Juan 16

1<<Noqaman imaypis creyikayämunaykipaqmi kay llapanta willayaq. 2Sinagögapitam qarquyäshunki. Tsaynöllam Dios Yaya munanqannö ruraykäyanqanta yarpar wañutsiyäshunki. 3Tsaynömi rurayäshunki noqata mana reqimar ni Taytätapis mana reqir. 4Qamkunatam willayaq ninqäkuna päsayäshuptiki llapan cumplinqanta musyayänaykipaq. Manaraqmi willayashkaqraqtsu tsaynö päsayäshunaykipaq kanqanta. Peru aywakunäpaqna karmi willayaq.

Espíritu Santu shamunanpaq Jesús ninqan

5<<Kananqa kachamaqnï kaqpa kutikunäpaqnam kaykä. Tsaynö kaptinpis maypa aywanqäta manam ni mayqaykipis tapuyämankitsu. 6Tapuyämanqaykipa rantinmi tsaykunata niyanqaqpita llakishqa kaykäyanki. 7Rasun kaqtam niyaq: Qamkunapaqmi mas alli noqa aywakuptï. Mana aywakuptïqa Yanapakuq Espíritu Santu#Juan 14.16; 15.26. manam shamunqatsu. Peru aywakurmi sïqa payta kachamushaq.

8<<Espíritu Santu shamurnam runakunata tantiyatsinqa jutsayuq kayanqanta, Dios Yaya munanqannö kawayänanpaq kanqanta y juzgashqa kayänanpaq kanqanta. 9Noqata mana chaskiyämaptinmi jutsayuq kayanqanta tantiyatsinqa. 10Taytä kaqman kutikuptïmi Dios Yaya munanqannö kawayänanpaq kanqanta tantiyatsinqa. Kutikuptïqa mananam rikäyämankinatsu. 11Kay patsapa mandakuqnin#16.11 Kay patsapa mandakuqninpaq parlarqa Satanáspaqmi Jesús parlarqan. vencishqana kaptinmi juzgashqa kayänanpaq kanqanta tantiyatsinqa.

12<<Mas atskaraqmi yachatsiyänaqpaq kan. Llapanta yachatsiyaptiqqa manam tantiyayämankitsu. 13Peru rasun kaqta tantiyatsikuq Espíritu Santu shamurmi sïqa Diospa willakuyninta llapanta tantiyatsiyäshunki. Payqa manam kikinpa yarpayllanpitatsu tantiyatsiyäshunki, sinöqa ninqäkunallatam. Tsaynöllam ima päsananpaq kaqkunatapis tantiyatsiyäshunki. 14Noqa ninqäkunata tantiyatsiyäshunki noqata alabayämänaykipaq. 15Taytä ninqankunaqa noqa ninqäkunam kayan. Tsaymi Espíritu Santu ninqäkunata tantiyatsiyäshunaykipaq niyashkaq.

Llakikuyanqanpita kushikuyänanpaq Jesús ninqan

16<<Manana rikäyämänaykipaqmi pöcullana faltan. Tsaypita pöcu tiempullatanam yapay rikäyämanki>>.

17Tsaynö niptinmi discïpulunkuna juknin juknin ninakuyarqan: <<Tsaynö ¿ima ninantatan nimantsik? ¿Imanirtan: <Manana rikäyämänaykipaqmi pöcullana faltan> nimantsik? ¿Imanirtan: <Tsaypita pöcu tiempullatanam yapay rikäyämanki> nimantsik? Tsaynölla ¿imanirtan Taytan kaqpa aywakunanpaq kanqanta nimantsik? 18<Pöcullanam faltan> ninqanqa ¿ima ninantan? Manam imapaq parlanqantapis tantiyantsiktsu>>.

19Discïpulunkuna tapuyta munayanqanta musyarmi Jesús nirqan: <<¿<Manana rikäyämänaykipaq pöcullanam faltan> y <tsaypita pöcu tiempullatanam yapay rikäyämanki> niyanqaqpitaku yarpachakuykäyanki? 20Rasun kaqtam niyaq: Aywakuptïmi Diosta mana cäsuq runakuna kushikuyanqa. Peru qamkunam sïqa llakikur waqayanki. Tsaynö llakikurpis tsaypitaraqmi kushikuyanki. 21Warmikuna qeshyakuyänanpaq nanakur waqarpis yuripukuskirqa kushikurmi ñakayanqanta yarpäyannatsu. 22Tsaynöllam qamkunapis kanan llakikurpis yapay tinkuskishqa kushikuyanki. Tsay kushikuytaqa manam pipis qechuyäshunkitsu. 23Yapay tinkushqaqa mananam imatapis tapuyämankinatsu.

<<Rasun kaqtam niyaq: Shutïchö imatapis mañakuyanqaykitam Taytä qarayäshunki. 24Noqapa shutïchö manam Taytäta imatapis mañakuyankiraqtsu. Kananpitaqa shutïchö mañakuyay. Mañakurqa chaskiyankim. Tsaynöpam alläpa kushikuyanki.#Mat. 7.7-11; Stg. 1.5-6.

25<<Kananyaqmi iwalatsikuypa yachatsiyashkaq. Peru tsaypitam sïqa mana iwalatsikuypana Dios Yayapa willakuyninta yachatsiyäshayki. 26Tsay witsayqa manam noqanatsu qamkunapaq Taytäta mañakushaq, sinöqa kikikikunam shutïchö mañakuyanki. 27Tsaynömi mañakuyanki Taytä kuyayäshuptiki. Paymi kuyayäshunki paypita shamunqäta creyir kuyayämaptiki. 28Taytä kaqpita kay patsaman shamushqa karmi Taytä kaqman kutikushaq>>.

29Tsaymi discïpulunkuna niyarqan: <<¡Kananmi sïqa niyämanqaykita tantiyayä! ¡Mana iwalatsikuypanam parlapaykäyämanki! 30Kananqa llapanta musyanqaykitam tantiyayashkä. Tsaymi yachayyuq kanqaykita pipis tapushunkinatsu. Kananmi sïqa Dios Yayapita shamunqaykita creyiyä>>.

31Jesúsnam nirqan: <<¿Kananqa creyiyankiku? 32Pöcu tiempullatanam japalläta dëjaskayämar wakpa kaypa witsikar aywakuyanki. Tsaynö aywakuyaptikipis manam japallätsu kashaq, sinöqa Taytämi noqawan kaykanqa.

33<<Llapan kaykunatam willayashkaq noqaman creyikamur alli kawayänaykipaq. Kay patsachö kawakuyanqaykiyaqqa sufriyankiraqmi. Peru tsaynö sufrirpis valorakuyay. Noqam kay patsachö llapan mana allikunata vencishkä>>.#Rom. 8.37; 2Cor. 2.14; 1Juan 5.4-5; Apoc. 3.21; 5.5.

Currently Selected:

Juan 16: qxn

Highlight

Copy