Juan 12

Jesúspa chakinman perfümita María wiñanqan

Mateo 26.6-13; Marcos 14.3-9

1 Pascua fiestapaq soqta junaqllana faltaykaptinmi Betania markaman Jesús aywarqan. Tsaychömi wañunqanpita kawamuq Lázaro täkurqan. 2Jesús chaykuptinmi kushikurnin meriendata kusinayarqan. Wakin runakunawan mësaman Jesús jamaykuptinmi Lázarupis mikunanpaq jamarqan. Paykunatam Marta qararqan.

3Tsaychö mikuykäyaptinmi nardupita rurashqa alläpa chaniyuq perfümita mediu litrutanö María apamurqan. Tsay perfümitam Jesúspa chakinman wiñarkur aqtsanwan tsakitsirqan.#12.3 Tsay witsaymi runakuna patsaman kinkishyaykur mikuyaq. Tsaynö mikuyaptinmi Jesúspa chakinta María aqtsanwan tsakitsirqan.#Luc. 7.37-38. Tsay perfümim waji junta mushkurqan. 4Tsaymi Jesústa rantikunanpaq kaq discïpulun Judas Iscariote nirqan: 5<<¿Imapaqtan tsay perfümita perditsin? Tsaypa rantinqa juk wata arupukur gänanqantsikchömi#12.5 Griëguchömi nin kimsa pachak (300) denariuchö rantikunanpaq kanqanta. Juk denariuqa juk junaq aruypa chaninmi karqan. rantikushwan karqan. Tsay qellaywannam waktsakunata yanapashwan karqan>>.

6Tsaynö nirqan manam waktsakunata yanapayta munartsu, sinöqa suwanan raykum. Qoriyanqan qellayta katsirmi wallka wallkalla suwakuq.

7Jesúsnam nirqan: <<Tsay perfümitam churarätsishqa pampayämänan junaqpaq. Tsaynö kaykaptinqa ama imatapis niytsu. 8Waktsakunaqa qamkunawanmi imaypis kaykäyanqa.#Deut. 15.11. Peru noqam sïqa qamkunawan kashaqnatsu>>.

Lázaruta wañutsiyta munayanqan

9Betania markachö Jesús kaykanqanta musyaskirmi atskaq runakuna aywayarqan. Manam Jesústa rikaqllatsu aywayarqan, sinöqa kawamuq Lázaruta rikaqnömi. 10Tsaymi mandakuq sacerdötikuna Lázarutapis wañutsiyta munayarqan. 11Mandakuq sacerdötikunata cäsuyanqanpa rantinmi Lázaruta kawatsimunqanpita atskaq runakuna Jesúsmanna creyiyarqan.

Jerusalénman Jesús yaykunqan

Mateo 21.1-11; Marcos 11.1-11; Lucas 19.28-40

12Waränin junaqmi fiestaman aywaq atskaq runakuna musyayarqan Jerusalénman Jesús yaykuykanqanta. 13Tsaymi palmakunapa rämankunata aparkur Jesústa chaskiyänanpaq aywayarqan. Jesúswan tinkuskirnam qayaykachar niyarqan: <<¡Hosana!#12.13 Israel runakunam Hosana niyarqan Dios Yayata alabar. ¡Dios Yayapa shutinchö shamuq runa alabashqa kaykullätsun! ¡Qammi Israel runakunapa mandakuqnin rey kanki!>>#Sal. 118.25-26.

14Jerusalénmanmi Jesús yaykurqan mallwa ashnun montashqa. Tsaynö yaykunanpaqmi Dios Yayapa palabran nin:

15<<Sión runakuna, ama mantsakäyaytsu.

Rikäyay mandaqniki rey mallwa ashnun montashqa shamuykaqta>>.#Zac. 9.9.

16Tsay höraqa Jerusalénman imanir ashnun montashqa yaykunqanta discïpulunkuna manam tantiyayarqantsu. Peru wañunqanpita kawaskamuptinraqmi Jesús ruranqankuna Dios Yayapa palabranchö ninqanta tantiyayarqan.

