq kanqanta.

32<<Tsaymi David qellqanqannölla Jesústa Dios Yaya kawaskatsimushqa. Kawamunqantam llapäkuna rikäyashkä. 33Paytam Dios Yaya derëcha kaq lädunman jamaykatsir prometinqan Espíritu Santuta entregashqa. Jesucristunam Espíritu Santuta noqakunaman kachamushqa. Tsaytam kanan wiyaykäyanki y rikaykäyanki.

34<<Davidqa manam kawamushqatsu ni ciëluman aywashqatsu. Tsaymi kikinpaq qellqananpa rantin jukpaq qellqar nirqan: <Mandamaqnïtam Dios Yaya nirqan: <<Derëcha kaq lädüman jamakamuy 35llapan chikishuqnikikunata podernikiman churamunqäyaq>> >.#Sal. 110.1.

36<<Israel runakuna, niyanqaqta shumaq tantiyayay. Jesústa cruzchö wañutsishqa kayaptikipis Dios Yayam payta churashqa Señornintsik y salvamaqnintsik Cristo kananpaq>>.

37Tsayta wiyaykurmi runakuna alläpa llakikur Pedruta y wakin apostolkunata tapuyarqan: <<Wawqikuna, ¿imatatan rurayäman?>>

38Pedrunam nirqan: <<Dios Yaya perdonayäshunaykipaq jutsaykikunapita arrepentikur Jesucristupa shutinchö bautizakuyay. Tsaynöpam Dios Yaya qarayäshunqayki Espíritu Santuta chaskiyanki. 39Diosnintsik prometinqan Espíritu Santum qamkunapaq, tsurikikunapaq y maytsaychö täkuyaptinpis qayanqan llapan runakunapaq kaykan>>.

40Tsaynö nirmi Pedro masta tantiyatsir nirqan: <<¡Jutsasapa runakunanö castigashqa kayänaykipaq kanqanpita salvakuyay!>>

41Pedro ninqanta creyikuqkunam kimsa waranqanö (3,000) kayarqan. Paykunam llapan bautizakuyarqan. 42Paykunam imaypis qorikäyaq apostolkuna yachatsiyanqankunata yachakuyänanpaq, animatsinakuyänanpaq, Santa Cënata mikuyänanpaq y Dios Yayata mañakuyänanpaq.

Creyikuqkuna yanapanakur kawakuyanqan

43Apostolkuna milagrukunata rurayanqanta rikarmi llapan creyikuqkuna mantsakäyarqan. 44Imaypis qorikarmi imaykankunatapis rakipunakur yanapanakuyaq.#Hech. 4.32-35. 45Tsaynöllam chakrankunata y imaykankunatapis rantikur wanayanqanman tsay qellayta aypunakuyaq. 46Waran waranmi templupa patiunman qorikäyaq. Tsaynöllam wajinkunachö qorikaykur tantata pakipunakur kushishqa paqta mikuyaq. Mayqanpis manam jaqayätsinakuyaqtsu. 47Paykunam imaypis Dios Yayata alabayaq. Llapan runakunam paykunata respitayaq. Wakin kaqtapis Señornintsik salvaptinmi waran waran mas atskayäyaq.

Currently Selected:

Hechos 2: qxn

Highlight

Copy