Génesis 37

1Taytan täkunqan Canaánllachömi Jacob täkurqan.

José sueñunqankuna

2Kaychömi qellqashqa kaykan Jacobpaq y tsurinkunapaqpis. Chunka qanchis watayuq kaykarmi José taytanpa üshankunatawan cabrankunata mitsikurqan Bilhapa y Zilpapa wawan kaq wawqinkunawan. Bilhawan Zilpaqa taytanpa wätaynin kaq warminkunam kayarqan. Josémi taytanta imaypis willaq wawqinkuna mana allikunata rurayanqanta.

3Awkinna kaykaptin tsurin José yurishqa kaptinmi Israelqa#37.3 Israelqa Jacobpa jukaq shutinmi karqan. wakin kaq tsurinkunapitapis payta mas kuyarqan. Tsaymi kuyakuypaq shumaq tünican ruraparqan. 4Joséta taytan mas kuyaptinmi wawqinkuna chikirnin rabyashqalla parlapäyaqpis.

5Juk kutinam sueñunqanta José willarqan wawqinkunata. Tsaymi wawqinkuna masraq chikiyarqan. 6Willarmi nirqan: <<Sueñunqäta willayäshayki. 7Chakrachö trïguta wataykanqantsiktam rikashkä. Wataykanqä tersum kikillan ichirkushqa. Qamkunapa tersuykikunanam ichiraykaq tersüman entërunpa tumat witiykur imayka adoraqnö umpuraykäyashqa>>.

8Tsaynö sueñunqanta willaptinmi wawqinkuna masraq chikir niyarqan: <<Tsaynöqa ¿mandayämaq rey kaytaku yarpaykanki? ¿Mandäduykichö katsiyämänaykipaqku yarpaykanki?>>

9Tsaypita sueñunqanta yapay wawqinkunata willarmi José nirqan: <<Sueñuynïchömi rikashkä rupaywan killa y chunka juk qoyllurkuna adorayämaqta>>.

10Tsay sueñunqanta taytantawan wawqinkunata willaptinmi taytan piñapar nirqan: <<¿Imata yarpartan tsaykunata sueñunki? ¿Mamaykiwan noqapis y wawqikikunapis qamman qonqurpakayämunätaku yarpanki?>>

11Tsaynö willaptinmi wawqinkunaqa masraq chikiyarqan.#Hech. 7.9. Taytannam yarpachakur nirqan: <<¿Imapaqraq tsaynö tsurï sueñushqa?>>

Joséta wawqinkuna rantikuyanqan

12Juk kutim Josépa wawqinkuna Siquem partiman aywayarqan taytanpa üshankunata y cabrankunata mitsiyänanpaq. 13Tsaymi Joséta taytan Israel nirqan: <<Siquemchömi wawqikikuna üshantsikkunata mitsiykäyan. Imanö kaykäyanqanta musyanäpaq ayway watukamuy>>.

Tsaynö niptinmi José nirqan: <<Taytay, aywä>>.

14Tsaymi taytan nirqan: <<Wawqikikuna y wätantsikkuna imanö kaykäyanqanta shumaq rikapakaskamur saslla kutimunki willamänaykipaq>>.

Tsaynö nirmi Hebrón pampapita Siquemyaq Joséta Israel mandarqan. 15Tsaymi Siquem partiman chaykur wawqinkunata ashir oqrakashqa purirqan. Tsaynö puriykaptinmi juk runa Joséwan tinkuskir tapurqan: <<¿Imatatan ashinki?>>

16Josénam nirqan: <<Wawqïkunatam ashiykä. ¿Manaku rikällashkanki mayllachöpis mitsikuykäyaqta?>>

17Tsaynam nirqan: <<Paykunaqa kaypitam aywakuyashqana. <Dotán lädupa aywakushun> nir willanakuqtam wiyarqä>>.

Tsaymi José Dotánpa aywar wawqinkunata tarirqan.

18Joséta karuman rikaskirmi wañutsiyänanpaq wawqinkuna willanakuyarqan. 19Tsaymi ninakuyarqan: <<¡Taqaytam sueñuy yachaq chölu shamuykan! 20Juklla wañuskatsirnin pipis mana tarinanpaq pözuman jitarpushun. Taytantsiktam nishun: <Josétam chucaru wätakuna mikuyashqa> nir. Tsaynö ruraskishqa sueñunqannökush mä kanqa>>.

21Tsaynö willanakuyaptinmi wawqin Rubén imaykanöpa salvayta munar nirqan: <<Ama wañutsishuntsu. 22Wawqintsikpa yawarninta jichanqantsikpa rantin tsunyachö pözullaman jitarpushun. Ama kikintsikqa wañutsishuntsu>>.

Rubénmi tsaynö nirqan Joséta imaykanöpis kawaykaqta taytanman kutitsiyta munar.

23Wawqinkunaman José chaykuptinmi kuyakuypaq shumaq tünicanta llushtiskatsirnin 24tsaki pözuman jitarpuyarqan. 25Tsaypita mikuyänanpaq jamaykurnam rikaskiyarqan atskaq ismaelitakuna shamuykäyaqta. Tsay runakunam camëllunkunawan apayarqan Galaadpita perfümikunata, balsamuta y mïrrata Egiptuchö rantikuyänanpaq.

26Tsaymi wawqinkunata Judá nirqan: <<Wawqintsikta wañuskatsir mana musyaq tukunqantsikwan ¿imatatan jipishun? 27Wañutsinqantsikpa rantinqa taqay ismaelita negociantikunata rantikuskishun. Payqa wawqintsik karmi yawarnintsik>>.

Tsaynam wawqinkuna niyarqan: <<Allim kanqa>>.

28Madiánpita ismaelita negociantikuna päsaqkunatam pözupita Joséta jipiskamur ishkay chunka (20) siclo#37.28 Juk siclo qellayqa juk killa arur gänanqannömi karqan. qellaychö rantikuyarqan.#Hech. 7.9. Tsaynöpam Joséta Egiptuman apayarqan.

29Pözuman Rubén aywar Joséta mana tarirmi alläpa llakikurnin llatapantapis rachirqanraq. 30Tsaymi wawqinkunaman aywaykur nirqan: <<¡Pözuman jitarpunqantsik chölu manam kannatsu! Kananqa ¿imatatan rurashaq?>>

31Tsaymi cabrata pishtaskirnin Josépa tünicanta yawarwan pichurkur 32taytanman apatsiyarqan. Túnica apaqtam kaynö ninanpaq yachatsiyarqan: <<Tsunya jirkachömi kay tünicata tariyashkä. Taytay, tsurikipa tünican kanqanta o mana kanqantapis reqiykullay>>.

33Chaykur rikätsiptinmi tsurinpa tünicanta reqiskir Jacob nirqan: <<¡Kayqa tsurïpa tünicanmi! ¡Chucaru wätakunach Josétaqa mikuyashqa!>>

34Tsaymi llakikur llatapantapis rachiskirnin lütu llatapata shukukurqan. Tsurin wañukunqanta mana qonqarmi waqar purirqan. 35Tsurinkuna warmipis ollqupis shoqayaptinmi masraq qayaraykachar nirqan: <<Wañukur paywan tinkunqäyaqmi tsurïta lütushaq>>.

36Madianita negociantikuna Egiptuman Joséta chaykatsirmi Faraónpa wardiankunapa capitannin Potifarman rantikuyarqan.

Currently Selected:

Génesis 37: qxn

Highlight

Copy