17Lázaruta Jesús kawatsimunqanta rikaq runakuna maytsaychö willakuyaptinmi 18Jesústa chaskiq maytsikaq aywayarqan. 19Tsayta rikarmi fariseukuna niyarqan: <<Kananqa ¿imatatan rurashun? ¡Llapan runakunam payta qatiräyan!>>

Mana Israel kaqkuna Jesústa ashiyanqan

20 Pascuachö Dios Yayata adorayänanpaqmi mana Israel kaqkunapis Jerusalénchö kaykäyarqan. 21Paykunapita wakinmi Felipiman aywaykur rugakuyarqan: <<Taytay, Jesústa reqiykatsiyällämay>>.

Felipiqa Galileachö Betsaida markapitam karqan.

22Felipinam Andrésta willarqan. Tsaypitanam ishkan aywar Jesústa willayarqan: <<Taytay, runakunam reqishuynikita munaykäyan>>. 23Jesúsnam nirqan: <<Runapa Tsurin glorificashqa kananpaq höra chämushqanam.#12.23 Glorificashqa kananpaq kanqanta nirqa Jesucristo wañunanpaq, kawamunanpaq, Dios Yayaman kutikunanpaq y llapanpaqpis poderyuq kananpaq kanqantam nirqan. 24Rasun kaqtam niyaq: Trïguta mururnin mana pampashqaqa manam jeqamuntsu. Peru pampashqam sïqa jeqamur alli wayun.#Mat. 10.38; 16.24; Mar. 8.34; Luc. 9.23. 25Kawayninta salvayta munaqkunam kawayninta oqrayanqa. Kawayninta kay patsachö oqraqkunam sïqa kawayninta salvar mana ushakaq kawayta tariyanqa.#12.25 Tsaynö nirmi Jesucristo nirqan: <<Kikin munanqannö mana alli kawaqkunaqa manam salvakuyanqatsu. Noqa munanqänö kawaqkunam sïqa salvakuyanqa>>.#Mat. 10.39; 16.25; Mar. 8.35; Luc. 9.24; 17.33. 26Pipis servimayta munaq kaqqa qatirämätsun. Qatirämarqa noqa kaykanqächömi kanqa. Servimaq kaqtaqa Taytäpis kuyanqam.

Wañunanpaq kanqanta Jesús willakunqan

27<<Alläpa llakikuymi tsariman. Tsaynö llakikurpis manam Taytäta mañakümantsu wañuypita salvamänanpaq. Wañunäpaqmi kay patsaman shamushkä>>.

28Tsaynö nirmi Dios Yayata mañakurqan: <<Taytay, poderyuq kanqaykita musyayänanpaq qam munanqaykinö kaykullätsun>>.

Tsaymi ciëlupita Dios Yaya nimurqan: <<Poderyuq kanqäta musyatsinqänömi yapay musyatsikushaq>>.

29Tsayta wiyarmi tsaychö kaykaq runakuna niyarqan: <<¡Maqakuymi!>>

Wakin kaqnam niyarqan: <<¡Angelmi parlamushqa!>>

30Jesúsnam nirqan: <<Parlamuqta wiyayanqaykiqa manam noqapaqtsu, sinöqa Dios Yaya kachamanqanta tantiyayänaykipaqmi. 31Runakunata juzgananpaq höram chaykämunna.#Juan 3.18-19; 9.39. Tsaynöllam kay patsapa mandakuqnin#12.31 Kay patsapa mandakuqninpaq parlarqa Satanáspaqmi Jesús parlarqan. qarqushqa kananpaq höran chaykämunna.#Juan 16.11; Col. 2.15. 32Kay patsapita pallariyämaptinmi#12.32 Tsaynö nirmi Jesús iwalatsikuypa nirqan cruzman clävayänanpaq kanqanta y kay patsapita Dios Yaya pushakunanpaq kanqanta.#Juan 3.14; 8.28. maytsay nación runakunata noqaman creyikayämunanpaq qorishaq>>.

33Tsaynömi Jesús tantiyatsirqan imanöpa wañunanpaq kanqanta.

