Génesis 34

Dinata apaykachanqan

1Leapa wawanmi Dina karqan. Paymi tsay läduchö täkuq yanasakuna watukaq aywarqan. 2Siquemmi heveo runa Hamorpa tsurin karqan. Hamorqa tsaychö täkuq runakunapa autoridäninmi karqan. Dinata rikaykurmi Siquem alläpa munaparnin achkuskir apaykacharqan. 3Tsaypitam Dina kuyananpaq Siquemqa imaykanöpapis shonqunman yaykuyta munarqan. 4Tsaymi Siquem taytan Hamorta nirqan: <<Taytay, tsay jipashta ashipaykallämay>>.

5Jacobmi musyarqan tsurin Dinata Siquem apaykachanqanta. Tsaynö musyaykarpis tsurinkuna wätankunawan jallqachö kayaptinmi paykuna kutiyämunqanyaq upällalla kakurqan. 6Tsayyaqmi Siquempa taytan Hamor aywarqan Jacobwan parlananpaq. 7Jacobpa tsurinkuna jallqapita kutiskamurmi paninkunata Siquem apaykachanqanta musyaykur alläpa rabyakuyarqan. Tsaynö apaykachanqan alläpa penqakuypaqmi karqan. Tsaytaqa manam ni imaypis ruranmantsu karqan.

8Tsaymi paykunawan parlar Hamor nirqan: <<Tsurï Siquemmi panikikunapaq alläpa löcuyashqa puriykan. Tsaymi shamushkä tsurïwan panikikunata churaykunapaq. 9Tsaynöpam compädrita rurar juk ayllunölla kashun. Tsaymi tsurïkunapis warmi tsurikikunawan churakäyanqa y qamkunapapis noqakunapawan churakäyanqa. 10Tsaynöpam kayllachöna täkushun. Täkuyänaykipaq maylätapis munanqaykita akrakuyay. Tsaynölla ima negociutapis rurarnin chakraykikuna rantiyay>>.

11Tsaynöllam Siquempis Dinapa taytantawan turinkunata nirqan: <<Taytakuna, panikikunata äniykayällämay. Äniyämaptikiqa imayka munayanqaykitam qarayäshayki. 12Panikikunata äniyämaptikiqa costumbrintsikpita masta mañayämaptikipis pägayäshaykim. Imaykanöpis panikikunata äniykayällämay>>.

13Tsaynö niptinmi paninkunata apaykachanqanpita Jacobpa tsurinkuna alläpa rabyashqa kar Siquemtawan taytan Hamorta äniq tukuyarqan. 14Tsaymi niyarqan: <<Noqakunaqa manam panïkunata änikuyämantsu señalakunni runataqa. Señalakunni runa mashäkuna karqa penqakuypaqmi kanqa. 15Peru noqakuna señalakuyanqänö qamkunapis llapan ollqu kaqkuna señalakuyaptikiqa panïkunatam äniyäshayki. 16Señalakuyaptikiqa tsurikikunatapis warmi tsurïkunawanmi churashun. Tsaynöllam warmi tsurikikunawanpis tsurïkuna churakäyanqa. Tsaynöpam llapantsikpis tsay ayllunölla kashun. 17Niyanqaqnö mana señalakuyaptikiqa panïkunata pushakurkurmi aywakuyäshaq>>.

18Tsaynö niyaptinmi Hamorwan tsurin Siquem paykuna niyanqannö señalakuyänanpaq äniyarqan. 19Tsaypita aywarmi Dinata kuyarnin Siquem sas señalakurqan. Paymi karqan taytanpa ayllunchö mas respitädu jöven. 20Tsaypitam taytan Hamorwan marka yaykuna punkuman aywayarqan. Tsaychömi runakunata niyarqan: 21<<Jacobpa ayllun runakunam alli runa kayan. Paykuna täkuyänanpaq chakrantsikkunapis atskam. Tsaynö kaykaptinqa kaychö täkur ima negociutapis rurayätsun. Tsaymi warmi tsurinkunawan tsurintsikkuna churakäyanqa y warmi tsurintsikkunapis tsurinkunawan churakäyanqa. 22Peru tsay ayllunölla kanapaqmi paykuna munayan señalakushqa kayanqannö noqantsikpis llapantsik ollqu kaqkuna señalakunata. 23Paykuna niyanqanta änishqaqam noqantsikwan quëdayanqa. Tsaynöpam llapan imaykankunawan wätankunapis noqantsikpana kanqa>>.

24Tsaynö niptinmi tsaychö qorikaq runakunapis äniyarqan Hamorwan Siquem niyanqanta. Tsaymi llapan ollqukuna cuerpunkunachö señalakuyarqan.

25Tsaypita kimsa junaqtam Dinapa turinkuna Simeónwan Leví tsay markaman yaykuyarqan. Cuerpunkunachö señalakuyanqanpita nanakurnin valorninnaq kaykäyaqtam espädawan llapanta wañutsiyarqan. 26Tsaynöllam Hamortawan tsurin Siquemtapis espädawan wañuskatsirnin Siquempa wajinpita Dinata pusharkur aywakuyarqan.

27Tsaypitam Jacobpa wakin kaq tsurinkuna markaman yaykur llapan runakuna wañushqa jitarparaykäyaqta tariyarqan. Paninta apaykachanqanpita rabyashqa karmi tsay markachö tariyanqan kaqtaqa llapan imaykatapis apayarqan. 28Tsaynöllam apayarqan üshakunata, cabrakunata, wäkakunata, ashnukunata y imaykatapis markachö y chakrachö tariyanqan kaqtaqa. 29Wajikunachö llapan imayka tariyanqanta aparmi wamrakunatawan warmikunatapis prësu apayarqan.

30Tsaynö rurayanqanta musyaykurmi Simeóntawan Levíta Jacob nirqan: <<¿Imaykamantan jitarpayämaruyki? Wañutsiyanqaykita musyaskirmi cananeo runakunawan ferezeo runakuna alläpa chikimäshun. Paykunam willanakuykur shamur llapantsikta wañutsimäshun. Serviqnintsik runakunapis wallkaqlla kaykaptinqa ¿imanötan pärapushun?>>

31Paykunam niyarqan: <<Tsaypunqa ¿jinach prostitüta warmitanöpis panïkunata apaykachäkunman karqan?>>

Currently Selected:

Génesis 34: qxn

Highlight

Copy