Génesis 15

Abramta Dios Yaya prometinqan

1Tsaypitanam Dios Yaya illaqpita revelarnin Abramta nirqan: <<Abram, ama mantsakaytsu. Noqam tsapäshuqniki escüdu kä. Qammanmi bendicionnïta churamushaq>>.

2Abramnam nirqan: <<Dios Yaya, tsurï mana kaykaptinqa ¿pïnïpaqtan llapan qaramanqaykipis kanqa? Wañukuptï llapan imaykäkunawanpis Damascupita servimaqnï Eliezerllapaqchi quëdanqa. 3Tsurinnaq kanäpaq destinaykämaptikiqa podernïchö yuriq servimaqllächi llapan imaykäwanpis quëdanqa>>.

4Tsaynö niptinnam Dios Yaya nirqan: <<Manam serviqnikitsu imaykaykiwanpis quëdanqa, sinöqa kikikipa tsurikim>>.

5Tsaypita Abramta waqtaman pushaykurmi Dios Yaya nirqan: <<Ciëluman rikay. ¿Qoyllurkunata yupayta puëdinkiku?>>

Tsaypitam yapay nirqan: <<Tsaynöllam qampita miraqkunapis yupayta mana puëdiypaq kayanqa>>.#Rom. 4.18; Heb. 11.12.

6Tsaynö ninqanta Abram creyiptinmi jutsannaqtana Dios Yaya chaskirqan.#Rom. 4.3, 9, 22; Gál. 3.6; Stg. 2.23. 7Tsaypitam Dios Yaya nirqan: <<Noqam Dios Yaya kä. Kay rikätsinqaq chakrakunata herenciayki entreganaqpaqmi caldeo runakuna täkuyanqan Ur markapita jipimurqaq>>.

8Tsaynam Abram tapurqan: <<Peru Dios Yaya, ¿imanötan musyashaq kay rikätsimanqaykikuna rasunpa noqapaq kanqanta?>>

9 Dios Yayanam nirqan: <<Kayman apamuy kimsa watayuqllaraq ternërata, cabrata y carnëruta. Tsaynölla apamuy juk kullkushtawan juk llullu palumata>>.

10Tsaymi Abramqa tsay mañanqan wätakunata apar pullanpa cuartizaskir ishkan läduman churarqan.#Jer. 34.18-19. Peru palumatawan kullkushtam sïqa cuartizarqantsu. 11Tsay churanqan aytsaman wiskulkuna shayämuptinmi Abram wajakurqan. 12Patsa qoyaykaptinnam#15.12 Wakin runakunaqa patsa tsakaykaptinnam niyan. Abram wañuypa puñukaskirqan. Puñukashqa kaykarmi mantsaypaq tutapaynö tsapaqta sueñurqan.

13Tsaynam Dios Yaya nirqan: <<Qampita miraq aylluykikunam chusku pachak (400) wata juk markachö juklä runakunapa serviqnin kar ñakayanqa.#Éxo. 1.1-14; Hech. 7.6. 14Tsaynö kaptinpis tsay marka runakunatam castigashaq. Tsaypitanam qampita miraqkunata imaykayuqta jipimushaq.#Éxo. 12.36; Hech. 7.7. 15Tsaykuna manaraq päsaptinmi qamqa awkinyäkur alli wañuypa wañukur unay kaq aylluykikunawan tinkuq aywakunki. 16Chusku pachak wata päsaskiptinraqmi qampita miraq aylluykikuna kay täkunqaykiman kutiyämunqa. Kutiyämunanpaqqa kaychö täkuq amorreo runakunapa jutsankuna alläpa juntanam kanqa>>.

17Patsa tutapaskiptinnam shanshayuq kanalla qoshnirraq y qeru puntanchö lunyarraq nina yuriskir churanqan aytsakuna chawpinpa päsarqan.#15.17 Tsay witsay runakunapa costumbrinkunam kaynö karqan: Ima änikunqantapis cumplinanpaqmi wätakunata pullanpa cuartizaskir ishkan läduman churayaq. Tsaypitanam aytsakuna churayanqan pullanpa päsar niyaq: <<Änikunqäta mana cumpliptïqa noqatapis ishkayman roquyämätsun>>. Tsaymi shanshayuq kanalla qoshnirraq y qeru puntanchö lunyarraq nina aytsakuna chawpinpa päsaykaqta rikar Abram tantiyarqan roqunqan wätakunapa pullanpa kikin Dios Yaya päsaykanqanta. Tsaynömi Abramta Dios Yaya tantiyatsirqan äninqanta cumplinanpaq. 18Tsay junaqmi Abramwan pactuta rurar Dios Yaya nirqan: <<Kay täkunqayki partitam qampita miraq aylluykikunata entregashaq Egipto mayupita hasta Éufrates jatun mayuyaq.#Hech. 7.5. 19Tsaynö entregashayki ceneo runakuna, cenezeo runakuna, cadmoneo runakuna, 20heteo runakuna, ferezeo runakuna, refaíta runakuna, 21amorreo runakuna, cananeo runakuna, gergeseo runakuna y jebuseo runakunapis täkuyanqantam>>.

Currently Selected:

Génesis 15: qxn

Highlight

Copy