34Runakunanam niyarqan: <<Dios Yayapa palabranchömi nin salvamaqnintsik Cristo imayyaqpis kawananpaq kanqanta.#Sal. 110.4; Isa. 9.7; Eze. 37.25; Dan. 7.14. Tsaynö kaykaptinqa ¿imanirtan ninki Runapa Tsurin wañunanpaq kanqanta? Tsaypunqa ¿pitan tsay Runapa Tsurin?>>

35Jesúsnam nirqan: <<Wallka junaqllanam qamkunawan aktsi kanqa. Manaraq tutapäpukur aktsi kanqanyaq puriyay. Tutapaypa purirqa maypa aywayanqaykitapis manam tantiyayankitsu.#12.35 Tsaynömi Jesús parlarqan kikinta aktsiman iwalatsikur. Tsaymi tutapaychönö kawaqkuna Jesúsman mana creyikuqkuna kayan.#Sal. 27.1; 119.105; Prov. 6.23; Isa. 49.6; Juan 9.5. 36Tsaynö kaykaptinqa qamkunawan aktsi kanqanyaq aktsiman creyiyay. Tsaynöpam qamkunapis aktsinö kayanki>>.

Tsaynö niskir pakayllapa aywakuptinmi rikäyarqannatsu.

Runakuna Jesúsman mana creyiyanqan

37Atska milagrukuna ruranqanta rikaykarpis Jesúsman manam creyiyarqantsu. 38Tsaynö mana creyiyänanpaq kanqantam profëta Isaías nirqan:

<<Dios Yaya, willakuyanqäta ¿piraq creyishqa?

Salvakuq kanqaykita musyatsikuptikipis ¿piraq tantiyashqa?>>#Isa. 53.1.

39Tsay ninqannöllam Jesúsmanpis creyiyarqantsu. Mastam Dios Yaya ninqanta Isaías nirqan:

40<<Tsay runakunapa ñawinkunatam qaprayätsishqa.#12.40a Ñawinkunatam qaprayätsishqa ninanqa yarpayninkunatam pantatsishqa ninanmi.

Paykunapa shonqunkunatam chukruyätsishqa.

Tsaynöpam mana rikar y mana tantiyar arrepentikuyanqatsu.

Tsaynö kayaptinmi noqapis kutikätsishaqtsu>>.#12.40b Manam qeshyayllapita kutikätsinanpaqtsu nin, sinöqa ñakaykunapita, llakikuykunapita y jutsa ruraykunapita salvananpaqmi nin.#Isa. 6.10.

41Isaíasmi Jesucristupaq tsaynö qellqarqan gloriachö poderyuq kaykaqta rikar.#Isa. 6.1-4.

42Jesúsman wakin runakuna mana creyiyaptinpis atskaqmi payman creyikuyarqan. Wakin kaq Israel autoridäkunapis paymanmi creyiyarqan. Peru tsaynö creyirpis sinagögapita fariseukuna qarquyänanta mantsakurmi willakuyarqantsu. 43Dios Yayapita alli rikashqa kayanqanpa rantinmi paykunaqa runakunallapita alli rikashqa kayta munayarqan.

Jesúsman creyiqkuna Dios Yayamanpis creyiyanqan

44Tsaypitanam jinchi Jesús nirqan: <<Noqaman creyikuq kaqqa kachamaqnïmanpis creyiyanmi. 45Tsaynöllam noqata reqimaq kaqqa kachamaqnïtapis reqiyan. 46Noqam aktsi kä.#12.46 <<Aktsim kä>> nirqa runakunata salvaq kanqanta y Dios munanqannö kawananpaq tantiyatsikuq kanqantam Jesús nirqan.#Sal. 27.1; 119.105; Prov. 6.23; Isa. 49.6; Juan 9.5. Kay patsamanmi shamushkä noqaman creyikuqkuna manana tutapaychönö kawayänanpaq.

47<<Manam runakunata condenaqtsu kay patsaman shamushkä, sinöqa salvanäpaqmi. Tsaymi ninqäkunata musyaykar mana cäsukuqkunata noqatsu condenashaq, 48sinöqa willakuynïkunam día del juiciuchö condenanqa. 49Noqaqa manam kikïpa yarpaylläpitatsu willakü, sinöqa kachamaqnï Taytä nimanqanllatam. 50Pay nimanqankunata cäsuqkunaqa mana ushakaq kawaytam tariyanqa. Tsaymi Taytä nimanqannölla llapantapis willakuykä>>.

Currently Selected:

Juan 12: qxn

Highlight

Copy